35 C
Phnom Penh

មេដឹកនាំ​ណាតូ​នៅតែ​ប្ដេជ្ញា​ជួយ​យក​អ៊ុយក្រែន​ឱ្យ​បាន​ក្លាយ​ជា​សមាជិក​ណាតូ

ដោយ ឌឹ ខេមបូឌា ដេលី

បទវិភាគ

នៅ​ថ្ងៃទី​១១-១២ ខែ​កក្កដា សប្ដាហ៍​ក្រោយ​នេះ គឺជា​កិច្ចប្រជុំ​កំពូល​នៃ​មេដឹកនាំ​អង្គការ​យោធា​អាត្លង់ទិច​ខាងជើង ហៅ​កាត់​ថា​ណាតូ។ ជំនួប​កំពូល​នៃ​មេដឹកនាំ ៣១​ប្រទេស ត្រូវ​ធ្វើឡើង​នៅ​ទីក្រុង​វិលនីញូស ប្រទេស​លីទុយអានី។

របៀបវារៈ​មួយ​ក្នុង​ចំណោម​ជាច្រើន​ទៀត គឺ​សំណើ​របស់​អ៊ុយក្រែន ដែល​សុំ​ជា​សមាជិក​នៃ​អង្គការ​យោធា​អឺរ៉ុប​មួយ​នេះ​នៅតែ​លេចធ្លោ​ជាងគេ ស្រប​ពេល​រដ្ឋាភិបាល​ក្រុង​គៀវ កំពុង​ជំរុញ​សម្ព័ន្ធមិត្ត​ណាតូ ឲ្យ​ពន្លឿន​សំណើ​របស់​ខ្លួន។

ដោយសារតែ​រឿង​នេះ​ហើយ អគ្គលេខាធិការ​អង្គការ​ណាតូ លោក Jens Stoltenberg បាន​បញ្ជាក់​កាលពី​ថ្ងៃ​អង្គារ ថា ការ​ពន្យារ​អាណត្តិ​របស់​លោក​មួយ​ឆ្នាំ​ទៀត​បាន​នាំ​ឱ្យ​លោក​ខិតខំ​ថែម​ទៀត​ស្វះស្វែង​រក្សា​សាមគ្គីភាព​ក្នុង​សម្ព័ន្ធភាព​ប្រឆាំង​នឹង​រុស្ស៊ី ហើយ​រក​ការ​ស្រុះស្រួល​ឱ្យ​បាន​ដើម្បី​ផ្ដល់​ការ​យល់ព្រម​ឱ្យ​អ៊ុយក្រែន ជា​សមាជិក​ណាតូ។

អ៊ុយក្រែន​ជា​ប្រទេស​មួយ​មាន​ព្រំដែន​គោក​ជាប់​នឹង​ប្រទេស​រុស្ស៊ី​យ៉ាង​ទូលំទូលាយ។ រុស្ស៊ី​ដែល​ឈ្លានពាន​ប្រទេស​ជិតខាង​មួយ​នេះ ត្រូវ​បាន​គេ​មើល​ឃើញ​ថា ដោយសារតែ​មេដឹកនាំ​ជំនាន់​ក្រោយ​នៃ​ប្រទេស​អ៊ុយក្រែន មិន​ព្រម​ទម្លាក់​ខ្លួន​ជា​អាយ៉ង​របស់​ក្រុង​មូស្គូ ដែល​ក្រោម​ការ​ដឹកនាំ​របស់​បុរស​ខ្លាំង វ៉្លាឌីមៀរ ពូទីន។ បើ​សុខចិត្ត​ធ្វើ​ជា​មេដឹកនាំ​អាយ៉ង​របស់​លោក ពូទីន ម្ល៉េះ​មិន​មាន​សង្គ្រាម​ផ្ទុះ​ឡើង​ទេ។ កាលពី​អ៊ុយក្រែន​នៅ​ក្រោម​ការ​ដឹកនាំ​របស់​លោក វិចទ័រ យ៉ាណាកូវិច មិន​មាន​ភាព​តានតឹង ហើយ​ឈាន​ដល់​ការ​ពើប​ប្រយុទ្ធ​គ្នា​ទេ ព្រោះតែ​អតីត​មេដឹកនាំ​អ៊ុយក្រែន​រូប​នេះ​បាន​ចុះហត្ថលេខា​កាត់​ដី​នៃ​ឧបទ្វីប​គ្រីមៀរ ទៅ​ឱ្យ​របប​លោក ពូទីន កាល​ខែ​មីនា ឆ្នាំ​២០១៤ ជា​ថ្នូរ​នឹង​សន្តិភាព។

តែ​ក្រោយពី​កាត់​ទឹកដី​ឱ្យ​រុស្ស៊ី​ហើយ បុរស​ម្នាក់​នេះ និង​គ្រួសារ បាន​រត់​ចោល​ប្រទេស​យ៉ាង​លឿន​ទៅ​នៅ​ក្រុង​មូស្គូ ព្រោះតែ​ប្រជាជន និង​កងទ័ព​អ៊ុយក្រែន​ដេញ​ចេញពី​អំណាច ហើយ​កាត់ទោស​ពី​ទោស​ក្បត់​ជាតិ។

ចំពោះ​លោក​ប្រធានាធិបតី វូឡូឌីមៀ ហ្សេឡេនស្គី និង​អតីត​ប្រធានាធិបតី វិចទ័រ ប៉េរេសឆេនកូ ដែល​ប្រកាស​ថ្កោលទោស​លោក យ៉ាណាកូវិច បាន​សច្ចា​យក​ទឹកដី​តំបន់​គ្រីមៀរ នេះ​ពី​រុស្ស៊ី​មក​វិញ ទោះជា​ត្រូវ​ធ្វើ​សង្គ្រាម​ក៏ដោយ។ ដូច​នេះ​ហើយ​បាន​ជា​លោក ហ្សេឡេនស្គី និង​លោក ប៉េរេសឆេនកូ បាន​សម្រេច​ដាក់​ពាក្យ​សុំ​ចូល​ជា​សមាជិក​ណាតូ ដើម្បី​ជា​បង្អែក​ការពារ​ទឹកដី​របស់​ខ្លួន។

រដ្ឋាភិបាល​លោក ហ្សេឡេនស្គី បាន​ដាក់​ពាក្យ​ស្នើសុំ​ចូល​ជា​សមាជិក​អង្គការ​ណាតូ ជា​ផ្លូវការ​កាលពី​ខែ​កញ្ញា ឆ្នាំ​ទៅ​មិញ​ជា​ថ្មី​ម្ដង​ទៀត ក្រោយពី​រុស្ស៊ី​ឈ្លានពាន​បាន​រយៈពេល​ជាង ៨​ខែ។

ខណៈ​ជំនួប​កំពូល​ជិត​ចូល​មក​ដល់ ប្រធានាធិបតី ហ្សេឡេនស្គី បាន​អំពាវនាវ​ឲ្យ​អង្គការ​ណាតូ​ផ្តល់​សមាជិកភាព​ដល់​អ៊ុយក្រែន ឲ្យ​បាន​ឆាប់​រហ័ស។ នេះ​បើ​តាម​ទីភ្នាក់ងារ​សារព័ត៌មាន AP ចុះផ្សាយ​កាលពី​ថ្ងៃទី​៦ កក្កដា នេះ។

ក្នុង​សន្និសីទ​កាសែត​រួម​គ្នា​មួយ​ជាមួយ​នាយករដ្ឋមន្ត្រី​អេស្ប៉ាញ លោក Pedro Sanchez ក្នុង​ទីក្រុង​គៀវ កាលពី​ថ្ងៃទី​១ ខែ​កក្កដា លោក ហ្សេឡេនស្គី បាន​ថ្លែង​ថា៖ ក្នុង​កិច្ចប្រជុំ​កំពូល​ណាតូ អ៊ុយក្រែន​ត្រូវការ​សញ្ញា​យ៉ាង​ច្បាស់ និង​ប្រាកដប្រជា​ថា អ៊ុយក្រែន​អាច​មាន​សិទ្ធិ​ក្លាយ​ជា​សមាជិក​ស្មើ​ភាព​របស់​សម្ព័ន្ធភាព​យោធា​មួយ​នេះ​ក្រោយពី​សង្គ្រាម​បិទ​បញ្ចប់។

ការ​ទាមទារ​របស់​មេដឹកនាំ​អ៊ុយក្រែន ទទួល​បាន​ការ​គាំទ្រ​ពី​មេដឹកនាំ​សមាជិក​ណាតូ​ជាច្រើន​នាក់ រួម​ទាំង​មេដឹកនាំ​អង់គ្លេស ប៉ូឡូញ និង​បណ្តា​រដ្ឋ​ក្នុង​តំបន់ Baltic។ ជាមួយ​គ្នា​នេះ ម្ចាស់​ផ្ទះ​នៃ​កិច្ចប្រជុំ​កំពូល​នៅ​ទីក្រុង​វិលនីញូស គឺ​ប្រធានាធិបតី​លីទុយអានី លោក Gitanas Nauseda និយាយ​ថា ការ​ផ្តល់​សញ្ញា​ច្បាស់លាស់​ពី​សម្ព័ន្ធមិត្ត​ណាតូ​ដល់​រដ្ឋាភិបាល​ក្រុង​គៀវ មាន​ភាព​រឹងមាំ​ចំពោះ​អនាគត​ប្រទេស​មួយ​ដែល​ត្រូវ​បាន​មហាអំណាច​ឈ្លានពាន។

លោក Nauseda បាន​លើកឡើង​ថា៖ ទាំងអស់​គ្នា​យល់​ថា ពេលនេះ​ចំ​ពេល​ដែល​មាន​សង្គ្រាម អ៊ុយក្រែន​មិន​អាច​ចូល​ណាតូ​បាន​ទេ។ តែ​ត្រូវតែ​បើក​ផ្លូវ​ឲ្យ​បន្ត​នីតិវិធី បើ​សង្គ្រាម​ចប់ គឺ​អ៊ុយក្រែន​ត្រូវតែ​បាន​ក្លាយ​ជា​សមាជិក​ណាតូ។

យ៉ាងណា​មិន​មែន​មាន​តែ​អ៊ុយក្រែន​ទេ​ដែល​លំបាក​ចូល​ណាតូ គឺ​ប្រទេស​ស៊ុយអែត ក៏​ដូច្នេះ​ដែរ។ ទាំង​ស៊ុយអែត និង​ហ្វាំងឡង់ បាន​បញ្ជូន​លិខិត​សុំ​ចូល​សមាជិក​ណាតូ​នៅ​ពេល​តែ​មួយ​ដូច​គ្នា ពោល​គឺ​ក្រោយពី​រុស្ស៊ី​លើក​ទ័ព​ចូល​ឈ្លានពាន​អ៊ុយក្រែន នៅ​ថ្ងៃទី​២៤ ខែ​កុម្ភៈ ឆ្នាំ​២០២២ តែ​ប៉ុន្មាន​សប្ដាហ៍​ប៉ុណ្ណោះ។ សម្រាប់​ហ្វាំងឡង់ បាន​ក្លាយ​ជា​សមាជិក​ណាតូ​ផ្លូវការ​ទៅ​ហើយ​កាលពី​ថ្ងៃទី​៤ មេសា ក្រោយពី​សភា​ប្រទេស​តួកគី និង​ហុងគ្រី បាន​សម្រេច​ផ្ដល់​សច្ចាប័ន។ តែ​ស៊ុយអែត នៅតែ​ប្រទេស​ពីរ​នេះ​ជំទាស់​ដោយ​មិន​ផ្ដល់​សច្ចាប័ន​នៅឡើយ​នោះ​ទេ។

នៅ​ក្នុង​ជំនួប​នៅ​សេតវិមាន ប្រធានាធិបតី ចូ បៃដិន បាន​ប្រាប់​លោក​នាយករដ្ឋមន្ត្រី Ulf Kristersson ថា លោក​កំពុង​ទន្ទឹង​រង់ចាំ​ការ​សម្រេច​ចិត្ត​ចុងក្រោយ ដើម្បី​ឲ្យ​ស៊ុយអែត ក្លាយ​ជា​សមាជិក​អង្គការ​ណាតូ។

លោក បៃដិន និយាយ​ថា បាន​បញ្ជាក់​ម្តង​ទៀត​ថា លោក​គាំទ្រ​យ៉ាង​ពេញ​ទំហឹង​ដល់​សមាជិកភាព​របស់​ស៊ុយអែត នៅ​ក្នុង​អង្គការ​ណាតូ ហើយ​លោក​ក៏​កំពុង​ទន្ទឹង​រង់ចាំ​ជា​ខ្លាំង​ចំពោះ​ការ​ផ្តល់​សច្ចាប័ន​លើ​ពាក្យ​ស្នើសុំ​នេះ។ ចំណែក​លោក Kristersson បាន​ថ្លែង​អំណរគុណ​ចំពោះ​ការ​គាំទ្រ​ដ៏​រឹងមាំ​របស់​លោក បៃដិន ចំពោះ​ការ​ស្នើសុំ​ចូល​ជា​សមាជិក​អង្គការ​ណាតូ​របស់​ស៊ុយអែត ដែល​តួកគី និង​ហុងគ្រី កំពុង​ជំទាស់។

យ៉ាង​នេះ​ក្តី លោក​នាយករដ្ឋមន្ត្រី​ស៊ុយអែត និង​លោក បៃដិន យល់​ឃើញ​ដូច​គ្នា​ថា កិច្ចប្រជុំ​កំពូល​ណាតូ​ដែល​នឹង​ធ្វើឡើង​នៅ​ទីក្រុង​វិលនីញូស របស់​ប្រទេស​លីទុយអានី គឺ​ពិត​ជា​ពេលវេលា​សមរម្យ​សម្រាប់​ការ​ចូលរួម​របស់​ស៊ុយអែត ប៉ុន្តែ​មាន​តែ​តួកគី​ប៉ុណ្ណោះ​ដែល​អាច​សម្រេច​បាន។

ដោយឡែក​ហុងគ្រី ឯណោះ​វិញ ក៏​បាន​បង្ហាញ​ថា ខ្លួន​នឹង​ធ្វើ​តាម​ការ​សម្រេច​ចិត្ត​របស់​តួកគី ក្នុង​ដំណើរការ​នេះ។

អគ្គលេខាធិការ​អង្គការ​យោធា​ណាតូ Stoltenberg បាន​ថ្លែង​ថា ជំនួប​ពិសេស​មួយ​នៅ​ថ្ងៃទី​៦ កក្កដា នេះ ដើម្បី​ធ្វើ​សេចក្ដី​សម្រេច​ម្ដង​ទៀត​អំពី​អនាគត​ប្រទេស​ស៊ុយអែត ត្រូវ​ក្លាយ​ជា​សមាជិក​អង្គការ​ណាតូ។

លោក Stoltenberg កត់សម្គាល់​ថា ជំនួប​កំពូល​របស់​ណាតូ​នៅ​លើ​ទឹកដី​នៃ​ប្រទេស​លីទុយអានី គឺជា​លើកដំបូង​ដែល​មេដឹកនាំ​ប្រទេស​ហ្វាំងឡង់ ចូលរួម​ក្នុង​ក្របខ័ណ្ឌ​ជា​សមាជិក​ថ្មី​ទី​៣១ របស់​ណាតូ ហើយ​ចំពោះ​ប្រទេស​ស៊ុយអែត ក៏​ត្រូវតែ​ផ្ដល់​ឱកាស​ជា​សមាជិក​ណាតូ​នៅ​ពេល​នោះ​ដែរ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស