អ្នកផ្តល់ប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ផ្តល់យោបល់ឱ្យរដ្ឋាភិបាលកម្ពុជា ធ្វើនយោបាយការទូតឱ្យកាន់តែជិតស្និទ្ធជាមួយប្រធានាធិបតីអាមេរិក លោក ដូណាល់ ត្រាំ បើចង់បានការបញ្ចុះពន្ធបដិការកាន់តែទាប។
លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី៥ មីនា នេះថា ពិតមែនតែលោក ដូណាល់ ត្រាំ ចាញ់ក្តីនៅតុលាការកំពូលជុំវិញការកំណត់ពន្ធបដិការនេះ ប៉ុន្តែគាត់មិនបានទម្លាក់បញ្ហានេះចោលឡើយ គឺនៅតែបន្តដំឡើងពន្ធទៅលើប្រទេសដទៃទៀតដែលគាត់ចង់ ដោយមិនខ្វល់ពីការសម្រេចរបស់តុលាការឡើយ។
លោក សេក សុជាតិ លើកឡើងថា ក្នុងពេលដែលលោក ដូណាល់ ត្រាំ នៅតែដឹកនាំសហរដ្ឋអាមេរិក កម្ពុជាត្រូវតែធ្វើនយោបាយការទូតឲ្យស្របនឹងផែនការដឹកនាំរបស់គាត់។
អ្នកឃ្លាំមើលសង្គមរូបនេះ ជំរុញឱ្យកម្ពុជាពង្រឹងនីតិរដ្ឋ ដើម្បីទាក់ទាញអ្នកវិនិយោគឱ្យមកបណ្ដាក់ទុននៅកម្ពុជាឱ្យកាន់តែច្រើន ដើម្បីបង្កើតលំហូរនាំចេញទៅកាន់សហរដ្ឋអាមេរិក និងប្រទេសផ្សេងៗឱ្យកាន់តែទូលំទូលាយ ដើម្បីផលប្រយោជន៍នៃប្រទេសទាំងសងខាង ក្នុងនោះ កម្ពុជាក៏ត្រូវបង្កើនការនាំចេញទៅកាន់ប្រទេសដទៃទៀតដែរ ពីព្រោះទីផ្សារនាំចេញរបស់កម្ពុជាមិនមែនមានតែអាមេរិកនោះទេ។
កាលពីថ្ងៃទី០៤ ខែមីនា អនុប្រធានទី១ នៃក្រុមប្រឹក្សាអភិវឌ្ឍន៍កម្ពុជា លោក ស៊ុន ចាន់ថុល បានប្រាប់ក្រុមអ្នកសារព័ត៌មានក្នុងស្រុកក្នុងពេលចូលរួមប្រជុំកំពូលធុរកិច្ចអាស៊ាន-កម្ពុជាឆ្នាំ២០២៦ ថា ពន្ធគយបដិការដែលអាម៉េរិកកំណត់លើទំនិញកម្ពុជា ក្នុងអត្រា ១៩% ត្រូវបានលុបចោលដោយស្វ័យប្រវត្តិ បន្ទាប់ពីតុលាការកំពូលសហរដ្ឋអាមេរិកសេចក្តីសម្រេចកាលពីពេលថ្មីៗ ដូច្នេះកម្ពុជារំពឹងថាពន្ធថ្មីដែលអាមេរិកដាក់មកលើទំនិញកម្ពុជា នឹងស្ថិតនៅក្រោម ១៩%។
លោក ស៊ុន ចាន់ថុល បញ្ជាក់ថា បន្ទាប់ពីពន្ធគយបដិការ ១៩% ត្រូវបានលុបចោលដោយស្វ័យប្រវត្តិ បច្ចុប្បន្ននេះ ក្រោមមាត្រា១២២ នៃច្បាប់ពាណិជ្ជកម្មឆ្នាំ១៩៧៤ សហរដ្ឋអាមេរិកបានអនុវត្តពន្ធបន្ថែមថ្មីក្នុងអត្រា ១៥% បូកបន្ថែមលើអត្រាពន្ធមូលដ្ឋាន MFN មកលើកម្ពុជា និងប្រទេសផ្សេងៗផងដែរ។
កាលពីចុងខែកុម្ភៈ ទីភ្នាក់ងារសារព័ត៌មានអន្តរជាតិ រ៉យទ័រ បានរាយការណ៍ថា តុលាការកំពូលសហរដ្ឋអាមេរិក នៅចុងខែកុម្ភៈ ឆ្នាំ២០២៦ បានសម្រេចសាលក្រមដោយប្រកាសថា ប្រធានាធិបតីអាមេរិក លោក ដូណាល់ ត្រាំ បានបំពានអំណាចរបស់ខ្លួនចំពោះការដាក់ពន្ធបដិការលើទំនិញនាំចូលពីបណ្ដាប្រទេសផ្សេងៗនៅជុំវិញពិភពលោក។
ចៅក្រមអាមេរិក ៦រូប ទល់នឹងចៅក្រម ៣រូប បានកំណត់ថា នយោបាយពន្ធរបស់លោក ដូណាល់ ត្រាំ លើទំនិញនាំចូលអាមេរិកទូទាំងពិភពលោក គឺខុសច្បាប់សេដ្ឋកិច្ច ដែលមានន័យថា រាល់ពន្ធដែលប្រធានាធិបតីអាមេរិករូបនេះបានកំណត់ គឺត្រូវដកចេញភ្លាមដោយស្វ័យប្រវត្តិ។
កាលពីថ្ងៃទី២ ខែមេសា ឆ្នាំ២០២៥ កន្លងទៅ ប្រធានាធិបតីអាមេរិក លោក ដូណាល់ ត្រាំ បានប្រកាសកំណត់ពន្ធគយលើប្រទេសមួយចំនួនដែលនាំទំនិញទៅកាន់ទីផ្សារអាមេរិក ក្នុងនោះ កម្ពុជាត្រូវដាក់ឱ្យជាប់របាំងពន្ធនេះ ៤៩% ប៉ុន្តែក្រោយមកត្រូវបានបញ្ចុះឱ្យមកនៅត្រឹម ៣៦% វិញ។
យ៉ាងណាក៏ដោយ នៅថ្ងៃទី៣១ ខែកក្កដា ឆ្នាំ២០២៥ សេតវិមាន បានបង្ហាញសេចក្តីសម្រេចចិត្តលើអត្រាពន្ធបដិការលើកចុងក្រោយដល់ប្រទេសចំនួន ៧០ ដែលមានទំនាក់ទំនងពាណិជ្ជកម្មជាមួយអាមេរិក ដោយក្នុងនោះ កម្ពុជាក៏ត្រូវបានអាមេរិកបញ្ចុះអត្រាពន្ធពី ៣៦% មកនៅត្រឹមតែ ១៩% ផងដែរ។
ជុំវិញបញ្ហានេះ ប្រធានសភាពាណិជ្ជកម្មអាម៉េរិក លោក Casey Barnett បានលើកឡើងកាលពីថ្ងៃទី៣១ ខែកក្កដា ឆ្នាំ២០២៥ ថា បើអាមេរិកបញ្ចុះពន្ធឱ្យកម្ពុជាដល់ ២០% ឬទាបជាងនេះ នោះគឺរឹតតែល្អដែលនឹងនាំឱ្យសេដ្ឋកិច្ចរបស់កម្ពុជាកាន់តែស្ទុះឡើងជាងមុន ប៉ុន្តែប្រសិនបើកម្ពុជាទទួលបានអត្រាពន្ធលើសពី ២៥% នោះគឺជាលំបាកសម្រាប់កម្ពុជាទៅវិញ៕
© 2026, ឌឹ ខេមបូឌា ដេលី. All rights reserved.