សាលាដំបូងរាជធានីភ្នំពេញ បានបង្ហាញវីដេអូភស្តុតាងចំនួន ៧ឃ្លីប ជុំវិញសំណុំរឿងដែលរងនូវការចោទប្រកាន់ពីបទ រួមគំនិតក្បត់ និងប្រមាថអង្គព្រះមហាក្សត្រ របស់សកម្មជនចលនាមាតាធម្មជាតិ។
នៅក្នុងខ្លឹមសារក្នុងវីដេអូទាំងនោះ ភាគច្រើនគឺជាការលើកឡើងរបស់ស្ថាបនិកចលនាមាតាធម្មជាតិអំពីការការពារបរិស្ថាន និងមូលហេតុដែលនាំឱ្យមានការបំផ្លាញបរិស្ថាននៅកម្ពុជាប៉ុណ្ណោះ។
តុលាការក្រុងភ្នំពេញ បានបន្តបើកសវនាការលើកទី៤ លើសំណុំរឿងសកម្មជនចលនាមាតាធម្មជាតិ នៅថ្ងៃទី១៧ ខែមិថុនា ឆ្នាំ២០២៤ នេះ ដោយការចាក់វីដេអូរបស់ស្ថាបនិកចលនាមាតាធម្មជាតិលោក អាឡិច ហាន់ដ្រូ ហ្គន់សាឡេស ដេវិតសុន ដែលបានលើកឡើងពីផែនការមួយចំនួនក្នុងការការពារបរិស្ថាននៅកម្ពុជា និងបានរិះគន់ពីការដឹកនាំនៃរបបត្រកូលហ៊ុន ព្រមទាំងនិយាយអំពីវិធីផ្លាស់ប្ដូរការដឹកនាំនៃគ្រួសារត្រកូលហ៊ុនដោយសន្តិវិធីផងដែរ។
តុលាការក្រុងភ្នំពេញ បានចាក់ឃ្លីបវីដេអូមួយដែលលោក អាឡិច លើកឡើងពីការប្រមូលថវិកានៅបរទេស ដើម្បីផ្គត់ផ្គង់សកម្មភាពការពារបរិស្ថានរបស់សកម្មជនចលនាមាតាធម្មជាតិផងដែរ ដែលវីដេអូនេះទំនងជាភស្តុតាងដែលអាជ្ញាធរបានចោទថា សកម្មជនបរិស្ថានទាំងនេះទទួលបានថវិកាពីបរទេសដែលមានអង្គការចាត់តាំងនាពេលកន្លងមក។
ខ្លឹមសារក្នុងវីដេអូទាំងនេះ បានបង្ហាញពីការបកស្រាយរបស់លោក អាឡិច ដែលបញ្ជាក់ថា ថវិកាទាំងនោះមិនបានស្ថិតក្រោមការគ្រប់គ្រងរបស់លោកនោះទេ ត្បិតជាមូលនិធិសម្រាប់គម្រោងការពារបរិស្ថានតែប៉ុណ្ណោះ ព្រោះថាបើគ្មានការការពារបរិស្ថានពីសកម្មជនទាំងនេះទេ ធនធានធម្មជាតិរបស់ខ្មែរនានា ដូចជា រ៉ែមាស រ៉ែខ្សាច់ រ៉ែថ្ម ឬរ៉ែធ្យូងថ្ម ជាដើម នឹងរងនូវការបំផ្លាញធ្ងន់ធ្ងរដោយសារតែការដឹកនាំគ្មានតម្លាភាពរបស់រដ្ឋាភិបាលដែលដឹកនាំដោយត្រកូលហ៊ុនសព្វថ្ងៃនេះ។
សវនាការនៅថ្ងៃទី១៧ ខែមិថុនា ឆ្នាំ២០២៤ នេះ មានសកម្មជនចលនាមាតាធម្មជាតិចំនួន ៥នាក់ចូលរួមក្នុងចំណោមសកម្មជនទាំង ១០នាក់ ដែលរងនូវការចោទប្រកាន់ពីបទ «ប្រមាថចំពោះអង្គព្រះមហាក្សត្រ និងរួមគំនិតក្បត់» ដូចជា កញ្ញា ភួន កែវរស្មី, កញ្ញា ឡុង គន្ធា, លោក លី ចាន់ដារ៉ាវុត, លោក យីម លាងហ៊ី និងលោក ថុន រដ្ឋា ជាដើម។
ចំណែកសកម្មជនបរិស្ថាន ៥នាក់ទៀត រួមមានកញ្ញា ស៊ុន រដ្ឋា, លោក ប៉ិញ ពិសិដ្ឋ, អ្នកស្រី រ៉ី រក្សា, លោក ពក ខឿយ និងលោក អាឡិច ហាន់ដ្រូ ហ្គន់សាឡេស ដេវិតសុន នៅតែអវត្តមានក្នុងសវនាការនេះដដែល ប៉ុន្តែពួកគេអាចនឹងមានមេធាវីតំណាង។
យ៉ាងណាក៏ដោយ សវនាការនៅព្រឹកនេះ តុលាការនៅតែមិនអនុញ្ញាតឱ្យអ្នកគាំទ្រ ឬអ្នកសារព័ត៌មានណាចូលទៅក្បែរតុលាការដូចមុនដដែល។
សកម្មជនចលនាមាតាធម្មជាតិ កញ្ញា ភួន កែវរស្មី លើកឡើងក្រោយបញ្ចប់សវនាការនៅព្រឹកនេះថា ការចាក់វីដេអូឃ្លីបដែលអាជ្ញាធរចាត់ទុកជាភស្តុតាងក្នុងការចោទប្រកាន់លើសកម្មជនចលនាមាតាធម្មជាតិ ពីបទ «ប្រមាថចំពោះអង្គព្រះមហាក្សត្រ និងរួមគំនិតក្បត់» ប្រៀបបីដូចជាតុលាការកំពុងស្រាតខោខ្លួនឯងទៅវិញ ដែលជារឿងគួរឱ្យអាម៉ាស់ជាទីបំផុត។
សកម្មជនបរិស្ថានរូបនេះអះអាងថា ខ្លឹមសារក្នុងវីដេអូទាំងនោះមិនមានរូបសកម្មជនបរិស្ថានណាមួយទេ គឺមានតែការលើកឡើងរបស់លោក អាឡិច ហាន់ដ្រូ ហ្គន់សាឡេស ដេវិតសុន តែប៉ុណ្ណោះ ដែលនិយាយអំពីសកម្មភាពការពារបរិស្ថាន និងការលើកឡើងរបស់សកម្មជនការពារព្រៃឈើលោក ឈុត វុទ្ធី អំពីសារសំខាន់នៃការការពារធនធានធម្មជាតិ។
ប្រភពដដែលបញ្ជាក់ថា ក្នុងចំណោមឃ្លីបវីដេអូទាំងនេះ ក៏មានការរិះគន់របស់លោក អាឡិច ចំពោះប្រព័ន្ធយុត្តិធម៌របស់កម្ពុជាដែលមិនអាចអនុវត្តវិធានការច្បាប់លើឧក្រិដ្ឋជនព្រៃឈើ ដូចជា ឧកញ៉ា ទ្រី ភាព ដែលល្បីល្បាញរកស៊ីឈើខុសច្បាប់ ជាដើម ដែលការលើកឡើងបែបនេះ បានធ្វើឱ្យតុលាការរងនូវភាពអាម៉ាស់យ៉ាងខ្លាំង ព្រោះតែមិនអាចធានានូវប្រព័ន្ធយុត្តិធម៌ដ៏ស្អាតស្អំសម្រាប់ប្រទេសរបស់ខ្លួនបានក្នុងនាមជាស្ថាប័នអនុវត្តច្បាប់។
ទាក់ទិននឹងបញ្ហានេះ ស្ថាបនិកចលនាមាតាធម្មជាតិលោក អាឡិច ហាន់ដ្រូ ហ្គន់សាឡេស ដេវិតសុន បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលថ្មីៗនេះដោយចាត់ទុកមន្ត្រីតុលាការកម្ពុជាដូចជាចៅក្រម និងព្រះរាជអាជ្ញា ជាដើម ជាក្រុមឧក្រិដ្ឋជនដែលពាក់អាវស្ថាប័នអនុវត្តច្បាប់ចាំទទួលបញ្ជាពីអ្នកមានអំណាច ធ្វើបាបពលរដ្ឋស្លូតត្រង់។
លោកបន្ថែមថា បើរដ្ឋាភិបាលលោក ហ៊ុន ម៉ាណែត ចាប់សកម្មជនបរិស្ថានទាំងនេះដាក់ពន្ធនាគារ នឹងធ្វើឱ្យប៉ះពាល់ដល់ការវិនិយោគ និងវិស័យទេសចរណ៍របស់កម្ពុជាធ្ងន់ធ្ងរ ដែលជាហេតុនាំទៅដល់ការប៉ះពាល់សេដ្ឋកិច្ចរបស់កម្ពុជាទាំងមូលទៅថ្ងៃមុខផងដែរ។
លោក អាឡិច លើកឡើងថា គ្រាន់តែសកម្មជនបរិស្ថានយកទឹកទន្លេទៅពិនិត្យពីគុណភាពទឹក ក៏រងនូវចោទពីបទញុះញង់ដែរ ដូច្នេះអ្នកវិនិយោគនឹងមានការខ្លាចរអាពីចំណាត់ការរបស់រដ្ឋាភិបាលកម្ពុជាលើសកម្មជនបរិស្ថានក្នុងករណីនេះ ដែលនេះជាសញ្ញាមួយបញ្ជាក់ថាជាប្រទេសដែលមានហានិភ័យខ្ពស់។
ស្ថាបនិកចលនាមាតាធម្មជាតិ បញ្ជាក់ថា បើតុលាការចាត់ទុកថារូបលោកពិតជាមានទោសមែន ហេតុអ្វីតុលាការមិនអនុញ្ញាតឱ្យលោកចូលក្នុងសវនាការ ខណៈការស្នើសុំរបស់លោកចូលទៅតតាំងក្តីក្នុងសវនាការ ក៏រដ្ឋាភិបាលកម្ពុជាមិនដែលឆ្លើយតបដែរនោះ។
លោកបញ្ជាក់ថា ដីកាដែលបញ្ជាឱ្យចាប់ខ្លួនលោក ក៏តុលាការមិនបញ្ជូនមកសមត្ថកិច្ចប្រទេសអេស្ប៉ាញ ដែរ ដែលនេះបញ្ជាក់ឱ្យឃើញថា តុលាការនេះគ្មានវិជ្ជាជីវៈត្រឹមត្រូវឡើយ ហើយជាតុលាការដែលចាំតែបម្រើនយោបាយឱ្យបក្សកាន់អំណាច ឬគ្រួសារត្រកូលហ៊ុនតែប៉ុណ្ណោះ៕
© 2024, ឌឹ ខេមបូឌា ដេលី. All rights reserved.