រដ្ឋមន្ត្រីក្រសួងសុខាភិបាល លោក ឈាង រ៉ា អះអាងថា ក្នុងឆ្នាំ២០២៤ ការប្រើប្រាស់សេវាព្យាបាលជំងឺទឹកនោមផ្អែមនៅតាមមន្ទីរពេទ្យរដ្ឋ និងឯកជន បានកើនឡើងចំនួន ៥៩% ដែលជាកម្រិតខ្ពស់គួរឱ្យកត់សម្គាល់នៅប្រទេសកម្ពុជា។
នេះបើយោងតាមការអះអាងពីរដ្ឋមន្ត្រីក្រសួងសុខាភិបាល លោក ឈាង រ៉ា ថ្លែងនៅក្នុងពិធីបិទសន្និបាតលើកទី៤៤ ក្នុងក្រសួងសុខាភិបាល នាថ្ងៃទី៤ ខែមីនា ឆ្នាំ២០២៥។
លោកថា អ្នកប្រើសេវាព្យាបាលជំងឺទឹកនោមផ្អែមក្នុងឆ្នាំ២០២៤ បានកើនឡើង ៥៩,១៨ភាគរយ ប្រៀបធៀបនឹងឆ្នាំ២០២៣ ក្នុងនោះអ្នកជំងឺថ្មីមានចំនួនជាង ២៣ម៉ឺននាក់ ខណៈអ្នកជំងឺទឹកនោមផ្អែមសម្រាកព្យាបាលនៅមន្ទីរពេទ្យមានចំនួនជាង ១ម៉ឺន ៧ពាន់នាក់ ពោលកើនឡើង ៤៣,២៥%។
លោក ឈាង រ៉ា បានឲ្យដឹងថា ជំងឺទឹកនោមផ្អែមនេះគឺជាឃាតករលាក់មុខដែលសម្លាប់ និងធ្វើឱ្យពលរដ្ឋខ្មែរធ្លាក់ខ្លួនពិការ ខណៈដែលប្រទេសកម្ពុជាកំពុងបោះជំហានទៅកាន់ប្រទេសមួយដែលមានដង់ស៊ីតេពលរដ្ឋវ័យចំណាស់កាន់តែច្រើន។
ក្នុងឆ្នាំ២០២៥ នេះ រាជរដ្ឋាភិបាលបានទម្លាក់កញ្ចប់ថវិកាប្រមាណ ២០លានដុល្លារសហរដ្ឋអាមេរិក ដើម្បីទិញថ្នាំព្យាបាលជំងឺទឹកនោមផ្អែម និងលើសឈាមដល់ប្រជាពលរដ្ឋខ្មែរដោយឥតគិតថ្លៃ។
កាលពីថ្ងៃទី២៧ ខែកុម្ភៈ ឆ្នាំ២០២៥ ប្រធានអង្គភាពអ្នកនាំពាក្យរាជរដ្ឋាភិបាលកម្ពុជា លោក ប៉ែន បូណា បានលើកឡើងថា ការជួយរបស់រដ្ឋាភិបាលចំពោះអ្នកជំងឺទឹកនោមផ្អែម គឺដើម្បីជួយសង្គ្រោះអាយុជីវិតពលរដ្ឋខ្មែរ និងថានេះជាគោលនយោបាយសុខាភិបាលរបស់រដ្ឋាភិបាលដែលគិតពីប្រយោជន៍ពលរដ្ឋជាធំ។
កាលពីថ្ងៃទី២៧ ខែវិច្ឆិកា រដ្ឋសភាខ្មែរបានអនុម័តថវិកាជាតិឆ្នាំ២០២៥ ដោយក្រសួងសុខាភិបាល ទទួលបានច្រើនជាងគេ គឺជិត ១៤០លានដុល្លារនៃចំនួនទឹកប្រាក់សរុប ៩,៣២ពាន់លានដុល្លារ (៣៧៩៥០ពាន់លានរៀល)។
ទឹកនោមផ្អែមជាជំងឺរ៉ាំរ៉ៃដែលលេចឡើងនៅពេលលំពែងលែងផលិតសារធាតុអាំងស៊ុយលីនបានគ្រប់គ្រាន់សម្រាប់តម្រូវការនៃសរីរាង្គកាយ ឬនៅពេលដែលសរីរាង្គនេះលែងប្រើប្រាស់អាំងស៊ុយលីនបានដោយត្រឹមត្រូវ។ ទម្លាប់បរិភោគចំណីអាហារមានជាតិផ្អែមហួសប្រមាណ ក៏ជាហេតុមួយនាំទៅឲ្យមានរោគទឹកនោមផ្អែមដែរ។ ជំងឺទឹកនោមផ្អែមមានពីរប្រភេទ គឺទឹកនោមផ្អែមប្រភេទ១ និងទឹកនោមផ្អែមប្រភេទ២។
ក្រុមអ្នកឃ្លាំមើលសង្គមលើកឡើងថា បញ្ហាជំងឺទឹកនោមផ្អែមបានបង្កផលប៉ះពាល់ខ្លាំងដល់សេដ្ឋកិច្ចគ្រួសារ សង្គម ធ្វើឲ្យប៉ះពាល់ដល់ការអភិវឌ្ឍធនធានមនុស្ស ដែលជាបន្ទុករដ្ឋត្រូវទទួលរ៉ាប់រងចំពោះអ្នកមានជំងឺនេះ៕
© 2025, ឌឹ ខេមបូឌា ដេលី. All rights reserved.