រាជរដ្ឋាភិបាលកម្ពុជាលោក ហ៊ុន ម៉ាណែត បានដាក់ចេញនូវគោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ ដើម្បីឆ្ពោះទៅបញ្ចប់ជំងឺអេដស៍នៅកម្ពុជា ដែលជាគ្រោះគំរាមកំហែងដល់សុខភាពសាធារណៈ។
ប្រធានអាជ្ញាធរជាតិប្រយុទ្ធនឹងជំងឺអេដស៍ លោកទេសរដ្ឋមន្ត្រី អៀង មូលី បានលើកឡើងក្នុងឱកាសបើកកិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍លើកទី១ ឆ្នាំ២០២៤ នៅទីស្ដីការគណៈរដ្ឋមន្ត្រី នាព្រឹកថ្ងៃទី១១ ខែមិថុនា ឆ្នាំ២០២៤ ថា គោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ បានបញ្ជាក់នូវការប្ដេជ្ញាចិត្តផ្នែកនយោបាយយ៉ាងមុតមាំបន្ថែមទៀតរបស់រាជរដ្ឋាភិបាលនីតិកាលទី៧ ដែលបន្តបេសកកម្មពីរាជរដ្ឋាភិបាលនីតិកាលមុនៗ ក្នុងការបន្តអភិវឌ្ឍមូលធនមនុស្ស និងការលើកកម្ពស់សុខភាព និងសុខមាលភាពប្រជាជនសមស្របតាមយុទ្ធសាស្ត្របញ្ចកោណដំណាក់កាលទី១។
ប្រភពដដែលបានលើកឡើងថា គោលនយោបាយជាតិបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ ត្រូវបានរៀបចំឡើងជាឧបករណ៍ដ៏មុតស្រួចក្នុងការជំរុញការចូលរួមការងារឆ្លើយតបមេរោគអេដស៍ និងជំងឺអេដស៍ជាលក្ខណៈពហុវិស័យ ទាំងនៅថ្នាក់ជាតិ និងទាំងនៅថ្នាក់ក្រោមជាតិ ដោយឈរលើសសរស្ដម្ភទាំងបី គឺ ទី១ ភាពជាអ្នកដឹកនាំ ឬភាពជាម្ចាស់ ទី២ ភាពជាដៃគូ និងទី៣ ការវិនិយោគរួមជាមួយគោលការណ៍បីមួយ។
ប្រភពដដែលអះអាងថា រដ្ឋាភិបាលជំរុញក្រសួងមហាផ្ទៃ ឱ្យណែនាំសម្របសម្រួលរដ្ឋបាលថ្នាក់ក្រោមជាតិ ក្នុងការអនុវត្តគោលនយោបាយបញ្ចប់អេដស៍ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ នៅរាជធានី ខេត្ត ស្រុក ខណ្ឌ ឃុំ សង្កាត់ ឱ្យបានជោគជ័យ។
នៅក្នុងសន្និបាតប្រចាំឆ្នាំ២០២៣ របស់អាជ្ញាធរជាតិប្រយុទ្ធប្រឆាំងនឹងជំងឺអេដស៍ នៅខែធ្នូ កន្លងមក អាជ្ញាធរជាតិប្រយុទ្ធនឹងជំងឺអេដស៍ បានលើកឡើងថា នៅកម្ពុជាមានអ្នកផ្ទុកមេរោគអេដស៍ប្រមាណ ១ម៉ឺន ២ពាន់នាក់ បានធ្វើតេស្ដឈាមរកឃើញមានផ្ទុកមេរោគអេដស៍ ប៉ុន្តែពេលនេះ អ្នកទាំងនោះបានបាត់ខ្លួនដោយមិនបានធ្វើតេស្ដរកមេរោគអេដស៍ជាថ្មីទៀតទេ ដែលចំណុចនេះមានការព្រួយបារម្ភថា ជំងឺអេដស៍អាចផ្ទុះឡើងវិញ បើសិនពួកគេមិនទៅទទួលសេវាព្យាបាល។
ជំងឺអេដស៍បានចាប់ផ្ដើមកើតនៅកម្ពុជានៅឆ្នាំ១៩៩១ ហើយបន្ទាប់មកបានរីករាលដាលជាខ្លាំងរហូតដល់ជនបទ។ ពួកគេទាំងនោះជាច្រើននៅតែមានកង្វះខាត ដូចជា ការមិនអាចទទួលបានសេវាការពារ ព្យាបាល និងគាំទ្រ។ ជាញឹកញាប់ ជំងឺអេដស៍បានធ្វើឲ្យប្រជាពលរដ្ឋទាំងអ្នកមាន និងអ្នកក្របាត់បង់ការងារ និងធ្វើឲ្យពួកគេជួបការមាក់ងាយ និងការរើសអើង។
ក្រុមអ្នកឃ្លាំមើលសង្គមបានកត់សម្គាល់ថា កុមារដែលកំព្រាដោយសារជំងឺអេដស៍ បានធ្វើឲ្យកើនឡើងនូវបន្ទុកសេដ្ឋកិច្ចនៃសមាជិកគ្រួសារដែលនៅរស់។ ជំងឺអេដស៍ក៏ជាបន្ទុករបស់ប្រទេសផងដែរ ដោយសារតែរដ្ឋាភិបាលបានបង់ប្រាក់ទៅលើវេជ្ជសាស្ត្រដែលទាក់ទងនឹងជំងឺអេដស៍។
តាមរបាយការណ៍របស់អាជ្ញាធរជាតិប្រយុទ្ធនឹងជំងឺអេដស៍ ឆ្នាំ២០២២ កម្ពុជាមានអ្នកឆ្លងមេរោគអេដស៍ថ្មីចំនួន ១៤០០នាក់ក្នុងមួយឆ្នាំ ដែលមានន័យថា មនុស្ស ៤នាក់បានឆ្លងមេរោគអេដស៍ជារៀងរាល់ថ្ងៃ។
ដើម្បីឈានទៅបញ្ចប់ការឆ្លងរាលដាលនៃមេរោគអេដស៍ និងជំងឺអេដស៍ក្នុងដំណាក់កាលដែលស្ថានភាពជំនួយពីបរទេសធ្លាក់ចុះ រដ្ឋាភិបាលអះអាងថា រដ្ឋបានចំណាយថវិកាទិញថ្នាំសម្រាប់ទប់ស្កាត់ការឆ្លងជំងឺអេដស៍ក្នុងមួយឆ្នាំៗ ៥លានដុល្លារអាមេរិក ដើម្បីជួយព្យាបាលអ្នកដែលបានឆ្លងជំងឺអេដស៍៕
© 2024, ឌឹ ខេមបូឌា ដេលី. All rights reserved.