រដ្ឋមន្ត្រីក្រសួងធនធានទឹក និងឧតុនិយម លោក ថោ ជេដ្ឋា អំពាវនាវឲ្យប្រជាកសិករស្ដាប់តាមការណែនាំរបស់ក្រសួងពាក់ព័ន្ធ មុននឹងសម្រេចចិត្តធ្វើស្រូវរដូវប្រាំង ដើម្បីកុំឲ្យខាតបង់ដោយសារតែខ្វះទឹក ខណៈការប្រើប្រាស់ទឹកសម្រាប់វិស័យកសិកម្មមានការកើនឡើងច្រើននៅរយៈពេលចុងក្រោយនេះ។
ថ្លែងនៅក្នុងសន្និសីទសារព័ត៌មានដែលរៀបចំដោយក្លឹបអ្នកកាសែតកម្ពុជា ប្រធានបទ «ការគ្រប់គ្រងសក្ដានុពលទឹក និងស្ថានភាពប្រព័ន្ធធារាសាស្ត្រកម្ពុជា» លោក ថោ ជេដ្ឋា ថ្លែងថា ការប្រើប្រាស់ទឹកសម្រាប់វិស័យកសិកម្មមានការកើនឡើងច្រើននៅរយៈពេលចុងក្រោយនេះ។ លោកថា ផែនការធ្វើស្រូវរដូវប្រាំងឆ្នាំ២០២៤-២០២៥ មានចំនួន ៥៣ម៉ឺនហិកតា តែការអនុវត្តជាក់ស្ដែងមានរហូតដល់ទៅ ៩០ម៉ឺនហិកតា ឬស្មើនឹង ១៧០%។
ប្រភពដដែលអះអាងថា លោកអំពាវនាវឲ្យប្រជាកសិករត្រូវយកចិត្តទុកដាក់ស្ដាប់ការណែនាំរបស់ក្រសួងធនធានទឹក ដែលតែងតែប្រកាសជារៀងរាល់ឆ្នាំនៅចុងរដូវវស្សាពីស្ថានភាពធនធានទឹកសម្រាប់ស្រោចស្រពស្រូវរដូវប្រាំង។ លោកបន្តថា ការប្រកាសរបស់ក្រសួងជំនាញ គឺធ្វើយ៉ាងណាដើម្បីបង្ការកុំឱ្យខាតដល់កសិករនៅពេលដែលពួកគេធ្វើស្រែប្រាំងលើសផែនការ និងខ្វះទឹកស្រោចស្រព។
ក្រសួងបានឲ្យដឹងថា កម្ពុជានៅប្រឈមនឹងការខ្វះខាតទឹកប្រមាណ ៣ពាន់ម៉ែត្រគូបទៀត ដែលចាំបាច់ត្រូវការអាងទឹក និងប្រព័ន្ធធារាសាស្ត្រឱ្យមានលក្ខណៈពេញលេញបន្ថែមទៀត ដើម្បីធានាបានទឹកស្រោចស្រពដល់ផ្ទៃដីរបស់កសិករ។
ក្រសួងបានព្យាករថា ក្នុងរយៈពេលពី ៥ឆ្នាំទៅ ១០ឆ្នាំខាងមុខ កម្ពុជាអាចត្រូវការស្តុកទឹកពី ១៥០០លានទៅ ២ពាន់លានម៉ែត្រគូបបន្ថែមទៀត ដើម្បីបម្រើទាំងកសិកម្ម និងទឹកស្អាត។
ក្រុមអ្នកឃ្លាំមើលបញ្ហាសង្គមលើកឡើងថា ចំណាត់ការរបស់រដ្ឋបាលខេត្ត គឺជាវិធានការបង្ការបណ្ដោះអាសន្នមួយដែលអាជ្ញាធរគួរមានចំណាត់ការសម្រាប់រយៈពេលវែង ដើម្បីធានាការកាត់បន្ថយបញ្ហាខ្វះទឹកនេះឲ្យមានប្រសិទ្ធភាព។ អាជ្ញាធរគួរពិនិត្យមើលទីតាំងភូមិសាស្ត្រដែលសមស្របក្នុងការរៀបចំប្រព័ន្ធគ្រប់គ្រងទឹក ឬអាងស្តុកទឹកសម្រាប់ទុកប្រើប្រាស់ក្នុងរដូវប្រាំង។
តាមក្រសួងធនធានទឹក បច្ចុប្បន្ននេះ ប្រព័ន្ធធារាសាស្ត្រកម្ពុជាមានប្រវែងសរុបប្រហែល ៧ម៉ឺនគីឡូម៉ែត្រ និងអាចស្តុកទឹកបានប្រមាណ ៤ពាន់លានម៉ែត្រគូប ក្នុងនោះមានពីអាងទឹកធំ និងតូចប្រហែល ១៥០០អាង។ ក្នុងទំហំបរិមាណទឹកទាំងនោះ គឺ ៨០% ត្រូវបានប្រើប្រាស់ស្រោចស្រពលើផ្ទៃដីកសិកម្ម ពិសេសដំណាំស្រូវ ខណៈបរិមាណទឹក ២០% ទៀតសម្រាប់ផ្គត់ផ្គង់ទឹកស្អាត និងបម្រើឱ្យវិស័យឧស្សាហកម្ម៕
© 2025, ឌឹ ខេមបូឌា ដេលី. All rights reserved.