លោក Kim Aris កូនប្រុសរបស់ជ័យលាភីណូបែលសន្តិភាព អ្នកស្រី អ៊ុងសាន ស៊ូជី អាយុ ៨០ឆ្នាំ បានបង្ហោះសារលិខិតរបស់លោកប្រធានាធិបតីបារាំង Emmanuel Macron ដែលបានអំពាវនាវទៅកាន់របបសឹកភូមា ឱ្យដោះលែងអ្នកទោសនយោបាយវ័យ ៨០ឆ្នាំរូបនេះឱ្យមានសេរីភាពជាបន្ទាន់។
សារលិខិតរបស់លោក Macron ដែលបានផ្ញើទៅឱ្យលោក Kim Aris កូនប្រុសរបស់អ្នកស្រី ស៊ូជី ត្រូវបានចុះផ្សាយនៅលើគេហទំព័រសារព័ត៌មាន Myanmar Now កាលពីថ្ងៃទី៤ ខែវិច្ឆិកា ឆ្នាំ២០២៥ នេះ។
លិខិតរបស់លោក Macron ក៏បានថ្កោលទោសរបបសឹកភូមា ព្រោះតែនៅបន្តឃុំខ្លួនអ្នកទោសនយោបាយ ក្នុងនោះមានទាំងអ្នកស្រី ស៊ូជី ផងដែរ។
លោក Macron បានសរសេរប្រាប់ទៅលោក Kim Aris ថា៖ «ខ្ញុំពិតជាមានការបារម្ភខ្លាំងចំពោះសុខភាពរបស់អ្នកស្រី ស៊ូជី ដែលចេះតែចុះខ្សោយទៅនេះ ព្រោះតែពុំមានការថែទាំសុខភាពដិតដល់ជូនអ្នកស្រី ស៊ូជី។ ការឃុំខ្លួនដ៏អយុត្តិធម៌នេះ សម្រាប់ខ្ញុំ របបសឹកភូមា ត្រូវតែបានថ្កោលទោស។»
ប្រទេសបារាំង រួមនឹងសហរដ្ឋអាមេរិក អង់គ្លេស សហភាពអឺរ៉ុប កាណាដា អូស្ត្រាលី និងជប៉ុន ជារឿយបានរំឭកឡើងវិញឱ្យរបបសឹកភូមា ដែលបានផ្ដួលរំលំរដ្ឋាភិបាលបក្សសម្ពន្ធជាតិប្រជាធិបតេយ្យរបស់អ្នកស្រី ស៊ូជី ក្នុងរដ្ឋប្រហារកាលពីថ្ងៃទី១ ខែកុម្ភៈ ឆ្នាំ២០២១ ឱ្យដោះលែងអ្នកស្រី ស៊ូជី ដោយគ្មានលក្ខខណ្ឌ។
លោក Macron បានសរសេរប្រាប់ទៅលោក Kim Aris ថា ដោយសារតែរដ្ឋប្រហាររបស់ពួកយោធានេះហើយ វាបានទាញឱ្យប្រទេសនៃសមាគមអាស៊ីអាគ្នេយ៍មួយនេះធ្លាក់ក្នុងវិបត្តិដ៏ធ្ងន់ធ្ងរនៅពេលនេះ ដែលបង្កផលវិបាកដល់ប្រទេសជិតខាង។
តាមប្រេសិតពិសេសបារាំងសម្រាប់ប្រទេសភូមា Christian Lechervy បាននិយាយថា ជាលើកដំបូងហើយដែលលោកប្រធានាធិបតីបារាំង Macron បានបញ្ជាក់ក្នុងលិខិតរបស់លោកឆ្លើយតបនឹងលិខិតរបស់លោក Kim Aris ដែលសរសេរលិខិតជូនលោក Macron សុំឱ្យបារាំង អន្តរាគមន៍បង្ខំឱ្យរបបសឹកនៅភូមា ដោះលែងម្ដាយរបស់ខ្លួន គឺអ្នកស្រី ស៊ូជី វ័យ ៨០ឆ្នាំកំពុងជាប់ឃុំក្រោមរបបរដ្ឋប្រហារមួយនេះ។
លិខិតរបស់លោក Kim Aris បានប្រាប់លោក Macron ថា ម្ដាយរបស់គាត់ គឺអ្នកស្រី ស៊ូជី មិនត្រឹមតែគ្មានសេរីភាពនោះទេ គឺអ្នកស្រីកំពុងប្រឈមមុខនឹងបញ្ហាសុខភាពយ៉ាងធ្ងន់ធ្ងរក្នុងវ័យមនុស្សចាស់ត្រូវបានជាប់ឃុំ។ លិខិតរបស់លោក Kim Aris ដែលបញ្ជូនទៅលោក Macron ត្រូវគេមើលឃើញនៅលើបណ្ដាញសង្គមកាលពីថ្ងៃទី៤ វិច្ឆិកា។
លោក Kim Aris ក៏បានទទូចទៅលោក Macron ជួយយ៉ាងណាឱ្យប្រទេសភូមា មានសេរីភាព និងសន្តិភាពឡើងវិញ។
តាមលិខិតរបស់លោក Kim Aris របបសឹកភូមា កំពុងគាបសង្កត់ធ្ងន់ធ្ងរណាស់ទៅលើសេរីភាពរបស់ប្រជាជន ហើយថាអ្នកទោសនយោបាយនៅភូមា ដូចម្ដាយរបស់គាត់កំពុងតែរងទណ្ឌកម្មក្នុងរនាំងដែកដែលគ្មានថ្ងៃដោះលែងឡើយ។ សម្រាប់លោក Macron បានរំឭកថា លោកនៅតែបន្តឱ្យដោះលែងជាបន្ទាន់ លោកប្រធានាធិបតី U Win Myint និងអ្នកស្រី ស៊ូជី មុនគេ ព្រោះជាអាទិភាពនៃនិមិត្តរូបសេរីភាពនៅភូមា។
តាមសមាគមសម្រាប់អ្នកទោសនយោបាយ មនុស្សប្រហែលជា ៣ម៉ឺននាក់ ត្រូវបានចាប់ខ្លួនចាប់តាំងពីរដ្ឋប្រហារនៅខែកុម្ភៈ ឆ្នាំ២០២១ ហើយ ២២៦០០នាក់កំពុងជាប់ឃុំ ក្នុងនោះ ១១៣០០នាក់ត្រូវបានកាត់ឱ្យមានទោស ក្នុងនោះមានអ្នកស្រី ស៊ូជី ម្នាក់ដែរដោយមានទោស ២៧ឆ្នាំក្នុងសំណុំរឿងព្រហ្មទណ្ឌច្រើនករណី។
នៅចុងបញ្ចប់សេចក្ដីនៃលិខិតរបស់លោក លោក Macron បានបញ្ជាក់ថា ប្រទេសបារាំង នៅតែឈរជាមួយប្រជាជនភូមា គាំទ្របុព្វហេតុដើម្បីសេរីភាព ដោយកាត់បន្ថយហិង្សា ហើយឆ្ពោះទៅរកផ្លូវសន្តិភាពជាមួយនឹងមេដឹកនាំនយោបាយទាំងអស់ត្រូវបានស្ដារសេរីភាពឡើងវិញ៕
© 2025, ឌឹ ខេមបូឌា ដេលី. All rights reserved.