សង្គមស៊ីវិលអះអាងថា រយៈពេលពេញ ១ឆ្នាំក្នុងឆ្នាំ២០២៤ ការរំលោភបំពានសិទ្ធិសេរីភាពបញ្ចេញមតិនៅកម្ពុជា តាមរយៈការជួបជុំដោយសន្តិវិធី និងការផ្សព្វផ្សាយអំពីសិទ្ធិមូលដ្ឋានរបស់ពលរដ្ឋ បានកើនឡើងជាង ៩០% ដោយសារតែអាជ្ញាធរមូលដ្ឋានរឹតត្បិត។
សមាគមការពារសិទ្ធិមនុស្ស និងការអភិវឌ្ឍន៍នៅកម្ពុជា (អាដហុក) ចេញរបាយការណ៍ស្ដីពីការរឹតត្បិតសេរីភាពបញ្ចេញមតិ និងសេរីភាពជួបជុំនៅមូលដ្ឋាននៅថ្ងៃទី១០ កុម្ភៈ នេះថា អាជ្ញាធរតាមសហគមន៍មូលដ្ឋានក្នុងភូមិជិត ៣០០ (២៩៦ភូមិ) ឃុំ-សង្កាត់ជាង ១០០ (១១១ឃុំ-សង្កាត់) និងស្រុក-ក្រុងជាង ៦០ ក្នុងខេត្តគោលដៅចំនួន ២២ បានរឹតត្បិតសិទ្ធីសេរីភាពបញ្ចេញមតិតាមរយៈនៃការជួបជុំដោយសន្តិវិធីយ៉ាងធ្ងន់ធ្ងរ។
របាយការណ៍ដដែលអះអាងថា អាជ្ញាធរមូលដ្ឋានបានប្រើរូបភាពគំរាមកំហែងរាល់ពេលជួបប្រជុំ ដូចជា ការថតរូបជាសន្លឹក និងវីដេអូ ការសួររកលិខិតអនុញ្ញាត ការរារាំងមិនឱ្យធ្វើការផ្សព្វផ្សាយ ការតម្រូវឱ្យជូនដំណឹងមុនធ្វើការផ្សព្វផ្សាយ សុំបញ្ជីវត្តមានអ្នកចូលរួម ការឃ្លាំមើលនៅកន្លែងជួបប្រជុំ ការសួរនាំអ្នកចូលរួមដោយប្រើពាក្យគំរាមកំហែង និងការឃ្លាំមើលដោយការកត់ត្រាផ្សេងៗ ជាដើម។
អាដហុក ស្នើឱ្យក្រសួងមហាផ្ទៃ ចាត់វិធានការណែនាំដល់អាជ្ញាធរមូលដ្ឋាន កុំឱ្យពួកគេអនុវត្តផ្ទុយពីច្បាប់ជាតិ និងអន្តរជាតិ ជាពិសេសសេចក្ដីជូនដំណឹង (ស.ជ.ណ) របស់ក្រសួងមហាផ្ទៃ ជាដើម។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១០ កុម្ភៈ នេះថា បើរដ្ឋាភិបាលថ្មីនេះមិនកែប្រែមុខមាត់របស់ខ្លួនទេ កម្ពុជាក៏ចៀសមិនផុតពីការរិះគន់ពីមជ្ឈដ្ឋានអន្តរជាតិបន្តទៀតដែរ ខណៈទណ្ឌកម្មនានាក៏អាចនឹងកើតមានឡើងបន្តទៀតដែរ។
លោក សេក សុជាតិ លើកឡើងថា ការធានាបាននូវសិទ្ធិសេរីភាពរបស់ពលរដ្ឋ គឺជាមុខមាត់ និងកិត្តិយសដ៏ធំសម្រាប់រដ្ឋាភិបាលលើឆាកអន្តរជាតិ ហើយកិត្តិយស និងមុខមាត់ទាំងនេះក៏នឹងផ្តល់ជាប្រយោជន៍ដល់ប្រទេសជាតិ និងពលរដ្ឋខ្មែរដែរ។
អ្នកស្រាវជ្រាវខាងការអភិវឌ្ឍផ្នត់គំនិតរូបនេះ អំពាវនាវឱ្យរដ្ឋាភិបាលពិនិត្យការអនុវត្តរបស់សមត្ថកិច្ចនៅមូលដ្ឋានឡើងវិញ សម្រាប់ការដឹកនាំក្នុងអាណត្តិថ្មីរបស់ខ្លួន ដែលទើបនឹងដំណើរការរយៈពេលជាង ១ឆ្នាំមកនេះ ហើយការធ្វើបែបនេះក៏ដើម្បីធានានូវសុខភាពរបស់រដ្ឋាភិបាលក្នុងការដឹកនាំយូរអង្វែងផងដែរ៕
© 2025, ឌឹ ខេមបូឌា ដេលី. All rights reserved.