30 C
Phnom Penh

អ្នក​ទិញ​ផ្ទះ​បុរី​ពិភព​ថ្មី​តវ៉ា​ទាមទារ​ឱ្យ​អ្នកឧកញ៉ា ហុង ពីវ សង​ប្រាក់ ៥០% ដល់​ម្ចាស់​ផ្ទះ​ដែល​ក្រុមហ៊ុន​រឹបអូស

ដោយ ឌឹ ខេមបូឌា ដេលី

បទវិភាគ

អ្នក​ទិញ​ផ្ទះ​បង់​រំលស់​បុរី​ពិភព​ថ្មី នាំគ្នា​តវ៉ា​ទាមទារ​ឲ្យ​អ្នកឧកញ៉ា ហុង ពីវ ម្ចាស់​បុរី​ពិភព​ថ្មី ដោះស្រាយ​ប្រាក់ ៥០% ដល់​ម្ចាស់​ផ្ទះ​ដែល​ក្រុមហ៊ុន​រឹបអូស និង​ទទួល​ទិញ​ផ្ទះ​យក​វិញ​សម្រាប់​អ្នក​ដែល​អស់​លទ្ធផល​បង់​រំលស់។

អតិថិជន​បុរី​ពិភព​ថ្មី​ជាង ១០០​នាក់ នៅ​ថ្ងៃទី​២៧ ខែ​តុលា នេះ បាន​ប្រមូលផ្ដុំ​គ្នា​តវ៉ា​ដោយ​លើក​រូបថត​ឧកញ៉ា ហុង ពីវ និង​គ្រួសារ អម​ជាមួយ​នឹង​បដា​ទាមទារ​ឲ្យ​ម្ចាស់​បុរី​ដោះស្រាយ​បញ្ហា​ប្រឈម​ចំនួន ៤​ចំណុច នៅ​មុខ​ការិយាល័យ​បុរី​ពិភព​ថ្មី ស្ថិត​ក្នុង​ខណ្ឌ​កំបូល រាជធានី​ភ្នំពេញ។

ចំណុច​ទាំង ៤ ដែល​អ្នក​ទិញ​ផ្ទះ​ទាមទារ ក្នុង​នោះ​ម្ចាស់​បុរី ត្រូវ​ដោះស្រាយ​ប្រាក់ ៥០% ជូន​ម្ចាស់​ផ្ទះ​ដែល​ក្រុមហ៊ុន​រឹបអូស ម្ចាស់​បុរី​ត្រូវ​ទិញ​ផ្ទះ​យក​វិញ ៥០% សម្រាប់​អ្នក​ដែល​អស់​លទ្ធភាព​បង់​រំលស់ និង​ត្រូវ​ចេញ​លិខិត​ធានា​ចំពោះ​ការ​ទិញ​ចូល ៥០% សម្រាប់​អតិថិជន​ដែល​បង់​រំលស់។

អ្នក​ទិញ​ផ្ទះ​បុរី​ពិភព​ថ្មី អះអាង​ថា ប្រសិនបើ​ពួកគាត់​មិន​នាំគ្នា​តវ៉ា​ទេ ពួកគាត់​នឹង​បាត់បង់​ជម្រក ហើយ​ជំពាក់​ធនាគារ​ថែម​ទៀត ខណៈ​ម្ចាស់​បុរី​នៅតែ​មិន​ព្រម​ដោះស្រាយ​ឲ្យ​ពួកគាត់។ ពួកគេ​ថា អភិបាល​រង​ខណ្ឌ​បាន​ហៅ​តំណាង ៥​នាក់​ទៅ​ដោះស្រាយ ប៉ុន្តែ​ដំណោះស្រាយ​នេះ គឺ​សម្រាប់​តែ​តំណាង ៥​នាក់​ប៉ុណ្ណោះ។

ក្រុម​អតិថិជន​អះអាង​ថា ពួកគេ​ចង់​ឲ្យ​អាជ្ញាធរ​សម្របសម្រួល​ដោះស្រាយ​ជូន​ជនរងគ្រោះ​ទាំងអស់​គ្នា មិន​មែន​ដោះស្រាយ​សម្រាប់​តែ​ពួកគាត់ ៥​នាក់​នោះ​ទេ។

ពួកគេ​ថា ប្រសិនបើ​ក្រុមហ៊ុន​នៅ​តែ​មិន​ព្រម​ដោះស្រាយ​ឲ្យ​ទេ ពួកគេ​នឹង​នាំគ្នា​តវ៉ា​ឈាន​ទៅ​ដល់​ការ​ហែ​ក្បួន​ទៅ​កាន់​ផ្ទះ​លោក ហ៊ុន សែន អតីត​នាយករដ្ឋមន្ត្រី និង​លោក ហ៊ុន ម៉ាណែត ដែល​ជា​នាយករដ្ឋមន្ត្រី​បច្ចុប្បន្ន។

បុរស​ម្នាក់​ដៃ​កាន់​មីក្រូ និយាយ​នៅ​ខាង​មុខ​ការិយាល័យ​បុរី​ពិភព​ថ្មី​ថា ម្ចាស់​បុរី​បាន​គេចវេះ​មិន​ទទួល​ខុសត្រូវ និង​បាន​រំលោភ​គោលការណ៍​របស់​ខ្លួន​ដែល​សន្យា​ជាមួយ​អតិថិជន​នៅ​ពេល​ទិញ​ផ្ទះ​កាលពី​ដំបូង។ លោក​ចាត់ទុក​ករណី​នេះ​ថា​ជា​រឿង​អយុត្តិធម៌​សម្រាប់​ពួកគាត់។

ក្រុម​អតិថិជន​បុរី​ពិភព​ថ្មី អះអាង​ថា ពលរដ្ឋ​ដែល​មិន​មាន​លទ្ធភាព​បង់​រំលស់​ផ្ទះ​បន្ត​នៅ​សាខា​បុរី​ពិភព​ថ្មី​កួរ​ស្រូវ មាន​ប្រមាណ ៥០០​នាក់ ខណៈ​អ្នក​ខ្លះ​ត្រូវ​បាន​ក្រុមហ៊ុន​រឹបអូស​ដោយសារ​ក្រុមហ៊ុន​មិន​បាន​ទទួល​ទិញ​ផ្ទះ​យក​វិញ​ក្នុង​តម្លៃ ៥០% នៃ​តម្លៃ​ដែល​អតិថិជន​ដែល​បាន​បង់​ទៅ​ឲ្យ​ក្រុមហ៊ុន។

កាលពី​ខែ​មិថុនា ឆ្នាំ​២០២៣ កន្លង​ទៅ អ្នក​ទិញ​ផ្ទះ​នៅ​បុរី​ពិភព​ថ្មី​ធ្លាប់​ផ្ទុះ​ការ​តវ៉ា​ម្ដង​រួច​មក​ហើយ ប៉ុន្តែ​ពេល​នោះ អតីត​នាយករដ្ឋមន្ត្រី​លោក ហ៊ុន សែន បាន​អន្តរាគមន៍​ដោយ​បញ្ជា​ទៅ​ម្ចាស់​បុរី​ប្រគល់​ផ្ទះ​ទៅ​ឲ្យ​ពលរដ្ឋ​វិញ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស