36 C
Phnom Penh

តុលាការ​ចេញ​ដីកា​ឱ្យ​ចាប់​ខ្លួន​មន្ត្រី​បក្ស​ភ្លើង​ទៀន​ពីរ​នាក់​ចោទ​បង្ក​ចលាចល​ដល់​ការ​បោះឆ្នោត

ដោយ ឌឹ ខេមបូឌា ដេលី

បទវិភាគ

សាលាដំបូង​រាជធានី​ភ្នំពេញ​ចេញ​ដីកា​ចាប់​ខ្លួន​មន្ត្រី​ជាន់ខ្ពស់​បក្ស​ភ្លើង​ទៀន ២​នាក់ គឺ​អ្នកស្រី វង រុន្នី ប្រធាន​ចលនា​ស្ត្រី​ថ្នាក់​ជាតិ​របស់​បក្ស​នេះ និង​លោក អេង ស្រូយ ប្រធាន​គណៈកម្មាធិការ​ប្រតិបត្តិ​ខេត្ត​ត្បូងឃ្មុំ ដែល​ត្រូវ​បាន​ចោទប្រកាន់​ពី​បទ​បង្ក​ចលាចល​ដល់​ការ​បោះឆ្នោត។

តុលាការ​ក្រុង​ភ្នំពេញ​កាលពី​ថ្ងៃទី​១៧ ខែ​កក្កដា ឆ្នាំ​២០២៣ បាន​ចេញ​ដីកា​បង្គាប់​ឱ្យ​នាំ​ខ្លួន​លោក អេង ស្រូយ និង​អ្នកស្រី វង រុន្នី ដោយ​ចោទប្រកាន់​ពី​បទ ញុះញង់​បង្ក​ឱ្យ​មាន​ភាព​វឹកវរ​ធ្ងន់ធ្ងរ​ដល់​សន្តិសុខ​សង្គម គឺ​បង្ក​ចលាចល​ដល់​ការ​បោះឆ្នោត​តាម​មាត្រា​៤៩៤ និង​មាត្រា​៤៩៥ នៃ​ក្រមព្រហ្មទណ្ឌ បន្ទាប់ពី​អ្នក​ទាំង​ពីរ​បាន​ប្រព្រឹត្ត​នៅ​កម្ពុជា និង​នៅ​ទីកន្លែង​ផ្សេង​ទៀត​ក្នុង​ឆ្នាំ​២០២៣ នេះ និង​ពេល​បន្តបន្ទាប់​មក​ទៀត។

តុលាការ​ក្រុង​ភ្នំពេញ​បញ្ជាក់​ថា ដើម្បី​ធានា​ដល់​ការ​បង្ហាញ​ខ្លួន​ជន​ត្រូវ​ចោទ​នៅ​ចំពោះ​មុខ​ចៅក្រម​ស៊ើបសួរ និង​ដើម្បី​ធានា​ដល់​ការ​ស៊ើបសួរ​ឱ្យ​បាន​ពេញលេញ អាជ្ញាធរ​មាន​សមត្ថកិច្ច​ត្រូវ​នាំ​ខ្លួន​ជន​ត្រូវ​ចោទ​ទាំង​ពីរ​នាក់​ខាងលើ​មក​ប្រគល់​ឱ្យ​សាលាដំបូង​រាជធានី​ភ្នំពេញ ដើម្បី​ចាត់ការ​តាម​នីតិវិធី​ច្បាប់​ជា​កំហិត។

ការ​ចេញ​ដីកា​ឱ្យ​នាំ​ខ្លួន​មន្ត្រី​ជាន់ខ្ពស់​បក្ស​ភ្លើង​ទៀន​នេះ ធ្វើឡើង​បន្ទាប់ពី​ពួកគេ​បាន​រង​នូវ​ការ​ចោទប្រកាន់​ថា កំពុង​ផ្សព្វផ្សាយ​ពី​យុទ្ធនាការ​បំផ្លាញ​សន្លឹកឆ្នោត ដែល​ផ្ទុយ​ពី​ច្បាប់​បោះឆ្នោត​ដែល​បក្ស​កាន់​អំណាច​ទើប​នឹង​កែប្រែ​កាលពី​ពេល​ថ្មីៗ​នេះ។

អ្នកស្រី វង រុន្នី ប្រធាន​ចលនា​ស្ត្រី​ថ្នាក់​ជាតិ​គណបក្ស​ភ្លើង​ទៀន មាន​ទីកន្លែង​កំណើត​នៅ​ឃុំ​ឆ្លូង ស្រុក​ឆ្លូង ខេត្ត​ក្រចេះ និង​លោក អេង ស្រូយ ប្រធាន​គណៈកម្មាធិការ​ប្រតិបត្តិ​ខេត្ត​ត្បូងឃ្មុំ មាន​ទីកន្លែង​កំណើត​នៅ​ភូមិ​កំពង់ក្រមួន ឃុំ​ព្រៃកន្លោង ស្រុក​ពោធិ៍រៀង ខេត្ត​ព្រៃវែង មាន​មុខរបរ​ជា​អតីត​គ្រូ​នគរបាល​កម្រិត​មធ្យម​ថ្នាក់​លេខ​៤ នៃ​សាលា​បណ្ឌិត្យសភា​នគរបាល​កម្ពុជា។

ទាំង​លោក អេង ស្រូយ និង​អ្នកស្រី វង រុន្នី ត្រូវ​បាន​សមត្ថកិច្ច​ចាប់​ខ្លួន​ដល់​គេហដ្ឋាន​ស្នាក់នៅ​បច្ចុប្បន្ន​របស់​ពួកគេ​នៅ​ក្នុង​ទីក្រុង​ភ្នំពេញ និង​បាន​បញ្ជូន​ខ្លួន​មក​ប្រគល់​ឱ្យ​តុលាការ​ក្រុង​ភ្នំពេញ​ហើយ​កាលពី​ថ្ងៃ​ចន្ទ ទី​១៧ ខែ​កក្កដា នេះ។

ទាក់ទិន​នឹង​បញ្ហា​នេះ គណបក្ស​ភ្លើង​ទៀន​បាន​សរសេរ​លើ​ទំព័រ​ហ្វេសប៊ុក​របស់​ខ្លួន​កាលពី​ថ្ងៃទី​១៧ កក្កដា ថា រយៈពេល ៤​ថ្ងៃ​ចុងក្រោយ​នេះ មន្ត្រី​ជាន់ខ្ពស់​របស់​ខ្លួន​ចំនួន ៤​រូប​ហើយ​ដែល​ត្រូវ​បាន​សមត្ថកិច្ច​ចាប់​ខ្លួន ក្នុង​នោះ​រួម​មាន​លោក លី រី សមាជិក​គណៈកម្មាធិការ​នាយក និង​ជា​សមាជិក​ក្រុម​ការងារ​គណបក្ស​ភ្លើង​ទៀន​រាជធានី​ភ្នំពេញ និង​លោក ប៊ុន ខេត ប្រធាន​ស្ដីទី​គណៈកម្មាធិការ​ប្រតិបត្តិ​គណបក្ស​ភ្លើង​ទៀន​រាជធានី​ភ្នំពេញ​ផង​ដែរ។

មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ​លោក អ៊ុំ សំអាន សរសេរ​នៅ​គណនី​ហ្វេសប៊ុក​របស់​លោក​នៅ​ថ្ងៃទី​១៨ កក្កដា នេះ​ថា អ្នកស្រី វង រុន្នី ប្រធាន​ចលនា​ស្ត្រី​ថ្នាក់​ជាតិ​របស់​គណបក្ស​ភ្លើង​ទៀន និង​លោក អេង ស្រូយ ប្រធាន​ប្រតិបត្តិ​គណបក្ស​ភ្លើង​ទៀន​ខេត្ត​ត្បូងឃ្មុំ ត្រូវ​អាជ្ញាធរ​ចាប់​ខ្លួន​ដើម្បី​បង្ខិតបង្ខំ​ឲ្យ​ពួកគេ​ចុះចូល​ជាមួយ​គណបក្ស​ប្រជាជន​កម្ពុជា ដោយ​មាន​ការ​រៀបចំ​ទុក​ជា​មុន។

លោក អ៊ុំ សំអាន បាន​ទម្លាយ​លិខិត​ចុះចូល​មួយ​របស់​អ្នកស្រី វង រុន្នី ដែល​បាន​ចុះ​កាលបរិច្ឆេទ​កាលពី​ថ្ងៃទី​១៩ ខែ​ធ្នូ ឆ្នាំ​២០២២ ក្នុង​កម្មវត្ថុ​សុំ​ចូលរួម​ជីវភាព​នយោបាយ​ជាមួយ​បក្ស​ប្រជាជន​កម្ពុជា ប៉ុន្តែ​លិខិត​ចុះចូល​នេះ​ត្រូវ​មន្ត្រី​ជាន់ខ្ពស់​គណបក្ស​សង្គ្រោះ​ជាតិ​រូប​នេះ​ចោទ​ថា ជា​លិខិត​ដែល​មន្ត្រី​បក្ស​ប្រជាជន​កម្ពុជា​ត្រៀម​ទុក​ជា​មុន ដើម្បី​បង្ខំ​ឱ្យ​អ្នកស្រី វង រុន្នី ចុះចូល​ជាមួយ​គណបក្ស​របស់​ពួកគេ។

លោក អ៊ុំ សំអាន ចោទ​ថា លោក ហ៊ុន សែន កំពុង​ធ្វើ​នយោបាយ​បែប​ស្មោកគ្រោក​ដោយ​ចាប់​ចង​មន្ត្រី​បក្ស​ប្រឆាំង ដើម្បី​បង្ខិតបង្ខំ​ឲ្យ​ពួកគេ​ចុះចូល​ជាមួយ​បក្ស​របស់​ខ្លួន​ក្នុង​បំណង​ត្រួសត្រាយ​ផ្លូវ​ផ្ទេរ​អំណាច​ផ្ដាច់ការ​ត​ពូជ​ឱ្យ​កូនប្រុស​របស់​គាត់ គឺ​លោក ហ៊ុន ម៉ាណែត នៅ​ក្រោយ​ការ​បោះឆ្នោត​នេះ។

អ្នក​ស្រាវជ្រាវ​ការ​អភិវឌ្ឍ​សង្គម បណ្ឌិត មាស នី ធ្លាប់​បាន​លើកឡើង​កាលពី​ពេល​ថ្មីៗ​នេះ​ថា ស្ថានភាព​នយោបាយ​នៅ​កម្ពុជា​តែងតែ​មាន​ការ​រឹត​បន្តឹង​រាល់​អាណត្តិ​ឱ្យ​តែ​ថ្ងៃ​បោះឆ្នោត​ជិត​មក​ដល់ ហើយ​ការ​រឹត​បន្តឹង​នេះ​នឹង​បន្ត​រហូត​ទាល់តែ​ការ​បោះឆ្នោត​ត្រូវ​បាន​បញ្ចប់ ដែល​ជា​បញ្ហា​មួយ​ធ្វើ​ឱ្យ​មជ្ឈដ្ឋាន​ជាតិ និង​អន្តរជាតិ​តែង​រិះគន់​ថា ការ​បោះឆ្នោត​នៅ​កម្ពុជា​ស្ថិត​ក្នុង​ស្ថានភាព​ចង្អៀត ដែល​ពិបាក​នឹង​ធានា​នូវ​ការ​អនុវត្ត​សិទ្ធិ​របស់​ម្ចាស់​ឆ្នោត​ក្នុង​ការ​ជ្រើសរើស​គណបក្ស​នយោបាយ និង​មេដឹកនាំ​ដែល​ពលរដ្ឋ​ខ្មែរ​ស្រឡាញ់​ពេញចិត្ត។

ទាក់ទិន​នឹង​បញ្ហា​នេះ នាយក​ប្រតិបត្តិ​មជ្ឈមណ្ឌល​ការងារ និង​សិទ្ធិមនុស្ស (សង់ត្រាល់) លោក មឿន តុលា បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃទី​១៨ កក្កដា នេះ ដែល​ទំនង​មាន​ចេតនា​រិះគន់​ដល់​ស្ថានភាព​នយោបាយ​នៅ​កម្ពុជា​ដែល​ពោរពេញ​ដោយ​ការ​គាបសង្កត់​នៅ​មុន​ការ​បោះឆ្នោត​នា​ចុងខែ​កក្កដា នេះ​ថា ផ្លូវ​មួយ​បើកបរ​តែ​ម្នាក់​ឯង តែ​បែរ​ជា​ខ្លាច​គេ​វ៉ា​ជែង​ខ្លួន​ទៅវិញ ដែល​ខ្លឹមសារ​នៃ​ការ​លើកឡើង​នេះ គឺ​ហាក់​សំដៅ​ទៅ​រក​គណបក្ស​ប្រជាជន​កម្ពុជា​ដែល​ត្រូវ​គេ​មើល​ឃើញ​ថា​កំពុង​គាបសង្កត់​គណបក្ស​ភ្លើង​ទៀន​កាន់តែ​ខ្លាំង​ឡើងៗ​នៅ​ពេលនេះ។

ការ​បោះឆ្នោត​ជាតិ​ឆ្នាំ​២០២៣ ដែល​នៅ​សល់​តែ ៤​ថ្ងៃ​ទៀត​នេះ ប៉ុន្តែ​នៅ​មុន​ការ​បោះឆ្នោត​នេះ​ត្រូវ​គេ​សង្កេត​ឃើញ​ថា មន្ត្រី​ជាន់ខ្ពស់ សកម្មជន និង​សមាជិក​គណបក្ស​ភ្លើង​ទៀន​ត្រូវ​រង​នូវ​ការ​ចោទប្រកាន់ និង​ចាប់​ឃុំ​ខ្លួន​ជា​បន្តបន្ទាប់ ក្រោម​ការ​បង្គាប់​បញ្ជា​របស់​មេដឹកនាំ​បក្ស​កាន់​អំណាច​លោក ហ៊ុន សែន ក្នុង​នោះ​អ្នក​ដែល​សុខចិត្ត​ទទួល​កំហុស​ដើម្បី​រួច​ខ្លួន​ពី​ការ​ចោទប្រកាន់ ហើយ​សុំ​ចុះចូល​ជាមួយ​បក្ស​ប្រជាជន​កម្ពុជា​ត្រូវ​លោក ហ៊ុន សែន ផ្តល់​ឋានៈ​តួនាទី​ក្នុង​ជួរ​រដ្ឋាភិបាល​ផង​ដែរ ក្នុង​បំណង​ដើម្បី​កុំ​ឱ្យ​មាន​សំឡេង​ប្រឆាំង​ចំពោះ​ការ​បោះឆ្នោត​នៅ​ថ្ងៃទី​២៣ ខែ​កក្កដា ឆ្នាំ​២០២៣ នា​ពេល​ដ៏​ខ្លី​ខាងមុខ​នេះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស