ក្រុមកូដករណាហ្គាវើលដ៍ បន្តចេញទាមទារឱ្យថៅកែក្រុមហ៊ុនណាហ្គាវើលដ៍ បញ្ឈប់ការរើសអើងសហជីពគ្រប់រូបភាព ព្រោះថ្នាក់ដឹកនាំ និងសមាជិកសហជីពក្នុងក្រុមហ៊ុនបនល្បែងមួយនេះ នៅតែត្រូវរងនូវការរំលោភបំពានសិទ្ធិការងារកាន់តែធ្ងន់ធ្ងរពីមួយថ្ងៃទៅមួយថ្ងៃ។
ក្រុមកូដករណាហ្គាវើលដ៍ ចេញធ្វើកូដកម្មតវ៉ាទាមទារសិទ្ធិការងារនៅមុខក្រុមហ៊ុនណាហ្គាវើលដ៍២ កាលពីថ្ងៃទី២៦ ខែមករា ឆ្នាំ២០២៥ នេះ ដោយលើកផ្ទាំងបដាធំៗដែលបានសរសេរលក្ខខណ្ឌទាមទារជិត ១០ចំណុច និងប្រើឧបករណ៍បំពងសំឡេងក្នុងការទាមទារយុត្តិធម៌នេះ បន្ទាប់ពីពួកគេរងភាពអយុត្តិធម៌ពីការរំលោភសិទ្ធិការងារអស់រយៈពេលជាង ៣ឆ្នាំដោយគ្មានដំណោះស្រាយ។
ប្រភពដដែលអះអាងថា រយៈពេលជាង ៣ឆ្នាំនៃការទាមទាររបស់កម្មករមិនមែនជាការស៊ីឈ្នួលទេ ហើយក៏មិនមែនដើម្បីញុះញង់ដែរ ប៉ុន្តែដើម្បីទទួលបានដំណោះស្រាយសមរម្យតែប៉ុណ្ណោះ ដូចជាការទាមទារឱ្យថៅកែណាហ្គាវើលដ៍ ទទួលយកថ្នាក់ដឹកនាំសហជីព និងសមាជិកឲ្យចូលធ្វើការវិញ និងត្រូវគិតប្រាក់បំណាច់បញ្ចប់កិច្ចសន្យាការងារឲ្យបានត្រឹមត្រូវតាមច្បាប់ផងដែរ។
ក្រៅពីនេះទៀត ត្រូវគិតប្រាក់បញ្ចប់កិច្ចសន្យាការងារបន្ថែមឲ្យបានត្រឹមត្រូវសម្រាប់កម្មករដែលត្រូវបានបញ្ឈប់ក្នុងឆ្នាំ២០២០ និងដើមឆ្នាំ២០២១ ហើយក៏ត្រូវផ្ដល់ប្រាក់បំណាច់អតីតភាពការងារ និងប្រាក់រឭកអតីតភាពការងារឲ្យបានត្រឹមត្រូវតាមច្បាប់ និងត្រូវដំឡើងប្រាក់ឈ្នួលគោល ៧% លើប្រាក់ឈ្នួលបច្ចុប្បន្នថែមទៀត។
លើសពីនេះ ត្រូវបញ្ឈប់ការកេងប្រវ័ញ្ចតាមរយៈការប្រើបុគ្គលិកក្រោមផ្លាក «កម្មសិក្សា» ជាថ្នូរឱ្យពួកគេក្លាយជាបុគ្គលិកពេញសិទ្ធិ។ បន្ថែមលើនេះទៀត ក៏ត្រូវបញ្ឈប់ប្រធានផ្នែកកាស៊ីណូលោក Florian Pastiu ថែមទៀត និងត្រូវផ្តល់ប្រាក់ឈ្នួលគោលស្មើគ្នារវាងបុគ្គលិកក្នុងស្រុកធៀបនឹងបុគ្គលិកក្រៅស្រុកដែលមានឋានៈ និងផ្នែកដូចគ្នាផងដែរ។
ក្រុមកូដកររងគ្រោះទាំងនេះបញ្ជាក់ថា ពួកគេគ្រាន់តែចង់បានដំណោះស្រាយពីថៅកែក្រុមហ៊ុនក្នុងភាពយុត្តិធម៌ដែលម្ចាស់បនល្បែងស៊ីសងមួយនេះបានរំលោភសិទ្ធិការងាររបស់ពួកគេ និងរំលោភច្បាប់ការងារនៅប្រទេសកម្ពុជាតែប៉ុណ្ណោះ។
អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី២៧ មករា នេះថា ការលើកស្ទួយសិទ្ធិការងាររបស់កម្មករ គឺជាកត្តាសំខាន់ដែលរដ្ឋាភិបាលត្រូវតែធានាឱ្យបាន ព្រោះអ្នកវិនិយោគល្អៗដែលគោរពច្បាប់ ពួកគេផ្តល់អាទិភាពបំផុតលើសិទ្ធិការងារសម្រាប់កម្មករនិយោជិត។
លោក សេក សុជាតិ លើកឡើងថា ការវិនិយោគនៅប្រទេសកម្ពុជាដែលគេមើលឃើញថាមិនទទួលបានការចាប់អារម្មណ៍ពីអ្នកវិនិយោគិនបរទេសសព្វថ្ងៃនេះ ក៏ដោយសារតែប្រទេសកម្ពុជាមិនធានាបាននូវសិទ្ធិការងារសម្រាប់កម្មករនេះដែរ ជាពិសេសករណីរំលោភសិទ្ធិការងារលើកម្មករក្រុមហ៊ុនណាហ្គាវើលដ៍ និងការរំលោភសិទ្ធិសហជីពឯករាជ្យដែលបានបន្តជាយូរឆ្នាំមកនេះ។
អ្នកឃ្លាំមើលរូបនេះបញ្ជាក់ថា បើប្រទេសកម្ពុជាចង់បានអ្នកវិនិយោគឱ្យចូលទៅរកស៊ីដើម្បីជួយលើកកម្ពស់សេដ្ឋកិច្ចជាតិ រាជរដ្ឋាភិបាលក៏ត្រូវធានាសិទ្ធិការងាររបស់កម្មករជាមុនដែរ ព្រោះអ្នកវិនិយោគល្អៗកំពុងរង់ចាំមើលថាតើប្រទេសកម្ពុជាអាចផ្លាស់ប្ដូរមុខមាត់ថ្មីរបស់ខ្លួនបានដែរឬក៏អត់ក្នុងពេលនេះ។
គិតចាប់តាំងពីចុងខែធ្នូ ឆ្នាំ២០២១ ដែលក្រុមកូដករណាហ្គាវើលដ៍ បាននាំគ្នាចេញតវ៉ាទាមទាររកយុត្តិធម៌ បន្ទាប់ពីថៅកែក្រុមហ៊ុនណាហ្គាវើលដ៍បានបញ្ឈប់ពួកគេពីការងារដោយរំលោភច្បាប់ គឺមានរយៈពេល ៣ឆ្នាំ ១ខែ ៨ថ្ងៃ (១១៣៥ថ្ងៃ) ហើយ ប៉ុន្តែដំណោះស្រាយនៅតែគ្មានសម្រាប់ជនរងគ្រោះ ខណៈក្រសួងការងារ ក្រោមការដឹកនាំរបស់លោក ហេង សួរ ក៏មិនបានចេញមុខរកយុត្តិធម៌ឱ្យកម្មកររងគ្រោះទាំងនេះដែរ៕
© 2025, ឌឹ ខេមបូឌា ដេលី. All rights reserved.