 ប៉ុណ្ណោះ។){kind=link}
ក្រុមសហជីពព្រមានថា ការចាប់ខ្លួនបេក្ខជនប្រធានសហជីពកម្ពុជាជាប់ឆ្នោត លោក ជា ចាន់ ធ្វើឡើងក្រោមការរៀបចំទុកជាមុន ដោយការគប់គិតគ្នារវាងថៅកែក្រុមហ៊ុន និងអាជ្ញាធរខេត្តកំពង់ស្ពឺ ក្នុងគោលបំណងកម្ចាត់សហជីពមូលដ្ឋានរបស់សហព័ន្ធសហជីពកម្ពុជាកុំឱ្យមាននៅក្នុងរោងចក្រ វីង ស្តារ ស៊ូ (Wing Star Shoes Co., Ltd) ប៉ុណ្ណោះ។
សហព័ន្ធសហជីពកម្ពុជា (CATU) និងសហជីពកម្ពុជា បានចេញសេចក្តីថ្លែងការណ៍រួមនៅថ្ងៃទី២៩ ខែមេសា នេះថា ការចាប់ខ្លួនលោក ជា ចាន់ ដោយចោទប្រកាន់ពីបទសមគំនិតក្នុងអំពើលួច គឺបង្ហាញពីការគំរាមកំហែង ការបំភិតបំភ័យ ការរើសអើង និងជាការធ្វើទុក្ខបុកម្នេញលើសហព័ន្ធសហជីពកម្ពុជា CATU យ៉ាងធ្ងន់ធ្ងរ ហើយទង្វើនេះក៏បានរំលោភលើច្បាប់ជាតិ និងច្បាប់អន្តរជាតិជាធរមានក្នុងវិស័យការងារនៅកម្ពុជាផងដែរ។
ក្រុមសហជីពទាំងនេះបញ្ជាក់ថា មុននឹងមានបណ្ដឹងនេះកើតឡើង លោក ជា ចាន់ ដែលជាប្រធានសហជីពជាប់ឆ្នោតនៃក្រុមហ៊ុន វីង ស្តារ ស៊ូ (Wing Star Shoes) និងជាប្រធានសហព័ន្ធសហជីពកម្ពុជា ត្រូវបានជនមិនស្គាល់មុខគំរាមតាមទូរសព្ទឱ្យឈប់បង្កើតសហជីពនៅក្នុងរោងចក្រផលិតស្បែកជើង វីង ស្តារ ស៊ូ នេះបន្តទៀត។ ជាងនេះទៀត ក៏មានការបញ្ចុះបញ្ចូលពីភាគីក្រុមហ៊ុនឱ្យលោក ជា ចាន់ បញ្ឈប់ការបង្កើតសហជីពនេះដែរ ប៉ុន្តែត្រូវលោក ជា ចាន់ បដិសេធជាបន្តបន្ទាប់។
កាលពីថ្ងៃទី១៤ ខែកុម្ភៈ ឆ្នាំ២០២៤ លោក ជា ចាន់ ត្រូវបានសមត្ថកិច្ចចូលទៅចាប់ខ្លួនទាំងកម្រោលនៅក្នុងបរិវេណរោងចក្រ វីង ស្តារ ស៊ូ ដោយមិនប្រាប់ពីមូលហេតុ និងគ្មានដីការបស់តុលាការ ហើយគិតមកមកដល់ពេលនេះ លោក ជា ចាន់ ត្រូវបានឃុំខ្លួនទាំងអយុត្តិធម៌អស់រយៈពេល ៥៥ថ្ងៃហើយ។
ក្រោយការចាប់ខ្លួនបាន ៣ថ្ងៃ តុលាការខេត្តកំពង់ស្ពឺ បានសម្រេចចោទប្រកាន់លោក ជា ចាន់ ពីបទ «សមគំនិតក្នុងអំពើលួច» និងឈ្មោះ ដួង សំណាង ពីបទ «លួច» ដែលប្រព្រឹត្តនៅក្នុងរោងចក្រផលិតស្បែកជើង វីង ស្តារ ស៊ូ កាលពីអំឡុងឆ្នាំ២០២២ កន្លងទៅ ប៉ុន្តែការចោទប្រកាន់នេះត្រូវក្រុមសហជីពជាច្រើននៅកម្ពុជាបដិសេធថា ជាបទចោទក្រោមលេសដើម្បីលុបបំបាត់សហជីពមូលដ្ឋានប៉ុណ្ណោះ។
នៅថ្ងៃទី២៩ ខែមេសា នេះ កម្មករនិយោជិតដែលជាសមាជិកសហជីព CATU នៃក្រុមហ៊ុន វីង ស្តារ ស៊ូ ប្រមាណ ៤០នាក់ បានប្រមូលផ្ដុំគ្នានៅខាងមុខសាលាដំបូងខេត្តកំពង់ស្ពឺ ដើម្បីតាមដានដំណើរការសវនាការ និងស្នើជំរុញឱ្យតុលាការទម្លាក់ចោលបទចោទ និងដោះលែងលោក ជា ចាន់ ឱ្យមានសេរីភាពឡើងវិញ ដោយគ្មានលក្ខខណ្ឌ ហើយជំរុញឲ្យក្រុមហ៊ុន វិង ស្តារ ស៊ូ ធានាគោរពសេរីភាព ធានានូវសំណងទៅលើផលប៉ះពាល់ចំពោះលោក ជា ចាន់ និងក្រុមគ្រួសាររបស់លោកថែមទៀតដែរ។
អ្នកគ្រប់គ្រងផ្នែកការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ បានប្រាប់សារព័ត៌មាន The Cambodia Dally នៅថ្ងៃទី២៩ មេសា នេះ ដោយអំពាវនាវឱ្យក្រុមហ៊ុនបញ្ជាទិញ ASICS របស់ក្រុមហ៊ុន វីង ស្តារ ស៊ូ ដែលមានមូលដ្ឋាននៅប្រទេសជប៉ុន ដាក់សម្ពាធលើក្រុមហ៊ុន វីង ស្តារ ស៊ូ ឱ្យដកពាក្យបណ្តឹងពីតុលាការ និងទទួលយកលោក ជា ចាន់ ចូលបម្រើការងារវិញ ព្រមទាំងទូទាត់សំណងប្រាក់ឈ្នួល និងអត្ថប្រយោជន៍ជាច្រើនទៀតដល់រូបលោកចាប់តាំងពីថ្ងៃដែលលោកត្រូវបានសមត្ថកិច្ចចាប់ឃុំខ្លួនរហូតដល់ថ្ងៃចូលបម្រើការងារវិញ។
លោក ឃុន ថារ៉ូ លើកឡើងថា កន្លងមក មជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) បានដាក់លិខិតទៅកាន់ក្រុមហ៊ុនបញ្ជាទិញ ASICS ជាបន្តបន្ទាប់ ដោយរៀបរាប់អំពីដំណើរដើមទងនៃការចាប់ខ្លួនលោក ជា ចាន់។ លោកបន្តថា មានភាពមិនប្រក្រតីជាច្រើនពាក់ព័ន្ធនឹងការចោទប្រកាន់លើលោក ជា ចាន់ ពីបទសមគំនិតលួចនេះ។
មន្ត្រីជាន់ខ្ពស់អង្គការសង់ត្រាល់រូបនេះសង្ឃឹមថា ក្រុមហ៊ុនបញ្ជាទិញ ASICS នឹងដាក់សម្ពាធទៅលើក្រុមហ៊ុន វីង ស្តារ ស៊ូ ដើម្បីឱ្យដោះលែងលោក ជា ចាន់ ព្រោះថាក្រុមហ៊ុនបញ្ជាទិញ ASICS មានឥទ្ធិពលគ្រប់គ្រាន់ក្នុងការជួយអន្តរាគមន៍ក្នុងរឿងនេះ ហើយការអន្តរាគមន៍នេះ គឺស្របទៅនឹងក្រមសីលធម៌របស់ក្រុមហ៊ុនបញ្ជាទិញ ASICS ស្ដីពីធុរកិច្ច និងសិទ្ធិមនុស្សនៅរោងចក្រផ្គត់ផ្គង់របស់ខ្លួនផងដែរ។
ទាក់ទិននឹងបញ្ហានេះ កាលពីថ្ងៃទី១៩ ខែកុម្ភៈ ឆ្នាំ២០២៤ សហជីពសកល IndustriALL Global Union បានលិខិតថ្កោលទោសមួយទៅកាន់នាយករោងចក្រ Wing Star Shoes លោក Chiu Ching TING បន្ទាប់ពីលោក ជា ចាន់ ដែលជាបេក្ខជនជាប់ឆ្នោតជាប្រធានសហជីពនៅរោងចក្រ វីង ស្តារ ស៊ូ ត្រូវបានឃុំខ្លួននៅពន្ធនាគារខេត្តកំពង់ស្ពឺ ក្រោយសមត្ថកិច្ចចាប់ខ្លួនទាំងកម្រោលដោយមិនប្រាប់ពីមូលហេតុ និងគ្មានដីការបស់តុលាការនោះ។
សហជីពសកលបញ្ជាក់ថា ការចាប់ខ្លួនលោក ជា ចាន់ នៅពេលនេះ គឺជាឧបាយកលបង្ក្រាបសហជីព បន្ទាប់ពីលោក ជា ចាន់ បដិសេធមិនទទួលយកការបញ្ចុះបញ្ចូលឱ្យបោះបង់ការបង្កើតសហជីពនៅក្នុងរោងចក្រដែលជាថៅកែចិន នេះតែប៉ុណ្ណោះ។
កាលពីថ្ងៃទី១០ ខែមករា ឆ្នាំ២០២៤ កម្មកររោងចក្រ Wing Star Shoes បានបោះឆ្នោតជ្រើសរើសតំណាងសហជីពទៅតាមនីតិវិធីនៃច្បាប់របស់កម្ពុជា ក្នុងនោះ លោក ជា ចាន់ ត្រូវបានជ្រើសរើសជាប្រធាន ប៉ុន្តែនៅថ្ងៃទី១៤ កុម្ភៈ លោក ជា ចាន់ ក៏ត្រូវសមត្ថកិច្ចចាប់ខ្លួនតែម្តង៕