អ្នកជំនាញសេដ្ឋកិច្ច បាននិយាយជាហូរហែមកថា គ្រាណាប្រេងឥន្ធនៈឡើងថ្លៃ អ្វីៗផ្សេងទៀតក៏នឹងឡើងថ្លៃតាមគ្នាដែរ។ បន្ទុកធ្ងន់បំផុតធ្លាក់លើប្រទេសដែលពឹងផ្អែកលើការនាំចូលប្រេងពីបរទេស ជាពិសេសពឹងលើប្រភពតិច។
ប្រទេសកម្ពុជា មុនពេលមានជម្លោះព្រំដែនជាមួយប្រទេសថៃឡង់ដ៍ ពឹងផ្អែកការនាំចូលប្រេងឆេះ មានសាំង ម៉ាស៊ូត ជាដើម ប្រមាណជាង ២៩%។ ក្រៅពីនេះ នាំចូលពីប្រទេសយៀកណាម ដែលនាំចូលពីប្រទេសចិន។ ប្រទេសយៀកណាម ត្រូវនាំចូលប្រេងសាំងយន្តហោះពីប្រទេសថៃឡង់ដ៍។
ដោយសារសង្គ្រាមនៅមជ្ឈិមបូព៌ា ដែលអ៊ីរ៉ង់ បិទច្រកសមុទ្រហ័រមូសនៃសមុទ្រពែក្ស ប្រទេសថៃឡង់ដ៍ ផ្អាកលក់ប្រេងឲ្យប្រទេសយៀកណាម ដែលតម្រូវឲ្យក្រុមហ៊ុនអាកាសចរណ៍យៀកណាម កាត់បន្ថយជើងយន្តហោះទៅប្រទេសនានា។ ជាមួយគ្នានេះ ប្រទេសជាច្រើនគិតអំពីបរិមាណផ្គត់ផ្គង់ប្រេងឥន្ធនៈសម្រាប់តម្រូវការក្នុងស្រុករៀងៗខ្លួន។
ប្រទេសកម្ពុជា ងាកទៅរកទិញប្រេងចម្រាញ់ស្រេចៗពីប្រទេសសិង្ហបុរី និងម៉ាឡេស៊ី ដែលអាចនឹងថ្លៃជាងប្រេងដឹកពីប្រទេសយៀកណាម និងពីប្រទេសថៃឡង់ដ៍ ដោយសារចម្ងាយ។ មុនពេលមានជម្លោះព្រំដែន ពលករខ្មែរជិត ១លាននាក់បានវិលមកស្រុកកំណើតវិញ។ ការធ្វើមាតុភូមិនិវត្តន៍នេះ បានធ្វើឲ្យបាត់បង់ចំណូលចូលមកប្រទេសកម្ពុជា គិតជាផលទុនក្នុងស្រុកសរុប GDP ប្រមាណ ៣៧% ពីជិត ៣ពាន់លានដុល្លារក្នុងមួយឆ្នាំ មកនៅជិត ២ពាន់លានដុល្លារក្នុងឆ្នាំ២០២៥។ នេះបើយោងតាមសារព័ត៌មាន The Straits Times ផ្សាយថ្ងៃទី៣១ ខែមីនា។
ក្រោយពេលមានការប្រយុទ្ធគ្នា ខ្មែរឈប់នាំប្រេងឆេះ និងទំនិញផ្សេងៗពីសៀម តាមច្រកចេញចូលស្របច្បាប់។ នេះបង្កឲ្យមានសកម្មភាពរត់ពន្ធទំនិញគេចពន្ធតាមព្រំដែនគោក និងតាមផ្លូវទឹក។
កាសែតខ្មែរថែមស៍ ផ្សាយថា ក្រសួងពាណិជ្ជកម្ម បានដំឡើងថ្លៃប្រេងឥន្ធនៈពីរដងក្នុងរយៈពេល ៧២ម៉ោង ពីតម្លៃ ៧៥០០រៀលនៅថ្ងៃទី១ ខែមេសា ដល់ ៨១០០រៀល ឬ ២ដុល្លារក្នុងមួយលីត្រសម្រាប់ប្រេងម៉ាស៊ូតនៅថ្ងៃទី៤ ខែមេសា គឺស្មើនឹងដំឡើង ៨% ក្នុងរយៈពេលបីថ្ងៃ។
បន្ទាប់ពីអាជ្ញាធរចាប់ខ្លួនប្រធានក្រុមហ៊ុន ហួយវ័ន គ្រុប (Huione Group) ឈ្មោះ Ly Xiong បញ្ជូនទៅស្រុកចិន ធនាគារជាតិនៃកម្ពុជា បិទខ្ទប់គណនេយ្យម្ចាស់ប្រាក់ក្នុងធនាគារនេះ ហើយប្រាប់ម្ចាស់ប្រាក់តម្កល់ទុកក្នុងធនាគារទាំងអស់ថា រដ្ឋគ្មានវិធានការដោះស្រាយប្រាក់របស់អតិថិជនទាំងនោះទេ ហើយថាខ្លួនគ្មានមូលដ្ឋានច្បាប់ដើម្បីទទួលស្គាល់ម្ចាស់ប្រាក់ដាក់ក្នុងធនាគារ Huione Group នោះទេ។
គួរបញ្ជាក់ថា ធនាគារបរទេសដែលចង់រកស៊ីនៅស្រុកខ្មែរត្រូវមានដើមទុនយ៉ាងតិច ៧៥លានដុល្លារ ហើយត្រូវតម្កល់ប្រាក់ ១០% ជាមួយធនាគារជាតិនៃកម្ពុជា។
ដំណាលៗពេលគ្នានេះ ព្រឹត្តិបត្រ The Mekong Memo ផ្សាយដោយក្រុមពិគ្រោះការងារ Horton International អំពីពលរដ្ឋខ្មែរដែលត្រូវអាជ្ញាធរបញ្ជាឲ្យចាកចេញពីដីធ្លី ផ្ទះសម្បែងរបស់ខ្លួននៅក្នុងខេត្តព្រះវិហារ ដើម្បីឲ្យដីទៅក្រុមហ៊ុនចិន។ តាមបញ្ជា ពលរដ្ឋប្រមាណ ៤០០គ្រួសារ ត្រូវចាកចេញឲ្យបានមុនថ្ងៃទី១៣ ខែមេសា នេះ ព្រោះរាជរដ្ឋាភិបាលបានធ្វើសម្បទានដីសេដ្ឋកិច្ចទំហំជិត ៦ពាន់ហិកតាដល់ក្រុមហ៊ុនបណ្ដាក់ទុនមហាមូលហេតុចិន China Great Cause។ រដ្ឋាភិបាលបានផ្តល់ប្រាក់សំណងមួយហិកតា ចំនួន ៣០០ដុល្លារ។
កាលពីថ្ងៃទី២ ខែមេសា សប្តាហ៍មុន កាសែតថៃ ខាវស៊ុត ផ្សាយអំពីកម្មករកាណូតខ្មែររត់ពន្ធសាច់ក្តាមសមុទ្រទម្ងន់ជិត ២តោន។ កងនាវាចរណ៍ថៃ បានឃាត់ទុកកាណូតដែលមានកម្មករស៊ីឈ្នួលបើកបរពីរនាក់នោះ ហើយរកឃើញមានប្រអប់ដាក់សាច់ក្តាមបង្កកចំនួន ៦៦ប្រអប់។ កាណូតពីរទៀតកំពុងប្រមូលទំនិញផ្សេងៗផ្ទុកត្រៀមដឹកចូលមកស្រុកខ្មែរវិញនៅស្រុកខ្លងយ៉ៃ ខេត្តត្រាត។
កម្មករខ្មែរម្នាក់អាយុ ៤៨ឆ្នាំ ម្នាក់ទៀតអាយុ ៦៣ឆ្នាំ បានសារភាពថា គាត់បានដឹកទំនិញគេចពន្ធ ៤-៥ជើងហើយ ដោយមួយជើងៗបានប្រាក់ ១ពាន់បាត។ ពួកគាត់សម្រេចចិត្តធ្វើដូច្នោះ មកពីខ្វះថវិកាឧបត្ថម្ភគ្រួសារ និងឲ្យកូនរៀនសូត្រ៕
© 2026, ឌឹ ខេមបូឌា ដេលី. All rights reserved.