29 C
Phnom Penh

សកម្មជន​ចលនា​មាតា​ធម្មជាតិ​ពហិការ​មិន​ចូលរួម​សវនាការ​បន្ទាប់ពី​តុលាការ​ហាមឃាត់​សាធារណជន​មិន​ឱ្យ​ចូល​ស្តាប់

ដោយ ឌឹ ខេមបូឌា ដេលី

បទវិភាគ

សកម្មជន​ចលនា​មាតា​ធម្មជាតិ ពហិការ​មិន​ចូលរួម​ក្នុង​សវនាការ​របស់​សាលាដំបូង​រាជធានី​ភ្នំពេញ​ទេ​នៅ​ថ្ងៃ​ពុធ ទី​៥ មិថុនា នេះ បន្ទាប់ពី​តុលាការ​បិទ​រនាំង​ហាមឃាត់​មិន​ឱ្យ​អ្នក​សារព័ត៌មាន និង​សាធារណជន​ចូលរួម​ស្តាប់​សវនាការ។

សកម្មជន​យុវជន​ចលនា​មាតា​ធម្មជាតិ ចំនួន ៥​នាក់ លើកឡើង​នៅ​មុខ​សាលាដំបូង​រាជធានី​ភ្នំពេញ​នៅ​ថ្ងៃទី​៥ មិថុនា នេះ​ថា ពួកគេ​នឹង​ចូលរួម​សវនាការ បើ​តុលាការ​យល់ព្រម​បើក​រនាំង​ហាមឃាត់ ដោយ​អនុញ្ញាត​ឱ្យ​អ្នក​សារព័ត៌មាន និង​សាធារណជន​ចូលរួម​ស្តាប់​សវនាការ​នេះ​ដែរ។

សកម្មជន​បរិស្ថាន​ទាំង ៥​នាក់ រួម​មាន លោក យឹម លាងហ៊ី, លោក ថុន រដ្ឋា, លោក លី ចាន់ដារ៉ាវុត, កញ្ញា ភួន កែវរស្មី និង​កញ្ញា ឡុង គន្ធា នាំគ្នា​អង្គុយ​ស្មិងស្មាធិ៍​នៅ​មុខ​សាលាដំបូង​រាជធានី​ភ្នំពេញ​ក្នុង​សម្លៀកបំពាក់​កាន់​ទុក្ខ​ពណ៌​ស​ពេញ​មួយ​ព្រឹក និង​បន្ត​រង់ចាំ​ចូល​សវនាការ​ពេល ១​រសៀល​ទៀត ខណៈ​តុលាការ​មិន​បាន​ដក​បារ៉ាស់​ចេញ​ទេ ចំណែក​សកម្មជន​ទាំងនោះ​ក៏​មិន​បាន​ចូល​បន្ទប់​សវនាការ​ដែរ បើ​ទោះជា​តុលាការ​នៅតែ​បន្ត​សវនាការ​ដោយ​អវត្តមាន​ជន​ដែល​ត្រូវ​ចោទ​ដដែល។

លោក លី ចាន់ដារ៉ាវុត អះអាង​ថា ការ​ដាក់​រនាំង​ហាមឃាត់​មិន​ឱ្យ​អ្នក​សារព័ត៌មាន និង​សាធារណជន​ចូល​ទៅ​ស្កាត់​សវនាការ​នេះ គឺជា​ទង្វើ​រំលោភ​ច្បាប់​យ៉ាង​ធ្ងន់ធ្ងរ ហើយ​ក៏​បង្ហាញ​ពី​សវនាការ​ឆាកល្ខោន​របស់​តុលាការ​ដែរ។

យុវជន​ចលនា​មាតា​ធម្មជាតិ​រូប​នេះ​បញ្ជាក់​ថា ការ​ដាក់​រនាំង​បែប​នេះ គឺ​ដោយសារតែ​សវនាការ​លើក​ពេល​កាលពី​ចុង​ខែ​ឧសភា មាន​អ្នកគាំទ្រ​សកម្មជន​ចលនា​មាតា​ធម្មជាតិ​ច្រើន ដូច្នេះ​ទើប​តុលាការ​បញ្ជា​ឱ្យ​អាជ្ញាធរ​ដាក់​រនាំង​ហាមប្រាម​នេះ​តែម្តង ក្នុង​នោះ​អ្នក​ដែល​បាន​ទៅ​ចូលរួម​គាំទ្រ​យុវជន​ចលនា​មាតា​ធម្មជាតិ​ក្នុង​សវនាការ​លើក​មុន ក៏​ត្រូវ​បាន​អាជ្ញាធរ​ទៅ​សួរ​ដេញដោល​ដល់​ផ្ទះ​ដែរ។

កញ្ញា ភួន កែវរស្មី លើកឡើង​ថា សកម្មភាព​ការពារ​បរិស្ថាន​កន្លង​មក បើ​ទោះជា​កញ្ញា​ដឹង​ថា​ត្រូវ​ប្រឈម​នឹង​ការ​ចាប់​ខ្លួន​ក៏ដោយ ក៏​កញ្ញា​មិន​ខ្លាច​ដែរ ប៉ុន្តែ​អ្វី​ដែល​កញ្ញា​ខ្លាច​បំផុត​នោះ គឺ​ខ្លាច​យុវជន​បាក់​ទឹកចិត្ត​មិន​ហ៊ាន​ចូលរួម​ការពារ​ធនធាន​ធម្មជាតិ​ដែល​កំពុង​រង​នូវ​ការ​បំផ្លាញ​បន្ត​ទៀត ព្រោះ​ការ​ជាប់​ឃុំ​ខ្លួន​របស់​កញ្ញា មិន​ជះ​ឥទ្ធិពល​អាក្រក់​ដូច​ការ​បាក់​ទឹកចិត្ត​របស់​យុវជន​ក្នុង​ការ​ចូលរួម​ជួយ​កិច្ចការ​សង្គម​ឡើយ។

នៅ​ថ្ងៃទី​៥ ខែ​មិថុនា ឆ្នាំ​២០២៤ នេះ សាលាដំបូង​រាជធានី​ភ្នំពេញ បើក​សវនាការ​លើ​សំណុំរឿង​សកម្មជន​ចលនា​មាតា​ធម្មជាតិ ដែល​រង​នូវ​ការ​ចោទប្រកាន់​ពី​បទ ប្រមាថ​ចំពោះ​អង្គ​ព្រះមហាក្សត្រ និង​បទ​រួម​គំនិត​ក្បត់ ដោយ​មិន​មាន​វត្តមាន​សកម្មជន​ទាំងនោះ​ទេ ដែល​គ្រាន់តែ​អាន​សក្ខីកម្ម​ដែល​ទទួល​បាន​អំឡុង​ពេល​សាកសួរ​កាលពី​លើក​មុនៗ​ប៉ុណ្ណោះ។

កាលពី​ថ្ងៃទី​២៩ ខែ​ឧសភា ឆ្នាំ​២០២៤ អ្នកគាំទ្រ​សកម្មជន​ចលនា​មាតា​ធម្មជាតិ​ជាច្រើន​នាក់ បាន​ចូលរួម​តាមដាន​សវនាការ​លើ​សំណុំរឿង​សកម្មជន​ចលនា​មាតា​ធម្មជាតិ ប៉ុន្តែ​តុលាការ​បាន​សម្រេច​លើក​យក​សវនាការ​នោះ​មក​បន្ត​នៅ​ថ្ងៃទី​៥ ខែ​មិថុនា នេះ​វិញ ប៉ុន្តែ​សវនាការ​នៅ​ថ្ងៃ​នេះ ត្រូវ​តុលាការ​ដាក់​រនាំង​ហាមឃាត់​មិន​ឱ្យ​មាន​អ្នកគាំទ្រ​ចូលរួម​ស្តាប់​សវនាការ​នេះ​ដាច់ខាត។

អតីត​មន្ត្រី​ជាន់ខ្ពស់​នៃ​សមាគម​ការពារ​សិទ្ធិមនុស្ស​អាដហុក (ADHOC) លោក ស៊ឹង សែនករុណា ប្រាប់​សារព័ត៌មាន The Cambodia Daily នៅ​ថ្ងៃទី​៥ មិថុនា នេះ​ថា សំណុំរឿង​របស់​សកម្មជន​ចលនា​មាតា​ធម្មជាតិ ជា​ករណី​សាធារណៈ ដូច្នេះ​សំណុំរឿង​បែប​នេះ​គឺ​គួរតែ​អនុញ្ញាត​ឱ្យ​មាន​អ្នក​សារព័ត៌មាន និង​សាធារណជន​គាំទ្រ​ក្រុម​យុវជន​ទាំងនោះ​ទៅ​ចូលរួម​ស្តាប់​ដែរ។

លោក ស៊ឹង សែនករុណា លើកឡើង​ថា ចៅក្រម​គួរ​ពិនិត្យ​លើ​នីតិវិធី​របស់​ខ្លួន​ឡើងវិញ ព្រោះ​សំណុំរឿង​នេះ​មិន​មាន​អ្វី​ជា​អាថ៌កំបាំង​ទេ ចំណែក​តុលាការ​ក៏​មិន​មាន​អ្វី​ត្រូវ​ខ្លាច​មិន​ហ៊ាន​ប្រឈមមុខ​នឹង​ការ​សម្រេច​របស់​ខ្លួន​ដែរ ទោះ​ការ​ចោទប្រកាន់​របស់​តុលាការ​លើ​ក្រុម​យុវជន​ទាំងនេះ​មិន​អាច​ឱ្យ​មហាជន​ទទួល​យក​បាន​ក៏ដោយ។

អតីត​មន្ត្រី​ជាន់ខ្ពស់​សង្គម​ស៊ីវិល​រូប​នេះ​បញ្ជាក់​ថា បទ​ចោទ​ដែល​តុលាការ​ចោទប្រកាន់​លើ​ក្រុម​យុវជន​ចលនា​មាតា​ធម្មជាតិ គឺជា​បទ​ចោទ​ដែល​មិន​ស័ក្តិសម​នឹង​សកម្មភាព​ដែល​ពួកគេ​បាន​ធ្វើ​នោះ​ទេ ព្រោះ​សកម្មភាព​របស់​សកម្មជន​បរិស្ថាន​កន្លង​មក មិន​បាន​បំផ្លាញ​សម្បត្តិ​ធម្មជាតិ​កម្ពុជា ឬ​រំលោភ​បំពាន​លើ​ច្បាប់​ស្ដីពី​បរិស្ថាន​ណា​មួយ​របស់​កម្ពុជា​ទេ។

សកម្មជន​ចលនា​មាតា​ធម្មជាតិ ទាំង ៥​នាក់ អាច​ប្រឈមមុខ​នឹង​ទោស​ពន្ធនាគារ​រហូត​ដល់ ១០​ឆ្នាំ ប្រសិនបើ​ត្រូវ​បាន​តុលាការ​ផ្ដន្ទាទោស​លើ​ភាព​សកម្ម​និយម​អហិង្សា​ក្នុង​កិច្ចការ​ការពារ​បរិស្ថាន​របស់​ពួកគេ​កន្លង​មក​នោះ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស