ក្រសួងព័ត៌មាន បានកត់សម្គាល់ ឬទប់ស្កាត់ព័ត៌មានក្លែងក្លាយចំនួន ៣៦២១ នៅឆ្នាំ២០២៤ កន្លងទៅ ដែលចំនួននេះកើនឡើងប្រមាណ ១៤% បើធៀបទៅនឹងឆ្នាំ២០២៣។
ថ្លែងក្នុងវេទិកាកិច្ចប្រជុំកំពូលប្រព័ន្ធផ្សព្វផ្សាយអាស៊ីលើកទី២០ (The 20th AMS 2025) ដែលកម្ពុជាកំពុងធ្វើជាម្ចាស់ផ្ទះនៅលើទឹកដីខេត្តសៀមរាប លោក នេត្រ ភក្ដ្រា រដ្ឋមន្ត្រីក្រសួងព័ត៌មាន បានលើកឡើងថា ប្រព័ន្ធបញ្ញាសិប្បនិម្មិត ឬ AI កំពុងជ្រៀតចូលយ៉ាងជ្រៅក្នុងវិស័យសារព័ត៌មាន ដែលធ្វើឱ្យសាធារណជនបែងចែកមិនដាច់មួយណាជាព័ត៌មានពិត មួយណាជាព័ត៌មានដែលបង្កើតឡើងដោយ AI។
លោក នេត្រ ភក្ដ្រា លើកឡើងថា បច្ចុប្បន្ន ប្រព័ន្ធបច្ចេកវិទ្យាកាន់តែជឿនលឿន ព័ត៌មានក្លែងក្លាយនៅលើបណ្ដាញសង្គមក៏កាន់តែច្រើនផងដែរ។ លោកថា ក្នុងឆ្នាំ២០២៤ កន្លងទៅ ព័ត៌មានក្លែងក្លាយសរុបចំនួន ៣៦២១ ត្រូវបានកត់សម្គាល់ ឬទប់ស្កាត់ ដែលចំនួននេះកើនឡើងប្រមាណ ១៤% បើធៀបនឹងឆ្នាំ២០២៣។
លោកថា ព័ត៌មានក្លែងក្លាយដែលក្រសួងបានក្តាប់ជាប់ទាំងនោះ ពាក់ព័ន្ធនឹងបញ្ហាសន្តិសុខជាតិ សង្គម ទេសចរណ៍ នយោបាយ និងការងារផ្សេងៗដែលមានភាពរសើប។ លោកបន្តថា កាលណាមានព័ត៌មានក្លែងក្លាយ គឺត្រូវតែដាក់ព័ត៌មានពិត និងបកស្រាយព័ត៌មានពិតឱ្យបានលឿនតាមតែអាចធ្វើទៅបាន។
ប្រធានអង្គការប្រជាធិបតេយ្យខ្មែរដែលមានមូលដ្ឋាននៅប្រទេសអូស្ត្រាលី លោក ស៊ឹង សែនករុណា បានឲ្យដឹងថា ព័ត៌មានក្លែងក្លាយកំពុងមានសន្ទុះខ្លាំងនៅអំឡុងពេលដែលពិភពលោកកំពុងប្រើប្រាស់នូវបច្ចេកវិទ្យាទំនើប ដូចជាបញ្ញាសិប្បនិម្មិត (AI) បណ្ដាញទំនាក់ទំនងសង្គម ជាដើម។
លោកថា ព័ត៌មានក្លែងក្លាយត្រូវបានបង្កើតឡើងដោយបុគ្គល ឬក្រុមដែលធ្វើសកម្មភាពដើម្បីផលប្រយោជន៍ផ្ទាល់ខ្លួន ឬហេតុផលនយោបាយ បំផ្លើសបំភ្លៃសភាពការណ៍ពិត ក្នុងគោលដៅបង្កើតចលាចលធ្វើឱ្យសង្គមវឹកវរជ្រួលច្របល់។
លោក ស៊ឹង សែនករុណា អះអាងថា ព័ត៌មានក្លែងក្លាយដែលបង្កើតឡើងដោយអ្នកនយោបាយ គឺមានគ្រោះថ្នាក់បំផុត ជាពិសេសនៅពេលដែលកម្ពុជាកំពុងមានជម្លោះព្រំដែនជាមួយប្រទេសថៃ នាពេលបច្ចុប្បន្ននេះ។ លោកថា តួយ៉ាងនៅថ្ងៃទី៨ មិថុនា កន្លងទៅ កម្ពុជា-ថៃ បានព្រមព្រៀងគ្នាលើការកែសម្រួលកម្លាំងទ័ពនៅចំណុចមុំបី តែសារព័ត៌មាន Khaosod របស់ថៃ បានផ្សាយថាកម្ពុជា ព្រមព្រៀងដកទ័ពនៅចំណុចរសើបនេះទៅវិញ។
ក្រសួងព័ត៌មាន បានឱ្យដឹងថា ក្នុងឆមាសទី១ នៃឆ្នាំ២០២៥ នេះ ក្រសួងបានកត់ត្រាព័ត៌មានក្លែងក្លាយសរុបចំនួន ១៧៥៧ករណី។ ចំនួននេះមានការកើនឡើងប្រមាណ ៣,២៩% បើគិតក្នុងរយៈពេលដូចគ្នាឆ្នាំ២០២៤ តែកើនឡើង ១៥% ក្នុងឆ្នាំ២០២៣៕
© 2025, ឌឹ ខេមបូឌា ដេលី. All rights reserved.