មេធាវីខ្មែរអាមេរិកាំង កញ្ញា សេង ធារី ស្នើទៅតុលាការក្រុងភ្នំពេញឲ្យជួយយកកញ្ញាពីពន្ធនាគារខេត្តព្រះវិហារ ដើម្បីមកចូលរួមក្នុងបន្ទប់សវនាការផ្ទាល់នៅគ្រប់នីតិវិធីសវនាការទាំងអស់ បន្ទាប់ពីកញ្ញាបញ្ចប់កូដកម្មអត់អាហារអស់រយៈពេល ១០ថ្ងៃ។
យោងតាមមជ្ឈមណ្ឌលសិទ្ធិមនុស្សកម្ពុជា (CCHR) សរសេរលើហ្វេសប៊ុកនាថ្ងៃទី៣ ខែសីហា ឆ្នាំ២០២៣ ថា ក្រុមការងាររបស់ ម.ស.ម.ក បានទៅជួបសួរសុខទុក្ខកញ្ញា សេង ធារី នៅពន្ធនាគារខេត្តព្រះវិហារ កាលពីថ្ងៃទី០២ ខែសីហា ឆ្នាំ២០២៣។ ប្រភពដដែលបានលើកឡើងថា អំឡុងពេលសួរសុខទុក្ខនោះ កញ្ញា សេង ធារី បានស្នើសុំឲ្យតុលាការជួយយក ឬដឹកកញ្ញាពីពន្ធនាគារខេត្តព្រះវិហារ មកចូលរួមដោយផ្ទាល់នៅក្នុងបន្ទប់សវនាការនៅគ្រប់នីតិវិធីសវនាការទាំងអស់។
CCHR បញ្ជាក់ថា ស្ថានភាពសុខភាពរាងកាយ និងផ្លូវចិត្តរបស់កញ្ញាល្អប្រសើរផងដែរ បន្ទាប់ពីកញ្ញាបញ្ចប់កូដកម្មអត់អាហារ។ កញ្ញា សេង ធារី ធ្វើកូដកម្មបង្អត់អាហាររយៈពេល ១០ថ្ងៃ គឺចាប់ផ្ដើមតាំងពីថ្ងៃទី១៧ ខែកក្កដា និងបញ្ចប់នៅថ្ងៃទី២៦ ខែកក្កដា ដើម្បីជាសារទាមទារឲ្យរដ្ឋាភិបាលកម្ពុជារៀបចំការបោះឆ្នោតដោយសេរី និងយុត្តិធម៌ បើកលំហសិទ្ធិសេរីភាពពលរដ្ឋ សិទ្ធិនយោបាយ ហើយដោះលែងកញ្ញា និងអ្នកទោសនយោបាយផ្សេងទៀតឲ្យមានសេរីភាពវិញ។
ជុំវិញរឿងនេះ ក្រុមការងារទទួលបន្ទុកការឃុំខ្លួនតាមទំនើងចិត្តរបស់អង្គការសហប្រជាជាតិ បានចេញសេចក្តីថ្លែងការណ៍មួយចុះថ្ងៃទី១២ ខែកក្កដា ឆ្នាំ២០២៣ ដោយចាត់ទុកការឃុំខ្លួនកញ្ញា សេង ធារី ធ្វើឡើងដោយបំពានទៅនឹងច្បាប់អន្តរជាតិ និងជាប់ហេតុផលនយោបាយ។
អ្នកជំនាញទាំងនោះបញ្ជាក់ថា ការឃុំខ្លួនកញ្ញា សេង ធារី គឺស្ថិតនៅក្នុងការបង្ក្រាបជាទ្រង់ទ្រាយទៅលើសេរីភាពនៃការបញ្ចេញមតិ ហើយការរំលោភលើនីតិវិធីត្រឹមត្រូវតាមច្បាប់ជាការរៀបចំដើម្បីគំរាមកំហែងកញ្ញាឲ្យស្ងាត់ស្ងៀម។
មេធាវីខ្មែរអាមេរិកាំង កញ្ញា សេង ធារី ត្រូវតុលាការក្រោមបញ្ជាលោក ហ៊ុន សែន កាត់ទោសឲ្យជាប់ពន្ធនាគាររយៈពេល ៦ឆ្នាំ កាលពីថ្ងៃទី១៤ ខែមិថុនា ឆ្នាំ២០២២ ដោយចោទប្រកាន់ពីបទរួមគំនិតក្បត់ និងបទញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម ទាក់ទងនឹងផែនការមាតុភូមិនិវត្តន៍មិនជោគជ័យរបស់លោក សម រង្ស៊ី កាលពីចុងឆ្នាំ២០១៩។
ចាប់តាំងពីឆ្នាំ២០២២ ដល់ខែសីហា ឆ្នាំ២០២៣ កញ្ញា សេង ធារី ដែលត្រូវបានឃុំខ្លួនរយៈពេលជាងមួយឆ្នាំមកហើយ បន្ទាប់ពីសមត្ថកិច្ចចាប់ និងបញ្ជូនទៅឃុំខ្លួននៅពន្ធនាគារក្នុងខេត្តព្រះវិហារ កាលពីថ្ងៃទី១៥ ខែមិថុនា ឆ្នាំ២០២២។
ការចោទប្រកាន់ និងបញ្ជូនកញ្ញា សេង ធារី ទៅឃុំនៅពន្ធនាគារខេត្តព្រះវិហារ ឆ្ងាយពីសាច់ញាតិ និងមិត្តភក្ដិនេះ ត្រូវបានអ្នកវិភាគនយោបាយ អង្គការជាតិ និងអង្គការអន្តរជាតិ ចាត់ទុកថាជាការរំលោភសិទ្ធិមនុស្សធ្ងន់ធ្ងរក្រោមការដឹកនាំបែបផ្ដាច់ការរបស់លោក ហ៊ុន សែន។ ពួកគេទាមទារឲ្យរដ្ឋាភិបាលដែលដឹកនាំដោយលោក ហ៊ុន សែន និងកូនប្រុសរបស់លោក គឺលោក ហ៊ុន ម៉ាណែត ដោះលែងកញ្ញា សេង ធារី និងសកម្មជននយោបាយផ្សេងៗជាបន្ទាន់ ដោយគ្មានលក្ខខណ្ឌ ដើម្បីលើកកម្ពស់ការគោរពសិទ្ធិមនុស្សនៅកម្ពុជាឡើងវិញ៕