រដ្ឋាភិបាលកម្ពុជា ប្រកាសពីការបង្កើនការនាំចូលប្រេងឥន្ធនៈពីប្រទេសសិង្ហបុរី និងម៉ាឡេស៊ី បន្ថែមទៀត ដើម្បីបំពេញការខ្វះខាតក្នុងស្រុកដែលអាចកើតមាន ខណៈសង្គ្រាមអាមេរិក-អ៊ីស្រាអែល លើអ៊ីរ៉ង់ កំពុងរំខានដល់ការផ្គត់ផ្គង់ប្រេងជាសកល។
ទីភ្នាក់ងារសារព័ត៌មានអន្តរជាតិរ៉យទ័រ (Reuters) បានស្រង់សម្ដីរដ្ឋមន្ត្រីក្រសួងរ៉ែ និងថាមពល លោក កែវ រតនៈ នៅថ្ងៃទី១៩ មីនា នេះថា រយៈពេល ១៨ថ្ងៃដំបូងនៃខែមីនា ឆ្នាំ២០២៦ នេះ ការនាំចូលប្រេងពីប្រទេសសិង្ហបុរី និងប្រទេសម៉ាឡេស៊ី បានកើនឡើង ២៥% បើប្រៀបនឹងឆ្នាំមុន ប៉ុន្តែធ្លាក់ចុះ ៤០% បើប្រៀបនឹងចុងខែកុម្ភៈ កន្លងទៅ។
លោក កែវ រតនៈ អះអាងថា ប្រហែល ១/៣ នៃស្ថានីយប្រេងដែលមានជាង ៦ពាន់ស្ថានីយ (៦៣០០ស្ថានីយ) នៅទូទាំងប្រទេសកម្ពុជា បានបិទទ្វារកាលពីសប្តាហ៍មុន ដោយសារព្រួយបារម្ភពីតម្លៃប្រេង ប៉ុន្តែពេលនេះមានតែប្រមាណជា ៥,៧៧% ប៉ុណ្ណោះដែលនៅតែបន្តបិទទ្វារ។
លោកបន្ថែមថា សព្វថ្ងៃនេះ កម្ពុជានៅតែអាចនាំចូលប្រេងខ្លះៗពីចិន ហើយលើសពីនេះក៏មានដៃគូអន្តរជាតិដទៃទៀតដែរ ដូចជា Total Energies និង Chevron ដែលជួយកាត់បន្ថយហានិភ័យនៃកង្វះការផ្គត់ផ្គង់ដល់កម្ពុជា។
រដ្ឋមន្ត្រីក្រសួងរ៉ែ និងថាមពល រូបនេះ បញ្ជាក់ថា រដ្ឋាភិបាលកម្ពុជាបានធ្វើកិច្ចពិភាក្សាបឋមនៅខែនេះជាមួយក្រុមហ៊ុន Woodside Energy (WDS.AX) របស់ប្រទេសអូស្ត្រាលី ដើម្បីធានាការផ្គត់ផ្គង់ឧស្ម័នធម្មជាតិរាវ (LNG) សម្រាប់រោងចក្រថាមពល ៩០០មេហ្គាវ៉ាត់ ដែលអាចនឹងចាប់ផ្តើមផលិតនៅឆ្នាំក្រោយនេះ។
លោក កែវ រតនៈ បញ្ជាក់ថា កម្ពុជាបានជជែកជាមួយក្រុមហ៊ុន Woodside របស់ប្រទេសអូស្ត្រាលី រួចរាល់ហើយ ដើម្បីផ្គត់ផ្គង់ឧស្ម័នធម្មជាតិរាវ (LNG) សម្រាប់រោងចក្រថាមពលដែលដំណើរការដោយឧស្ម័នធម្មជាតិដំបូងគេរបស់កម្ពុជា ខណៈការផ្គត់ផ្គង់របស់អូស្ត្រាលី ក៏បានជួយការពារហានិភ័យភូមិសាស្ត្រនយោបាយដល់កម្ពុជា ផងដែរ។
ទីភ្នាក់ងារសារព័ត៌មានរ៉យទ័រ (Reuters) បានរាយការណ៍កាលពីដើមខែមីនា ឆ្នាំ២០២៦ នេះថា យោងតាមទិន្នន័យពីក្រុមហ៊ុនវិភាគការដឹកជញ្ជូន Kpler សម្រាប់ឆ្នាំ២០២៥ បានបង្ហាញថា ប្រទេសសិង្ហបុរី ដែលជា «មជ្ឈមណ្ឌលប្រេងប្រចាំអាស៊ី» បាននាំចូលប្រេងឆៅជាង ៧០% របស់ខ្លួនពីតំបន់មជ្ឈិមបូព៌ា ដែលស្មើនឹងជាង ៦សែនបារ៉ែល (៦៩៤០០០បារ៉ែល) ក្នុង ១ថ្ងៃ។ ដោយឡែកប្រទេសម៉ាឡេស៊ី ក៏ពឹងផ្អែកយ៉ាងខ្លាំងផងដែរពីការនាំចូលប្រេងឆៅពីមជ្ឈិមបូព៌ា ដែលមានប្រមាណជាង ៣សែនបារ៉ែល (៣២៣០០០បារ៉ែល) ក្នុង ១ថ្ងៃ ទោះបីប្រទេសនេះមានផលិតកម្មប្រេងក្នុងស្រុកដោយខ្លួនឯងក៏ដោយ។
ប្រភពដដែល អះអាងថា ទោះបីប្រទេសម៉ាឡេស៊ី និងប្រទេសសិង្ហបុរី ជាមជ្ឈមណ្ឌលនាំចេញប្រេងប្រចាំតំបន់ក៏ដោយ ក៏ប្រទេសទាំងពីរនេះមានស្តុកប្រេងបម្រុងសម្រាប់គ្រាអាសន្នតិចតួចប៉ុណ្ណោះ បើប្រៀបធៀបទៅនឹងប្រទេសធំៗនៅអាស៊ីបូព៌ា។
ជុំវិញបញ្ហានេះ តាមរបាយការណ៍របស់ទស្សនាវដី្ត Forbes កាលពីពេលថ្មីៗនេះ បង្ហាញថា សិង្ហបុរី មានស្តុកប្រេងបម្រុងដែលអាចប្រើប្រាស់បានប្រហែល ៤០ថ្ងៃ ប្រសិនបើគ្មានការនាំចូលសោះ។ ដោយឡែកម៉ាឡេស៊ី មិនបានបញ្ចេញទិន្នន័យជាក់លាក់អំពីស្ដុកប្រេងរបស់ខ្លួនថាអាចប្រើប្រាស់បានប៉ុន្មានថ្ងៃនោះទេ។
របាយការណ៍ដដែលបង្ហាញថា ប្រទេសធំៗមួយចំនួននៅអាស៊ីបូព៌ា មានស្ដុកប្រេងបម្រុងដែលអាចប្រើប្រាស់បានយូរក្នុងករណីមិនអាចនាំចូលប្រេងសោះ ដូចជា ប្រទេសចិន មានប្រេងស្តុកទុកចំនួន ១០០ថ្ងៃ ចំណែកប្រទេសជប៉ុន មានស្តុកប្រេងបម្រុងចំនួន ២៥៤ថ្ងៃ ខណៈប្រទេសកូរ៉េខាងត្បូង ក៏មានប្រេងបម្រុងទុកចំនួន ២០៧ថ្ងៃដែរ។
ជុំវិញបញ្ហានេះ រដ្ឋមន្ត្រីក្រសួងរ៉ែ និងថាមពល លោក កែវ រតនៈ បានអះអាងកាលពីថ្ងៃទី១៦ មីនា នេះថា បច្ចុប្បន្នកម្ពុជាមិនមានបញ្ហាខ្វះប្រេងឥន្ធនៈឡើយ ព្រោះកម្ពុជាមានស្តុកប្រេងយុទ្ធសាស្ត្រដែលអាចប្រើបានប្រហែល ២១ថ្ងៃ ដែលមានន័យថា ទោះបីជាមិនអាចនាំចូលប្រេងសោះ ក៏នៅតែមានប្រេងគ្រប់គ្រាន់សម្រាប់ប្រើប្រាស់រយៈពេល ៣សប្តាហ៍ដែរ៕
© 2026, ឌឹ ខេមបូឌា ដេលី. All rights reserved.