34.8 C
Phnom Penh

សាលា​ឧទ្ធរណ៍​គ្រោង​បើក​សវនាការ​សំណុំរឿង​ចាងហ្វាង​គេហទំព័រ​ស្រទាប់​យុវវ័យ​នៅ​ចុង​ខែ​សីហា

ដោយ ឌឹ ខេមបូឌា ដេលី

បទវិភាគ

សាលា​ឧទ្ធរណ៍​ភ្នំពេញ​គ្រោង​បើក​សវនាការ​សំណុំរឿង​បរិហារកេរ្តិ៍​តាម​ប្រព័ន្ធ​ផ្សព្វផ្សាយ​លើ​ចាងហ្វាង​គេហទំព័រ​ស្រទាប់​យុវវ័យ នៅ​ថ្ងៃទី​២៨ ខែ​សីហា ឆ្នាំ​២០២៣ បន្ទាប់ពី​បាន​ចុះផ្សាយ​រឿង​ជម្លោះ​ដីធ្លី​រវាង​ឧត្តមសេនីយ៍​យោធា​ពាក់​ផ្កាយ​២ ម្នាក់​ជាមួយ​ពលរដ្ឋ ៤​គ្រួសារ​កាលពី​ឆ្នាំ​២០២០។

កាលពី​ថ្ងៃទី​១៥ ខែ​មីនា ឆ្នាំ​២០២២ សាលាដំបូង​រាជធានី​ភ្នំពេញ​បាន​សម្រេច​ដោយ​បង្គាប់​ចាងហ្វាង​គេហទំព័រ​ស្រទាប់​យុវវ័យ លោក ប៉ែន នួន បង់​ប្រាក់​ពិន័យ​ចំនួន ៣​លាន​រៀល និង​ប្រាក់​សំណង​ជំងឺចិត្ត ៦​លាន​រៀល​ដល់​មន្ត្រី​យោធា។ ដោយ​មិន​សុខចិត្ត​នឹង​ការ​សម្រេច​នេះ លោក​បាន​ប្ដឹង​សាទុក្ខ​មក​សាលា​ឧទ្ធរណ៍ ដើម្បី​ឲ្យ​តុលាការ​ជាន់ខ្ពស់​មួយ​នេះ​ជួយ​រក​យុត្តិធម៌​ឲ្យ​ខ្លួន។

មជ្ឈមណ្ឌល​សិទ្ធិមនុស្ស​កម្ពុជា (CCHR) បាន​ឲ្យ​ដឹង​កាលពី​ថ្ងៃទី​២៣ ខែ​សីហា ឆ្នាំ​២០២៣ ថា សាលា​ឧទ្ធរណ៍​នឹង​បើក​សវនាការ​សំណុំរឿង​បរិហារកេរ្តិ៍​តាម​ប្រព័ន្ធ​ផ្សព្វផ្សាយ​លើ​លោក ប៉ែន នួន នៅ​វេលា​ម៉ោង ២:០០​រសៀល​នា​ថ្ងៃទី​២៨ ខែ​សីហា ឆ្នាំ​២០២៣ ខាងមុខ​នេះ។

CCHR បញ្ជាក់​ថា ចាងហ្វាង​គេហទំព័រ​ស្រទាប់​យុវវ័យ លោក ប៉ែន នួន ត្រូវ​បាន​ឧត្តមសេនីយ៍​យោធា​លោក អ៊ុក គឹមលី ប្ដឹង​ទៅ​តុលាការ បន្ទាប់ពី​លោក​បាន​ចុះផ្សាយ​រឿង​ជម្លោះ​ដីធ្លី​រវាង​ពលរដ្ឋ​ចំនួន ៤​គ្រួសារ​ជាមួយ​នឹង​ឧត្តមសេនីយ៍​យោធា​រូប​នេះ​កាលពី​អំឡុង​ឆ្នាំ​២០២០។

ប្រភព​ដដែល​ឲ្យ​ដឹង​ថា លោក ប៉ែន នួន ត្រូវ​បាន​សាលាដំបូង​រាជធានី​ភ្នំពេញ​សម្រេច​បង្គាប់​ឲ្យ​បង់​ប្រាក់​ពិន័យ​ឲ្យ​ទៅ​មន្ត្រី​យោធា​ពាក់​ផ្កាយ​២ រូប​នេះ​ចំនួន ៣​លាន​រៀល និង​ប្រាក់​សំណង​ជំងឺចិត្ត ៦​លាន​រៀល​កាលពី​ថ្ងៃទី​១៥ ខែ​មីនា ឆ្នាំ​២០២២។

ការ​សម្រេច​ដូច្នេះ បន្ទាប់ពី​តុលាការ​បាន​ចោទប្រកាន់​លោក ប៉ែន នួន ពី​បទ «បរិហារកេរ្តិ៍​តាមរយៈ​ប្រព័ន្ធ​ផ្សព្វផ្សាយ» កាលពី​ឆ្នាំ​២០២១ ក្រោយពី​ទទួល​បណ្ដឹង​ពី​ឧត្ដមសេនីយ៍​ផ្កាយ​២ រូប​នេះ ដែល​ប្ដឹង​ចាងហ្វាង​គេហទំព័រ​ស្រទាប់​យុវវ័យ លោក ប៉ែន នួន ករណី​ចុះផ្សាយ​រឿង​ជម្លោះ​ដីធ្លី​រវាង​ពលរដ្ឋ​ជាមួយ​ឧត្តមសេនីយ៍​យោធា​លោក អ៊ុក គឹមលី នោះ។

តែ​យ៉ាងណា កាលពី​អំឡុង​ខែ​មករា ឆ្នាំ​២០២២ ចាងហ្វាង​គេហទំព័រ​រូប​នេះ​អះអាង​ថា លោក​ធ្លាប់​បាន​ប្ដឹង​មន្ត្រី​តុលាការ​ចំនួន ៤​រូប​ទៅ​កាន់​ក្រសួង​យុត្តិធម៌ ឲ្យ​ជួយ​រក​យុត្តិធម៌ ដោយ​ថា​មន្ត្រី​តុលាការ​ទាំងនោះ​បាន​កាត់​ក្ដី​ឲ្យ​ខ្លួន​ចាញ់​ទាំង​មិន​អស់​ចិត្ត។

លោក ប៉ែន នួន ធ្លាប់​ប្រាប់​សារព័ត៌មាន វីអូឌី ថា ដើមចម​ដែល​នាំ​ឱ្យ​គាត់​ដាក់​ពាក្យ​ប្ដឹង​ទៅ​ក្រសួង​យុត្តិធម៌ ដោយសារតែ​មន្ត្រី​យោធា​ផ្កាយ​២ បាន​រំលោភ​យក​ដី​របស់​គាត់ និង​ពលរដ្ឋ ៣​គ្រួសារ​ទៀត​សរុប​ជិត ៦០០​ហិកតារ។

លោក ប៉ែន នួន ដែល​អះអាង​ថា​ជា​ចាងហ្វាង​គេហទំព័រ​ស្រទាប់​យុវវ័យ និង​ជា​អ្នក​មាន​ជម្លោះ​ដីធ្លី​ម្នាក់​ក្នុង​ចំណោម​ពលរដ្ឋ ៣​គ្រួសារ​ទៀត​ជាមួយ​មន្ត្រី​យោធា​ផ្កាយ​២ ម្នាក់​ឈ្មោះ អ៊ុក គឹមលី ស្ថិត​នៅ​ភូមិ​សាមគ្គី ឃុំ​ត្រពាំងប្រីយ៍ ស្រុក​អន្លង់វែង ខេត្ត​ឧត្ដរមានជ័យ។

លោក​បាន​ចោទ​ថា ក្រោយពី​មន្ត្រី​យោធា​ផ្កាយ​២ បាន​គប់គិត​ជាមួយ​មន្ត្រី​ក្រោម​ឱវាទ​ឈ្មោះ យឹម សេន រំលោភ​យក​កាលពី​ឆ្នាំ​២០១៩ នៅ​ពេល​នោះ​គាត់​បាន​ឡាយ​វីដេអូ​និយាយ​ផ្សព្វផ្សាយ​ក្នុង​នាម​ជា​អ្នក​សារព័ត៌មាន​ម្នាក់ ក៏ប៉ុន្តែ​ត្រូវ​មន្ត្រី​យោធា​នោះ​ប្ដឹង​ពី​បទ «បរិហារកេរ្តិ៍» និង​បទ «ញុះញង់​ពលរដ្ឋ» ទៅ​វិញ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស