អង្គការ សមាគម និងសហជីពជាង ៦០ លើកសំណើអាទិភាពចំនួន ១៣ចំណុចឱ្យរាជរដ្ឋាភិបាលកម្ពុជាពិចារណា និងដោះស្រាយប្រកបដោយប្រសិទ្ធភាព ដើម្បីនាំមកនូវវិបុលភាពសេដ្ឋកិច្ចរបស់ប្រទេសជាតិ និងសុខុមាលភាពរបស់កម្មករនិយោជិត និងប្រជាពលរដ្ឋកម្ពុជា។
សំណើទាំងអស់នេះ ធ្វើឡើងបន្ទាប់ពីនាយករដ្ឋមន្ត្រី ហ៊ុន ម៉ាណែត ផ្ញើសារមួយថ្ងៃមុនទិវាពលករអន្តរជាតិ (International Workers’ Day) ១ ឧសភា ដោយប្ដេជ្ញាថានឹងបង្កើតការងារដល់ពលរដ្ឋខ្មែរមានប្រាក់ខែសមរម្យ មានគុណភាពជីវិត ហើយឲ្យក្លាយទៅជាប្រទេសមានចំណូលខ្ពស់នៅឆ្នាំ២០៥០។
គួរកត់សម្គាល់ថា សម័យមុនគេហៅថា ទិវាបុណ្យការងារ ឬទិវាបុណ្យពលករអន្តរជាតិ ឬទិវា ១ឧសភា គឺផ្ទុយពីទិវាបុណ្យជាតិអាមេរិកាំង ហៅ ទិវាការងារ ឬទិវាពលកម្ម (Labor Day) ដែលប្រារព្ធនៅដើមខែកញ្ញា ថ្វីត្បិតតែខ្លឹមសារនៃទិវាទាំងពីរមានលក្ខណៈប្រហាក់ប្រហែលគ្នា គឺផ្តល់តម្លៃដល់ពលករកម្មករបានចូលរួមធ្វើវិភាគទានផលិតធ្វើឲ្យសង្គមលូតលាស់រីកចម្រើន។
អង្គការក្រៅរដ្ឋាភិបាល រួមទាំងសមាគម និងសហជីពចំនួន ៦២ស្ថាប័ន ចេញសេចក្តីថ្លែងការណ៍រួមគ្នានៅក្នុងឱកាសនៃការប្រារព្ធទិវាពលករអន្តរជាតិ ១ឧសភា ដោយលើកឡើងនូវសំណើចំនួន ១៣ចំណុច ដោយស្នើឱ្យរដ្ឋាភិបាលស្ដារឡើងវិញនូវលម្ហសេរីភាពជាមូលដ្ឋាន សេរីភាពក្នុងការបង្កើតសហជីព និងអនុវត្តតាមអនុសាសន៍របស់សភាអឺរ៉ុប ដើម្បីទទួលបានប្រព័ន្ធអនុគ្រោះពន្ធ EBA ២០% ត្រឡប់មកវិញផងដែរ។
បន្ថែមពីនេះ ក៏ស្នើឱ្យរដ្ឋាភិបាលជួបពិភាក្សាជាមួយសមាគមនិយោជក និងតំណាងក្រុមហ៊ុនអ្នកបញ្ជាទិញធំៗ ដើម្បីរកវិធីសាស្ត្រធានាស្ថិរភាពការងារជូនកម្មករ និងការវិនិយោគនៅកម្ពុជា ដោយមានការពិគ្រោះយោបល់ជាមួយសហជីព និងភាគីពាក់ព័ន្ធ រួមទាំងសំណើជាច្រើនទៀតផងដែរ។
ប្រភពដដែលលើកឡើងថា វិស័យការងារនៅតែជាវិស័យចម្បងបំផុតមួយរបស់ប្រទេសកម្ពុជា ហើយការទទួលបានកំណើនប្រាក់ចំណូលខ្ពស់របស់កម្ពុជាកន្លងមក ក៏បានមកពីការប្រឹងប្រែងធ្វើការងាររបស់កម្មករនិយោជិតដែរ ប៉ុន្តែកម្មករនិយោជិតទាំងនេះនៅតែទទួលបានប្រាក់ឈ្នួលទាបនៅឡើយ។
សេចក្តីថ្លែងការណ៍នេះអះអាងថា រាល់ថ្ងៃ កម្មករនិយោជិត ជាពិសេសកម្មការិនីនៅតែប្រឈមបញ្ហានៅកន្លែងការងារ ដូចជា កិច្ចសន្យាការងារមានថេរវេលាខ្លី សម្ពាធការងារត្រូវបំពេញតាមបរិមាណផលិតកម្ម លក្ខខណ្ឌការងារមិនសមរម្យ អំពើហិង្សាទាក់ទងនឹងយេនឌ័រ និងការបៀតបៀនដោយការរើសអើងពីនិយោជក ព្រមទាំងការគំរាមបញ្ឈប់ពីការងារ ជាដើម។
លើសពីនោះ កម្មករនិយោជិត និងថ្នាក់ដឹកនាំសហជីពមួយចំនួននៅតែប្រឈមឧបសគ្គក្នុងការអនុវត្តសិទ្ធិសេរីភាពមូលដ្ឋានរបស់ខ្លួន ដូចជា សេរីភាពក្នុងការបញ្ចេញមតិ សេរីភាពក្នុងការបង្កើតសហជីព និងសិទ្ធិក្នុងការជួបប្រជុំដោយសន្តិវិធី ជាដើម ទោះបីជាសិទ្ធិសេរីភាពទាំងនេះត្រូវបានការពារដោយរដ្ឋធម្មនុញ្ញកម្ពុជា និងកតិកាសញ្ញាអន្តរជាតិស្ដីពីសិទ្ធិពលរដ្ឋ និងសិទ្ធិនយោបាយក៏ដោយ។
អង្គការសមាគមទាំងនេះ បញ្ជាក់ថា កម្មករ និងថ្នាក់ដឹកនាំសហជីព ត្រូវរងនូវការចាប់ខ្លួន និងចោទប្រកាន់ពីបទល្មើសព្រហ្មទណ្ឌធ្ងន់ធ្ងរ ឬការដាក់ឱ្យស្ថិតនៅក្រោមការត្រួតពិនិត្យរបស់តុលាការ ជាបន្តបន្ទាប់ ដោយសារតែការអនុវត្តសិទ្ធិសេរីភាពមូលដ្ឋាន និងភាពសកម្មនិយមក្នុងការការពារពីការរំលោភបំពានលើសិទ្ធិការងារ ជាដើម។
នៅថ្ងៃទី១ ខែឧសភា ឆ្នាំ២០២៥ នេះ អង្គការសង្គមស៊ីវិលជាច្រើន បានសហការគ្នាប្រារព្ធពិធីអបអរសាទរទិវាពលករអន្តរជាតិ ១ឧសភា នៅក្នុងបរិវេណសួនច្បារមុខក្រុមប្រឹក្សាអភិវឌ្ឍន៍កម្ពុជា និងបរិវេណកោះនរា ដែលមានពលរដ្ឋប្រមាណជា ២៥០០នាក់មកពីសហព័ន្ធសហជីព សហជីព និងកម្មករនិយោជិត រួមទាំងសមាជិកក្រុមសង្គមស៊ីវិលផងដែរ៕
© 2025, ឌឹ ខេមបូឌា ដេលី. All rights reserved.