បុរីពិភពថ្មីរបស់អ្នកឧកញ៉ា ហុង ពីវ ចោទថា ការផ្ទុះការតវ៉ាពីសំណាក់អតិថិជនមកលើបុរីពិភពថ្មីកាលពីពេលថ្មីៗនេះ គឺជាការញុះញង់របស់ឈ្មួញកណ្តាលពីរនាក់ គឺអគ្គនាយកក្រុមហ៊ុន K.B Real Estate លោក ឆាយ យាន និងលោក ហេង តារា ដែលបានទិញផ្ទះចំនួន ២៤៥ខ្នងផ្ទះពីបុរីពិភពថ្មីយកទៅលក់បន្ត ប៉ុន្តែលក់មិនចេញ ទើបពួកគេញុះញង់ឱ្យមានការតវ៉ា។
ក្រុមហ៊ុនបុរីពិភពថ្មី អះអាងថា ឈ្មួញកណ្តាលទាំងពីរនាក់ខាងលើបានទិញផ្ទះពីបុរីពិភពថ្មី ដើម្បីយកទៅលក់បន្តបានចំណេញរាប់ម៉ឺនដុល្លារអាមេរិក ក្នុងនោះលោក ហេង តារា មានផ្ទះចំនួន ៣៩ផ្ទះ និងបច្ចុប្បន្នកំពុងបង់រំលស់ ៣ផ្ទះទៀត ចំណែកលោក ឆាយ យាន មានឋានៈជារដ្ឋលេខាធិការ និងជាទីប្រឹក្សាផ្ទាល់សម្តេចព្រះអភិសិរីសុគន្ធាមហាសង្ឃរាជាធិបតី កិត្តិឧទ្ទេសបណ្ឌិត បួរ គ្រី មានផ្ទះចំនួន ២០៣ផ្ទះ និងកំពុងបង់រំលស់ ១០ផ្ទះទៀតផងដែរ។
ក្រុមហ៊ុនបុរីពិភពថ្មីបានចេញសេចក្ដីប្រកាសព័ត៌មានមួយកាលថ្ងៃទី២៩ ខែតុលា ឆ្នាំ២០២៣ ក្រោយពីផ្ទុះការតវ៉ា ដែលត្រូវបានផ្សព្វផ្សាយនៅថ្ងៃទី២ វិច្ឆិកា នេះថា ទោះបីជាសព្វថ្ងៃនេះមានបញ្ហាសេដ្ឋកិច្ចជាសកល ក្រុមហ៊ុនមិនត្រឹមតែអនុវត្តតាមកិច្ចសន្យាដោយឥតកែប្រែទេ ប៉ុន្តែក្រុមហ៊ុនបានបន្ថែមលក្ខខណ្ឌដើម្បីជាប្រយោជន៍សម្រាប់អតិថិជនថែមទៀត។
ក្រុមហ៊ុនខាងលើបញ្ជាក់ថា លក្ខខណ្ឌដែលក្រុមហ៊ុនផ្តល់ជូនដល់អតិថិជនដើម្បីជួយសម្រួលដល់ពួកគេនោះ គឺទី១ ជាកិច្ចសន្យាទិញលក់ផ្ទះមានលក្ខខណ្ឌទទួលទិញវិញ ទី២ ជាកិច្ចសន្យាទិញលក់ផ្ទះគ្មានលក្ខខណ្ឌទទួលទិញវិញ និងទី៣ ជាកិច្ចសន្យាទិញលក់ផ្ទះគ្មានលក្ខខណ្ឌទទួលទិញវិញសម្រាប់អតិថិជនមាន ២ផ្ទះ។
ក្រុមហ៊ុនបុរីពិភពថ្មី គូសបញ្ជាក់ថា ក្រោយពេលដែលអតិថិជនបានជ្រើសរើសជម្រើសទី៣ ខាងលើហើយ ក្រុមហ៊ុននឹងមិនទទួលទិញផ្ទះវិញដាច់ខាត។
ការអះអាងនេះ ធ្វើឡើងបន្ទាប់ពីមានការតវ៉ាពីអតិថិជនរបស់ខ្លួនដោយចោទប្រកាន់ថា ក្រុមហ៊ុនបុរីពិភពថ្មីបានរឹបអូសផ្ទះរបស់ពួកគេនៅពេលដែលខ្លួនពុំមានលទ្ធភាពបង់លុយប្រចាំខែនាពេលកន្លងមក។
កាលពីថ្ងៃទី២៧ ខែតុលា ឆ្នាំ២០២៣ កន្លងទៅ អតិថិជនជាង ១០០នាក់ដែលបានទិញផ្ទះបង់រំលស់ពីបុរីពិភពថ្មី បានប្រមូលផ្ដុំគ្នាតវ៉ាទាមទារនៅខាងមុខការិយាល័យបុរីពិភពថ្មីក្នុងខណ្ឌកំបូល រាជធានីភ្នំពេញ ឲ្យអ្នកឧកញ៉ា ហុង ពីវ ដែលជាម្ចាស់បុរីពិភពថ្មីដោះស្រាយប្រាក់ ៥០% ដល់ម្ចាស់ផ្ទះដែលត្រូវក្រុមហ៊ុនរឹបអូស និងទទួលទិញផ្ទះយកវិញសម្រាប់អ្នកដែលអស់លទ្ធផលបង់រំលស់។
អតិថិជនបុរីពិភពថ្មីទាំងជាង ១០០នាក់នោះទាមទារឲ្យម្ចាស់បុរីដោះស្រាយបញ្ហាប្រឈមចំនួន ៤ចំណុច ក្នុងនោះ ម្ចាស់បុរីត្រូវដោះស្រាយប្រាក់ ៥០% ជូនម្ចាស់ផ្ទះដែលក្រុមហ៊ុនរឹបអូស ម្ចាស់បុរីត្រូវទិញផ្ទះយកវិញ ៥០% សម្រាប់អ្នកដែលអស់លទ្ធភាពបង់រំលស់ និងត្រូវចេញលិខិតធានាចំពោះការទិញចូល ៥០% សម្រាប់អតិថិជនដែលបង់រំលស់ផងដែរ។
ក្រុមអ្នកតវ៉ាទាំងនោះអះអាងថា ពួកគេចង់ឲ្យអាជ្ញាធរសម្របសម្រួលដោះស្រាយជូនជនរងគ្រោះទាំងអស់គ្នា ព្រោះថាកន្លងមក ម្ចាស់បុរីបានគេចវេះមិនទទួលខុសត្រូវ និងបានរំលោភគោលការណ៍របស់ខ្លួនដែលសន្យាជាមួយអតិថិជននៅពេលទិញផ្ទះកាលពីដំបូង ដែលជារឿងអយុត្តិធម៌បំផុតសម្រាប់ពួកគេ។
ក្រុមអតិថិជនខាងលើអះអាងថា ពលរដ្ឋដែលមិនមានលទ្ធភាពបង់រំលស់ផ្ទះបន្តនៅសាខាបុរីពិភពថ្មីកប់ស្រូវ ប្រមាណ ៥០០នាក់ ខណៈអ្នកខ្លះត្រូវបានក្រុមហ៊ុនរឹបអូសដោយសារក្រុមហ៊ុនមិនបានទទួលទិញផ្ទះយកវិញក្នុងតម្លៃ ៥០% នៃតម្លៃដែលអតិថិជនដែលបានបង់ទៅឲ្យក្រុមហ៊ុននោះឡើយ។
ទាក់ទិននឹងករណីនេះ កាលពីដើមខែមិថុនា ឆ្នាំ២០២៣ កន្លងទៅ តំណាងប្រជាពលរដ្ឋជាង ១ពាន់គ្រួសាររស់នៅក្នុងបុរីពិភពថ្មីកំបូល បានសំណូមពរដល់លោក ហ៊ុន សែន ដែលនៅកាន់តំណែងជានាយករដ្ឋមន្ត្រី ឱ្យជួយអន្តរាគមន៍ទៅអ្នកឧកញ៉ា ហុង ពីវ អគ្គនាយកក្រុមហ៊ុនបុរីពិភពថ្មី ធ្វើយ៉ាងណាឱ្យក្រុមហ៊ុននេះទទួលទិញផ្ទះត្រឡប់វិញក្នុងតម្លៃ ៥០ភាគរយ ក្នុងករណីប្រជាពលរដ្ឋគ្មានលទ្ធភាពបង់ប្រាក់បន្តជូនក្រុមហ៊ុន ឱ្យស្របតាមកិច្ចសន្យាដែលក្រុមហ៊ុននេះធ្លាប់បានអនុវត្តជាមួយអតិថិជននាពេលកន្លងមក។
តំណាងប្រជាពលរដ្ឋខាងលើបញ្ជាក់ថា មានប្រជាពលរដ្ឋរាប់ពាន់គ្រួសារដែលមិនមានលទ្ធភាពបង់ប្រាក់រំលស់ផ្ទះជូនក្រុមហ៊ុនបុរីពិភពថ្មីកំបូលតាមកាលកំណត់របស់ក្រុមហ៊ុន ព្រោះជួបវិបត្តិសេដ្ឋកិច្ចធ្ងន់ធ្ងររកប្រាក់ចំណូលមិនបាន ហើយក៏បង្ខំចិត្តលក់ផ្ទះជូនក្រុមហ៊ុនវិញ ដែលអ្នកខ្លះបានបង់រំលស់ចាប់ពី ៣ ទៅ ៥ឆ្នាំមកហើយនោះ ប៉ុន្តែបែរជាក្រុមហ៊ុនបុរីពិភពថ្មីកំបូល មិនទទួលទិញយកផ្ទះបង់រំលស់នោះវិញទេ នៅពេលប្រជាពលរដ្ឋមិនមានប្រាក់បង់ជូនក្រុមហ៊ុនបន្តទៀត គឺខាងក្រុមហ៊ុនបានមកបិទសេចក្តីជូនដំណឹងរឹបអូសយកផ្ទះ និងយកសោចាក់ទ្វារផ្ទះមិនឱ្យប្រជាពលរដ្ឋរស់នៅតែម្តង។
អំឡុងពេលនៃការតវ៉ានោះ លោក ហេង តារា ដែលក្រុមហ៊ុនបុរីពិភពថ្មីបានចោទថាជាឈ្មួញកណ្តាលនៅពេលនេះ ធ្លាប់បានអះអាងថា គាត់បានទិញផ្ទះបង់រំលស់នៅបុរីពិភពថ្មីនេះ ៥ឆ្នាំកន្លងមកហើយ ប៉ុន្តែពេលនេះគាត់ខ្វះលទ្ធភាពមិនមានលុយបង់រំលស់ជូនក្រុមហ៊ុនបន្តទៀតទេ ហើយក៏សម្រេចចិត្តដាក់ពាក្យស្នើសុំលក់ផ្ទះឱ្យក្រុមហ៊ុនវិញ ប៉ុន្តែបែរជាក្រុមហ៊ុនបុរីពិភពថ្មីមិនព្រមទទួលទិញយកវិញឡើយ។
ជុំវិញបញ្ហានេះ សារព័ត៌មាន The Cambodia Daily នៅមិនទាន់អាចទាក់ទងលោក ឆាយ យាន និងលោក ហេង តារា សុំការបំភ្លឺចំពោះការចោទប្រកាន់ខាងលើនេះបាននៅឡើយទេ៕