ក្រសួងការងារនឹងដាក់ឱ្យអនុវត្ត QR Code បណ្តឹងអនាមិកដើម្បីអនុញ្ញាតឱ្យសាធារណជន ក៏ដូចជាកម្មករនិយោជិតអាចធ្វើការប្តឹង ឬរាយការណ៍ពីភាពមិនប្រក្រតីផ្សេងៗដែលពាក់ព័ន្ធវិស័យការងារ មកកាន់ក្រសួងដើម្បីសុំកិច្ចអន្តរាគមន៍ និងដោះស្រាយទាន់ពេល។
រដ្ឋមន្ត្រីក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានប្រកាសថា ក្រសួងការងារនឹងដាក់ឱ្យអនុវត្ត QR Code បណ្តឹងអនាមិក ដែលជាយន្តការថ្មីមួយសម្រាប់អនុញ្ញាតឱ្យសាធារណជន ក៏ដូចជាកម្មករនិយោជិត អាចធ្វើការប្តឹង ឬរាយការណ៍ពីភាពមិនប្រក្រតីផ្សេងៗដែលពាក់ព័ន្ធវិស័យការងារមកកាន់ក្រសួងការងារ ដើម្បីសុំកិច្ចអន្តរាគមន៍។
លោក ហេង សួរ អះអាងថា កម្មវិធី QR Code បណ្តឹងអនាមិកមួយនេះ នឹងត្រូវដាក់ឱ្យប្រើប្រាស់នៅតាមទីសាធារណៈ និងរោងចក្រសហគ្រាសនានា។ លោកថា ទន្ទឹមនឹងនេះ ប្រសិនបើសាធារណជន ក៏ដូចជាកម្មករនិយោជិតមានចម្ងល់ណាមួយពាក់ព័ន្ធនឹងសេវាសាធារណៈរបស់ក្រសួងការងារ និងបណ្តុះបណ្តាលវិជ្ជាជីវៈ សូមធ្វើការទំនាក់ទំនងមកកាន់ប្រព័ន្ធទូរសព្ទ Hotline ឥតគិតថ្លៃ លេខ ១២៨៦ ឬ ១២៩៧ របស់ក្រសួងការងារ និងបណ្តុះបណ្តាលវិជ្ជាជីវៈ។
ក្រសួងការងារ អះអាងថា តាមរយៈការស្កេន QR Code គឺធានានូវគណនេយ្យភាព តម្លាភាព និងសុចរិតភាពនៃការផ្តល់សេវាសាធារណៈរបស់ក្រសួងការងារ និងបណ្តុះបណ្តាលវិជ្ជាជីវៈ និងដើម្បីបង្ការការឆបោក ឬការមិនទទួលខុសត្រូវរបស់បុគ្គលណាមួយ។ ជាងនេះទៅទៀត ក្រសួងលើកទឹកចិត្តដល់សាធារណជន កម្មករនិយោជិត និងនិយោជក សូមប្រើប្រាស់នូវប្រអប់បណ្ដឹងអនាមិកនេះ ដើម្បីទទួលបានការឆ្លើយតបពីក្រសួងនូវរាល់មតិ ឬសំណើនានា។
ប្រធានអង្គការប្រជាធិបតេយ្យខ្មែរក្នុងប្រទេសអូស្ត្រាលី លោក ស៊ឹង សែនករុណា លើកឡើងថា ការដាក់ឱ្យអនុវត្ត QR Code បណ្តឹងអនាមិករបស់ក្រសួងការងារ គឺជួយបងប្អូនកម្មករនិយោជិតអាចប្តឹងសុំកិច្ចអន្តរាគមន៍មកកាន់ក្រសួងការងារ ប្រសិនបើពួកគេជួបប្រទះនូវភាពមិនប្រក្រតីណាមួយនៅកន្លែងធ្វើការរបស់ខ្លួន។
លោកសង្ឃឹមថា QR Code បណ្តឹងអនាមិកនេះនឹងជួយកម្មករនិយោជិតដែលទទួលរងការរំលោភបំពាន ការរំលោភច្បាប់ពីសំណាក់និយោជកលើអត្ថប្រយោជន៍ផ្សេងៗ នោះក្រសួងនឹងធ្វើអន្តរាគមន៍លឿនឆាប់រហ័ស។ លោកថា ប្រសិនបើបង្កើតឡើងដើម្បីឲ្យតែល្អមើល នោះកម្មវិធីនេះមិនខុសអ្វីពីមន្ត្រីដែលចូលការិយាល័យមិនធ្វើការនោះទេ។
របាយការណ៍ស្រាវជ្រាវថ្មីមួយរបស់អង្គការអុកស្វាម ស្ដីពី «ការទទួលបានការងារសមរម្យ និងរបបសន្តិសុខសង្គមក្នុងចំណោមកម្មការិនីរោងចក្រម៉ៅការបន្តនៅកម្ពុជា» ដែលបានចេញផ្សាយកាលពីខែមិថុនា កន្លងមក ឲ្យដឹងថា កម្មករកម្មការិនីធ្វើការនៅរោងចក្រម៉ៅការដេរបន្តប្រឈមនឹងការរំលោភសិទ្ធិការងារធ្ងន់ធ្ងរ ដោយពួកគេមិនទាន់ទទួលបានការអនុវត្តសិទ្ធិ និងកិច្ចគាំពារសង្គមនៅកន្លែងការងារដូចមានចែងក្នុងច្បាប់នៅឡើយ។ តែផ្ទុយទៅវិញ ពួកគេរងការបង្ខំឱ្យធ្វើការលើសម៉ោងពីសំណាក់ថៅកែក្រុមហ៊ុន ទាំងដែលទទួលបានប្រាក់ឈ្នួលទាប។
បើតាមក្រសួងការងារ គិតត្រឹមដើមឆ្នាំ២០២៤ កម្ពុជាមានរោងចក្រកាត់ដេរសរុបជាង ១៥០០កន្លែង ដែលមានកម្មករនិយោជិតសរុបជាង ៩០ម៉ឺននាក់ ក្នុងនោះមានស្ត្រីជាង ៧០ម៉ឺននាក់ ដែលស្មើនឹង ៨០% នៃកម្មករនិយោជិតក្នុងវិស័យកាត់ដេរទាំងអស់៕
© 2024, ឌឹ ខេមបូឌា ដេលី. All rights reserved.