អតីតមេដឹកនាំបក្សប្រឆាំងលោក សម រង្ស៊ី លើកឡើងថា ផ្អែកតាមការលើកឡើងរបស់មន្ត្រីជាន់ខ្ពស់ប៉ូលិសអន្តរជាតិ Interpol ដែលថាកម្ពុជាជាប់ឈ្មោះជាប្រទេសដែលមានការជួញដូរមនុស្សដ៏ធំប្រចាំតំបន់អាស៊ីអាគ្នេយ៍សព្វថ្ងៃនេះ បានបង្ហាញយ៉ាងច្បាស់ថា មុខមាត់ និងកិត្តិយសរបស់ប្រទេសកម្ពុជាបានធ្លាក់ចូលទៅក្នុងភាពកខ្វក់ ដោយសារការដឹកនាំរបស់គ្រួសារត្រកូល ហ៊ុន ទាំងស្រុង។
អតីតមេដឹកនាំបក្សប្រឆាំងលោក សម រង្ស៊ី សរសេរលើទំព័រហ្វេសប៊ុករបស់លោកកាលពីថ្ងៃទី២៨ មីនា នេះថា ត្រកូល ហ៊ុន កំពុងគប់គិតជាមួយក្រុមម៉ាហ្វីយ៉ាពេញទំហឹង ដែលអនុញ្ញាតឱ្យក្រុមឧក្រិដ្ឋជនទាំងនោះប្រើប្រាស់ប្រទេសកម្ពុជាជាមជ្ឈមណ្ឌលប្រព្រឹត្តអំពើឧក្រិដ្ឋកម្មផ្សេង ដូចជា ប្រព្រឹត្តអំពើជួញដូរមនុស្ស ជាដើម ដោយគ្មានការអនុវត្តច្បាប់សព្វថ្ងៃនេះ ដែលជាហេតុធ្វើឱ្យមុខមាត់ និងកិត្តិយសរបស់ប្រទេសកម្ពុជាធ្លាក់ចូលទៅក្នុងភាពស្មោកគ្រោកយ៉ាងធ្ងន់ធ្ងរ។
កាលពីថ្ងៃទី២៨ ខែមីនា ឆ្នាំ២០២៤ សារព័ត៌មានអន្តរជាតិ រ៉យទ័រ (Reuters) បានចុះផ្សាយថា អគ្គលេខាធិការប៉ូលិសអន្តរជាតិ Interpol លោក Jurgen Stock បានអះអាងក្នុងសន្និសីទសារព័ត៌មានមួយនៅឯស្ថាប័នសម្របសម្រួលប៉ូលិសពិភពលោករបស់ប្រទេសសិង្ហបុរី កាលពីថ្ងៃទី២៧ ខែមីនា ឆ្នាំ២០២៤ ថា ប្រទេសកម្ពុជាកំពុងធ្លាក់ទៅជាមជ្ឈមណ្ឌលបោកប្រាស់តាមអ៊ីនធឺណិត (Online Scam) ដ៏ធំប្រចាំតំបន់អាស៊ីអាគ្នេយ៍។
លោក Jurgen Stock អះអាងថា ការជួញដូរមនុស្សនៅក្នុងតំបន់អាស៊ីអាគ្នេយ៍សព្វថ្ងៃនេះ បានក្លាយជាវិបត្តិសកលយ៉ាងធំធេង ខណៈប្រទេសកម្ពុជាបានក្លាយជាមជ្ឈមណ្ឌលបោកប្រាស់តាមអ៊ីនធឺណិតដ៏ធំប្រចាំក្នុងតំបន់អាស៊ីផងដែរ ព្រោះថាមនុស្សជាង ១សែននាក់ ត្រូវបានជួញដូរទៅក្នុងមជ្ឈមណ្ឌលបោកប្រាស់តាមអ៊ីនធឺណិតនៅកម្ពុជា ត្រូវបានគេរកឃើញនាពេលកន្លងមក។
អគ្គលេខាធិការប៉ូលិសអន្តរជាតិ Interpol រូបនេះលើកឡើងថា ការផ្ទុះឡើងនៃការជួញដូរមនុស្សបានពង្រីកពីតំបន់អាស៊ីអាគ្នេយ៍ទៅជាបណ្ដាញសកលដោយគំរូអាជីវកម្មថ្មីៗ ដែលមានជនរងគ្រោះរាប់លាននាក់ត្រូវបានជួញដូរជាមួយនឹងការសន្យានៃការងារផ្តល់ការងារស្របច្បាប់ ក្រោមលក្ខខណ្ឌនៃការជួយក្រុមឧក្រិដ្ឋជនបំប្លែងប្រាក់ចំណូលរបស់ពួកគេពីការជួញដូរគ្រឿងញៀន មកលុយស្របច្បាប់ ជាដើម។
លោក Jurgen Stock បញ្ជាក់ថា អាជីវកម្មជួញដូរគ្រឿងញៀននៅតែចូលរួមចំណែកយ៉ាងធំចាប់ពី ៤០% ទៅ ៧០% នៃប្រាក់ចំណូលក្រុមឧក្រិដ្ឋជន ក្រៅពីការប្រមូលលុយដោយការបំប្លែងពីការជួញដូរមនុស្ស ការជួញដូរអាវុធ និងការលួចកម្មសិទ្ធិបញ្ញាលើផលិតផលផ្សេងៗ ក្នុងនោះ ក្រុមឧក្រិដ្ឋជនក៏អាចរកចំណូលពីជំនួញឧក្រិដ្ឋទាំងនោះចាប់ពី ២ ទៅ ៣ម៉ឺនម៉ឺនលានដុល្លារអាមេរិកក្នុង ១ឆ្នាំៗដែរ។
ទាក់ទិននឹងបញ្ហានេះ កាលពីអំឡុងខែកក្កដា ឆ្នាំ២០២៣ អង្គការសហប្រជាជាតិបានបង្ហាញរបាយការណ៍របស់ខ្លួនថា អំពើឆបោកតាមប្រព័ន្ធអ៊ីនធឺណិតនៅក្នុងតំបន់អាស៊ីអាគ្នេយ៍កំពុងបង្កើតប្រាក់ចំណូលរាប់ពាន់លានដុល្លារអាមេរិក ដោយមានជនរងគ្រោះប្រមាណ ១សែននាក់ត្រូវបានជួញដូរចូលទៅក្នុងប្រទេសកម្ពុជា និងជាង ១សែននាក់ផ្សេងទៀត (១២០០០០នាក់) ចូលទៅកាន់ប្រទេសភូមា ផងដែរ ប៉ុន្តែតួលេខនេះត្រូវបានរដ្ឋាភិបាលកម្ពុជាបដិសេធចោលទាំងស្រុង។
យ៉ាងណាក៏ដោយ កាលពីដើមខែសីហា ឆ្នាំ២០២៣ ឧស្សាហកម្មភាពយន្តចិន បានចាក់បញ្ចាំងរឿង No More Bets បានពណ៌នាពីករណីជួញដូរមនុស្សប្រមាណជា ១សែនករណីនៅកម្ពុជាដោយផ្អែកលើរឿងពិត ក្នុងសាច់រឿង អ្នកសរសេរកម្មវិធីម្នាក់ និងតារាស្រីបង្ហាញម៉ូតម្នាក់ទៀតដែលជាជនជាតិចិន បន្ទាប់ពីចាញ់បោកក្រុមឧក្រិដ្ឋជនពីការប្រកាសស្វែងរកការងារតាមអនឡាញ ដោយការសន្យាទទួលបានប្រាក់ខែខ្ពស់។
ប៉ុន្តែ ទីបំផុត ពួកគេត្រូវបានបោកប្រាស់យកទៅធ្វើការខុសច្បាប់ឱ្យធ្វើការឆបោកតាមប្រព័ន្ធអ៊ីនធឺណិត ដែលត្រូវក្រុមឧក្រិដ្ឋជនលក់ពីកន្លែងមួយទៅកន្លែងមួយ ជាដើម ខណៈជនរងគ្រោះដែលជាបុរសត្រូវបានបង្ខំឱ្យធ្វើការឆបោកតាមប្រព័ន្ធអនឡាញ ដូចជា ការបណ្ដាក់ទុន Investments in Stock, BitCoin Mining, Online Games, E-Commerce ឬការជំរិតទារប្រាក់តាមវិធីផ្សេងៗ ជាដើម។
ខ្សែភាពយន្តនេះបានលាតត្រដាងអំពើជួញដូរមនុស្ស និងបង្ហាញពីការធ្វើទារុណកម្មរបស់ក្រុមឧក្រិដ្ឋជនទៅលើជនរងគ្រោះយ៉ាងព្រៃផ្សៃដែរ ដូចជា ការលក់មនុស្សឱ្យបម្រើសេវាកម្មផ្លូវភេទ ការចាក់បញ្ចូលថ្នាំញៀនឱ្យទទួលភ្ញៀវ ការបាញ់សម្លាប់ជនរងគ្រោះដែលមានបំណងលួចរត់ ការដកក្រចក ការយកស្គុតរុំច្រមុះឱ្យថប់ដង្ហើម កាត់ស្លឹកត្រចៀក ច្រានជនរងគ្រោះទម្លាក់ពីលើអគារ និងការវេះយកគ្រឿងក្នុងជនរងគ្រោះទៅលក់ក្នុងទីផ្សារងងឹត ជាដើម ដែលធ្វើឱ្យអ្នកទស្សនាភ័យខ្លាច និងព្រឺព្រួចជាខ្លាំង។
ទាក់ទិននឹងបញ្ហានេះ កាលពីថ្ងៃទី១៤ ខែកក្កដា ឆ្នាំ២០២២ សារព័ត៌មានអន្តរជាតិ អាល់ចាហ្ស៊ីរ៉ា (Aljazeera) បានចេញផ្សាយជាវីដេអូរយៈពេលជាង ៤០នាទី ដែលមានចំណងជើងថា «Forced to Scam: Cambodia’s Cyber Slaves» ឬ «ទាសករតាមអ៊ីនធឺណិតនៅកម្ពុជា» ដោយក្នុងវីដេអូនោះ បានរៀបរាប់យ៉ាងច្រើនពីការស៊ើបអង្កេតនៃអំពើជួញដូរមនុស្ស និងការធ្វើទាសភាពដោយប្រតិបត្តិការបោកប្រាស់តាមអ៊ីនធឺណិតរបស់ជនជាតិចិន នៅកម្ពុជា និងបណ្ដាញរបស់ពួកគេដែលពាក់ព័ន្ធជាមួយមន្ត្រីជាន់ខ្ពស់នៃរដ្ឋាភិបាលកម្ពុជា ដែលធ្វើឡើងជាប្រព័ន្ធ ជាពិសេសគឺមេដឹកនាំបក្សកាន់អំណាចលោក ហ៊ុន សែន តែម្តង។
ក្រសួងការបរទេសអាមេរិក កាលពីចុងឆ្នាំ២០២២ បានបញ្ចេញរបាយការណ៍របស់ខ្លួនស្ដីពីការជួញដូរមនុស្ស ដោយបានដាក់ប្រទេសកម្ពុជាចូលក្នុងបញ្ជីខ្មៅស្ថិតក្រោមការឃ្លាំមើលកម្រិត៣ (Tier 3 Watch List) ដែលបញ្ជាក់ថា កម្ពុជាស្ថិតនៅក្នុងបញ្ជីខ្មៅនៃការជួញដូរមនុស្សធ្ងន់ធ្ងរនៅឡើយ៕