 នៅឡើយទេ។){kind=link}
ក្រសួងសុខាភិបាលកម្ពុជា ដាស់តឿនឲ្យប្រជាពលរដ្ឋប្រុងប្រយ័ត្នពីការប្រើប្រាស់វ៉ាក់សាំងបង្ការជំងឺគ្រុនឈាមមួយប្រភេទឈ្មោះថា Qdenga បន្ទាប់ពីក្រសួងសង្កេតឃើញថា វ៉ាក់សាំងនេះបានផ្សព្វផ្សាយឲ្យប្រើប្រាស់នៅតាមបណ្ដាញទំនាក់ទំនងសង្គម និងដោយបុគ្គលមួយចំនួន ដែលនឹងធ្វើឲ្យប៉ះពាល់សុខភាពធ្ងន់ធ្ងរ ពីព្រោះវ៉ាក់សាំងប្រភេទនេះនៅមិនទាន់ទទួលស្គាល់ពីអង្គការសុខភាពពិភពលោក (WHO) នៅឡើយទេ។
យោងតាមសេចក្ដីប្រកាសព័ត៌មានរបស់ក្រសួងសុខាភិបាល ចេញផ្សាយនៅថ្ងៃទី២៥ ខែមករា ឆ្នាំ២០២៤ បានឲ្យដឹងថា វ៉ាក់សាំងបង្ការជំងឺគ្រុនឈាមប្រភេទ Qdenga កំពុងស្ថិតនៅក្នុងដំណាក់កាលទី៣ ក្នុងចំណោមដំណាក់កាលសិក្សាសរុប ៤ នៅឡើយ។
ប្រភពដដែលអះអាងថា ក្រសួងក៏បានអះអាងដោយយោងតាមការព្រមានរបស់អង្គការសុខភាពពិភពលោកថា វ៉ាក់សាំងនេះដើរតួនាទីជាអ្នកចម្លងជំងឺគ្រុនឈាមលើកទី១ ចំពោះអ្នកមិនធ្លាប់កើតជំងឺគ្រុនឈាម និងដែលអាចវិវឌ្ឍទៅរកជំងឺគ្រុនឈាមធ្ងន់ធ្ងរនៅពេលកើតជំងឺគ្រុនឈាមលើកទី២ បាន។
សេចក្ដីប្រកាសព័ត៌មានរបស់ក្រសួងសុខាភិបាលកម្ពុជាដដែល បានបន្ថែមថា ក្រៅពីមិនទាន់បានទទួលស្គាល់ពីអង្គការសុខភាពពិភពលោក (WHO) វ៉ាក់សាំង Qdenga នេះនៅមិនទាន់ត្រូវបានទទួលស្គាល់ពីនាយកដ្ឋានចំណីអាហារ និងឱសថ (FDA) របស់សហរដ្ឋអាមេរិក និងក៏នៅមិនទាន់ត្រូវបានកម្ពុជាចុះក្នុងបញ្ជិកាផងដែរ។
ប្រភពដដែលបានបញ្ជាក់បន្ថែមថា ក្រសួងសង្កេតឃើញថា វ៉ាក់សាំង Qdenga នេះ ត្រូវបានផ្សព្វផ្សាយឲ្យប្រើប្រាស់នៅតាមបណ្ដាញទំនាក់ទំនងសង្គម និងដោយបុគ្គលមួយចំនួន។ ក្រសួងសុខាភិបាលសូមអំពាវនាវដល់សាធារណជន ស្វែងយល់ និងបន្តការយកចិត្តទុកដាក់ក្នុងការថែទាំសុខភាពដោយមធ្យោបាយសមស្របដែលមានការអនុញ្ញាតដោយក្រសួងសុខាភិបាល។
ដើម្បីបង្ការការចម្លងជំងឺគ្រុនឈាម ក្រសួងសុខាភិបាលអំពាវនាវដល់សាធារណជន រួមទាំងអាជ្ញាធរមូលដ្ឋាន ត្រូវសកម្មចូលរួមកម្ចាត់ដង្កូវទឹកនៅតាមទីកន្លែងដែលមានទឹកដក់ ដូចជា សម្បកកង់ឡាន ម៉ូតូ ពាង សម្បកដប កំប៉ុង ត្រឡោកដូង និងវត្ថុដក់ទឹកផ្សេងទៀត។ ក្នុងករណីមានរោគសញ្ញាក្តៅខ្លួនខ្លាំងភ្លាមៗ ត្រូវប្រញាប់នាំអ្នកជំងឺទៅរកសេវាពិនិត្យ និងព្យាបាលនៅតាមមណ្ឌលសុខភាព ឬមន្ទីរពេទ្យដែលនៅជិតបំផុតជាបន្ទាន់។
គួររម្លឹកថា វ៉ាក់សាំង Qdenga ធ្លាប់ត្រូវបានណែនាំឲ្យប្រើប្រាស់ដោយក្រុមអ្នកប្រឹក្សាយុទ្ធសាស្ត្រនៃការចាក់ថ្នាំបង្ការហៅកាត់ SAGE របស់អង្គការសុខភាពពិភពលោក កាលពីខែកញ្ញា ឆ្នាំ២០២៣។ មួយវិញទៀត អត្ថបទព័ត៌មានមួយចុះផ្សាយដោយ Reuters បានឱ្យដឹងថា Qdenga នេះ ក៏ត្រូវបានអនុញ្ញាតឲ្យប្រើប្រាស់ក្នុងសហភាពអឺរ៉ុប កាលពីខែធ្នូ ឆ្នាំ២០២២ ដែរ។ វ៉ាក់សាំង Qdenga គឺផលិតផលមួយរបស់ក្រុមហ៊ុន Takeda Pharmaceutical ដែលមកពីប្រទេសជប៉ុន។
រយៈពេល ២១សប្ដាហ៍ដើមឆ្នាំ២០២៣ ក្រសួងសុខាភិបាលបានរកឃើញជំងឺគ្រុនឈាមជិត ៤ពាន់ករណី (៣៤៣៩) ករណី ក្នុងនោះបណ្ដាលឲ្យស្លាប់មនុស្សចំនួន ៥នាក់។ ការរកឃើញនេះមានកើនឡើង ២ដង បើប្រៀបធៀបនឹងឆ្នាំ២០២២ មានតែប្រមាណជាង ១ពាន់ករណី (១៣៥៤) បណ្ដាលឲ្យមានអ្នកស្លាប់ចំនួន ៣នាក់ប៉ុណ្ណោះ៕