ប្រធានាធិបតីរុស្ស៊ី លោក វ្ល៉ាឌីមៀ ពូទីន បានទៅដល់ទីក្រុងញូវដែលី កាលពីថ្ងៃព្រហស្បតិ៍ ទី៤ ធ្នូ ដើម្បីជួបនាយករដ្ឋមន្ត្រីឥណ្ឌា លោក ណារិនដ្រា ម៉ូឌី ដែលជាទស្សនកិច្ចលើកដំបូងរបស់មេដឹកនាំវិមានក្រឹមឡាំង រូបនេះទៅកាន់ប្រទេសឥណ្ឌា ចាប់តាំងពីសង្គ្រាមរុស្ស៊ី ឈ្លានពានអ៊ុយក្រែន ផ្ទុះឡើងជិត ៤ឆ្នាំហើយ។
តែថ្ងៃជាមួយគ្នានេះ ប្រធានាធិបតីបារាំង លោក អេម៉ានុយអែល ម៉ាក្រុង ក៏បានទៅដល់ទីក្រុងប៉េកាំង ផងដែរ។ លោក ម៉ាក្រុង ទៅទីក្រុងប៉េកាំង ដើម្បីដាក់សម្ពាធលោកប្រធានាធិបតីចិន ស៊ី ជីនពីង ឱ្យគាបរុស្ស៊ី បញ្ចប់សង្គ្រាមនៅអ៊ុយក្រែន។
ប៉ុន្តែលោក ពូទីន ទៅឥណ្ឌា ដើម្បីស្នើសុំឥណ្ឌា ឱ្យនៅបន្តជួយទិញប្រេងពីរុស្ស៊ី ក្នុងការពង្រឹងសង្គ្រាមរបស់ខ្លួននៅលើទឹកដីអ៊ុយក្រែន ដែលគេថាជាសង្គ្រាមឈ្លានពានរបស់រុស្ស៊ី។
តាមសារព័ត៌មាន The Moscow Times ដំណើរទស្សនកិច្ចរយៈពេលពីរថ្ងៃរបស់លោក ពូទីន នៅក្រុងញូវដែលី ធ្វើឡើងខណៈដែលឥណ្ឌា និងរុស្ស៊ី ប្រារព្ធខួប ២៥ឆ្នាំនៃភាពជាដៃគូយុទ្ធសាស្ត្រ។ នៅថ្ងៃសុក្រ ទី៥ ធ្នូ នេះ មេដឹកនាំទាំងពីរនឹងធ្វើជាសហប្រធាននៃកិច្ចប្រជុំកំពូលប្រចាំឆ្នាំឥណ្ឌា-រុស្ស៊ី លើកទី២៣។
ព្រឹត្តិការណ៍នេះកើតឡើងចំពេលដែលសហរដ្ឋអាមេរិក កំពុងបង្កើនសម្ពាធលើរុស្ស៊ី និងគំរាមដាក់ទណ្ឌកម្មលើឥណ្ឌា ដោយសារទីក្រុងញូវដែលី នៅបន្តទំនាក់ទំនងជិតស្និទ្ធជាមួយទីក្រុងមូស្គូ បើទោះជាក្រុងញូវដែលី កាត់បន្ថយការនាំចូលប្រេងរុស្ស៊ី ក៏ដោយ។
លោក ពូទីន ត្រូវបានអមដំណើរដោយរដ្ឋមន្ត្រីការពារជាតិ លោក Andrei Belousov និងគណៈប្រតិភូជាន់ខ្ពស់ពីក្រុមហ៊ុនប្រេង និងអាវុធរដ្ឋរបស់រុស្ស៊ី។
តាម The Moscow Times នាយករដ្ឋមន្ត្រីឥណ្ឌា ណារិនដ្រា ម៉ូឌី នៅតែស្នើឱ្យរុស្ស៊ី និងអ៊ុយក្រែន ឆាប់បង្កើតសន្តិភាពជាមួយគ្នាឡើងវិញ។ លោក ណារិនដ្រា ម៉ូឌី និយាយថា ដោយសារតែសង្គ្រាមធ្វើឱ្យពិភពលោកជួបផលវិបាកទាំងសេដ្ឋកិច្ច និងការកសាងសណ្ដាប់ធ្នាប់ពិភពលោក។ តែគេមិនឮថាលោក ណារិនដ្រា ម៉ូឌី ចង់ដើរតួនាទីជួយរុញសង្គ្រាមរុស្ស៊ី និងអ៊ុយក្រែន ទៅរកទីបញ្ចប់នោះទេ។
ចំពោះលោក ម៉ាក្រុង ដែលស្ថិតនៅទីក្រុងប៉េកាំង លោកបានដាក់សម្ពាធលើសមភាគីចិន ស៊ី ជីនពីង ឱ្យប្រឹងប្រែងជួយបិទបញ្ចប់សង្គ្រាមរុស្ស៊ី នៅអ៊ុយក្រែន ប៉ុន្តែលោកប្រធានាធិបតី ស៊ី ជីនពីង និយាយថា ចិនមិនចង់ឱ្យគេទម្លាក់ទំនួលខុសត្រូវលើចិន ក្នុងវិបត្តិនៅអ៊ុយក្រែន នេះទេ។
ការពិតទៅ មេដឹកនាំទាំងពីរមានគំនិតខ្វែងគ្នាក្នុងបរិបទសង្គ្រាមរុស្ស៊ី នៅអ៊ុយក្រែន។
យ៉ាងណា លោក ស៊ី ប្រកាសគាំទ្ររាល់កិច្ចខិតខំប្រឹងប្រែងដើម្បីសន្តិភាព ហើយបន្តដើរតួនាទីបែបស្ថាបនាក្នុងការស្វែងរកដំណោះស្រាយ តែប្រឆាំងដាច់ខាតការប៉ុនប៉ងទម្លាក់ទំនួលខុសត្រូវលើចិន ក្នុងវិបត្តិអ៊ុយក្រែន។
សម្រាប់ក្រុងប៉េកាំង មិនដែលថ្កោលទោសសង្គ្រាមឈ្លានពានរបស់រុស្ស៊ី លើអ៊ុយក្រែន ម្ដងណាទេ ហើយសូម្បីតែការចូលរួមដាក់ទណ្ឌកម្មលើរុស្ស៊ី ក៏ចិន មិនបានចូលរួមដែរ។ ចិននៅតែជាប្រទេសទិញប្រេងដ៏ច្រើនបំផុតពីរុស្ស៊ី។
ចំពោះលោក ម៉ាក្រុង នៅតែចង់ឃើញចិន ប្រើឥទ្ធិពលរបស់ខ្លួនបិទបញ្ចប់សង្គ្រាមរបស់រុស្ស៊ី។
តាមការកត់ត្រារបស់អ្នកសារព័ត៌មាន នេះជាលើកទីបួនដែលប្រធានាធិបតីបារាំង បានទៅធ្វើទស្សនកិច្ចផ្លូវរដ្ឋនៅប្រទេសចិន គិតចាប់តាំងពីឆ្នាំ២០១៧ មក។
តាមទីភ្នាក់ងារសារព័ត៌មានចិន ស៊ីនហួរ ប្រទេសចិន បានទទួលស្វាគមន៍វត្តមានលោក ម៉ាក្រុង នៅវិមានប្រជាជនចិន យ៉ាងកក់ក្ដៅ។
ក្នុងជំនួបនោះ លោក ស៊ី ជីនពីង និងភរិយា ទទួលលោក ម៉ាក្រុង និងភរិយារបស់លោក ម៉ាក្រុង ជាលក្ខណៈឯកជន តែមានភាពអធិកអធមយ៉ាងខ្លាំង។
តែយ៉ាងណា ចិនធ្លាប់ចង់ដើរតួនាទីជាអ្នកស្វែងរកសន្តិភាពបញ្ចប់សង្គ្រាមរុស្ស៊ី និងអ៊ុយក្រែន ដែរ តែអ៊ុយក្រែន មិនពេញចិត្ត ដោយសារតែផែនការសន្តិភាពរបស់ចិន មិននិយាយអំពីអធិបតេយ្យភាព បូរណភាពទឹកដីអ៊ុយក្រែន ត្រូវបានគោរពនោះទេ បែរជានិយាយថា សង្គ្រាមអាចបិទបញ្ចប់បាន លុះត្រាអឺរ៉ុប និងអាមេរិក លែងបន្តជួយអាវុធទៅឱ្យអ៊ុយក្រែន។ អ៊ុយក្រែន ថាចិន ចង់ឱ្យអ៊ុយក្រែន កាត់ទឹកដីឱ្យរុស្ស៊ី។
ចំណែកឯឥណ្ឌា ក៏ចង់ដើរតួនាទីជាអ្នកសម្របសម្រួលសន្តិភាពសម្រាប់អ៊ុយក្រែន ដែរ តែរុស្ស៊ី ហាក់មិនពេញចិត្តក្រុងញូវដែលី។ ក្នុងសំណុំរឿងសង្គ្រាមរបស់រុស្ស៊ី ឈ្លានពានអ៊ុយក្រែន គេថារុស្ស៊ី បារម្ភឥណ្ឌា នៅក្រោមឥទ្ធិពលអាមេរិក និងអឺរ៉ុប៕
© 2025, ឌឹ ខេមបូឌា ដេលី. All rights reserved.