ក្រសួងកសិកម្ម ព្រមានម្ចាស់អាជីវកម្មចិញ្ចឹមសត្វត្រចៀកកាំជាលក្ខណៈគ្រួសារ ឱ្យប្រុងប្រយ័ត្នជំងឺឆ្លងពីសត្វមកមនុស្ស និងការចាក់បំពងសំឡេងឮខ្លាំងៗហួសកម្រិតច្រើនម៉ោង ដែលបង្កឱ្យមានការរំខានដល់អ្នកជិតខាង និងប៉ះពាល់ដល់សុខភាពសាធារណៈ។
ក្រសួងកសិកម្ម រុក្ខាប្រមាញ់ និងនេសាទ បានចេញសេចក្តីជូនដំណឹងស្ដីពីការថែរក្សាសត្វត្រចៀកកាំជាលក្ខណៈគ្រួសារនៅថ្ងៃទី១២ មីនា នេះថា បច្ចុប្បន្ន ការសាងសង់ផ្ទះ ឬអគារថែរក្សាសត្វត្រចៀកកាំជាលក្ខណៈគ្រួសារមានការកើនឡើងគួរឱ្យកត់សម្គាល់ ដូច្នេះ ម្ចាស់ផ្ទះ ឬម្ចាស់អគារដែលថែរក្សាសត្វត្រចៀកកាំជាលក្ខណៈគ្រួសារ ត្រូវតាមដានជាប់ជានិច្ចនូវសុខភាពសត្វ និងអនាម័យដើម្បីបង្ការជំងឺឆ្លង។
បន្ថែមពីនេះ ការចាក់បំពងសំឡេងឮខ្លាំងហួសកម្រិតច្រើនម៉ោងដើម្បីទាក់ទាញសត្វត្រចៀកកាំ ក៏តម្រូវឱ្យមានការកំណត់ពេលដែរ ដើម្បីចៀសវាងការបង្កឱ្យមានការរំខានដល់អ្នកជិតខាង និងប៉ះពាល់ដល់សុខភាពសាធារណៈ។
សេចក្តីជូនដំណឹងដដែលនេះ ណែនាំឱ្យម្ចាស់ផ្ទះ ឬម្ចាស់អគារថែរក្សាសត្វត្រចៀកកាំជាលក្ខណៈគ្រួសារ ត្រូវកំណត់ការចាក់បំពងសំឡេងជាបីកម្រិតសម្រាប់នៅតំបន់សាធារណៈ និងតំបន់លំនៅឋាន។
ប្រភពដដែលថា ចាប់ពីម៉ោង ៦ព្រឹកដល់ម៉ោង ៦ល្ងាច ត្រូវកំណត់ឱ្យប្រើកម្រិតសំឡេង ៤៥ដេស៊ីប៊ែល (Decibel dB) និងកម្រិត ៤០ដេស៊ីប៊ែល ចាប់ពីម៉ោង ៦ល្ងាចដល់ម៉ោង ១០យប់ ប៉ុន្តែចាប់ពីម៉ោង ១០យប់ដល់ម៉ោង ៦ព្រឹក ត្រូវបានកំណត់ឱ្យចាក់បំពងសំឡេងត្រឹមតែកម្រិត ៣៥ដេស៊ីប៊ែលប៉ុណ្ណោះសម្រាប់តំបន់មន្ទីរពេទ្យ បណ្ណាល័យ និងសាលារៀន។
ក្រសួងកសិកម្ម អំពាវនាវឱ្យម្ចាស់ផ្ទះ ឬម្ចាស់អគារថែរក្សាសត្វត្រចៀកកាំជាលក្ខណៈគ្រួសារ ត្រូវអនុវត្តវិធានការជីវសុវត្ថិភាព និងធ្វើអនាម័យនៅជុំវិញ រួមទាំងខាងក្នុងទីតាំងថែរក្សាសត្វត្រចៀកកាំជាប្រចាំ។ ជាងនេះទៀត ត្រូវរាយការណ៍ជាបន្ទាន់នៅពេលដែលមានសត្វត្រចៀកកាំមានជំងឺ ឬងាប់។
ក្រសួងកសិកម្ម បានបង្ហាញរបាយការណ៍របស់ខ្លួនកាលពីពេលកន្លងទៅថា គិតត្រឹមឆ្នាំ២០២៣ នៅទូទាំងប្រទេសកម្ពុជា មានផ្ទះត្រចៀកកាំចន្លោះពី ៥ពាន់ផ្ទះ ទៅ ៧ពាន់ផ្ទះ ដែលអាចផ្តល់ទិន្នផលប្រមាណជា ១២០តោនក្នុងមួយឆ្នាំៗ។
ទាក់ទងនឹងបញ្ហាទាំងនេះ លោក ស៊ុយ កុកធាន ប្រធានសមាគមត្រចៀកកាំខ្មែរ អះអាងកាលពីពេលថ្មីៗនេះថា រយៈពេលប៉ុន្មានឆ្នាំចុងក្រោយនេះ ការសាងសង់ផ្ទះត្រចៀកកាំមានកំណើនគួរឱ្យកត់សម្គាល់ ចាប់តាំងពីមានការចុះពិធីសារស្ដីពីលក្ខខណ្ឌតម្រូវភូតគាមអនាម័យសម្រាប់នាំចេញទឹកមាត់ត្រចៀកកាំ ទៅកាន់ទីផ្សារចិន កាលពីពេលកន្លងទៅនោះ។
លោកបញ្ជាក់ថា ទីផ្សារសម្បុកត្រចៀកកាំបច្ចុប្បន្នមានតម្លៃជាង ៣០០ដុល្លារទៅ ៤៥០ដុល្លារក្នុងមួយគីឡូក្រាម សម្រាប់សម្បុកត្រចៀកកាំមិនទាន់សម្អាត និងមិនទាន់កែច្នៃ រីឯសម្បុកត្រចៀកកាំដែលកែច្នៃរួចមានតម្លៃចាប់ពី ៨០០ដុល្លារទៅ ១៥០០ដុល្លារក្នុងមួយគីឡូក្រាម ដោយអាស្រ័យទៅតាមការសម្អាតរបស់ក្រុមហ៊ុននីមួយៗ៕
© 2026, ឌឹ ខេមបូឌា ដេលី. All rights reserved.