អគ្គនាយកក្រុមហ៊ុន Maritime Group អតីតអ្នកឧកញ៉ា ហេង សិទ្ធី អំពាវនាវទៅកាន់ស្ថានទូតទាំងអស់នៅប្រទេសកម្ពុជា ឱ្យចាត់វិធានការលើឧក្រិដ្ឋជនដែលកំពុងប្រើប្រាស់ប្រទេសកម្ពុជាប្រព្រឹត្តឧក្រិដ្ឋកម្មជាបន្ទាន់ ដើម្បីកុំឱ្យពួកគេទទួលបានទិដ្ឋាការជាមធ្យោបាយក្នុងការបោកប្រាស់មនុស្សចម្រុះជាតិសាសន៍បន្តទៅទៀត។
អតីតអ្នកឧកញ៉ាខ្មែរលោក ហេង សិទ្ធី សរសេរលើគណនីហ្វេសប៊ុករបស់ខ្លួនទាំងភាសាចិន និងភាសាអង់គ្លេស កាលពីយប់ថ្ងៃទី១៨ ធ្នូ ថា ឯកអគ្គរាជទូត និងរដ្ឋទូតទាំងអស់សុទ្ធតែបានដឹងគ្រប់គ្នាហើយថាប្រទេសកម្ពុជាត្រូវបានគេចាត់ទុកជាផ្ទះសម្រាប់ឧក្រិដ្ឋជនចម្រុះជាតិសាសន៍ប្រព្រឹត្តឧក្រិដ្ឋកម្មតាមប្រព័ន្ធអ៊ីនធឺណិត និងអំពើឆបោកនានា រួមទាំងអំពើហិង្សា និងចាប់ជំរិតមនុស្សផងដែរ។
លោកថា ជារឿងគួរឱ្យស្រក់ទឹកភ្នែកខ្លាំងណាស់នៅពេលដែលឃើញជនរងគ្រោះទាំងអស់ដែលមកពីបណ្តាប្រទេសក្នុងតំបន់អាស៊ាន ចិន សហរដ្ឋអាមេរិក និងមជ្ឈិមបូព៌ា ជាដើម បានរងនូវអំពើបោកប្រាស់ដោយខ្វះយុត្តិធម៌ក្រោមអំពើពុករលួយនៃអាជ្ញាធរមានសមត្ថកិច្ចខ្មែរដែលការពារឧក្រិដ្ឋជនទាំងនោះ។
លោក ហេង សិទ្ធី លើកឡើងថា ថ្មីៗនេះលោកបានលាតត្រដាងនូវអំពើជនបោកប្រាស់របស់ជនជាតិសិង្ហបុរីម្នាក់ដែលជាអ្នកដឹកនាំបង្កើតកម្មវិធីហ្គេមអនឡាញដ៏ធំបំផុតមួយ និងកំពុងប្រតិបត្តិការលើគេហទំព័ររាប់រយ ដើម្បីប្រព្រឹត្តអំពើឆបោកតាមអនឡាញទាំងនៅក្នុងប្រទេសកម្ពុជា ទាំងក្នុងប្រទេសនៅតំបន់អាស៊ាន រួមទាំងបណ្តាប្រទេសលើសកលលោកផងដែរ។
លោកបន្តថា សកម្មភាពបោកប្រាស់នេះ មិនត្រឹមតែបំផ្លាញផ្លូវចិត្តមនុស្សដែលជាជនរងគ្រោះដោយផ្ទាល់នោះទេ ប៉ុន្តែសមាជិកគ្រួសាររបស់ពួកគេផ្សេងទៀត និងសង្គមជាតិរបស់ពួកគេ ក៏រងនូវផលប៉ះពាល់ធ្ងន់ធ្ងរដែរ ព្រោះជនរងគ្រោះភាគច្រើនត្រូវបានកាត់ទោសដោយការធ្វើអត្តឃាត និងខ្លះទៀតត្រូវបានសម្លាប់ពីសំណាក់ឧក្រិដ្ឋជន ជាដើម។
ប្រភពដដែលអះអាងថា អំពើទុច្ចរិតទាំងនេះបានជះឥទ្ធិពលអាក្រក់យ៉ាងខ្លាំងដល់ចក្ខុវិស័យ និងគោលដៅរបស់រដ្ឋាភិបាល ថាដើម្បីធ្វើការផ្លាស់ប្ដូរជាក់លាក់ដែលទាមទារឱ្យមានវិធានការម៉ឺងម៉ាត់ ដើម្បីដាក់ទោសឧក្រិដ្ឋជនទាំងនោះតាមច្បាប់នៃប្រទេសនីមួយៗ។
លោក ហេង សិទ្ធី បញ្ជាក់ថា ឧក្រិដ្ឋជនទាំងនោះកំពុងទាក់ទាញសង្គមជាតិខ្មែរ រួមទាំងបណ្តាប្រទេសក្នុងតំបន់ និងពិភពលោក ឱ្យចូលទៅក្នុងអន្ទាក់របស់ពួកគេ ដោយសារភាពលោភលន់របស់គ្រួសារក្រីក្រ និងគ្រួសារវណ្ណៈកណ្តាលមួយចំនួនដែលចង់រកប្រាក់ចំណូលបានលឿន និងងាយស្រួលតាមរយៈអំពើឆបោកទាំងនោះ។
កាលពីថ្ងៃទី០៤ ខែតុលា ឆ្នាំ២០២៤ គម្រោងរាយការណ៍អំពីឧក្រិដ្ឋកម្មមានរចនាសម្ព័ន្ធ និងអំពើពុករលួយ (Organized Crime and Corruption Reporting Project=OCCRP) ស្រាវជ្រាវដោយក្រុមអ្នកកាសែត បានចេញផ្សាយសេចក្តីរាយការណ៍ស៊ើបអង្កេតមួយថា រដ្ឋាភិបាលប្រទេសកម្ពុជាកំពុងលាក់បាំងព័ត៌មានពីការផ្តល់សញ្ជាតិឲ្យក្រុមឧក្រិដ្ឋជនបរទេស ដែលជាប់ពាក់ព័ន្ធនឹងការលាងលុយកខ្វក់យ៉ាងច្រើនសន្ធឹកសន្ធាប់។
សេចក្តីរាយការណ៍ដដែលបានរកឃើញថា ប្រទេសកម្ពុជាបានផ្តល់សញ្ជាតិខ្មែរដល់ឧក្រិដ្ឋជនបរទេសជាង ៦០០នាក់នាពេលកន្លងមក ហើយក្រុមឧក្រិដ្ឋជនដែលមានសញ្ជាតិខ្មែរទាំងនេះ បានប្រើប្រាស់ទឹកដីប្រទេសនេះប្រព្រឹត្តទង្វើឧក្រិដ្ឋផ្សេងៗគ្រប់រូបភាព ដូចជា បង្កើតគម្រោងអចលនទ្រព្យ បើកហាងលក់មាស ហាងលក់ពេជ្រ និងប្រតិបត្តិការបនល្បែង ការឆបោកតាមប្រព័ន្ធអនឡាញ ជាដើម៕
© 2024, ឌឹ ខេមបូឌា ដេលី. All rights reserved.