មន្ត្រីជាន់ខ្ពស់អង្គការសង្គមស៊ីវិលទទួលបន្ទុកសិទ្ធិការងារ អះអាងថា ការប្រើលេសយកកិច្ចសន្យាការងាររបស់កម្មករនិយោជិត ដើម្បីបញ្ឈប់ថ្នាក់ដឹកនាំសហជីពពីការងារ ជាកត្តាចម្បងនាំឱ្យជះឥទ្ធិពលអាក្រក់ដល់សិទ្ធិសេរីភាពជាមូលដ្ឋាន និងសិទ្ធិការពារពិសេសរបស់ថ្នាក់ដឹកនាំសហជីពឯករាជ្យយ៉ាងធ្ងន់ធ្ងរ។
អ្នកគ្រប់គ្រងផ្នែកសិទ្ធិការងារនៃមជ្ឈមណ្ឌលការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ ប្រាប់សារព័ត៌មាន The Cambodia Daily នៅថ្ងៃទី១៣ មិថុនា នេះថា ការបញ្ឈប់ថ្នាក់ដឹកនាំសហជីពឯករាជ្យក្នុងរោងចក្រ សេង បូ ម្តងហើយម្តងទៀត គឺជាការបង្ហាញឱ្យឃើញយ៉ាងច្បាស់ពីចេតនារំលោភច្បាប់ស្ដីពីសហជីព និងច្បាប់ស្ដីពីការងាររបស់កម្ពុជា។
លោក ឃុន ថារ៉ូ លើកឡើងថា សហជីពឯករាជ្យក្នុងរោងចក្រ សេង បូ តែងជួយការពារសិទ្ធិកម្មករនិយោជិតដែលរងនូវការរំលោភបំពាន ដូចជា ការបើកប្រាក់ខែយឺត និងការកាត់ប្រាក់ខែកម្មករដោយគ្មានមូលហេតុ រាល់ពេលបើកលុយនៅចុងខែ ជាដើម ដែលបញ្ហានេះជាហេតុធ្វើឱ្យថៅកែរោងចក្រមិនពេញចិត្ត។
មន្ត្រីជាន់ខ្ពស់សង្គមស៊ីវិលរូបនេះ បញ្ជាក់ថា ដើម្បីបញ្ឈប់ការតវ៉ានេះ ថៅកែរោងចក្រ សេង បូ បានប្រើលេសយកកិច្ចសន្យាការងាររបស់ថ្នាក់ដឹកនាំសហជីព ធ្វើជាកម្មវត្ថុដើម្បីបញ្ឈប់ពួកគេពីការងារក្នុងចេតនារំលាយសហជីព ខណៈសិទ្ធិការពារពិសេសរបស់ថ្នាក់ដឹកនាំសហជីពដែលមានចែងក្នុងច្បាប់ស្ដីពីការងារ និងច្បាប់ស្ដីពីសហជីព មិនត្រូវបានធានាការពារឱ្យបានពេញលេញនៅឡើយ។
កាលពីថ្ងៃទី១២ ខែមិថុនា ឆ្នាំ២០២៤ ក្រុមអង្គការសង្គមស៊ីវិលជិត ២០ស្ថាប័ន បានចេញសេចក្តីថ្លែងការណ៍មួយដោយស្នើឱ្យអ្នកស្រី រឿន កូលាប អាចចូលធ្វើការងារនៅក្នុងក្រុមហ៊ុន សេង បូ ហ្គាមិន (ខេមបូឌា) ឯ.ក វិញ ក្រោមហេតុផលថា អ្នកស្រីត្រូវបានក្រុមហ៊ុនបញ្ឈប់ពីការងារដោយខុសច្បាប់ចាប់តាំងពីថ្ងៃទី៣០ ខែមិថុនា ឆ្នាំ២០២៣ មក។
ក្រុមអង្គការសង្គមស៊ីវិលទាំងនេះ បានសម្ដែងការសោកស្តាយចំពោះក្រុមហ៊ុនដែលបានបញ្ឈប់អ្នកស្រី រឿន កូលាប ដោយខុសច្បាប់ ដែលរហូតដល់ពេលនេះ អ្នកស្រីនៅពុំទាន់ទទួលបានយុត្តិធម៌នៅឡើយ ហើយការបញ្ឈប់នេះ គឺជាការរំលោភបំពានយ៉ាងធ្ងន់ធ្ងរដល់សិទ្ធិសេរីភាពក្នុងការបង្កើតសហជីព ដើម្បីការពារសិទ្ធិកម្មករស្របច្បាប់នៅកន្លែងការងារដែរ។
ប្រភពដដែលលើកឡើងថា ការប្រើប្រាស់កិច្ចសន្យាមានថេរវេលាមានកំណត់ នៅតែត្រូវបានរកឃើញថា រោងចក្របានប្រើប្រាស់កិច្ចសន្យានេះធ្វើឧបករណ៍សម្រាប់បំភិតបំភ័យ និងបន្លាចកុំឱ្យកម្មករនិយោជិតចងក្រងសហជីព ក្រោមលេសផ្សេងៗរបស់រោងចក្រ ដែលជាទម្រង់មួយនៃការរើសអើងប្រឆាំងទៅនឹងមេដឹកនាំសហជីពឯករាជ្យ។
ក្រុមអង្គការសង្គមស៊ីវិលដដែលនេះ អំពាវនាវឱ្យរដ្ឋាភិបាលតាមរយៈក្រសួងការងារ និងបណ្តុះបណ្តាលវិជ្ជាជីវៈ ជួយអន្តរាគមន៍ឱ្យក្រុមហ៊ុន សេង បូ ទទួលយកអ្នកស្រី រឿន កូលាប ចូលធ្វើការងារវិញ។ ជាងនេះទៅទៀត ក្រុមហ៊ុនអ្នកបញ្ហាទិញ ក៏ត្រូវតែជួយជំរុញក្រុមហ៊ុន សេង បូ ឱ្យបញ្ឈប់នូវការរើសអើងសហជីព និងគោរពសិទ្ធិសេរីភាពសហជីពនៅកន្លែងការងារផងដែរ។
កាលពីថ្ងៃទី២៨ ខែមិថុនា ឆ្នាំ២០២៣ អ្នកស្រី រឿន កូលាប ត្រូវបានកម្មករនិយោជិតបោះឆ្នោតឱ្យធ្វើជាប្រធានសហជីពនៅក្នុងរោងចក្រ ហើយការបោះឆ្នោត និងការប្រព្រឹត្តទៅនៃអង្គការវិជ្ជាជីវៈនេះ ក៏បានជូនដំណឹងត្រឹមត្រូវតាមនីតិវិធីនៃច្បាប់ស្ដីពីការងារ និងច្បាប់ស្ដីពីសហជីព ដោយមានការជូនដំណឹងទៅក្រុមហ៊ុនផងដែរ។
ប៉ុន្តែត្រឹមតែរយៈពេលពីរថ្ងៃប៉ុណ្ណោះ ក្រោយបោះឆ្នោត គឺនៅថ្ងៃទី៣០ ខែមិថុនា ឆ្នាំ២០២៣ អ្នកស្រី រឿន កូលាប បានដាក់សុំច្បាប់ឈប់សម្រាកតាមច្បាប់ការិយាល័យរដ្ឋបាល ស្រាប់តែក្រុមហ៊ុនប្រគល់នូវលិខិតបញ្ឈប់ពីការងារទៅវិញ ក្រោមមូលហេតុថា ការដេរខោអាវរបស់អ្នកស្រីមិនគ្រប់ចំនួនកំណត់តាមតម្រូវការរបស់ក្រុមហ៊ុន។
យ៉ាងណាក៏ដោយ ហេតុផលនៃការបញ្ឈប់នេះ ត្រូវគេមើលឃើញថា គឺខុសពីការពិតទាំងស្រុង ព្រោះថាអ្នកស្រីតែងទទួលបានប្រាក់រង្វាន់រាល់ខែចំពោះលទ្ធផលការងាររបស់ខ្លួនដូចកម្មករដទៃទៀតដែរ ហើយអ្នកស្រីក៏មិនដែលទទួលការស្ដីបន្ទោស ឬព្រមានអ្វីពីថ្នាក់លើម្តងណាឡើយ។
មាត្រា៦៧ និងមាត្រា៤៣ នៃច្បាប់ស្ដីពីសហជីព ចែងថា បេក្ខជនដែលជាប់ឆ្នោតជាថ្នាក់ដឹកនាំសហជីព ត្រូវទទួលបានការការពារពិសេស ហើយរាល់ការបញ្ឈប់បេក្ខជនណាម្នាក់ លុះត្រាតែមានការយល់ព្រមពីអធិការកិច្ចការងារ។
ចំណែកមាត្រា៦២ និងមាត្រា៦៣ នៃច្បាប់ស្ដីពីសហជីព ចង្អុលបង្ហាញកាន់តែច្បាស់ពីការមិនត្រូវបានអនុញ្ញាតឱ្យបញ្ចប់ ឬយកហេតុផលនៃការមិនបន្តកិច្ចសន្យាចំពោះកម្មករដែលចូលរួមក្នុងសកម្មភាពសហជីពនោះឡើយ៕
© 2024, ឌឹ ខេមបូឌា ដេលី. All rights reserved.