29 C
Phnom Penh

សមត្ថកិច្ច​បង្ក្រាប​កន្លែង​កែច្នៃ​គ្រឿងញៀន​ដោយ​រឹបអូស​សារធាតុ​គីមី​ជិត​៧០០​គីឡូក្រាម​នៅ​ពីរ​ទីតាំង​ផ្សេង​គ្នា

ដោយ ឌឹ ខេមបូឌា ដេលី

បទវិភាគ

សមត្ថកិច្ច​ចុះ​បង្ក្រាប​ករណី​កែច្នៃ រក្សាទុក និង​ជួញដូរ​គ្រឿងញៀន​នៅ​ទីតាំង​ចំនួន​ពីរ​កន្លែង​ផ្សេង​គ្នា​នៅ​រាជធានី​ភ្នំពេញ និង​ខេត្ត​កណ្ដាល ដោយ​រឹបអូស​ថ្នាំញៀន​ជាង ១៦​គីឡូក្រាម រួម​ទាំង​សារធាតុ​គីមី​ជិត ៧០០​គីឡូក្រាម និង​ឃាត់​ខ្លួន​ជនសង្ស័យ ៤​នាក់។

អគ្គស្នងការដ្ឋាន​នគរបាល​ជាតិ បាន​ឲ្យ​ដឹង​ថា សមត្ថកិច្ច​ចុះ​បង្ក្រាប​រួម​មាន​គោលដៅ​ទី​១ នៅ​ខុនដូ ដឺប្លេស សង្កាត់​ជ្រោយចង្វារ ខណ្ឌ​ជ្រោយចង្វារ រាជធានី​ភ្នំពេញ និង​គោលដៅ​ទី​២ នៅ​ភូមិ​ព្រែកហូរលិច សង្កាត់​ព្រែកហូរ ក្រុង​តាខ្មៅ ខេត្ត​កណ្តាល។

ប្រភព​ដដែល​បាន​អះអាង​ថា ការ​ចុះ​បង្ក្រាប​គោលដៅ​ទាំង​ពីរ​នេះ បាន​រក​ឃើញ​គ្រឿងញៀន​ជា​ប្រភេទ​មេតំហ្វេតាមីន (MDMA), មេតំហ្វេតាមីន (WY), មេតំហ្វេតាមីន (ICY) រួម​ទាំង​សារធាតុ​គីមី​ផ្សំ​ចំនួន ៦៨៥​គីឡូក្រាម​ផង​ដែរ។

លើស​ពី​នេះ សមត្ថកិច្ច​ក៏​បាន​ឃាត់​ខ្លួន​ជនសង្ស័យ​ចំនួន ៤​នាក់​ជា​ជនជាតិ​ខ្មែរ​ថែម​ទៀត។ បច្ចុប្បន្ន ជនសង្ស័យ​ត្រូវ​មន្ទីរ​ប្រឆាំង​គ្រឿងញៀន​យក​ទៅ​សួរនាំ និង​រៀបចំ​សំណុំរឿង​បញ្ជូន​ទៅ​កាន់​សាលាដំបូង ដើម្បី​ចាត់ការ​តាម​នីតិវិធី​ច្បាប់។

មន្ត្រី​ប្រឆាំង​គ្រឿងញៀន​កម្ពុជា លើកឡើង​ថា ក្នុង​រយៈពេល ៣​ខែ​ដើម​ឆ្នាំ​២០២៤ នេះ ខ្លួន​បង្ក្រាប​បាន​បទល្មើស​គ្រឿងញៀន​ជិត ២០០​ករណី (១៨១​ករណី) ឃាត់​ខ្លួន​ជនសង្ស័យ​បាន​ជាង ៥០០​នាក់ (៥៤៨​នាក់) និង​រឹបអូស​គ្រឿងញៀន​បាន​ជិត ២​តោន (១​តោន ៧៨៣​គីឡូក្រាម)។

ប្រភព​ដដែល​លើកឡើង​ថា ក្រៅពី​ប្រតិបត្តិការ​បង្ក្រាប​របស់​មន្ទីរ​ប្រឆាំង​គ្រឿងញៀន ស្នងការដ្ឋាន​នគរបាល​រាជធានី-ខេត្ត​ទាំង​២៥ ក៏​បាន​បង្ក្រាប​ករណី​គ្រឿងញៀន​បាន​ជាង ១​ពាន់​ករណី (១៦៣១​ករណី) និង​ឃាត់​ខ្លួន​ជនសង្ស័យ​ជិត ៤​ពាន់​នាក់ (៣៩០៣​នាក់) ព្រមទាំង​រឹបអូស​គ្រឿងញៀន​បាន​ជាង ៨០​គីឡូក្រាម​ផង​ដែរ។

កាលពី​ខែ​កុម្ភៈ ឆ្នាំ​២០២៤ អាជ្ញាធរ​ជាតិ​ប្រយុទ្ធ​ប្រឆាំង​គ្រឿងញៀន បាន​លើកឡើង​ក្នុង​កិច្ចប្រជុំ​ក្រុម​ការងារ​អន្តរ​ក្រសួង​ត្រួតពិនិត្យ​សារធាតុ​ញៀន និង​សារធាតុ​គីមី​ផ្សំ​ថា ចាប់តាំងពី​ឆ្នាំ​២០២០ រហូត​ដល់​ចុង​ឆ្នាំ​២០២៣ កន្លង​ទៅ គ្រឿងញៀន និង​សារធាតុ​ផ្សំ បាន​លុកលុយ​ចូល​ប្រទេស​កម្ពុជា​ជិត ១​ពាន់​តោន (៦០០​តោន) ដែល​អាជ្ញាធរ​កម្ពុជា​បង្ក្រាប​បាន ក្នុង​នោះ ជនសង្ស័យ​ជាង ៧​ម៉ឺន​នាក់​ត្រូវ​បាន​ឃាត់​ខ្លួន​ក្នុង​ចំណោម​ជាង ៣​ម៉ឺន​ករណី។

រដ្ឋមន្ត្រី​ក្រសួង​មហាផ្ទៃ​លោក ស សុខា ព្រមាន​ថា កន្លង​មក កម្ពុជា​ត្រូវ​បាន​ប្រើប្រាស់​ជា​កន្លែង​ផលិត​គ្រឿងញៀន​យក​ទៅ​ប្រទេស​ក្រៅ​ផង និង​ជា​កន្លែង​ចរាចរ​សម្រាប់​ឆ្លងកាត់​ទៅ​ប្រទេស​ទី​៣ ផង​ដែរ ប៉ុន្តែ​បច្ចុប្បន្ន​នេះ ក្រុម​ឧក្រិដ្ឋជន​បាន​នាំគ្នា​មក​ផលិត​សម្រាប់​ផ្គត់ផ្គង់​ទីផ្សារ​នៅ​ក្នុង​ប្រទេស​កម្ពុជា​តែម្តង ហើយ​ក្រុម​ឧក្រិដ្ឋជន​ទាំងនោះ​បាន​ដើរ​មុន​វិធានការ​របស់​រដ្ឋាភិបាល​មួយ​ជំហាន​រហូត ខណៈ​យុទ្ធនាការ​បង្ក្រាប​គ្រឿងញៀន​របស់​កម្ពុជា គឺ​នៅ​មាន​កម្រិត​នៅឡើយ។

អគ្គលេខាធិការ​នៃ​អាជ្ញាធរ​ជាតិ​ប្រយុទ្ធ​ប្រឆាំង​គ្រឿងញៀន លោក មាស វិរិទ្ធ បាន​ថ្លែង​កន្លង​មក​ថា ក្នុង​ន័យ​រក្សា​ការពារ​សមិទ្ធផល​ដែល​សម្រេច​ក្នុង​ពេល​កន្លង​មក ក៏ដូចជា​ដើម្បី​ទប់ទល់​ទៅ​នឹង​និន្នាការ និង​ល្បិច​កល​ថ្មីៗ​របស់​ក្រុម​ឧក្រិដ្ឋជន ក្នុង​ការ​កាត់បន្ថយ និង​ឈាន​ទៅ​លុប​បំបាត់​គ្រឿងញៀន​ឱ្យ​អស់​ពី​កម្ពុជា ក្នុង​នាម​ជា​សេនាធិការ​របស់​រដ្ឋាភិបាល គឺ​ខិតខំ​ប្រឹងប្រែង និង​ជម្នះ​គ្រប់​ឧបសគ្គ​តស៊ូ​ប្តូរផ្តាច់​ក្នុង​ការ​បង្ការ ទប់ស្កាត់ បង្ក្រាប និង​ដោះស្រាយ​រាល់​បញ្ហា​ដែល​ពាក់ព័ន្ធ​នឹង​គ្រឿងញៀន។

ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាព លោក យង់ គិមអេង បាន​ប្រាប់​សារព័ត៌មាន​ក្នុង​ស្រុក​កន្លង​មក​ថា លោក​ស្នើ​ឱ្យ​អាជ្ញាធរ​បន្ត​ស្រាវជ្រាវ និង​ស្វែងរក​ក្រុម​ឧក្រិដ្ឋជន​គ្រឿងញៀន និង​ទប់ស្កាត់​បណ្ដាញ​ចែកចាយ​គ្រឿងញៀន​តាម​សហគមន៍។ លោក​ក៏​អំពាវនាវ​ឲ្យ​ពលរដ្ឋ ចូលរួម​សហការ​លើ​កិច្ច​ការងារ​នេះ​ផង​ដែរ ដើម្បី​ឈាន​ទៅ​កាត់បន្ថយ​គ្រឿងញៀន​ក្នុង​ប្រទេស៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស