29 C
Phnom Penh

អង្គការ​ចលនា​មាតា​ធម្មជាតិ​អំពាវនាវ​ឱ្យ​ពលរដ្ឋ​តាមដាន​ករណី​សង់​រីស៊ត​រំលោភ​ចូល​ដី​ស្ទឹង​សង្កែ​របស់​ឧកញ៉ា ទុយ គី

ដោយ ឌឹ ខេមបូឌា ដេលី

បទវិភាគ

អង្គការ​ចលនា​មាតា​ធម្មជាតិ អំពាវនាវ​ឱ្យ​ពលរដ្ឋ​តាមដាន​ករណី​សាងសង់​សំណង់​រឹង​រំលោភ​ចូល​ស្ទឹង​សង្កែ ដែល​ជា​គម្រោង​រីស៊ត​ឯកជន​របស់​ឧកញ៉ា ទុយ គី ដោយ​មាន​ការ​ការពារ​ពី​ស្នងការ​ខេត្ត​បាត់ដំបង លោក មៀន ឡាយ យ៉ាង​ហ្មត់ចត់​ថែម​ទៀត។

អង្គការ​ចលនា​មាតា​ធម្មជាតិ​កម្ពុជា បាន​សរសេរ​លើ​ទំព័រ​ហ្វេសប៊ុក​របស់​ខ្លួន​ដោយ​ភ្ជាប់​រូបថត​ជាច្រើន​សន្លឹក​ជុំវិញ​ការ​សាងសង់​កន្លែង​ស្នាក់នៅ​កម្សាន្ត (រីស៊ត) ឯកជន​មួយ​កន្លែង​ដែល​គេ​ដឹង​ថា​ជា​កម្មសិទ្ធិ​របស់​ឧកញ៉ា ទុយ គី មាន​ទីតាំង​ស្ថិតនៅ​ទល់​មុខ​នឹង​សាលាឃុំ​អូដំបង១ ស្រុក​សង្កែ ខេត្ត​បាត់ដំបង ប៉ុន្តែ​អាជ្ញាធរ​មូលដ្ឋាន​មិន​បាន​អន្តរាគមន៍​លើ​ករណី​នេះ​ទេ ប៉ុន្តែ​បែរជា​បើក​ដៃ​ឱ្យ​ឧកញ៉ា​រូប​នោះ​រំលោភ​ដី​សាធារណៈ​តាម​អំពើ​ចិត្ត​ទៅវិញ។

ប្រភព​ដដែល​អះអាង​ថា ស្ទឹង​សង្កែ គឺជា​ស្ទឹង​ប្រវត្តិសាស្ត្រ​មួយ​របស់​ប្រទេស​កម្ពុជា ដែល​កំពុង​ត្រូវ​បាន​រំលោភ​បំពាន​ពី​សំណាក់​អ្នក​មាន​លុយ មាន​អំណាច ដោយ​ការ​ចាក់​ដី​រំលោភ​យក និង​សាងសង់​សំណង់​តាម​អំពើ​ចិត្ត ក្នុង​នោះ​រូបថត​ដែល​ចលនា​នេះ​បាន​បង្ហោះ​លើ​បណ្ដាញ​សង្គម​ហ្វេសប៊ុក បាន​បង្ហាញ​ពី​លំនៅឋាន​ដែល​កំពុង​ដំណើរការ​សាងសង់​ដែល​សម្រេច​បាន​ប្រមាណ ៧០% ផង​ដែរ ដោយ​ការ​បណ្ដុះ​សសរ​ជាច្រើន​តាម​បណ្តោយ​មាត់ស្ទឹង​ប្រវែង​ប្រមាណ​ជា ១០០​ម៉ែត្រ​ថែម​ទៀត។

ការ​អំពាវនាវ​នេះ ធ្វើឡើង​ស្រប​ពេល​ដែល​កន្លែង​ស្នាក់នៅ​កម្សាន្ត​ឯកជន​មួយ​កន្លែង​បាន​រំលោភ​យក​ដី​មាត់ស្ទឹង​សង្កែ ខេត្ត​បាត់ដំបង ធ្វើ​ជា​កម្មសិទ្ធិ​ដើម្បី​សាងសង់​រីស៊ត​ឯកជន​ផ្ទាល់ខ្លួន​នៅ​ពេលនេះ។

អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក អ៊ុំ សំអាន បាន​សរសេរ​លើ​គណនី​ហ្វេសប៊ុក​របស់​លោក​កាលពី​ថ្ងៃ​ចន្ទ ទី​១៩ មិថុនា ថា បើសិន​ពលរដ្ឋ​សាមញ្ញ​ពិត​ជា​មិន​ហ៊ាន​សង់​សំណង់​រឹង​រំលោភ​មាត់ស្ទឹង​បែប​នេះ​ទេ ហើយ​អាជ្ញាធរ​នឹង​ចាត់ការ​វាយ​សំណង់​នោះ​កម្ទេច​ចោល រីឯ​ម្ចាស់​សំណង់​នោះ​អាច​នឹង​ត្រូវ​ជាប់​គុក​ថែម​ទៀត។

ឧកញ៉ា ទុយ គី គឺជា​ប្រធាន​សភា​ពាណិជ្ជកម្ម​ខេត្ត​ពោធិ៍សាត់ និង​ជា​អនុប្រធាន​សភា​ពាណិជ្ជកម្ម​កម្ពុជា​ក្នុង​ពេល​បច្ចុប្បន្ន​នេះ។ លើស​ពី​នេះ គេ​សង្កេត​ឃើញ​ថា ឧកញ៉ា​រូប​នេះ​មាន​ចំណូលចិត្ត​សាងសង់​សណ្ឋាគារ និង​សំណង់​ផ្សេងៗ​ដោយ​រំលោភ​យក​ដី​មាត់ស្ទឹង​ជា​បន្តបន្ទាប់​រហូត​មក ដូចជា​សណ្ឋាគារ​ពោធិ៍សាត់​រីវើសាយ (Pusat Riverside) ស្ថិត​ក្នុង​ទី​រួម​ខេត្ត​ពោធិ៍សាត់ ក៏​បាន​រំលោភ​យក​ដី​មាត់ស្ទឹង​ដូច​គ្នា​នឹង​ករណី​សាងសង់​កន្លែង​ស្នាក់នៅ​កម្សាន្ត​ដែល​រំលោភ​យក​ដី​មាត់ស្ទឹង​សង្កែ ដូច​ពេល​នេះ​ដែរ។

ក្រុម​អ្នក​សង្កេតការណ៍​លើកឡើង​ថា ករណី​ឧកញ៉ា និង​អ្នក​មាន​អំណាច​រំលោភ​យក​ដី​សាធារណៈ​ស្ទើរតែ​ក្លាយ​ជា​ករណី​ធម្មតា​ទៅ​ហើយ​សម្រាប់​ប្រទេស​កម្ពុជា ព្រោះ​ថា​កម្ពុជា​ក្រោម​ការ​ដឹកនាំ​របស់​បក្ស​ប្រជាជន​កម្ពុជា​ដែល​មាន​លោក ហ៊ុន សែន ជា​អ្នក​គ្រប់គ្រង បាន​បណ្តែតបណ្តោយ​ឱ្យ​អំពើ​បែប​នេះ​កើតមាន​នៅ​ទូទាំង​ប្រទេស​រហូត​មាន​ករណី​ខ្លះ រំលោភ​យក​ដី​ក្នុង​ទន្លេ និង​សមុទ្រ ដោយ​ការ​ចាក់​លុប​ដើម្បី​សាងសង់​សំណង់​នានា​ថែម​ទៀត។

ច្បាប់​ស្ដីពី​តំបន់​ការពារ​ធម្មជាតិ មាត្រា​៦២ ចែង​ថា ត្រូវ​ផ្ដន្ទាទោស​ជា​បទល្មើស​ធនធាន​ធម្មជាតិ​ថ្នាក់​ទី​៤ និង​ត្រូវ​រឹបអូស​វត្ថុតាង​ជា​សម្បត្តិ​រដ្ឋ ចំពោះ​ជន​ដែល​បាន​ប្រព្រឹត្ត​បទល្មើស​ដោយ​ការ​ចាក់​ដី​លុប ឬ​ចាក់​បំពេញ​ដី ឬ​ចាក់​បំពេញ​ដែនទឹក​ដោយ​គ្មាន​ការ​អនុញ្ញាត ហើយ​ក្នុង​ករណី​មិន​រាងចាល ត្រូវ​ផ្ដន្ទាទោស​ទ្វេដង៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស