ក្រសួងការបរទេសកម្ពុជា អះអាងថា កម្ពុជាមិនទាន់ទទួលបានដំណឹងជាផ្លូវការណាមួយពាក់ព័ន្ធការដាក់កម្ពុជាចូលក្នុងបញ្ជីលឿងរបស់អាមេរិក ក្នុងចំណោម ៤៣ប្រទេស ដែលរឹតបន្តឹងប្រជាជនចូលក្នុងប្រទេសរបស់ខ្លួននៅឡើយទេ។
អ្នកនាំពាក្យក្រសួងការបរទេសកម្ពុជា លោក ជុំ សុន្ទរី បានប្រាប់ក្រុមអ្នកសារព័ត៌មានថា កម្ពុជាកំពុងរកព័ត៌មានបន្ថែមជុំវិញនឹងសេចក្ដីព្រាងរបស់ក្រសួងការបរទេសអាមេរិក ដែលរឹតបន្តឹងប្រជាជនប្រមាណ ៤៣ប្រទេសចូលទឹកដីអាមេរិក។
អ្នកនាំពាក្យក្រសួងការបរទេសរូបនេះថា ជំហរកម្ពុជានៅតែបន្តកិច្ចសហប្រតិបត្តិការយ៉ាងពេញលេញជាមួយអាមេរិក។ លើសពីនេះ បានជំរុញការពន្លឿនលើកិច្ចការមាតុភូមិនិវត្តន៍របស់ពលរដ្ឋខ្មែរដែលអាមេរិកគ្រោងបញ្ជូនចេញមកវិញផងដែរ។
លោកបន្តថា ក្រសួងមហាផ្ទៃ និងស្ថានទូតកម្ពុជាប្រចាំសហរដ្ឋអាមេរិក បាននិងកំពុងផ្តល់កិច្ចសហប្រតិបត្តិការជាមួយភាគីអាមេរិក។
ទាក់ទិននឹងបញ្ហាខាងលើ លោក អំ សំអាត នាយកប្រតិបត្តិអង្គការលីកាដូ (LICADHO) បានឲ្យដឹងថា បើក្រសួងការបរទេសអាមេរិកអនុម័តជាផ្លូវការលើសេចក្ដីព្រាងនេះ នឹងប៉ះពាល់ដល់ការធ្វើដំណើររបស់ពលរដ្ឋកម្ពុជា។ លោកបន្ថែមថា អ្នកជួបបញ្ហាលំបាកខ្លាំង គឺនិស្សិតខ្មែរដែលទៅសិក្សា រួមទាំងអ្នកជំនួញខ្មែរដែលមានទំនាក់ទំនងជាមួយប្រទេសមហាអំណាចនេះ។
លោក អំ សំអាត បន្ថែមថា ប្រទេសដែលស្ថិតក្នុងបញ្ជីនេះដោយសារអាមេរិកសង្ស័យថាជាប់ពាក់ព័ន្ធនឹងការជួញដូរលិខិតឆ្លងដែនខុសច្បាប់។ លោកយល់ថា អាចពាក់ព័ន្ធនឹងលម្ហសេរីភាព និងបញ្ហាពុករលួយ។ លោកជំរុញឱ្យរដ្ឋាភិបាលកម្ពុជាកែលម្អស្ថានភាពសេរីភាព និងបង្កើនការអនុវត្តតាមច្បាប់ឱ្យកាន់តែមានប្រសិទ្ធភាព។
កាលពីថ្ងៃទី១៥ ខែមីនា ឆ្នាំ២០២៥ រដ្ឋបាលលោកប្រធានាធិបតីអាមេរិក ដូណាល់ ត្រាំ ពិចារណាលើការរឹតត្បិត ឬហាមឃាត់ការធ្វើដំណើរចូលទឹកដីអាមេរិកចំពោះពលរដ្ឋមកពីជាង ៤០ប្រទេស ដែលត្រូវបែងចែកជាបីប្រភេទ គឺប្រទេសដែលត្រូវបានចាត់ថ្នាក់ចូលទៅក្នុងពណ៌ក្រហម ពណ៌ទឹកក្រូច និងពណ៌លឿង ក្នុងនោះប្រទេសកម្ពុជា ក៏ត្រូវបានចាត់ក្នុងប្រទេសប្រភេទពណ៌លឿងដែរ។
ប្រទេសចំនួន ១១ ដែលស្ថិតក្នុងបញ្ជីពណ៌ក្រហម ដូចជា អាហ្វហ្គានីស្ថាន កូរ៉េខាងជើង និងវេណេហ្ស៊ុយអេឡា ជាដើម ត្រូវហាមឃាត់ទាំងស្រុងមិនឲ្យចូលទឹកដីអាមេរិក។ ចំណែកប្រទេសដែលស្ថិតក្នុងបញ្ជីពណ៌ទឹកក្រូចដែលមានចំនួន ១០ប្រទេស ដូចជា បេឡារុស ឡាវ និងភូមា ជាដើម ត្រូវផ្អាកការផ្តល់ទិដ្ឋាការដល់និស្សិត ទិដ្ឋាការអន្តោប្រវេសន៍ និងទិដ្ឋាការទេសចរណ៍ ជាដើម ប៉ុន្តែត្រូវលើកលែងទិដ្ឋាការសម្រាប់ធ្វើអាជីវកម្ម។
ដោយឡែកប្រទេសដែលស្ថិតក្នុងបញ្ជីពណ៌លឿងទាំង ២២ រួមមាន កម្ពុជា និងប្រទេសម៉ាលី ជាដើម អាចប្រឈមនឹងការរឹតត្បិតការធ្វើដំណើរចូលទឹកដីអាមេរិក ឬបញ្ចូលក្នុងបញ្ជីពណ៌ក្រហម និងបញ្ជីពណ៌ទឹកក្រូចផងដែរ ប៉ុន្តែប្រទេសដែលស្ថិតក្នុងបញ្ជីពណ៌លឿងនេះ មានពេល ៦០ថ្ងៃ គិតចាប់ពីថ្ងៃទី២០ ខែមករា មក ដើម្បីធ្វើរបាយការណ៍ចុងក្រោយដាក់ជូនសេតវិមានពិនិត្យ និងសម្រេច៕
© 2025, ឌឹ ខេមបូឌា ដេលី. All rights reserved.