ក្រសួងមហាផ្ទៃ សម្រេចដកហូតមុខតំណែងឋានន្តរស័ក្ដិ និងបណ្ដេញមន្ត្រីនគរបាលមួយរូបចេញពីក្របខ័ណ្ឌនគរបាលជាតិ ដោយសារមន្ត្រីរូបនោះល្មើសវិន័យរបស់កម្លាំងនគរបាលជាតិ។
សេចក្តីប្រកាសរបស់ក្រសួងមហាផ្ទៃ នៅថ្ងៃទី១៧ ខែសីហា លើកឡើងថា រដ្ឋមន្ត្រីក្រសួងមហាផ្ទៃ លោក ស ខេង បានដកហូតមុខតំណែងឋានន្តរស័ក្ដិ និងបណ្ដេញមន្ត្រីនគរបាលជាតិ លោក អ៊ុន សំអាត ដែលមានតួនាទីជានាយរងផ្នែកនគរបាលយុត្តិធម៌នៃអធិការដ្ឋាននគរបាលក្រុងតាខ្មៅ ចំណុះស្នងការដ្ឋាននគរបាលខេត្តកណ្ដាល ចេញពីក្របខ័ណ្ឌចាប់ពីខែវិច្ឆិកា ឆ្នាំ២០២១ ក្រោមមូលហេតុល្មើសវិន័យរបស់កម្លាំងនគរបាលជាតិ។
ក្រសួងមិនបានបញ្ជាក់ពីមូលហេតុឱ្យបានលម្អិតពាក់ព័ន្ធនឹងការដកឋានន្តរស័ក្តិ និងបណ្តេញមន្ត្រីនគរបាលជាតិចេញពីក្របខ័ណ្ឌនេះនៅឡើយទេ។
លោកអនុសេនីយ៍ឯក អ៊ុន សំអាត ធ្លាប់បែកធ្លាយសំឡេងនាពេលកន្លងមក ដោយបានអួតអាងថា «ក្នុង១អាទិត្យ លោកធ្វើការតែមួយថ្ងៃប៉ុណ្ណោះ»។ តាមរយៈសារសំឡេងនោះ លោក អ៊ុន សំអាត និយាយថា «អ្នកខ្លះយាមទាំងយប់ទាំងថ្ងៃ មិនមែនដូចអញ ១អាទិត្យធ្វើការតែ ១ថ្ងៃទេ រកស៊ី ៦ថ្ងៃ ព្រលឹមឡើងមកស្អាង ល្ងាចឡើងទៅតាខ្មៅវិញ»។
ករណីដកតំណែងមន្ត្រីនគរបាលជាតិនេះដែរ រដ្ឋាភិបាលចេញអនុក្រឹត្យកាលពីថ្ងៃទី១៥ ខែកុម្ភៈ ឆ្នាំ២០២១ ដកស័ក្តិលោក គឹម ពន្លក អធិការស្រុកកំរៀង ខេត្តបាត់ដំបង និងបណ្តេញចេញពីក្របខ័ណ្ឌមន្ត្រីនគរបាលជាតិ ដោយសារអធិការរូបនោះបានដោះលែងមេខ្យល់នាំមនុស្សឆ្លងដែនខុសច្បាប់ពីប្រទេសថៃ ចូលទឹកដីកម្ពុជា ដោយគេចវេសពីការធ្វើចត្តាឡីស័កនៅតាមព្រំដែនកម្ពុជា-ថៃ កាលពីថ្ងៃទី១៤ ខែកុម្ភៈ ឆ្នាំដដែល។
ទោះជាយ៉ាងណាក៏ដោយ ក្រុមអ្នកឃ្លាំមើលនិយាយថា មានមន្ត្រីនគរបាល មន្ត្រីកងរាជអាវុធហត្ថ និងមន្ត្រីយោធាជាច្រើនទៀតដែលត្រូវបណ្តេញចេញពីតួនាទីដោយសារពួកគេបានរំលោភសិទ្ធិពលរដ្ឋធ្ងន់ធ្ងរ ដូចជាការបាញ់រះទៅលើពលរដ្ឋក្នុងពេលចុះអនុវត្តសាលក្រមរបស់តុលាការក្នុងការរឹបអូសដីធ្លីពីពលរដ្ឋ ការប្រព្រឹត្តអំពើពុករលួយកាងពីក្រោយបទល្មើសព្រៃឈើ និងករណីជាច្រើនទៀត៕