 ក្នុង ១លីត្រសម្រាប់ប្រេងសាំង ខណៈតម្លៃប្រេងម៉ាស៊ូតក្នុង ១លីត្រ ក៏បានកើនឡើងជិត ៣០០០រៀល (២៧០០រៀល) ដែរ។){kind=link}
រយៈពេល ១៧ថ្ងៃ តម្លៃប្រេងឥន្ធនៈនៅកម្ពុជាបានបន្តហក់ឡើងឥតឈប់ ក្នុងនោះបើប្រៀបធៀបតម្លៃប្រេងឥន្ធនៈកាលពីថ្ងៃទី១ ខែមីនា និងថ្ងៃទី១៧ ខែមីនា នេះ បានកើនឡើងជិត ២០០០រៀល (១៦៥០រៀល) ក្នុង ១លីត្រសម្រាប់ប្រេងសាំង ខណៈតម្លៃប្រេងម៉ាស៊ូតក្នុង ១លីត្រ ក៏បានកើនឡើងជិត ៣០០០រៀល (២៧០០រៀល) ដែរ។
ក្រសួងពាណិជ្ជកម្ម ចេញសេចក្តីជូនដំណឹងស្ដីពីតម្លៃលក់រាយប្រេងឥន្ធនៈនៅតាមស្ថានីយកាលពីយប់ថ្ងៃទី១៦ ខែមីនា ឆ្នាំ២០២៦ នេះថា ចាប់ពីថ្ងៃទី១៧ ខែមីនា ឆ្នាំ២០២៦ នេះតទៅ តម្លៃប្រេងនៅកម្ពុជាត្រូវបានកំណត់ ៥៥០០រៀលក្នុង ១លីត្រសម្រាប់ប្រេងសាំង ខណៈប្រេងម៉ាស៊ូតត្រូវកំណត់ឱ្យលក់រហូតដល់ ៦៥៥០រៀលឯណោះក្នុង ១លីត្រ ហើយតម្លៃនេះនឹងត្រូវបន្តរហូត បើគ្មានសេចក្តីជូនដំណឹងថ្មីទេនោះ។
ប្រភពដដែលអះអាងថា យោងតាមការប្រែប្រួលនៃតម្លៃប្រេងឥន្ធនៈលើទីផ្សារក្នុងតំបន់ និងអន្តរជាតិ រាជរដ្ឋាភិបាលបន្តបញ្ចុះតម្លៃលក់រាយប្រេងឥន្ធនៈនៅកម្ពុជាចំនួន ៦,៥សេនដុល្លារក្នុង ១លីត្រ ក្នុងគោលបំណងជួយសម្រួលដល់ជីវភាពប្រជាពលរដ្ឋ។
ជាងនេះទៀត រាជរដ្ឋាភិបាលក៏បានបញ្ចុះ ១សេនដុល្លារក្នុង ១លីត្របន្ថែមទៀតដែរ ដោយសារប្រេងសាំងអន្តរជាតិឡើងលើសពី ៩០ដុល្លារក្នុង ១បារ៉ែល និងប្រេងម៉ាស៊ូតអន្តរជាតិឡើងលើស ១០០ដុល្លារក្នុង ១បារ៉ែលនោះ។ លើសពីនេះ រដ្ឋក៏បានកាត់បន្ថយពន្ធអាករប្រមាណ ៤,១លានដុល្លារដែរក្នុងរយៈពេល ៣ថ្ងៃកន្លងទៅនេះ។
ក្រសួងពាណិជ្ជកម្ម បញ្ជាក់ថា ការកំណត់រូបមន្តសម្រាប់កែសម្រួលថ្លៃលក់រាយប្រេងឥន្ធនៈនៅកម្ពុជា គឺយោងលើការព្រមព្រៀងលើរូបមន្តកំណត់តម្លៃជាមួយក្រុមហ៊ុនប្រេងឥន្ធនៈដែលប្រកបអាជីវកម្មនៅកម្ពុជា និងយោងការប្រែប្រួលនៃតម្លៃប្រេងឥន្ធនៈលើទីផ្សារក្នុងតំបន់ និងអន្តរជាតិ។
កាលពីថ្ងៃទី១៦ មីនា ទីភ្នាក់ងារសារព័ត៌មានអន្តរជាតិ CNA បានរាយការណ៍ថា តម្លៃប្រេងបានបន្តហក់កើនឡើងខ្លាំងកាលពីថ្ងៃចន្ទដើមសប្តាហ៍នេះ ព្រោះតែច្រកសមុទ្រហ័រមូស (Hormuz) កំពុងរងការគំរាមកំហែងដោយសារតែសង្គ្រាមរវាងអាមេរិក-អ៊ីស្រាអែល ប្រឆាំងនឹងអ៊ីរ៉ង់ នាពេលនេះ។
កាសែត CNA ឱ្យដឹងថា តម្លៃប្រេងឆៅប្រភេទ Brent បានហក់ឡើង ២,០១ដុល្លារអាមេរិក ឬ ១,៩៥ភាគរយដល់តម្លៃ ១០៥,១៥ដុល្លារក្នុងមួយបារ៉ែល គិតត្រឹមព្រឹកថ្ងៃចន្ទដើមសប្តាហ៍នេះ ចំណែកតម្លៃប្រេងឆៅប្រភេទ West Texas Intermediate របស់សហរដ្ឋអាមេរិក ក៏បានកើនឡើង ១,៦១ដុល្លារ ឬ ១,៦៣ភាគរយដល់តម្លៃ ១០០,៣២ដុល្លារក្នុងមួយបារ៉ែលផងដែរ។
ដោយឡែកប្រើប្រៀបធៀបតម្លៃប្រេងនៅថ្ងៃទី១៧ មីនា ដដែលនេះ ទៅនឹងតម្លៃប្រេងកាលពីថ្ងៃទី១៣ មីនា គឺកើនឡើង ៣០០រៀលបន្ថែមទៀតក្នុងមួយលីត្រដែលធ្វើឱ្យប្រេងសាំងឡើងដល់តម្លៃ ៥៥០០រៀល ចំណែកប្រេងម៉ាស៊ូតក៏បានកើនឡើង ១៥០រៀលក្នុង ១លីត្រដែរ ដែលធ្វើឱ្យតម្លៃប្រេងម៉ាស៊ូតឡើងដល់ ៦៥៥០រៀលក្នុងមួយលីត្រក្នុងពេលនេះ។
ពាក់ព័ន្ធនឹងបញ្ហាតម្លៃប្រេងនេះ សារព័ត៌មានថៃ នៅថ្ងៃទី១៧ មីនា នេះ ផ្សាយថា រដ្ឋាភិបាលថៃ កំពុងចរចាទិញប្រេងរុស្ស៊ី បង្គ្រប់សេចក្តីត្រូវការក្នុងស្រុក ហើយក៏ឈប់ដឹកប្រេងលក់ឲ្យស្រុកដទៃ។ ក្រុមហ៊ុនអាកាសចរណ៍យៀកណាម នឹងកាត់បន្ថយជើងយន្តហោះដោយសារខ្វះប្រេងសាំងយន្តហោះដែលនាំចូលប្រមាណ ៦០% ពីប្រទេសចិន និងប្រទេសថៃឡង់ដ៍។
នៅថ្ងៃទី១៧ ខែមីនា នេះ ស្ថានីយប្រេងឥន្ធនៈតូតាល់ (TOTAL) បានដាក់បង្ហាញតម្លៃប្រេងឥន្ធនៈរបស់ខ្លួនជាសាធារណៈ ដោយកំណត់ប្រេងសាំងធម្មតាតម្លៃ ៥៥០០រៀលក្នុង ១លីត្រ ខណៈប្រេងសាំងស៊ូពែរតម្លៃ ៦៦០០រៀលក្នុង ១លីត្រ ចំណែកប្រេងម៉ាស៊ូតតម្លៃ ៦៥៥០រៀលក្នុងមួយលីត្រ៕
© 2026, ឌឹ ខេមបូឌា ដេលី. All rights reserved.