30 C
Phnom Penh

លោក ថាក់ស៊ីន អតីត​នាយករដ្ឋមន្ត្រី​ថៃ​ត្រូវ​បញ្ជូន​ទៅ​មន្ទីរពេទ្យ​បន្ទាប់ពី​ចូល​ពន្ធនាគារ​បាន​មួយ​យប់

ដោយ ឌឹ ខេមបូឌា ដេលី

បទវិភាគ

អតីត​នាយករដ្ឋមន្ត្រី​ថៃ លោក ថាក់ស៊ីន ស៊ីណាវ៉ាត់ ត្រូវ​បាន​ដឹក​ចូល​ទៅ​កាន់​មន្ទីរពេទ្យ បន្ទាប់ពី​លោក​ស្ថិត​ក្នុង​ពន្ធនាគារ​បាន​មួយ​យប់​នៅ​យប់​ថ្ងៃទី​២២ ខែ​សីហា ជា​ថ្ងៃ​ដែល​លោក​វិល​ចូល​ប្រទេស​ថៃ​វិញ​ក្រោយពី​និរទេស​ខ្លួន​នៅ​ក្រៅ​ប្រទេស​រយៈពេល​ជិត ១៧​ឆ្នាំ។

បើ​តាម​មន្ត្រី​ពន្ធនាគារ​ឲ្យ​ដឹង​ថា លោក ថាក់ស៊ីន មាន​ជំងឺ​សម្ពាធ​ឈាម និង​បេះដូង ដែល​ក្នុង​ហេតុផល​នេះ​បាន​នាំ​ឱ្យ​គ្រូពេទ្យ​យល់ព្រម​ឱ្យ​អតីត​នាយករដ្ឋមន្ត្រី​វ័យ ៧៤​ឆ្នាំ​រូប​នេះ​សម្រាក​ព្យាបាល​នៅ​មន្ទីរពេទ្យ​រហូត​ស្ថានភាព​នៃ​សុខភាព​របស់​លោក​ប្រក្រតី​វិញ។

ទីភ្នាក់ងារ​សារព័ត៌មាន Reuters បាន​ចុះផ្សាយ​នៅ​ថ្ងៃទី​២៣ ខែ​សីហា នេះ​ថា លោក ថាក់ស៊ីន ត្រូវ​បាន​ដឹក​ទៅ​ព្យាបាល​នៅ​មន្ទីរពេទ្យ​របស់​ប៉ូលិស​ក្រុង​បាងកក នៅ​ម៉ោង​ទៀបភ្លឺ​ថ្ងៃទី​២៣ ខែ​សីហា។

វេជ្ជបណ្ឌិត Soponrat Singhajaru បាន​បញ្ជាក់​ថា មក​ដល់​រសៀល​ថ្ងៃ​ពុធ​នេះ ស្ថានភាព​នៃ​សុខភាព​របស់​លោក ថាក់ស៊ីន បាន​ប្រសើរ​បន្តិច​ហើយ។ ចំពោះ​អ្នក​នាំពាក្យ​នៃ​អគ្គស្នងការដ្ឋាន​នគរបាល​ជាតិ លោក Prachub Wongsuk បាន​ប្រាប់​ទីភ្នាក់ងារ​សារព័ត៌មាន Reuters ថា ពេទ្យ​ប្រចាំការ​នៅ​ពន្ធនាគារ​បាន​វាយតម្លៃ​ឃើញ​ថា​មាន​ការ​ខ្វះ​វេជ្ជបណ្ឌិត និង​ឧបករណ៍​ពេទ្យ​ដែល​ពិបាក​មើល​ថែ​អ្នកជំងឺ ជា​ហេតុ​ត្រូវ​បញ្ជូន​លោក ថាក់ស៊ីន ទៅ​កាន់​មន្ទីរពេទ្យ។

អតីត​នាយករដ្ឋមន្ត្រី​ថៃ លោក ថាក់ស៊ីន ស៊ីណាវ៉ាត់ ត្រូវ​បាន​ប៉ូលិស​ឃាត់​ខ្លួន​ភ្លាមៗ ហើយ​បញ្ជូន​ទៅ​កាន់​តុលាការ​កំពូល បន្ទាប់ពី​រូបលោក​វិលត្រឡប់​ចូល​ប្រទេស​ថៃ តាម​ជើង​យន្តហោះ​ចុះចត​នៅ​អាកាសយានដ្ឋាន Don Mueang នៅ​ទីក្រុង​បាងកក នៅ​ម៉ោង ៩​ព្រឹក​កាលពី​ថ្ងៃទី​២២ សីហា។ តុលាការ​កំពូល​បាន​ចេញ​សាលដីកា​នៅ​ចំពោះ​មុខ​លោក​ដោយ​ផ្ដន្ទាទោស​លោក​រយៈពេល ៨​ឆ្នាំ​ក្នុង​សំណុំរឿង​ព្រហ្មទណ្ឌ ក្រោម​បទ​ចោទ​ប្រព្រឹត្ត​អំពើពុករលួយ និង​បំពាន​អំណាច​រដ្ឋ​កាល​អំឡុង​លោក​កាន់​តំណែង​នាយករដ្ឋមន្ត្រី។

ក្រោយពី​តុលាការ​កំពូល​បាន​បញ្ជាក់​អំពី​ការ​សម្រេច​ផ្ដន្ទាទោស​អតីត​នាយករដ្ឋមន្ត្រី​ថៃ​រូប​នេះ​ហើយ សមត្ថកិច្ច​ពន្ធនាគារ​បាន​នាំ​ខ្លួន​លោក​តាម​រថយន្ត​ដឹក​ទៅ​ឃុំ​ខ្លួន​ក្នុង​ពន្ធនាគារ​ក្នុង​តំបន់​មួយ​នៃ​ទីក្រុង​បាងកក។ លោក ថាក់ស៊ីន ធ្លាប់​បាន​ច្រានចោល​រាល់​ការ​ចោទប្រកាន់​ទាំងឡាយ​ប្រឆាំង​នឹង​រូបលោក ដោយ​បាន​ចោទ​ថា​តុលាការ​មាន​ចេតនា​នយោបាយ។

លោក ថាក់ស៊ីន ជា​នាយករដ្ឋមន្ត្រី​ជាប់​ឆ្នោត​មកពី​គណបក្ស​ថៃរ៉ាក់ថៃ ដែល​ជា​បក្ស​ដើម​របស់​បក្ស​ភឿថៃ។ លោក​បាន​ឡើង​កាន់​តំណែង​នាយករដ្ឋមន្ត្រី​នៅ​ឆ្នាំ​២០០១ ដោយ​បាន​កាន់​តំណែង​បាន​ពេញ​មួយ​អាណត្តិ ៥​ឆ្នាំ។

លោក​បាន​កាន់​តំណែង​នាយករដ្ឋមន្ត្រី​អាណត្តិ​ទី​២ បាន​ជិត​មួយ​ឆ្នាំ​ប៉ុណ្ណោះ ក៏​ត្រូវ​ពួក​យោធា​ធ្វើ​រដ្ឋប្រហារ​នៅ​ខែ​កញ្ញា ឆ្នាំ​២០០៦។ ការ​វិល​មក​វិញ​របស់​អតីត​នាយករដ្ឋមន្ត្រី​ថៃ​រូប​នេះ គឺជា​ការ​បិទ​បញ្ចប់​ភាព​ជា​អ្នក​នយោបាយ​និរទេស​ខ្លួន​រយៈពេល​ជិត ១៧​ឆ្នាំ។

ហេតុ​អ្វី​បាន​ជា​លោក ថាក់ស៊ីន សម្រេច​យក​ថ្ងៃទី​២២ ខែ​សីហា ជា​ការ​វិល​ចូល​ប្រទេស​ថៃ​វិញ?

អ្នក​សង្កេតការណ៍​មើល​ឃើញ​ថា នយោបាយ​របស់​បក្ស​ភឿថៃ ផ្ដោត​ទៅ​លើ​លោក ថាក់ស៊ីន តាំងតែ​ពី​បក្ស​នេះ​បង្កើត​ឡើង ក្រោយ​បក្ស​ថៃរ៉ាក់ថៃ ដឹកនាំ​ដោយ​លោក ថាក់ស៊ីន​ផ្ទាល់​ត្រូវ​បាន​រំលាយ ហើយ​ក្រុម​អ្នក​នយោបាយ​របស់​លោក ថាក់ស៊ីន និង​ប្អូនស្រី​របស់​លោក គឺ​អតីត​នាយករដ្ឋមន្ត្រី យីងឡាក់ រួម​ទាំង​សាច់ញាតិ​របស់​លោក ចាំបាច់​ត្រូវ​បង្កើត​បក្ស​នេះ​ឡើង។

ព្រោះ​តែ​ជា​ឱកាស​ដ៏​ល្អ​ចំ​ពេល​បក្ស​ភឿថៃ បាន​ឈាន​មុខ​គេ​ក្នុង​ការ​បង្កើត​រដ្ឋាភិបាល​ចម្រុះ​ក្រោម​ស្ថានការណ៍​ទៅ​រក​ការ​ផ្សះផ្សា​ជាតិ រហូត​មាន​កិច្ចព្រមព្រៀង​ជាមួយ​បក្ស​យោធា​ទៀត​ផង​នោះ ជា​ហេតុ​នាំ​ឱ្យ​លោក ថាក់ស៊ីន ចាំបាច់​ត្រូវ​ប្រើ​ឱកាស​នេះ​វិល​ចូល​ប្រទេស​ថៃ​វិញ​ដោយ​មិន​ត្រូវ​អូស​បន្លាយ​ពេល​ទៀត​នោះ​ទេ។

ឱកាស​ដ៏​ល្អ​ទៀត​នោះ លោក ថាក់ស៊ីន អាច​គិត​ថា​ថ្ងៃទី​២២ សីហា ជា​ការ​បើក​ប្រជុំ​រដ្ឋសភា​ដើម្បី​ជ្រើសតាំង​នាយករដ្ឋមន្ត្រី​ថ្មី ដែល​បេក្ខជន​មកពី​បក្ស​ភឿថៃ​ទៀត​នោះ បាន​នាំ​ឱ្យ​លោក​ត្រូវតែ​សម្រេច​ដូចនេះ។

ទីបំផុត សភា​ថៃ​បាន​បោះឆ្នោត​ជ្រើសតាំង​លោក Srettha Thavisin ជា​នាយករដ្ឋមន្ត្រី​ថ្មី​របស់​រាជាណាចក្រ​ថៃ ដែល​មកពី​បក្ស​ភឿថៃ។

លោក ថាក់ស៊ីន ត្រូវ​បាន​ចាត់ទុក​ថា​ជា​មេ​បក្ស​ភឿថៃ តាម​ព្រឹត្តិន័យ។

ព្រឹត្តិការណ៍​ជា​វិជ្ជមាន​នេះ នឹង​នាំ​ទៅ​រក​ការ​បិទ​បញ្ចប់​ការ​ជាប់​គាំង​នយោបាយ​ចាប់តាំងពី​ការ​បោះឆ្នោត​សភា​កាលពី​ថ្ងៃទី​១៤ ខែ​ឧសភា មក​នេះ។

តាម​លទ្ធផល​បោះឆ្នោត​បង្ហាញ​ថា សមាជិក​ព្រឹទ្ធសភា និង​រដ្ឋសភា ៤៨២​រូប​បាន​បោះឆ្នោត​គាំទ្រ​លោក Srettha ដែល​នាំ​ឱ្យ​លោក​ជាប់​ឆ្នោត​ជា​នាយករដ្ឋមន្ត្រី​ដោយ​មាន​សំឡេង​ភាគច្រើន​លើសលប់​ក្រោម​ច្បាប់​រដ្ឋធម្មនុញ្ញ​ថៃ ឆ្នាំ​២០១៧ ដែល​ពួក​យោធា​តាក់តែង​ឡើង។

ឥឡូវ​នេះ លោក Srettha Thavisin ដែល​ជា​អ្នក​នយោបាយ​ជំនាន់​ក្រោយ​នៃ​គណបក្ស​ភឿថៃ បាន​ក្លាយ​ជា​នាយករដ្ឋមន្ត្រី​ទី​៣០ របស់​រាជាណាចក្រ​ថៃ ដោយ​ឡើង​ជំនួស​លោក ប្រាយុទ្ធ ចាន់អូចា ជា​នាយករដ្ឋមន្ត្រី​ទី​២៩។ លោក Srettha ជា​នាយករដ្ឋមន្ត្រី​នៃ​រដ្ឋាភិបាល​ចម្រុះ ១១​គណបក្ស ក្នុង​នោះ​មាន​បក្ស​របស់​ពួក​យោធា​ផង​ដែរ។

ក្រុម​អ្នក​សង្កេតការណ៍​យល់​ថា យោង​តាម​សុខភាព និង​អាយុ​របស់​លោក ថាក់ស៊ីន ដែល​វ័យ​កាន់តែ​ចាស់​ហើយ​នោះ ព្រះមហាក្សត្រ​អាច​នឹង​លើកលែង​ទោស​មហាសេដ្ឋី​ថៃ​រូប​នេះ​តាម​សំណើ​របស់​នាយករដ្ឋមន្ត្រី​ដែល​មកពី​បក្ស​ភឿថៃ ក្រោម​បរិយាកាស​នៃ​ការ​ផ្សះផ្សា​ជាតិ និង​បញ្ឈប់​ជម្លោះ​ជាមួយ​នឹង​ពួក​យោធា៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស