ភរិយាមេដឹកនាំគណបក្សប្រឆាំងនៃប្រទេសរុស្ស៊ី លោក Alexei Navalny ដែលជាគូប្រជែងអំណាចនឹងលោក វ្ល៉ាឌីមៀ ពូទីន គឺអ្នកស្រី Yulia Navalnaya បានប្រកាសកាលពីថ្ងៃទី១៧ កញ្ញា ថា តាមមន្ទីរពិសោធន៍អន្តរជាតិចំនួនពីរ បានសន្និដ្ឋានថា លោក Alexei Navalny មេដឹកនាំបក្សប្រឆាំងនៅរុស្ស៊ី រូបនេះ ត្រូវបានសម្លាប់ដោយការបំពុល។
នេះបើតាមការចុះផ្សាយក្នុងសារព័ត៌មាន Kyiv Independent នៃប្រទេសអ៊ុយក្រែន នៅថ្ងៃទី១៨ កញ្ញា ឆ្នាំ២០២៥។
លោក Alexei Navalny ដែលជាអ្នករិះគន់យ៉ាងខ្លាំងចំពោះប្រធានាធិបតីរុស្ស៊ី លោក វ្ល៉ាឌីមៀ ពូទីន បានស្លាប់នៅថ្ងៃទី១៦ ខែកុម្ភៈ ឆ្នាំ២០២៤ នៅក្នុងពន្ធនាគារមួយនៅទីក្រុង Kharp ស្ថិតនៅតំបន់អាកទិច ដែលជាតំបន់ដាច់ស្រយាល និងមានអាកាសធាតុត្រជាក់ខ្លាំង។ នៅទីនោះ គាត់បានជាប់ឃុំក្នុងពន្ធនាគារដោយទទួលទោសរយៈពេលយូរ។
អ្នកស្រី Yulia Navalnaya បានបន្ថែមថា ក្រុមការងាររបស់ប្តីអ្នកស្រីបានរក្សា និងដឹកជញ្ជូនសំណាកជីវសាស្ត្រលោក Alexei Navalny ដោយយកទៅពិសោធនៅបរទេស។
នៅក្នុងសេចក្តីថ្លែងការណ៍តាមវីដេអូ អ្នកស្រី Yulia Navalnaya បានបញ្ជាក់ថា៖ «មន្ទីរពិសោធន៍ដែលមានភាពឯករាជ្យយ៉ាងហោចណាស់ចំនួនពីរ បានធ្វើការវិភាគសំណាកទាំងនេះ ហើយលទ្ធផលបង្ហាញច្បាស់ថា លោក Alexei Navalny ត្រូវបានសម្លាប់ដោយការបំពុល។»
ស្ត្រីមេម៉ាយ Yulia Navalnaya បានចោទប្រកាន់រដ្ឋាភិបាលប្រទេសលោកខាងលិច ថាបានបន្ថយ ឬបោះបង់ការស៊ើបអង្កេតចំពោះមរណភាពប្ដីរបស់អ្នកស្រី។ អ្នកស្រីបានអំពាវនាវឲ្យមន្ទីរពិសោធន៍ ផ្សព្វផ្សាយលទ្ធផលការរកឃើញរបស់ពួកគេ។
អ្នកស្រីបាននិយាយក្នុងសេចក្តីថ្លែងការណ៍ថា៖ «ពលរដ្ឋរុស្ស៊ី ម្នាក់ ត្រូវបានសម្លាប់នៅលើទឹកដីរុស្ស៊ី ដែលភស្តុតាងទាំងអស់ក៏មានផងដែរ។ រឿងនេះ ប្រទេសលោកខាងលិចមិនមានហេតុផលផ្លូវច្បាប់ក្នុងការផ្ដួចផ្ដើម និងបន្តដំណើរការនីតិវិធីព្រហ្មទណ្ឌនោះទេ ហើយហេតុផលពិតប្រាកដនៃការស្លាប់នោះ គឺជាហេតុផលនយោបាយ។»
អ្នកស្រី Navalnaya ក៏បានបង្ហាញសក្ខីកម្មពីបុគ្គលិកប្រាំនាក់នៅក្នុងពន្ធនាគារ ស្ថិតនៅក្នុងទីក្រុង Kharp នៃតំបន់អាកទិច ដែលអ្នកស្រីអះអាងថាបានជួយបង្កើតឡើងវិញនូវព័ត៌មានលម្អិតអំពីរបៀបដែលប្តីអ្នកស្រីស្លាប់។
តាមសេចក្តីរាយការណ៍ពីអធិការជាន់ខ្ពស់ Anton Nemtsov ក៏បានឱ្យដឹងថា លោក Alexei Navalny បានត្អូញត្អែរពីអារម្មណ៍មិនស្រួលពេលដើរ ហើយត្រូវបានបញ្ជូនត្រឡប់ទៅបន្ទប់ឃុំឃាំងវិញ។ បន្ទាប់មក គាត់ត្រូវបានដឹកទៅកាន់មន្ទីរពេទ្យក្នុងស្ថានភាពសន្លប់ មុននឹងស្លាប់។ បន្ទាប់ពីលោក Alexei Navalny បានដួលសន្លប់ជាង ៤០នាទី ទើបចាប់ផ្ដើមសង្គ្រោះ។
បុគ្គលិកម្នាក់ទៀតឈ្មោះ Ruslan Tsoi អនុប្រធានអង្គភាពពេទ្យ បានផ្តល់សក្ខីកម្មថា រថយន្តសង្គ្រោះបន្ទាន់បានធ្វើរោគវិនិច្ឆ័យថា លោក Alexei Navalny មានរោគសញ្ញាប្រកាច់ និងបានបណ្តាលឱ្យស្លាប់ភ្លាមៗ។
ស្ត្រីមេម៉ាយ Yulia Navalnaya បានលើកឡើងថា សញ្ញាប្រកាច់នេះបង្ហាញពីការពុល។ នាងក៏បានបង្ហាញរូបថតកោសិការបស់លោក Navalny ជាមួយនឹងសសំណល់ក្អួត និងបានចង្អុលបង្ហាញថា ទោះបីជាមានកាមេរ៉ាឃ្លាំមើលនៅក្នុងកន្លែងក៏ដោយ ក៏មិនមានវីដេអូណាមួយត្រូវបានចេញផ្សាយដែរ។
អ្នកស្រី Navalnaya បាននិយាយថា៖ «ជាក់ស្តែង មានអ្វីមួយនៅក្នុងការថតទាំងនេះ ដែលមិនសមនឹងការលាក់បាំងនោះទេ។ បើមិនដូច្នោះទេ វានឹងត្រូវបានបង្ហាញម្តងហើយម្តងទៀតដោយភាពបើកចំហ និងប៉ុស្តិ៍ទូរទស្សន៍។»
លោក Navalny ទទួលបានភាពល្បីល្បាញពីការលាតត្រដាងអំពើពុករលួយតាមរយៈមូលនិធិប្រឆាំងអំពើពុករលួយរបស់លោក។ លោកបានប្រឈមមុខនឹងការចាប់ខ្លួន ការជាប់ពន្ធនាគារ និងការប៉ុនប៉ងធ្វើឃាតម្តងហើយម្តងទៀត។
ការបំពុលលោក Alexei Navalny ក្នុងឆ្នាំ២០២០ ដោយប្រើសារធាតុពុលប្រឆាំងសរសៃប្រសាទ ដែលពេលនោះបានបង្កកំហឹងយ៉ាងធ្ងន់ធ្ងរពីសហគមន៍អន្តរជាតិ ដោយទាញឱ្យមានការស៊ើបអង្កេតពីអង្គការអន្តរជាតិ។
បន្ទាប់ពីមរណភាពរបស់លោក Alexei Navalny ប្រធានាធិបតី វ៉្លាឌីមៀ ពូទីន បាននិយាយថា លោកយល់ព្រមចំពោះការផ្លាស់ប្ដូរអ្នកទោស ភាគច្រើនគឺជាអ្នកស៊ើបការណ៍រុស្ស៊ី ដែលត្រូវបានឃុំខ្លួននៅក្នុងប្រទេសលោកខាងលិច ប៉ុន្តែអកុសលអ្វីដែលបានកើតឡើង គឺបានកើតឡើង។ ចាប់តាំងពីទីក្រុងមូស្គូ បានចាប់ផ្តើមយុទ្ធនាការសឹកវាយលុកលុយយ៉ាងពេញលេញលើអ៊ុយក្រែន នៅខែកុម្ភៈ ឆ្នាំ២០២២ អាជ្ញាធររុស្ស៊ី បានបង្កើនការបង្ក្រាបលើអ្នកនយោបាយបក្សប្រឆាំង។
លោក Alexei Navalny បានស្រែកក្នុងសវនាការនៅពេលត្រូវបាននាំខ្លួនមកជំនុំជម្រះក្ដីនៅតុលាការមួយនៅជាយក្រុងមូស្គូ។ លោកស្រែករិះគន់ថា សង្គ្រាមរបស់លោក ពូទីន មិនបានអ្វីមកវិញទេ។ វានឹងធ្វើឱ្យរុស្ស៊ី បាក់មុខមាត់ និងចុះខ្សោយឥទិ្ធពលនៅលើវេទិកាអន្តរជាតិ។ លោក Alexei Navalny ក៏បានអំពាវនាវឱ្យប្រជាជនរុស្ស៊ី ងើបឡើងប្រឆាំងសង្គ្រាមរបស់លោក ពូទីន។
ក្នុងពេលដែលលោក Alexei Navalny នឹងត្រូវឡើងសវនាការម្ដងទៀត ពេលនោះ អាជ្ញាធរបានបញ្ជូនលោក Alexei Navalny ទៅឃុំខ្លួននៅពន្ធនាគារមួយនៅតំបន់អាកទិច ដែលជាតំបន់ត្រជាក់ក្រោមសូន្យជារៀងរាល់ថ្ងៃ៕
© 2025, ឌឹ ខេមបូឌា ដេលី. All rights reserved.