31 C
Phnom Penh

សមាជិក​សហភាព​អឺរ៉ុប​អំពាវនាវ​រដ្ឋាភិបាល​កម្ពុជា​ការពារ​អ្នកកាសែត​ក្នុង​ទិវា​សេរីភាព​សារព័ត៌មាន

ដោយ ឌឹ ខេមបូឌា ដេលី

បទវិភាគ

ស្ថានទូត​ស៊ុយអែត​ប្រចាំ​ប្រទេស​កម្ពុជា អំពាវនាវ​ឱ្យ​រាជរដ្ឋាភិបាល​ការពារ​អ្នក​សារព័ត៌មាន​ឯករាជ្យ ដើម្បី​បញ្ចៀស​នូវ​ការ​បៀតបៀន ឬ​ការ​ប្រឆាំង​ដោយ​បទឧក្រិដ្ឋ ជាពិសេស​គឺ​ការពារ​ទៅ​លើ​ស្ត្រី​ជា​អ្នក​សារព័ត៌មាន ដើម្បី​រួម​គ្នា​ដោះស្រាយ​ពី​វិបត្តិ​បរិស្ថាន​ដែល​កំពុង​ធ្វើ​ឱ្យ​មាន​ការ​បម្រែបម្រួល​អាកាសធាតុ​លើ​ភព​ដែនដី​ក្នុង​ពេល​បច្ចុប្បន្ន​នេះ។

ភារធារី​ស្ថានទូត​ស៊ុយអែត​ប្រចាំ​កម្ពុជា អ្នកស្រី ខាំមីឡា អនតូសុន (Camilla Ottosson) លើកឡើង​ក្នុង​ទិវា​សេរីភាព​សារព័ត៌មាន​ក្រោម​ប្រធានបទ សារព័ត៌មាន​សម្រាប់​ភព​ផែនដី នៅ​ថ្ងៃទី​២ ខែ​ឧសភា ឆ្នាំ​២០២៤ ថា ដើម្បី​ជំរុញ​ឱ្យ​មាន​ការ​យល់ដឹង​ពី​បរិស្ថាន​សម្រាប់​ភព​ផែនដី​ទៅ​ដល់​ប្រជាពលរដ្ឋ​ខ្មែរ សំខាន់​ណាស់​ការ​ជំរុញ​ឱ្យ​មាន​ប្រព័ន្ធ​ផ្សព្វផ្សាយ​ឯករាជ្យ និង​ដោយ​សេរី ដើម្បី​រួម​គ្នា​រក​វិធានការ​ទប់ស្កាត់​ពី​វិបត្តិ​ទាំងនោះ។

អ្នកស្រី ខាំមីឡា អនតូសុន (Camilla Ottosson) លើកឡើង​ថា តួនាទី​របស់​សារព័ត៌មាន ពិត​ជា​មាន​សារសំខាន់​ខ្លាំង​ណាស់​ក្នុង​បរិបទ​នៃ​គ្រោះមហន្តរាយ​បរិស្ថាន​សព្វថ្ងៃ​នេះ ព្រោះ​ថា​អ្នក​សារព័ត៌មាន​ឯករាជ្យ​ទាំងនោះ អាច​ជួយ​ពន្យល់​ទៅ​ដល់​ប្រជាជន​កម្ពុជា​ឱ្យ​មាន​ការ​យល់ដឹង​ពី​ការ​ប្រែប្រួល​អាកាសធាតុ​បាន​កាន់តែ​ច្រើន ព្រោះ​ថា​ការ​ប្រែប្រួល​អាកាសធាតុ​ដែល​បណ្តាល​មកពី​វិបត្តិ​បរិស្ថាន នឹង​ជះឥទ្ធិពល​ដ៏​អាក្រក់​ទៅ​ដល់​ការ​អភិវឌ្ឍ សេដ្ឋកិច្ច​សង្គម និង​ជីវភាព​រស់នៅ​របស់​ប្រជាពលរដ្ឋ​ខ្មែរ​ផង​ដែរ។

នៅ​ថ្ងៃទី​២ ខែ​ឧសភា ឆ្នាំ​២០២៤ នេះ សម្ព័ន្ធ​អ្នក​សារព័ត៌មាន​កម្ពុជា បាន​រៀបចំ​ទិវា​សេរីភាព​សារព័ត៌មាន ក្រោម​ប្រធានបទ សារព័ត៌មាន​សម្រាប់​ភព​ផែនដី៖ សារព័ត៌មាន​ក្នុង​ការ​ប្រឈមមុខ​នឹង​វិបត្តិ​បរិស្ថាន ដែល​មាន​ការ​ចូលរួម​ពី​ភាគី​ពាក់ព័ន្ធ​ជាច្រើន ដូចជា តំណាង​ស្ថាប័ន​សារព័ត៌មាន​ឯករាជ្យ អង្គការ​សង្គម​ស៊ីវិល មន្ត្រី​ជាន់ខ្ពស់​ក្រសួង​បរិស្ថាន មន្ត្រី​ជាន់ខ្ពស់​ក្រសួង​ព័ត៌មាន និង​អ្នក​ចូលរួម​ប្រមាណ​ជា ២០០​នាក់​ផ្សេង​ទៀត​ផង​ដែរ។

អ្នក​នាំពាក្យ​ក្រសួង​ព័ត៌មាន​លោក ទេព អស្នារិទ្ធ លើកឡើង​ក្នុង​ទិវា​សេរីភាព​សារព័ត៌មាន​ខាងលើ​ថា រៀបចំ​ទិវា​សេរីភាព​សារព័ត៌មាន​ក្រោម​ប្រធានបទ សារព័ត៌មាន​សម្រាប់​ភព​ផែនដី​នៅ​ពេលនេះ គឺជា​ការ​ឆ្លុះបញ្ចាំង​មួយ​ចំពោះ​ស្ថានភាព​សេរីភាព​សារព័ត៌មាន​នៅ​កម្ពុជា ដែល​អ្នក​សារព័ត៌មាន​មាន​មុខនាទី​ក្នុង​ការ​រួម​ចំណែក​ការពារ ថែរក្សា ធនធាន​ជីវចម្រុះ និង​បរិស្ថាន​នៅ​កម្ពុជា​សព្វថ្ងៃ​នេះ។

មន្ត្រី​ជាន់ខ្ពស់​ក្រសួង​ព័ត៌មាន​រូប​នេះ​លើកឡើង​ថា វិបត្តិ​បរិស្ថាន​ដែល​កើត​មាន​នៅ​ក្នុង​ប្រទេស​កម្ពុជា មិនមែន​ជា​បញ្ហា​របស់​អ្នក​ណា​ម្នាក់ ឬ​ស្ថាប័ន​ណា​មួយ​ឡើយ ប៉ុន្តែ​ជា​បញ្ហា​ទាំងអស់​គ្នា ដែល​អ្នក​ពាក់ព័ន្ធ​ត្រូវ​ចូលរួម​ផ្សព្វផ្សាយ និង​ដោះស្រាយ​វិបត្តិ​ទាំងនេះ​ជាមួយ​គ្នា។

លោក ទេព អស្នារិទ្ធ បញ្ជាក់​ថា ស្ថានភាព​សេរីភាព​សារព័ត៌មាន​នៅ​កម្ពុជា​មាន​ភាព​ល្អ​ប្រសើរ ក្នុង​នោះ សេរីភាព​សារព័ត៌មាន​ដ៏​សម្បូរ​បែប​នៅ​ប្រទេស​កម្ពុជា​សព្វថ្ងៃ​នេះ​បាន​ជួយ​លើក​កម្ពស់​ដល់​សេរីភាព​សារព័ត៌មាន​យ៉ាង​ធំធេង​ដែរ ដែល​អាច​ឱ្យ​អ្នក​ប្រកប​អាជីព​ជា​អ្នក​សារព័ត៌មាន​អាច​ប្រមូល​ព័ត៌មាន និង​ផ្សព្វផ្សាយ​ដោយ​គ្មាន​ការ​ភ័យខ្លាច ជាពិសេស​ទាក់ទង​នឹង​ការ​រាយការណ៍​អំពី​បរិស្ថាន ជាដើម។

មាត្រា​៤១ នៃ​រដ្ឋធម្មនុញ្ញ​ចែង​ថា ប្រជាពលរដ្ឋ​ខ្មែរ​មាន​សេរីភាព​ខាង​ការ​បញ្ចេញមតិ​របស់​ខ្លួន សេរីភាព​ខាង​សារព័ត៌មាន សេរីភាព​ខាង​បោះពុម្ព​ផ្សាយ និង​សេរីភាព​ខាង​ការ​ជួប​ប្រជុំ ជាដើម។

យ៉ាងណាក៏ដោយ ស្ថានភាព​សេរីភាព​សារព័ត៌មាន​នៅ​កម្ពុជា​សព្វថ្ងៃ​នេះ ត្រូវ​គេ​មើល​ឃើញ​ថា កំពុង​រង​នូវ​ការ​គាបសង្កត់​ពី​រដ្ឋាភិបាល​យ៉ាង​ធ្ងន់ធ្ងរ ជាពិសេស​ការ​ធ្វើ​ទុក្ខបុកម្នេញ​ទៅ​លើ​សារព័ត៌មាន​ដែល​បាន​រក​ឃើញ​ពី​ការ​កាប់​បំផ្លាញ​ព្រៃឈើ​ដែល​មាន​ការ​គប់គិត​រវាង​មន្ត្រី​រដ្ឋាភិបាល​កម្ពុជា និង​ឈ្មួញ​រកស៊ី​ឈើ​ខុស​ច្បាប់ ក្នុង​នោះ សកម្មជន​បរិស្ថាន​នានា​ដែល​បាន​ផ្សព្វផ្សាយ​ពី​ការ​បំផ្លាញ​បរិស្ថាន​ក្នុង​តំបន់​ការពារ​នានា ក៏​ត្រូវ​រង​នូវ​ការ​ចាប់​ខ្លួន​ឃុំ​ដែរ​សព្វថ្ងៃ​នេះ។

សមាគម​សម្ព័ន្ធ​អ្នក​សារព័ត៌មាន​កម្ពុជា ខេមបូចា បាន​រក​ឃើញ​ថា អ្នក​សារព័ត៌មាន​ជាង ៤០​នាក់ (៤៤​នាក់) និង​ស្ថាប័ន​សារព័ត៌មាន​ឯករាជ្យ​មួយ​ចំនួន​ទៀត ប្រឈមមុខ​នឹង​ការ​យាយី​គ្រប់​ទម្រង់​ក្នុង​ឆ្នាំ​២០២៣ កន្លង​ទៅ ក្នុង​នោះ​មាន ១៣​ករណី​ដែល​ជា​ការ​ប្រើប្រាស់​ចំណាត់ការ​ផ្លូវច្បាប់​ប្រឆាំង​អ្នក​សារព័ត៌មាន បន្ទាប់ពី​ពួកគេ​បាន​ចុះផ្សាយ​ពី​ការ​បំផ្លិចបំផ្លាញ​បរិស្ថាន ដូចជា ការ​កាប់​បំផ្លាញ​ព្រៃឈើ និង​បញ្ហា​រសើប​ជាច្រើន​ដទៃ​ទៀត ជាដើម។

អង្គការ​អ្នក​សារព័ត៌មាន​គ្មាន​ព្រំដែន (Reporters Without Borders) បាន​ដាក់​ចំណាត់ថ្នាក់​សេរីភាព​សារព័ត៌មាន​នៅ​កម្ពុជា​សម្រាប់​ឆ្នាំ​២០២៣ ស្ថិត​ក្នុង​លំដាប់​លេខ​រៀង​ទី​១៤៧ ក្នុង​ចំណោម​ប្រទេស​១៨០ ដែល​ចំណាត់ថ្នាក់​នេះ​បង្ហាញ​អំពី​សេរីភាព​សារព័ត៌មាន​នៅ​កម្ពុជា​នៅតែ​មិន​អាច​ងើប​ចេញពី​ចំណាត់ថ្នាក់​ដ៏​អាក្រក់ ដោយសារតែ​គេ​រក​ឃើញ​ថា មាន​ការ​កើន​ឡើង​នៃ​ការ​ធ្វើ​ទុក្ខបុកម្នេញ​របស់​រដ្ឋាភិបាល​លើ​ប្រព័ន្ធ​ផ្សព្វផ្សាយ​ឯករាជ្យ។

អង្គការ​អ្នក​សារព័ត៌មាន​គ្មាន​ព្រំដែន លាតត្រដាង​ថា វិស័យ​ប្រព័ន្ធ​ផ្សព្វផ្សាយ​ឯករាជ្យ​នៅ​កម្ពុជា​ត្រូវ​បាន​បំផ្លិចបំផ្លាញ និង​បោស​សំអាត​ដោយ​រដ្ឋាភិបាល​កម្ពុជា ចាប់តាំងពី​អំឡុង​ឆ្នាំ​២០១៧ និង​ឆ្នាំ​២០១៨ មក ហើយ​ជា​លទ្ធផល​នៃ​យុទ្ធនាការ​នេះ ពលរដ្ឋ​កម្ពុជា​សព្វថ្ងៃ​នេះ​ទទួល​បាន​ព័ត៌មាន​តែ​ពី​ស្ថាប័ន​ដែល​ស្និទ្ធ​នឹង​រដ្ឋាភិបាល​កម្ពុជា​តែប៉ុណ្ណោះ។

ជា​ឧទាហរណ៍​ជាក់ស្តែង សហភាព​សហព័ន្ធ​អ្នក​សារព័ត៌មាន​កម្ពុជា​ដែល​លោក ហ៊ុន សែន តែង​ផ្តល់​ថវិកា​រាប់​សិប​ម៉ឺន​ដុល្លារ​ក្នុង ១​ឆ្នាំៗ និង​ស្ថាប័ន​សារព័ត៌មាន Fresh News ជាដើម ត្រូវ​គេ​មើល​ឃើញ​ថា​ជា​ស្ថាប័ន​បម្រើ​នយោបាយ​របស់​រដ្ឋាភិបាល​កម្ពុជា​ទាំងស្រុង មិនមែន​ជា​ស្ថាប័ន​ព័ត៌មាន​ឯករាជ្យ​ចុះផ្សាយ​អំពី​ការពិត​ដែល​មាន​ក្នុង​សង្គម​នោះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស