ពួកព្រាហ្មណ៍បុរោហិត ជោតិកាចារ្យ ព្រះរាជគ្រូប្រចាំព្រះបរមរាជវាំង បានប្រកាសដោយយោងតាមការបរិភោគរបស់គោឧសភរាជ ឬគោឈ្មោលស្តេច នាព្រះរាជពិធីមង្គលទ្វាទសមាស វប្បមង្គល ឬច្រត់ព្រះនង្គ័ល នៅខេត្តកំពង់ឆ្នាំង នាថ្ងៃទី១៥ ខែឧសភា ឆ្នាំ២០២៥ ក្រោមព្រះរាជាធិបតី ព្រះមហាក្សត្រ ព្រះបាទសម្តេចព្រះបរមនាថ នរោត្តម សីហមុនី បានបង្ហាញថា ស្រូវ ពោត និងសណ្ដែកនៅក្នុងឆ្នាំ២០២៥ នេះទទួលបានទិន្នផលល្អ។
ឆ្នាំនេះ លោក ស៊ុន សុវណ្ណារិទ្ធ អភិបាលខេត្តកំពង់ឆ្នាំង ជាតំណាងព្រះមហាក្សត្រ ដោយធ្វើជាស្តេចមាឃ កាន់នង្គ័លទីពីរ និងភរិយារបស់លោក គឺលោកស្រី ផាត សុផានី ជាព្រះមេហួ។ លោក ឃុន សាវឿន រដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ជាអ្នកកាន់នង្គ័លយោង ឬនង្គ័លទីមួយ រីឯនង្គ័លទីបី ឬនង្គ័លយោងខាងក្រោយ កាន់ដោយលោក វណ្ណា បូរិទ្ធ អគ្គលេខាធិការរងគណៈកម្មាធិការជាតិរៀបចំបុណ្យជាតិ និងអន្តរជាតិ។
ព្រះមហាក្សត្រកម្ពុជា ព្រះបាទសម្តេចព្រះបរមនាថ នរោត្តម សីហមុនី ត្រូវបានអមព្រះរាជដំណើរដោយប្រធានព្រឹទ្ធសភា លោក ហ៊ុន សែន ប្រធានរដ្ឋសភា លោកស្រី ឃួន សុដារី លោកនាយករដ្ឋមន្ត្រី ហ៊ុន ម៉ាណែត និងមន្ត្រីជាន់ខ្ពស់នៅក្នុងជួររដ្ឋាភិបាលជាច្រើនរូបទៀត ដើម្បីចូលរួមក្នុងព្រះរាជពិធីច្រត់ព្រះនង្គ័លនៅក្នុងខេត្តកំពង់ឆ្នាំង។
បន្ទាប់ពីស្តេចមាឃ និងព្រះមេហួ បានភ្ជួរដីដោយប្រើគោឧសភរាជចំនួន ៣ជុំវិញព្រះស្រែមក ព្រាហ្មណ៍ព្រះរាជគ្រូក៏បានសូត្រពាក្យអធិដ្ឋានផ្សងគោឧសភរាជដែលទឹមច្រត់ព្រះនង្គ័លនោះឲ្យបរិភោគអាហារចំនួន ៧មុខ រួមមាន ស្រូវ សណ្តែក ពោត ល្ង ស្មៅ ទឹក និងស្រា ទៅតាមទំនៀមបរមបុរាណ។
ក្រោយគោឧសភរាជបរិភោគអាហារដែលដាក់តាំងរួចរាល់ ព្រាហ្មណ៍ព្រះរាជគ្រូបុរោហិតបានប្រកាសថា លទ្ធផលដែលបានមកពីការផ្សងគោឧសភរាជបរិភោគនូវអាហារទាំង ៧ បានបង្ហាញថា គោឧសភរាជបានបរិភោគ ស្រូវ ៩៥% ពោត ៩៥% និងសណ្តែក ៨០%។
ព្រះរាជពិធីដែលមានការតាំងពិព័រណ៍ផលិតផលកសិកម្ម សិប្បកម្មក្នុងស្រុកឆ្នាំ២០២៥ ប្រព្រឹត្តទៅនៅថ្ងៃព្រហស្បតិ៍ ទី១៥ ខែឧសភា នេះ នាទីព្រះស្រែនៅបរិវេណកីឡដ្ឋានក្រុងកំពង់ឆ្នាំង ខេត្តកំពង់ឆ្នាំង។ ព្រះរាជពិធីច្រត់ព្រះនង្គ័ល ត្រូវប្រារព្ធធ្វើឡើងជារៀងរាល់ឆ្នាំ នៅថ្ងៃ៤រោច ខែពិសាខ ដែលជាព្រះរាជពិធីដ៏សំខាន់មួយនៃពិធីបុណ្យ ឬមង្គលទ្វាទសមាស។
ព្រះរាជពិធីតាមក្បួនជោតិសាស្ត្របែបព្រហ្មញ្ញសាសនានេះ រៀបចំក្នុងគោលបំណងផ្សងមើលប្រផ្នូលសម្រាប់ស្រុកទេសទៅតាមការគយគន់មើលសត្វ «គោឧសភរាជ» បរិភោគអាហារអ្វីខ្លះទាំង ៧យ៉ាង មានស្រូវ សណ្តែក ពោត ល្ង ស្មៅ ទឹក និងស្រា។
ប្រជាកសិករខ្មែរតែងមានជំនឿថា រាល់អាហារដែលគោឧសភរាជបានបរិភោគ គឺជាការបញ្ជាក់ពីទិន្នផលដំណាំនៅថ្ងៃខាងមុខ។ ម្យ៉ាងទៀត ជំនឿចំពោះពិធីមួយនេះ នៅតែជារឿងចាំបាច់ក្នុងការអភិរក្ស និងថែរក្សាទំនៀមទម្លាប់ ហើយវាក៏ជាការឆ្លុះបញ្ចាំងពីអត្តសញ្ញាណជាតិខ្មែរផងដែរ។ ពិធីនេះជានិមិត្តរូបនៃរដូវផ្តើមការដាំដុះសម្រាប់កសិករខ្មែរតាមបែបលទ្ធិព្រាហ្មណ៍ ប៉ុន្តែរៀងរាល់ឆ្នាំ ប្រផ្នូលលេចចេញពីគោឧសភរាជបរិភោគធញ្ញជាតិអ្វីៗនោះ ជួនកាលក៏ត្រូវខ្លះ ជួនកាលខុសខ្លះ៕
© 2025, ឌឹ ខេមបូឌា ដេលី. All rights reserved.