26 C
Phnom Penh

ប្រធាន​សមាគម CDPLA ចោទ​ថា​ខ្លឹមសារ​ប្រកាស​របស់​រដ្ឋបាល​ខេត្ត​ស្វាយរៀង​គឺ​ប្រឌិត​ដោយ​រដ្ឋបាល​ឃុំ​ត្រពាំងស្ដៅ

ដោយ ឌឹ ខេមបូឌា ដេលី

បទវិភាគ

ប្រធាន​សមាគម​អភិវឌ្ឍន៍​ជីវភាព​ពលរដ្ឋ​កម្ពុជា​ខេត្ត​ស្វាយរៀង (CDPLA) ច្រានចោល​សេចក្តី​ប្រកាស​ព័ត៌មាន​របស់​រដ្ឋបាល​ខេត្ត​ស្វាយរៀង និង​រដ្ឋបាល​ស្រុក​រមាសហែក ទាំងស្រុង ក្រោម​ហេតុផល​ថា ដោយសារតែ​អាជ្ញាធរ​មូលដ្ឋាន​ខេត្ត​ស្វាយរៀង មាន​ចេតនា​រំលោភ​យក​ដី​លំនៅឋាន​របស់​លោក ហើយ​ខ្លឹមសារ​ក្នុង​សេចក្តី​ប្រកាស​ព័ត៌មាន​របស់​រដ្ឋបាល​ខេត្ត​ស្វាយរៀង និង​រដ្ឋបាល​ស្រុក​រមាសហែក គឺ​ប្រឌិត​ឡើង​ដោយ​ស្មៀនឃុំ​ត្រពាំងស្ដៅ ឈ្មោះ ម៉ូវ តែប៉ុណ្ណោះ។

ប្រធាន​សមាគម​អភិវឌ្ឍន៍​ជីវភាព​ពលរដ្ឋ​កម្ពុជា​ខេត្ត​ស្វាយរៀង (CDPLA) លោក ព្រុំ ប៊ុនថន ប្រាប់​សារព័ត៌មាន The Cambodia Daily នៅ​ថ្ងៃទី​៦ កុម្ភៈ នេះ​ថា សេចក្តី​ប្រកាស​ព័ត៌មាន​របស់​រដ្ឋបាល​ខេត្ត​ស្វាយរៀង និង​រដ្ឋបាល​ស្រុក​រមាសហែក ធ្វើឡើង​ដោយ​ខ្វះ​ការ​ស៊ើបអង្កេត ខ្វះ​ធាតុ​ផ្សំ ខ្វះ​អង្គហេតុ និង​ខ្វះ​អង្គ​ច្បាប់​ទាំងស្រុង ព្រោះ​ខ្លឹមសារ​ទាំងអស់​ក្នុង​សេចក្តី​ប្រកាស​ព័ត៌មាន​នោះ គឺ​យក​តាម​របាយការណ៍​ប្រឌិត​របស់​រដ្ឋបាល​ឃុំ​ត្រពាំងស្ដៅ ដែល​ចងក្រង​ប្រឌិត​ឡើង​ដោយ​ស្មៀនឃុំ ឈ្មោះ ម៉ូវ ធ្វើជា​មូលដ្ឋាន ខណៈ​រដ្ឋបាល​ខេត្ត និង​ស្រុក មិន​បាន​ចុះ​មក​ស៊ើបអង្កេត​ជុំវិញ​វិវាទ​ដីធ្លី​នេះ​ដោយ​ផ្ទាល់​នោះ​ទេ។

លោក ព្រុំ ប៊ុនថន អះអាង​ថា ដី​លំនៅឋាន​ដែល​លោក​កំពុង​រស់នៅ​សព្វថ្ងៃ គឺជា​ដី​កេរ​ដូនតា​បាន​ចែក​ឱ្យ​ឪពុក​របស់​លោក​ឈ្មោះ ព្រុំ សាមន់ ដើម្បី​ធ្វើ​ស្រែ​តាំង​ពី​មុន​ឆ្នាំ​១៩៧០ មក​ម្ល៉េះ។ ជាង​នេះ​ទៀត នៅ​អំឡុង​សម័យ​រដ្ឋ​កម្ពុជា​ប្រជាមានិត រដ្ឋ​អំណាច​ឃុំ​ត្រពាំងស្ដៅ ក៏​បាន​ធ្វើ​បញ្ជី​សារពើភណ្ឌ​ដី​របស់​រដ្ឋអំណាច​ឃុំ​ត្រពាំងស្ដៅ ដែល​រក្សាទុក​នៅ​សាលាស្រុក​ផង​ដែរ ដែល​នោះ​គឺជា​ភស្តុតាង​ពិតប្រាកដ​ក្នុង​ការ​បញ្ជាក់​ពី​ដី​ដែល​កំពុង​មាន​វិវាទ​នេះ។

លោក​រៀបរាប់​ថា ក្នុង​បញ្ជី​សារពើភណ្ឌ​ខាងលើ បាន​កំណត់​យ៉ាង​ច្បាស់​ថា ដី​នោះ​មាន​ព្រំប្រទល់​ខាងជើង​ទល់​នឹង​ដី​របស់​ឈ្មោះ ឯក ម៉ាន់ ចំណែក​ព្រំ​ដី​ខាងត្បូង​ទល់​នឹង​ដី​របស់​ឈ្មោះ ព្រំ សាមន់ ចំណែក​ព្រំ​ដី​ខាងកើត ទល់​នឹង​ដី​របស់​ឈ្មោះ រស់ ដូង ហើយ​ព្រំ​ដី​ខាងលិច ទល់​នឹង​ដី​របស់​ឈ្មោះ ចាប សារុំ ដែល​ជា​គណៈកម្មការ​ប្រជាជន​ស្រុក​រមាសហែក ចុះហត្ថលេខា​ទទួលស្គាល់​នៅ​ថ្ងៃទី​៥ ខែ​កក្កដា ឆ្នាំ​១៩៩៣ ជា​ផ្លូវការ។

ប្រធាន​សមាគម​អភិវឌ្ឍន៍​ជីវភាព​ពលរដ្ឋ​កម្ពុជា​រូប​នេះ​បញ្ជាក់​ថា រដ្ឋបាល​ឃុំ​ត្រពាំងស្ដៅ នៅតែ​បន្ត​ចិញ្ចឹម​ចិត្ត​ធ្វើ​ឯកសារ​ក្លែងបន្លំ ក្នុង​ចេតនា​លេប​យក​ដី​កេរ​ឪពុក​របស់​លោក​រហូត​មក ប៉ុន្តែ​ដោយសារ​គ្រួសារ​របស់​លោក​គ្មាន​ឱកាស​ផ្តល់​ភស្តុតាង​ក្នុង​ការ​ប្តឹងផ្តល់​ទាមទារ​យុត្តិធម៌ សាលាដំបូង​ខេត្ត​ស្វាយរៀង ក៏​បាន​ចេញ​សាលក្រម​កំបាំង​មុខ ឱ្យ​លោក​ចាញ់​ក្តី​លើ​ករណី​នេះ​តែម្តង ដូច្នេះ​ដើម្បី​ទាមទារ​រក​យុត្តិធម៌ លោក​មាន​តែ​ប្តឹង​ជំទាស់​ទៅ​នឹង​សាលក្រម​របស់​សាលាដំបូង​ខេត្ត​ស្វាយរៀង ទៅ​សាលា​ឧទ្ធរណ៍​ក្រុង​ភ្នំពេញ​តែប៉ុណ្ណោះ។

កាលពី​ថ្ងៃទី​៤ ខែ​កុម្ភៈ ឆ្នាំ​២០២៤ រដ្ឋបាល​ខេត្ត​ស្វាយរៀង បាន​ចេញ​សេចក្តី​ប្រកាស​ព័ត៌មាន​មួយ​ដោយ​អះអាង​ថា ករណី​ទំនាស់​ដីធ្លី​រវាង​សាលាឃុំ​ត្រពាំងស្ដៅ ស្រុក​រមាសហែក និង​លោក ព្រុំ ប៊ុនថន ត្រូវ​បាន​សាលាដំបូង​ខេត្ត​ស្វាយរៀង ចេញ​សាលក្រម​ឱ្យ​សាលាឃុំ​ត្រពាំងស្ដៅ ឈ្នះ​ក្តី​រួច​ទៅ​ហើយ ដូច្នេះ​រដ្ឋបាល​ឃុំ​ត្រពាំងស្ដៅ មាន​សិទ្ធិ​ប្រើប្រាស់​អាស្រ័យ​ផល និង​ចាត់ចែង​លើ​ដី​នេះ​ស្រប​តាម​ច្បាប់​ជា​ធរមាន មិនមែន​ដូច​ការ​អះអាង​របស់​លោក ព្រុំ ប៊ុនថន នោះ​ទេ។

ជុំវិញ​បញ្ហា​នេះ កាលពី​ថ្ងៃទី​២៦ ខែ​មករា ឆ្នាំ​២០២៤ លោក ព្រុំ ប៊ុនថន បាន​អះអាង​ថា អាជ្ញាធរ​ឃុំ​ត្រពាំងស្ដៅ ស្រុក​រមាសហែក បាន​រំលោភ​បំពាន​សិទ្ធិ​កាន់កាប់​លំនៅឋាន​របស់​លោក​ក្នុង​បំណង​យក​ទៅ​លក់​យក​លុយ​ដាក់​ហោប៉ៅ​ផ្ទាល់ខ្លួន​តែប៉ុណ្ណោះ បើ​ទោះបីជា​ពួកគេ​បាន​ដឹង​ថា ដី​ដែល​ពួកគេ​បាន​រំលោភ​យក​នោះ​ជា​ដី​កេរ​ឪពុក​របស់​លោក​ហើយ​ក៏ដោយ។

ទាក់ទិន​នឹង​បញ្ហា​នេះ កាលពី​ចុង​ខែ​ធ្នូ ឆ្នាំ​២០២៣ កន្លង​ទៅ ប្រធាន​សមាគម​ការពារ​សិទ្ធិមនុស្ស និង​អភិវឌ្ឍន៍​នៅ​កម្ពុជា លោក នី សុខា អំពាវនាវ​រដ្ឋាភិបាល​អាណត្តិ​ថ្មី​របស់​លោក ហ៊ុន ម៉ាណែត ផ្សព្វផ្សាយ​អំពី​សិទ្ធិ​លំនៅឋាន​សមរម្យ និង​លក្ខខណ្ឌ​អប្បបរមា​ស្ដីពី​សិទ្ធិ​លំនៅឋាន​ដែល​កំណត់​ដោយ​អង្គការ​សហប្រជាជាតិ ឱ្យ​បាន​ទូលំទូលាយ​ទៅ​ដល់​អាជ្ញាធរ​មូលដ្ឋាន​គ្រប់​លំដាប់​ថ្នាក់ ដើម្បី​ធានា​ការ​រស់នៅ​របស់​ពលរដ្ឋ​ប្រកប​ដោយ​សុវត្ថិភាព។

កាលពី​ខែ​តុលា ឆ្នាំ​២០២៣ មជ្ឈមណ្ឌល​សិទ្ធិមនុស្ស​កម្ពុជា CCHR បាន​ចេញ​ផ្សាយ​របាយការណ៍​របស់​ខ្លួន​ដោយ​រក​ឃើញ​ថា ចាប់ពី​ខែ​មីនា ឆ្នាំ​២០២០ ដល់​ខែ​សីហា ឆ្នាំ​២០២៣ ករណី​រំលោភ​សិទ្ធិ​លំនៅឋាន​ដោយ​ការ​បណ្តេញ​ចេញ​ដោយ​បង្ខំ​ដែល​មាន​ចំនួន​សរុប​រហូត​ទៅ​ដល់​ជាង ២០​ករណី (២២​ករណី) ដែល​ប៉ះពាល់​ដល់​ពលរដ្ឋ​ជាង ១​ម៉ឺន​គ្រួសារ (១៣១១១​គ្រួសារ) ក្នុង​ខេត្ត-ក្រុង-រាជធានី​ចំនួន​១១ ដូចជា រាជធានី​ភ្នំពេញ ខេត្ត​កណ្តាល បន្ទាយមានជ័យ សៀមរាប ខេត្ត​រតនគិរី និង​ខេត្ត​មណ្ឌលគិរី ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស