ចលនាមាតាធម្មជាតិ បង្ហាញការហួសចិត្តដែលរដ្ឋមន្ត្រីក្រសួងយុត្តិធម៌លោក កើត រិទ្ធ ឆ្លើយតបទៅកាន់ក្រុមយុវជននៃចលនាមួយនេះថា «គ្មានពេលដើម្បីឆ្លើយតបសំណើរបស់ពួកគេនោះទេ»។
យុវជនចលនាមាតាធម្មជាតិ នាថ្ងៃសុក្រ ទី២០ តុលា នេះ បាននាំគ្នាទៅក្រសួងយុត្តិធម៌ ដើម្បីតាមដានញត្តិរបស់ពួកគេដែលបានដាក់ទៅក្រសួងកាលពីថ្ងៃទី៦ ខែតុលា ឆ្នាំ២០២៣ ដើម្បីស្នើសុំឲ្យរដ្ឋមន្ត្រីក្រសួងយុត្តិធម៌ជួយអន្តរាគមន៍ បន្ទាប់ពីសាលាដំបូងរាជធានីភ្នំពេញមិនអនុញ្ញាតឲ្យពួកគេចេញទៅទទួលពានរង្វាន់ Right Livelihood ២០២៣ នៅចុងខែវិច្ឆិកា នេះ។
ចលនាមាតាធម្មជាតិ Mother Nature Cambodia បានសរសេរលើទំព័រហ្វេសប៊ុករបស់ខ្លួននៅថ្ងៃសុក្រនេះ បង្ហាញការហួសចិត្តដែលបុគ្គលិកក្រសួងយុត្តិធម៌បានប្រាប់យុវជនមាតាធម្មជាតិថា លោក កើត រិទ្ធ គ្មានពេលវេលាក្នុងការឆ្លើយតបសំណើរបស់ពួកគេ ដើម្បីចេញទៅទទួលពានរង្វាន់ Alternative Nobel នៅក្រៅប្រទេសនោះទេ។
ប្រភពដដែលថា តើពលរដ្ឋសង្ឃឹមអ្វីពីក្រសួងយុត្តិធម៌ បើឧបនាយករដ្ឋមន្ត្រីមួយរូបចេះនិយាយត្រឹមពាក្យថា «គ្មានពេល» បែបនេះហើយនោះ។ ការឆ្លើយតបដូច្នេះ វាជាកំណែទម្រង់ដែលលោក កើត រិទ្ធ តែងនិយាយជាហូរហែមកឬ?
សកម្មជនចលនាមាតាធម្មជាតិ កញ្ញា ភួន កែវរស្មី បានលើកឡើងថា ពួកគេទៅតាមដានញត្តិដែលបានដាក់នេះ ដោយសារតែរយៈពេល ២សប្ដាហ៍ហើយ ក្រសួងយុត្តិធម៌នៅមិនទាន់ឆ្លើយតបណាមួយមកឲ្យពួកគេបានដឹងនៅឡើយទេ។
ប៉ុន្តែនៅពេលពួកគេទៅដល់ខាងមុខក្រសួងយុត្តិធម៌ បុគ្គលិកក្រសួងបានប្រាប់ថា មួយរយៈពេលនេះ រដ្ឋមន្ត្រីយុត្តិធម៌ លោក កើត រិទ្ធ រវល់ច្រើន និងជាប់កម្មវិធីផ្សេងៗដោយគ្មានពេលឆ្លើយតបនឹងសំណើរបស់ពួកគេនោះទេ។
កញ្ញា ភួន កែវរស្មី យល់ថា នៅពេលបុគ្គលិកក្រសួងឆ្លើយតបបែបនេះ បង្ហាញឲ្យឃើញពីភាពអសកម្មក្នុងការបំពេញការងាររបស់មន្ត្រីនៅក្នុងក្រសួងយុត្តិធម៌ ព្រោះរយៈពេល ២សប្ដាហ៍ ប្រសិនមន្ត្រីបំពេញការងាររបស់ខ្លួនបានត្រឹមត្រូវ នឹងឆ្លើយតបដល់ពួកគេហើយ។
ចំណែកលោក ថុន រដ្ឋា បានលើកឡើងនៅខាងមុខក្រសួងយុត្តិធម៌ ថា ក្រុមរបស់លោកនឹងមិនបាក់ទឹកចិត្តឡើយ បើទោះបីលោកមិនបានទៅទទួលពានរង្វាន់នៅប្រទេសស៊ុយអែត នៅខែវិច្ឆិកា ខាងមុខក៏ដោយ ហើយថាក្រុមរបស់លោកនឹងមិនបោះបង់ការងារការពារធនធានធម្មជាតិនៅប្រទេសកម្ពុជាឡើយ។
សាលាដំបូងរាជធានីភ្នំពេញ កាលពីថ្ងៃទី២ ខែតុលា ឆ្នាំ២០២៣ បានបដិសេធសំណើរបស់ក្រុមយុវជនមាតាធម្មជាតិចំនួន ៣រូប ដែលស្នើសុំទៅទទួលពានរង្វាន់ Right Livelihood Award ដែលនឹងធ្វើឡើងនៅប្រទេសស៊ុយអែត នាថ្ងៃទី២៩ ខែវិច្ឆិកា ឆ្នាំ២០២៣ ខាងមុខនេះ ក្រោមហេតុផលថា «មិនចាំបាច់»។
ក្រោយការបដិសេធនេះ កាលពីថ្ងៃទី៣ ខែតុលា នេះ អង្គការ Right Livelihood បានចេញសេចក្ដីថ្លែងការណ៍មួយដោយសម្ដែងការសោកស្ដាយ និងស្នើទៅតុលាការកម្ពុជាពិចារណាឡើងវិញចំពោះការរារាំងក្រុមយុវជនមាតាធម្មជាតិទៅទទួលពានរង្វាន់នៅក្រៅប្រទេស។
ក្រុមយុវជនចលនាមាតាធម្មជាតិ ដូចជាលោក ថុន រដ្ឋា កញ្ញា ភួន កែវរស្មី កញ្ញា ឡុង គន្ធា លោក យីម លាងហ៊ី លោក លី ចន្ទ្រដារ៉ាវុធ និងកញ្ញា ស៊ុន រដ្ឋា ត្រូវបានអាជ្ញាធរចាប់ខ្លួនកាលពីអំឡុងខែមិថុនា ឆ្នាំ២០២១ ក្រោយរដ្ឋាភិបាលកម្ពុជាចោទថា ពួកគេមានអង្គការចាត់តាំងខុសច្បាប់ពីក្រៅប្រទេស ប្រើប្រាស់ហិរញ្ញប្បទានភេរវកម្ម និងធ្វើសកម្មភាពបំបែកបំបាក់ជាតិ ក្រោមបទចោទ «ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម» បទ «រួមគំនិតក្បត់» និងបទ «ប្រមាថអង្គព្រះមហាក្សត្រ»។
សកម្មជនទាំងនេះត្រូវបានអាជ្ញាធរដោះលែងឱ្យនៅក្រៅឃុំបណ្ដោះអាសន្ន កាលពីថ្ងៃទី១២ ខែវិច្ឆិកា ឆ្នាំ២០២១ ខណៈការដោះលែងនេះ អ្នកខ្លះបានអនុវត្តទោសចប់តាមការកំណត់របស់តុលាការ ចំណែកអ្នកខ្លះទៀតត្រូវបានដោះលែងនៅក្រៅឃុំបណ្ដោះអាសន្ន ដោយទោសដែលនៅសល់ ត្រូវព្យួរសាកល្បង ប៉ុន្តែពួកគេគ្រប់គ្នាសុទ្ធតែមានទោសផ្សេងទៀតដែលតុលាការមិនទាន់ជំនុំជម្រះនៅឡើយពីបទចោទ រួមគំនិតក្បត់ និងបទ ប្រមាថអង្គព្រះមហាក្សត្រ៕