គ្រួសារជនរងគ្រោះស្រែកអង្វរសុំឱ្យប្រមុខរដ្ឋាភិបាលកម្ពុជា លោក ហ៊ុន សែន ជួយអន្តរាគមន៍ផ្តល់យុត្តិធម៌ បន្ទាប់ពីបុរសដែលជាស្វាមី គឺលោក មន មឿន ត្រូវរងនូវការធ្វើទារុណកម្មធ្ងន់ធ្ងររហូតដល់ស្លាប់នៅក្នុងពន្ធនាគារខេត្តកំពង់ស្ពឺ។
អ្នកស្រី សុខ ស្រីមុំ ជាកម្មការិនីរោងចក្រដែលត្រូវជាភរិយារបស់លោក មន មឿន និងបងប្អូនសាច់ញាតិរបស់ជនរងគ្រោះ ប្រាប់សារព័ត៌មាន The Cambodia Daily នៅថ្ងៃទី២២ មិថុនា នេះដោយអំពាវនាវសុំឱ្យសមត្ថកិច្ចជំនាញ អគ្គស្នងការនគរបាលជាតិ រដ្ឋមន្ត្រីក្រសួងមហាផ្ទៃ លោក ស ខេង និងលោកនាយករដ្ឋមន្ត្រី ហ៊ុន សែន សូមមេត្តាជួយរកយុត្តិធម៌ឱ្យពួកគេផង ព្រោះលោក មន មឿន ត្រូវគេមួលបង្កាច់ប៉ុណ្ណោះ។
អ្នកស្រី មន សុខគា ដែលត្រូវជាប្អូនស្រីបង្កើតរបស់ជនរងគ្រោះបានរៀបរាប់ថា កាលពីថ្ងៃទី១០ ខែមិថុនា ឆ្នាំ២០២៣ បងប្រុសរបស់អ្នកស្រី គឺលោក មន មឿន ត្រូវបានគេចោទប្រកាន់ពីបទប៉ុនប៉ងរំលោភសេពសន្ថវៈលើស្ត្រីម្នាក់ ហើយស្ត្រីនោះទាមទារសំណងចំនួន ៥ពាន់ដុល្លារអាមេរិក ដើម្បីបញ្ចប់រឿង ប៉ុន្តែសាច់ញាតិរបស់លោក មន មឿន សុំធ្វើការសម្របសម្រួលបង់ត្រឹម ១ពាន់ដុល្លារ ប៉ុន្តែស្ត្រីនោះមិនព្រម។
ដោយសារមិនចុះសម្រុងគ្នា សមត្ថកិច្ចក៏សម្រេចបញ្ជូនបងប្រុសរបស់ខ្លួនទៅឃុំខ្លួននៅស្នងការដ្ឋាន និងបន្តបញ្ជូនទៅឃុំខ្លួននៅពន្ធនាគារខេត្តកំពង់ស្ពឺ តែម្តង ប៉ុន្តែក្រោយលោក មន មឿន ត្រូវបានបញ្ជូនទៅឃុំខ្លួនក្នុងពន្ធនាគារបានប៉ុន្មានថ្ងៃ ស្រាប់តែសមត្ថកិច្ចបានទូរសព្ទមកប្រាប់ពួកគាត់ដែលជាសាច់ញាតិថា សូមនាំគ្នាមកមើលលោក មន មឿន ផង ព្រោះឥឡូវនេះគាត់កំពុងត្រូវយកមកព្យាបាលនៅមន្ទីរពេទ្យបង្អែកខេត្តកំពង់ស្ពឺ ដែលកំពុងមានជំងឺធ្ងន់ធ្ងរ។
អ្នកស្រី មន សុខគា អះអាងថា នៅពេលដែលអ្នកស្រីទៅដល់មន្ទីរពេទ្យ ក្រុមគ្រូពេទ្យបានប្រាប់ថា លោក មន មឿន បានស្លាប់តាំងពីមុនពេលបញ្ជូនមកដល់មន្ទីរពេទ្យម្ល៉េះ ខណៈមន្ត្រីពន្ធនាគារអះអាងថា មូលហេតុស្លាប់របស់លោក មន មឿន គឺដោយសារតែជំងឺគាំងបេះដូង ប៉ុន្តែសាច់ញាតិជនរងគ្រោះនាំគ្នាពិនិត្យរាងកាយសាកសព បានរកឃើញថា មានស្នាមជាំលើដងខ្លួន មានស្លាកស្នាមជាំដៃ ជាំជើង បែកមាត់ហូរឈាម និងស្នាមរបួសជាច្រើនកន្លែងទៀត ដែលបង្ហាញថាគាត់ត្រូវគេធ្វើទារុណកម្មទើបបណ្តាលឱ្យស្លាប់។
លោក មន មឿន មានអាយុ ៤២ឆ្នាំ មានមុខរបរជាកសិករ នៅភូមិធ្លាចាស់ សង្កាត់វាលពង់ ក្រុងឧដុង្គម៉ែជ័យ ខែត្រកំពង់ស្ពឺ និងមានប្រពន្ធឈ្មោះ សុខ ស្រីមុំ អាយុ ៣៦ឆ្នាំ មានមុខរបរជាកម្មការិនីរោងចក្រ ព្រមទាំងមានកូនស្រីម្នាក់នៅក្នុងបន្ទុកអាយុ ៧ឆ្នាំផងដែរ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី២២ មិថុនា នេះថា ប្រសិនបើភាគីជនរងគ្រោះមានការសង្ស័យលើការអះអាងរបស់មន្ត្រីពន្ធនាគារពីការស្លាប់របស់លោក មន មឿន ពួកគេអាចដាក់ពាក្យបណ្ដឹងទៅតុលាការ ដើម្បីឱ្យសមត្ថកិច្ចបើកការស៊ើបអង្កេត និងធ្វើកោសល្យវិច័យលើករណីនេះបាន ដើម្បីឱ្យជាក់ច្បាស់ថា លោក មន មឿន ពិតជាស្លាប់ដោយសារជំងឺគាំងបេះដូងមែនដែរឬក៏អត់នោះ។
លោក ស៊ឹង សែនករុណា លើកឡើងថា ដោយឡែកប្រសិនបើការស្លាប់នេះបង្កឡើងដោយសារការធ្វើទារុណកម្មក្នុងអំឡុងពេលសួរចម្លើយ ដើម្បីបង្ខំឱ្យជនរងគ្រោះសារភាព នោះគ្រួសារជនរងគ្រោះក៏អាចដាក់ពាក្យបណ្ដឹងទៅគណៈកម្មាធិការប្រឆាំងអំពើទារុណកម្មផងដែរ ដើម្បីបើកការស៊ើបអង្កេតឱ្យកាន់តែជាក់លាក់លើរឿងនេះបន្ថែមទៀត។
ទាក់ទិននឹងបញ្ហានេះ កាលពីអំឡុងខែមេសា ឆ្នាំ២០២១ ជនសង្ស័យម្នាក់ឈ្មោះ ពេជ្រ ធារ៉េត បានស្លាប់ភ្លាមៗបណ្ដាលមកពីការធ្វើទារុណកម្មរបស់សមត្ថកិច្ចអំឡុងពេលសួរចម្លើយនៅស្នងការដ្ឋានខេត្តបាត់ដំបង ក្នុងនោះគេពិនិត្យឃើញថា សពរបស់គាត់មានស្នាមរបួសបែកឈាមខ្មៅពេញខ្លួន ប៉ុន្តែសមត្ថកិច្ចប្រកែកថាគាត់ស្លាប់ដោយសារជំងឺគាំងបេះដូង ដែលចម្លើយនោះគឺដូចគ្នាទៅនឹងចម្លើយរបស់សមត្ថកិច្ចខេត្តកំពង់ស្ពឺ ដែលបានឆ្លើយនៅពេលនេះបេះបិទ ខណៈសភាពលើរូបរាងកាយរបស់សាកសពលោក មន មឿន ក៏មានសណ្ឋានដូចគ្នានឹងសាកសពលោក ពេជ្រ ធារ៉េត ដែរ។
ទាក់ទិននឹងបញ្ហានេះ ជនរងគ្រោះដែលធ្លាប់រងនូវការចាប់ខ្លួន និងសួរចម្លើយពីសមត្ថកិច្ចកម្ពុជា បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះកាលពីពេលថ្មីៗនេះថា លោកធ្លាប់ត្រូវបានសមត្ថកិច្ចចាប់ខ្លួនទាំងអយុត្តិធម៌ម្តងដែរ ហើយក្នុងពេលពួកគេសួរចម្លើយ គេបានធ្វើទារុណកម្មលើរូបលោកយ៉ាងធ្ងន់ធ្ងរ ដោយការវាយតប់ទាត់ធាក់ស្ទើរស្លាប់ស្ទើររស់ ដើម្បីបង្ខំឱ្យលោកឆ្លើយនូវអ្វីដែលពួកគេចង់បាន៕