មន្ត្រីជាន់ខ្ពស់គណបក្សភ្លើងទៀន លោក សៅ រ៉ាស៊ី ប្រកាសលាឈប់ពីតួនាទីជាសមាជិកគណៈកម្មាធិការអចិន្ត្រៃយ៍ និងជាសមាជិកគណៈកម្មាធិការនាយករបស់បក្សនេះចាប់ពីថ្ងៃនេះតទៅ។
ក្នុងលិខិតរបស់មួយផ្ញើទៅប្រធានស្តីទីគណបក្សភ្លើងទៀន កាលពីថ្ងៃទី១៨ ខែកញ្ញា ឆ្នាំ២០២៣ ទើបត្រូវបានផ្សព្វផ្សាយជាសាធារណៈនាថ្ងៃទី២២ កញ្ញា នេះ ឲ្យដឹងថា ការលាលែងពីតួនាទីនៅក្នុងគណបក្សភ្លើងទៀន នេះ លោក សៅ រ៉ាស៊ី មិនបានបញ្ជាក់ពីមូលហេតុនោះទេ។
កាលពីចុងខែឧសភា ឆ្នាំ២០២៣ អគ្គស្នងការដ្ឋាននគរបាលជាតិ បានផ្ញើលិខិតមួយច្បាប់ទៅរដ្ឋមន្ត្រីក្រសួងមហាផ្ទៃ លោក ស ខេង ដើម្បីឱ្យអគ្គនាយកដ្ឋានអន្តោប្រវេសន៍ដាក់បញ្ចូលឈ្មោះលោក សៅ រ៉ាស៊ី និងមន្ត្រីគណបក្សភ្លើងទៀន ២នាក់ចូលក្នុងបញ្ជីខ្មៅដែលត្រូវចាប់ខ្លួន។
លិខិតដែលចុះហត្ថលេខាដោយលោក នេត សាវឿន បញ្ជាក់ថា អ្នកទាំងបីនាក់នោះ គឺជាជនជាប់ចោទដែលសាលាដំបូងរាជធានីភ្នំពេញបង្គាប់ឱ្យសមត្ថកិច្ចចាប់ខ្លួនពីបទ «ប្រមាថព្រះមហាក្សត្រ ញុះញង់ឲ្យមានការរើសអើងពូជសាសន៍ និងញុះញង់ឲ្យមានភាពវឹកវរធ្ងន់ធ្ងរដល់សន្តិសុខសង្គម» ដែលប្រព្រឹត្តនៅកម្ពុជា និងលើបណ្ដាញសង្គមហ្វេសប៊ុកកាលពីអំឡុងឆ្នាំ២០២០ ដល់ឆ្នាំ២០២២។
ប៉ុន្តែសារព័ត៌មានរបស់រដ្ឋាភិបាលកម្ពុជា fresh news លើកឡើងថា លោក សៅ រ៉ាស៊ី លាលែងពីតួនាទីសមាជិកគណៈកម្មាធិការអចិន្ត្រៃយ៍ និងជាសមាជិកគណៈកម្មាធិការនាយកនៃគណបក្សភ្លើងទៀន ដើម្បីទៅចុះចូលជាមួយគណបក្សប្រជាជនកម្ពុជា បន្ទាប់ពីលោកជួបជាមួយមន្ត្រីគណបក្សប្រជាជនកម្ពុជា លោក គឹម សន្តិភាព។
តែយ៉ាងណា សារព័ត៌មាន The Cambodia Daily មិនអាចសុំការអត្ថាធិប្បាយពីលោក សៅ រ៉ាស៊ី ដើម្បីបញ្ជាក់បន្ថែមបាននៅឡើយទេ ខណៈអ្នកនាំពាក្យគណបក្សភ្លើងទៀន លោក គីមសួរ ភីរិទ្ធ មិនទាន់អាចសុំការអត្ថាធិប្បាយជុំវិញរឿងនេះបានដែរ៕