38 C
Phnom Penh

ពលករ​ខ្មែរ​ថា​ការ​លើកឡើង​របស់​ស្ថានទូត​កម្ពុជា​នៅ​ជប៉ុន​បង្ហាញ​ពី​ទង្វើ​អសមត្ថភាព​ក្នុង​ការងារ

ដោយ ឌឹ ខេមបូឌា ដេលី

បទវិភាគ

ពលករ​ខ្មែរ​ដែល​កំពុង​មាន​វិបត្តិ​ការងារ​នៅ​ប្រទេស​ជប៉ុន លើកឡើង​ថា ការ​ដែល​ស្ថានទូត​កម្ពុជា​ប្រចាំ​នៅ​ប្រទេស​ជប៉ុន មិន​ដឹង​រឿង​ដាច់​ចរន្ត​អគ្គិសនី​រហូត​ធ្វើ​ឱ្យ​ប៉ះពាល់​ដល់​ដំណើរការ​ស្ថានីយ​រថភ្លើង គឺ​បង្ហាញ​ពី​ទង្វើ​អសមត្ថភាព​ក្នុង​ការងារ​របស់​ពួកគេ​យ៉ាង​ពិតប្រាកដ។

ប្រភព​ដដែល​បញ្ជាក់​ថា មន្ត្រី​ស្ថានទូត​ទំនង​ជា​ដឹង​តែ​រឿង​ណា​ដែល​សារព័ត៌មាន​ចុះផ្សាយ​ប៉ុណ្ណោះ ប៉ុន្តែ​បញ្ហា​ណា​ដែល​សារព័ត៌មាន​មិន​បាន​ចុះផ្សាយ ពួកគេ​ប្រហែលជា​មិន​បាន​ដឹង​នោះ​ទេ ដូច្នេះ​មាន​ន័យ​ថា ពួកគេ​ក៏​មិន​បាន​ដឹង​ពី​សុខទុក្ខ​ពលករ​ខ្មែរ​ដូច​គ្នា​ដែរ បើ​ស្ថានទូត​រង់ចាំ​មើល​តែ​សារព័ត៌មាន​ចុះផ្សាយ​នោះ។

ពលករ​ខ្មែរ​ដែល​កំពុង​បម្រើ​ការងារ​នៅ​ប្រទេស​ជប៉ុន ប្រាប់​សារព័ត៌ The Cambodia Daily ក្នុង​លក្ខខណ្ឌ​មិន​បញ្ចេញ​ឈ្មោះ​នៅ​ថ្ងៃទី​២១ សីហា នេះ​ថា នៅ​ប្រទេស​ជប៉ុន​មាន​ក្រុមហ៊ុន​សូឡា​ផ្គត់ផ្គង់​អគ្គិសនី​ឱ្យ​ក្រុមហ៊ុន​រថភ្លើង​ជប៉ុន ហើយ​ក្រុមហ៊ុន​ផ្គត់ផ្គង់​អគ្គិសនី​នេះ​ត្រូវ​បាន​ពលករ​ខ្មែរ​លួច​កាត់​យក​ខ្សែភ្លើង​ដែល​បណ្តាល​ឱ្យ​ប៉ះពាល់​ដល់​ដំណើរការ​ដល់​ក្រុមហ៊ុន​រថភ្លើង​ផង​ដែរ ប៉ុន្តែ​ដោយសារ​ការ​ខូចខាត​មាន​កម្រិត​សម​ល្មម​ដែល​អាច​ជួសជុល​បាន ខាង​ក្រុមហ៊ុន​ក៏​បាន​ជួសជុល​តែម្តង ហើយ​ខាង​សារព័ត៌មាន​ក៏​មិន​បាច​ចុះផ្សាយ​អំពី​ករណី​នេះ​ច្រើន​ដែរ ប៉ុន្តែ​ខាង​ក្រុមហ៊ុន​បាន​ទៅ​រាយការណ៍​ប្រាប់​ប៉ូលិស​ពី​រឿង​នេះ​ដើម្បី​ឱ្យ​មាន​ការ​ស៊ើបអង្កេត។

ប្រភព​ដដែល​លើកឡើង​ថា ដោយសារតែ​ខាង​ក្រុមហ៊ុន​បាន​ជួសជុល​ការ​ខូចខាត​នោះ មន្ត្រី​ប៉ូលិស​ជប៉ុន​ក៏​មិន​បាន​សួរ​ដេញដោល​រឿង​ទៅ​កាន់​មន្ត្រី​ស្ថានទូត​ខ្មែរ​ដែរ ប៉ុន្តែ​ករណី​នេះ​បង្ហាញ​ថា ស្ថានទូត​ខ្មែរ​គាត់​នឹង​មិន​ដឹង​រឿង​អ្វី​ទាំងអស់ ប្រសិនបើ​ប្រព័ន្ធ​ផ្សព្វផ្សាយ​របស់​ប្រទេស​ជប៉ុន​មិន​បាន​ចុះផ្សាយ​នោះ ដូច្នេះ​រឿង​ថៅកែ​ក្រុមហ៊ុន​រំលោភ​បំពាន​សិទ្ធិ​ការងារ​នៅ​ក្នុង​កន្លែង​ធ្វើការ ក៏​ស្ថានទូត​ខ្មែរ​មិន​ដឹង​ដូច​គ្នា​ដែរ។ ជាង​នេះ​ទៀត រឿង​សមាគម​គាបសង្កត់​ពួកគេ​ឱ្យ​ធ្វើ​តាម​ការ​រំលោភ​បំពាន​សិទ្ធិ​ការងារ​របស់​ថៅកែ​ក្រុមហ៊ុន ក៏​ស្ថានទូត​ខ្មែរ​រឹតតែ​មិន​ដឹង​ថែម​ទៀត។

ពលករ​ខ្មែរ​ដែល​កំពុង​មាន​វិបត្តិ​ទាំងនោះ​ត្អូញត្អែរ​ថា ពួកគេ​ឆ្លងដែន​ទៅ​ធ្វើ​ការងារ​នៅ​ប្រទេស​ជប៉ុន គឺ​ដើម្បី​រក​ការងារ​ស្រប​ច្បាប់​សម្រាប់​ចិញ្ចឹម​គ្រួសារ មិនមែន​ដើម្បី​ទៅ​ធ្វើ​ចោរ​នោះ​ទេ ប៉ុន្តែ​នៅ​កន្លែង​ធ្វើការ​ត្រូវ​ថៅកែ​រំលោភ​បំពាន​សិទ្ធិ​ការងារ សមាគម​ដែល​បញ្ជូន​ខ្លួន​មក​ក៏​មិន​ជួយ​រក​ដំណោះស្រាយ មាន​តែ​គាបសង្កត់ ខណៈ​ស្ថានទូត​មិន​អើពើ​ចុះ​ជួយ​ពួកគេ ដូច្នេះ​ពួកគេ​មាន​តែ​រត់​គេច​ចេញពី​កន្លែង​ធ្វើការ​ប៉ុណ្ណោះ ដើម្បី​រក្សា​ជីវិត​ឱ្យ​នៅ​រស់​បន្ត​ទៀត។

ពលករ​ខ្មែរ​ខាងលើ​លើកឡើង​ថា ពួកគេ​មិន​ចង់​រត់​គេច​ពី​កន្លែង​ធ្វើការ​របស់​ពួកគេ​ទេ ប៉ុន្តែ​ដោយសារតែ​ពួកគេ​ទ្រាំ​នឹង​ការ​ធ្វើបាប​របស់​ថៅកែ​ក្រុមហ៊ុន​មិន​បាន។ ប្រភព​ដដែល​បន្ត​ថា ដើម្បី​រក​ប្រាក់​ចាយវាយ​ប្រចាំ​ថ្ងៃ ពួកគេ​មាន​តែ​ធ្វើ​ការងារ​ខុស​ច្បាប់​ប៉ុណ្ណោះ ប៉ុន្តែ​ការងារ​ខុស​ច្បាប់ គឺ​មិន​ទៀងទាត់​ឡើយ ជួនកាល​បាន​ធ្វើ ជួនកាល​មិន​បាន​ធ្វើ ដូច្នេះ​ពួកគេ​គ្មាន​លុយ​សម្រាប់​ចំណាយ​ប្រចាំ​ថ្ងៃ​នោះ​ទេ អ៊ីចឹង​ហើយ ដោយសារតែ​ទាល់ច្រក ពួកគេ​ក៏​សម្រេច​ចិត្ត​ទាក់ទង​ក្រុម​ចោរ​ចូលរួម​លួច​របស់របរ​ផ្សេងៗ​ដើម្បី​បាន​លុយ​ចិញ្ចឹម​ជីវិត​បន្ត​ទៀត។

ប្រភព​ដែល​បញ្ជាក់​ថា ប្រសិនបើ​ស្ថានទូត​ខ្មែរ​យកចិត្ត​ទុកដាក់​នឹង​ពលករ ជួយ​ដោះស្រាយ​បញ្ហា​នៅ​កន្លែង​ការងារ កុំ​ឱ្យ​មាន​ការ​រំលោភ​បំពាន​ពី​ថៅកែ​រោងចក្រ ពួកគេ​ក៏​មិន​ចាំបាច់​រត់​ចេញពី​កន្លែង​ធ្វើការ​រហូត​ធ្លាក់​ខ្លួន​ធ្វើជា​ចោរ​លួច ដើម្បី​រក​លុយ​ចិញ្ចឹម​ក្រពះ​នោះ​ដែរ ប៉ុន្តែ​នៅ​ពេល​មាន​បញ្ហា ស្ថានទូត​ខ្មែរ​មិន​ត្រឹមតែ​មិន​ប្រឹងប្រែង​ដោះស្រាយ​បញ្ហា​ឱ្យ​ពួកគេ​ទេ តែ​បែរ​ជា​ចោទ​ពលករ​ដែល​កំពុង​ជួប​វិបត្តិ​ទាំងនោះ​ថា​ជា​ក្រុម​ប្រឆាំង ដើម្បី​ទម្លាក់​កំហុស​លើ​ពួកគេ​ទៅវិញ។

កាលពី​ថ្ងៃទី​១៩ ខែ​សីហា ឆ្នាំ​២០២៣ ស្ថានទូត​កម្ពុជា​ប្រចាំ​នៅ​ប្រទេស​ជប៉ុន បាន​អះអាង​ថា អំពើ​ចោរកម្ម​លួច​កាត់​ខ្សែភ្លើង​ដែល​កើតមាន​កន្លងមក គឺ​ជា​ការ​លួច​កាត់​ខ្សែភ្លើង​សូឡា​ប៉ុណ្ណោះ ពុំ​មែន​ខ្សែភ្លើង​ធ្វើ​ឱ្យ​ស្ថានីយ​រថភ្លើង​លែង​ដំណើរការ​នោះ​ទេ ដែល​ការ​លួច​កាត់​នេះ​មាន​ការ​រៀបចំ​ជា​ប្រព័ន្ធ ពុំ​មែន​គ្រាន់តែ​ដោយសារ​ជួប​វិបត្តិ​អត់​ការងារ​ធ្វើ​នោះ​ដែរ។

ស្ថានទូត​ខ្មែរ​លើកឡើង​ថា សហជីព​ដែល​បាន​លើកឡើង​ពី​បញ្ហា​នេះ ពុំ​មែន​ជា​សហជីព​ទទួល​បន្ទុក​ការពារ​សិទ្ធិ​ពលករ​ខ្មែរ​នោះ​ទេ ក៏ប៉ុន្តែ​ជា​ប្រភេទ​សហជីព​លើក​ទឹកចិត្ត​ឱ្យ​កម្មសិក្សាការី​បរទេស​ប្ដឹង​នឹង​ក្រុមហ៊ុន​ប៉ុណ្ណោះ ជាពិសេស​សហជីព​នោះ​ពុំ​ដែល​ទំនាក់ទំនង​មក​ស្ថានទូត​ឡើយ ព្រោះ​ថា​សហជីព​នោះ​គឺ​មាន​បុគ្គលិក​ខ្មែរ​ដែល​មាន​និន្នាការ​គាំទ្រ​អតីត​គណបក្ស​សង្គ្រោះ​ជាតិ។

ជាង​នេះ​ទៀត ស្ថានទូត​កម្ពុជា​បញ្ជាក់​ថា ចំពោះ​ករណី​ធ្វើ​អត្តឃាត​របស់​កម្មសិក្សាការី​ក្នុង​ឆ្នាំ​២០២២ មិន​មែន​ដោយសារ​ការ​រង​សម្ពាធ​ការងារ​នោះ​ទេ គឺជា​ការ​ចាញ់បោក​រត់​តាម​មេខ្យល់​ទៅ​ធ្វើ​ការ​ខុស​ច្បាប់​ប៉ុណ្ណោះ ខណៈ​ក្រុម​ការងារ​ស្ថានទូត​ក៏​បាន​ចូលរួម​កម្មវិធី​បូជាសព​នេះ​ផង​ដែរ។

កាលពី​ថ្ងៃទី​១៧ ខែ​សីហា ឆ្នាំ​២០២៣ សហជីព​ប្រចាំ​ប្រទេស​ជប៉ុន ដែល​ធ្វើការ​លើ​វិស័យ​ការងារ ត្អូញត្អែរ​ថា ពលករ​ខ្មែរ​ដែល​ប្រព្រឹត្ត​អំពើ​ចោរកម្ម​ដោយ​ការ​លួច​កាត់​ខ្សែភ្លើង​រហូត​ធ្វើ​ឱ្យ​ស្ថានីយ​រថភ្លើង​លែង​ដំណើរការ​ជា​បន្តបន្ទាប់​មក​នេះ គឺ​ដោយសារតែ​ពួកគេ​ជួប​វិបត្តិ​អត់​ការងារ ព្រោះ​តែ​រត់​ចេញពី​ក្រុមហ៊ុន​ដែល​ថៅកែ​រំលោភ​សិទ្ធិ​ការងារ និង​គ្មាន​ការ​ជួយ​ដោះស្រាយ​បញ្ហា​ពី​ស្ថានទូត​ខ្មែរ។

ដោយឡែក​ករណី​ពាក់ព័ន្ធ​នឹង​ពលករ​ខ្មែរ​ដែល​ធ្វើ​អត្តឃាត​កាលពី​ថ្ងៃទី​៧ ខែ​មករា ឆ្នាំ​២០២២ ឈ្មោះ លោក តេង ឆវ័ន្ត នៅ​ខេត្ត​កាណាកាវ៉ា ប្រទេស​ជប៉ុន គឺជា​ករណី​រង​សម្ពាធ​ពី​ការងារ​ដែល​គ្មាន​ការ​ជួយ​ដោះស្រាយ​ពី​ស្ថានទូត​សុទ្ធសាធ ព្រោះ​ថា​ដោយសារតែ​គ្មាន​ដំណោះស្រាយ​ឱ្យ​ពលករ​រូប​នោះ​រួច​ផុត​ពី​ការ​រំលោភបំពាន​សិទ្ធិ​ការងារ​នេះ​ហើយ ទើប​រូបគេ​ចាញ់​បោក​មេខ្យល់​ទៅ​ធ្វើការ​ដោយ​ខុស​ច្បាប់។

ជាង​នេះ​ទៀត នៅ​ពេល​ដែល​ពលករ​នោះ​បាន​ស្លាប់ ភាគី​ខាង​ក្រុមហ៊ុន​បាន​បដិសេធ​មិន​ផ្តល់​សំណង​នោះ​ទេ ខណៈ​ស្ថានទូត​ក៏​មិន​បាន​ចេញ​មុខ​ទាមទារ​សំណង​នោះ​ដែរ ប៉ុន្តែ​ដោយសារតែ​សហជីព​ដែល​មាន​មូលដ្ឋាន​នៅ​ប្រទេស​ជប៉ុន​ធ្វើការ​តវ៉ា ទើប​ភាគី​ខាង​ក្រុមហ៊ុន​ផ្តល់​សំណង​ទៅ​ឱ្យ​ជនរងគ្រោះ​តាម​ច្បាប់។

ក្រុម​អ្នក​សង្កេតការណ៍​លើកឡើង​ថា វា​ជា​រឿង​ធម្មតា​ទៅ​ហើយ​សម្រាប់​មន្ត្រី​រដ្ឋាភិបាល​កម្ពុជា​ដែល​តែង​ចោទ​ពលករ​កម្មករ​ដែល​តវ៉ា​រក​យុត្តិធម៌​ពី​ការ​រំលោភ​សិទ្ធិ​ការងារ តែ​បែរ​ជា​ត្រូវ​មន្ត្រី និង​ស្ថាប័ន​ពាក់ព័ន្ធ​ចោទ​ពួកគេ​ថា​ជា​ក្រុម​ប្រឆាំង​មាន​ចេតនា​ញុះញង់​នោះ ព្រោះ​ថា​ការ​ចោទប្រកាន់​បែប​នេះ​គឺជា​ល្បិច​ដែល​ពួកគេ​ព្យាយាម​បិទបាំង​ពី​កំហុស​របស់​ខ្លួន​ក្នុង​ចេតនា​មិន​ទទួល​ខុសត្រូវ​លើ​ការងារ​របស់​ខ្លួន​ដែល​បាន​ប្រព្រឹត្ត​ខុស​កន្លងមក​នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស