ប្រធានាធិបតីនិងកងទ័ពនេប៉ាល់ កំពុងជ្រើសនាយករដ្ឋមន្ត្រីបណ្ដោះអាសន្ន ខណៈតំណាងបាតុករចង់ឱ្យរំលាយសភា

ក្រុមកងទ័ពនេប៉ាល់ និងប្រធានាធិបតី កំពុងស្វែងរកនាយករដ្ឋមន្ត្រីថ្មីបណ្ដោះអាសន្ន ដើម្បីជំនួសគណៈរដ្ឋមន្ត្រីដែលត្រូវបានរំលាយក្រោមភ្លើងកំហឹងរបស់បាតុករ ដែលងើបឡើងប្រឆាំងសង្គមពុករលួយឈានដល់ការផ្ដួលរំលំរដ្ឋាភិបាល និងដុតអគាររដ្ឋសភាឆេះខ្លោច។

ទីភ្នាក់ងារសារព័ត៌មាន AFP បានរាយការណ៍ថា ប្រទេសនេប៉ាល់ ដែលមានប្រជាជន ៣០លាននាក់ បានធ្លាក់ទៅក្នុងចលាចលក្នុងសប្ដាហ៍នេះ បន្ទាប់ពីកងកម្លាំងសន្តិសុខប្រើប្រាស់អំពើហិង្សាវាយបំបែកហ្វូងបាតុករបង្កឱ្យមនុស្សស្លាប់ភ្លាមៗនៅក្នុងព្រឹត្តិការណ៍ប៉ះទង្គិចគ្នា។

ដើមចមបើទោះជាចេញពីការងើបឡើងប្រឆាំងការបិទបណ្ដាញសង្គមក៏ពិតមែន តែវាបានប្រែរូបភាពទៅជាការប្រឆាំងនឹងរបបពុករលួយនៃរដ្ឋាភិបាលរបស់ក្រុមកែទម្រង់ដឹកនាំប្រទេស ដែលកើតចេញពីភ្នក់ភ្លើងសង្គ្រាមស៊ីវិលកាលពី ២៣ឆ្នាំកន្លងមកនេះ។

នៅក្នុងអំពើកុបកម្ម ៣ថ្ងៃជាប់គ្នា ចន្លោះពីថ្ងៃទី៨ ដល់ថ្ងៃទី៩ ខែកញ្ញា មនុស្សស្លាប់កើនឡើង ៥១នាក់ និងរងរបួសជាង ១៣០០នាក់។ នៅក្នុងចលាចលទូទាំងប្រទេស បាតុករមួយចំនួនបានទៅបំបែកទ្វារគុក ដោយរំដោះអ្នកទោសមានទាំងអ្នកទោសឧក្រិដ្ឋទៀតផងប្រមាណជិត ១៣៥០០នាក់បានរត់ចេញពីពន្ធនាគារ។

ប៉ុន្តែបើយោងតាមពួកមន្ត្រីប៉ូលិស បានឲ្យដឹងថា អ្នកទោសទាំងនោះភាគច្រើនបានទៅចូលរួមតវ៉ា និងបង្កហិង្សាវាយប្រហារទៅលើពួកមន្ត្រីរដ្ឋាភិបាល។

ព្រឹត្តិការណ៍នៃការផ្ទុះកុបកម្មនេះ ត្រូវបានកត់ត្រាថាជាអំពើឃោរឃៅយ៉ាងអាក្រក់បំផុតចាប់តាំងពីការរំលាយរបបរាជានិយមនេប៉ាល់ នៅឆ្នាំ២០០៨ ដោយកម្លាំងបក្សនយោបាយក្រោមឥទ្ធិពលរបស់គណបក្សកុម្មុយនីស្តម៉ៅនិយម។

នៅពេលនេះ កងទ័ពនៅតែដើរល្បាតតាមដងផ្លូវ និងតាមឃ្លាំមើលសកម្មភាពរបស់ហ្វូងមនុស្សដែលកងទ័ពទាំងនោះមានវិធានការដើម្បីទប់ស្កាត់មិនឱ្យមានការផ្ទុះហិង្សាកើតឡើងតាមដងផ្លូវទៀតនោះទេ។

ប្រធានាធិបតីនេប៉ាល់ Ram Chandra Paudel បានពិភាក្សាជាមួយនឹងអគ្គមេបញ្ជាការកងទ័ពឧត្ដមសេនីយ៍ Ashok Raj Sigdel និងអ្នកនយោបាយមួយចំនួនទៀត ហើយក្នុងនោះក៏មានតំណាងបាតុករមកពីក្រុមចលនា Gen Z ផងដែរ។ ក្រុមចលនា Gen Z ជាយុវជន និងនិស្សិត ដែលដឹកមុខគេក្នុងការទាញទម្លាក់រដ្ឋាភិបាលរបស់នាយករដ្ឋមន្ត្រី Sharma Oli។

ទោះជាយ៉ាងណាក៏ដោយ ការចរចានោះនៅមិនទាន់ចុះសម្រុងគ្នានៅពេលនេះ ដោយសារតែមានការប្រជែងគ្នាក្នុងការជ្រើសរើសឥស្សរជនម្នាក់ដែលក្លាយជានាយករដ្ឋមន្ត្រីបណ្ដោះអាសន្ន ប៉ុន្តែអ្នកស្រី Sushila Karki អាយុ ៧៣ឆ្នាំ ដែលជាអតីតប្រធានតុលាការកំពូល ត្រូវបានគេមើលឃើញថាជាបេក្ខជនឈានមុខគេ ប៉ុន្តែអ្នកស្រីទទួលបានការគាំទ្រច្រើនចេញពីបាតុករ។

ជំនួបចរចាដើម្បីជ្រើសរើសនាយករដ្ឋមន្ត្រីបណ្ដោះអាសន្ន បន្តធ្វើឡើងម្ដងទៀតនៅរសៀលថ្ងៃសុក្រ ទី១២ ខែកញ្ញា។

ជាមួយគ្នានេះដែរ ការខ្វែងគំនិតគ្នាក៏កើតឡើងនៅពេលដែលអ្នកនយោបាយទាមទារឱ្យសមាជិកសភា នៅតែបន្តមានសុពលភាពក្នុងការធ្វើសេចក្ដីសម្រេចមួយចំនួនជួយរៀបចំរដ្ឋាភិបាលបណ្ដោះអាសន្ន។ ប៉ុន្តែក្នុងចំណោមអ្នកចរចា ជាពិសេសគឺតំណាងបាតុករមួយចំនួន បានទាមទារឱ្យរំលាយសភានៅពេលនេះតែម្ដង។ ត្រង់នេះហើយដែលមិនអាចដើរដល់ចំណុចត្រូវគ្នា ថាតើនាយករដ្ឋមន្ត្រីបណ្ដោះអាសន្ននេះត្រូវឆ្លងកាត់សភា ឬក៏មិនត្រូវឆ្លងកាត់សភា។

ភាគច្រើន តំណាងបាតុករទាមទារថានាយករដ្ឋមន្ត្រីបណ្ដោះអាសន្នមិនគួរសុំសេចក្ដីទុកចិត្តពីសភានោះទេ។ តែជាមួយគ្នានេះ ប្រធានាធិបតី Ramchandra Paudel បានបន្តចេញសេចក្ដីថ្លែងការណ៍អំពាវនាវឱ្យមានដំណោះស្រាយជាបន្ទាន់នៃការបង្កើតរដ្ឋាភិបាលអន្តរកាល ដើម្បីគ្រប់គ្រងស្ថានភាពនយោបាយសេដ្ឋកិច្ចឡើងវិញ។

ជាមួយគ្នានេះ ប្រធានាធិបតី Ramchandra Paudel បានសម្រេចឱ្យលោកឧត្ដមសេនីយ៍ Ashok Raj Sigdel បន្តជួយគ្រប់គ្រងស្ថានការណ៍ស្រុកទេស ជាពិសេសទីក្រុងកាតម៉ានឌូ រហូតមានគណៈរដ្ឋមន្ត្រីថ្មី។

តាមប្រភពរបស់ AFP អ្នកស្រី Sushila Karki អតីតប្រធានតុលាការកំពូល អាចនឹងតែងតាំងជានាយករដ្ឋមន្ត្រីដឹកនាំរដ្ឋាភិបាលបណ្ដោះអាសន្ន ព្រោះអ្នកស្រីទទួលបានការគាំទ្រ និងចាត់ទុកថាជាមនុស្សស្អាតស្អំក្នុងការប្រឆាំងអំពើពុករលួយ។

ចំពោះបេក្ខជនមួយរូបទៀត គឺលោក Balendra Shah ជាអតីតអភិបាលក្រុង Katmandou ដែលមានប្រជាប្រិយភាពខ្លាំងក្នុងចំណោមយុវជន ក៏ជាជម្រើសផងដែរ។ ក្រុមយុវជនដើមឡើយចង់ឱ្យអតីតអភិបាលក្រុង Katmandou ជានាយករដ្ឋមន្ត្រីថ្មីបណ្ដោះអាសន្ន តែបែរជាលោកប្រកាសគាំទ្រអ្នកស្រីចៅក្រម Sushila Karki អតីតប្រធានតុលាការកំពូល ទៅវិញ។

នេប៉ាល់ ជាប្រទេសមួយស្ថិតនៅតំបន់អាស៊ីខាងត្បូង។ ទឹកដីភាគច្រើននៃអតីតរាជាណាចក្រនេះ លាតសន្ធឹងតាមជួរភ្នំហិម៉ាល័យ ដោយមានព្រំប្រទល់ខាងជើងជាប់តំបន់ទីបេនៃប្រទេសចិន និងភាគខាងត្បូង, ខាងកើត ជាប់នឹងប្រទេសឥណ្ឌា។

របបរាជានិយមនេប៉ាល់ ត្រូវបានរំលាយនៅក្នុងឆ្នាំ២០០៨ បន្ទាប់ពីភាពចលាចលក្នុងសង្គ្រាមស៊ីវិលជាង ១០ឆ្នាំ ដោយសារតែការបះបោរនៃក្រុមលទ្ធិម៉ៅនិយម។

ជាមួយនឹងការបង្ហាញថាប្រជាជននេប៉ាល់ ភាគច្រើនផ្អៀងទៅក្រុមបក្សម៉ៅនិយម ឬបក្សកុម្មុយនីស្ត ជាការមិនពេញចិត្តការរស់នៅក្រោមរបបរាជានិយមនៃមហាក្សត្រ Gyanendra គឺគ្រានោះហើយក៏មានការបះបោរទាមទារឱ្យដូររបបរាជានិយម ដែលក្រុមលទ្ធិម៉ៅនិយមហៅថាជារាជាណាចក្រផ្ដាច់ការ ឱ្យដូរទៅរបបទ្រលទ្ធិប្រជាធិបតេយ្យដែលគ្មានស្ដេចសោយរាជ្យ។

ក្រោមកិច្ចព្រមព្រៀងជាប្រវត្តិសាស្ត្រមួយដែលបក្សនយោបាយរួមគ្នាបញ្ចប់សង្គ្រាមស៊ីវិលជាងមួយទសវត្សរ៍ ក៏បាននាំឱ្យមានការបោះឆ្នោតសភាធម្មនុញ្ញដើម្បីបញ្ចប់ជាផ្លូវការនូវរាជវង្ស Gyanendra ដែលមានអាយុកាល ២៤០ឆ្នាំ ដោយបានប្រកាសប្រទេសនេប៉ាល់ ជាសាធារណរដ្ឋប្រជាធិបតេយ្យសហព័ន្ធនេប៉ាល់ មកទល់នឹងសព្វថ្ងៃនេះ៕

ប្រធានាធិបតីនិងកងទ័ពនេប៉ាល់ កំពុងជ្រើសនាយករដ្ឋមន្ត្រីបណ្ដោះអាសន្ន ខណៈតំណាងបាតុករចង់ឱ្យរំលាយសភា

បទវិភាគ

បទវិភាគ៖ ហេតុអ្វីបានជារុស្ស៊ី ខ្លាចមីស៊ីល Tomahawk អាមេរិក? ធ្វើដូចម្ដេចអ៊ុយក្រែន បានអាវុធនេះពីលោក ត្រាំ?

បទវិភាគ៖ ពីឧក្រិដ្ឋជនសង្គ្រាមក្លាយជាភ្ញៀវរបស់អាមេរិក លោក ត្រាំ ទាញលោក ពូទីន ចេញពីភាពឯកា

បទវិភាគព័ត៌មាន៖ មិនអាចប្ដូរមេដឹកនាំផ្ដាច់ការនៅបេឡារូស លើកលែងតែដូចប្រទេសបង់ក្លាដេស

បទវិភាគ៖ របបផ្ដាច់ការនៅប្រទេសស៊ីរី ដល់ពេលត្រូវបាត់បង់ហើយ

បទវិភាគ៖ ប្រទេសមួយក្រោមឥទ្ធិពលចិនខ្លាំង ហើយពីរទៀតក្រោមឥទ្ធិពលវៀតណាមផងចិនផង

បទវិភាគ៖ ផ្លែការ៉ុតនិងដំបងដាក់នៅចំពោះមុខកម្ពុជាក្នុងភូមិសាស្ត្រនយោបាយរវាងអាមេរិកនិងចិន

បទវិភាគ៖ តើប៉ាឡេស្ទីន អាចក្លាយជាសមាជិកពេញសិទ្ធិនៃអង្គការសហប្រជាជាតិបានដែរឬទេ?

បទវិភាគ៖ អាហ្វ្រិកខាងត្បូងអូសអ៊ីស្រាអែលឡើង ICC តែផ្ដល់ឱកាសឱ្យរុស្ស៊ីបន្តវិនាសកម្មនៅអ៊ុយក្រែន

អត្ថបទទាក់ទង

យុវជន GenZ នៅប្រទេសម៉ារ៉ុក ដែលចម្លងគំរូយុវជន GenZ នៅនេប៉ាល់ ដាក់សម្ពាធឱ្យរំលាយរដ្ឋាភិបាល

នេប៉ាល់ ហាមមិនឱ្យនាយករដ្ឋមន្ត្រីធ្លាក់ពីអំណាច ចាកចេញពីទីក្រុង Kathmandu ដោយបង្គាប់ឱ្យរង់ចាំឡើងតុលាការ

៤ឆ្នាំចុងក្រោយ មេដឹកនាំប្រទេសចំនួនបីនៅអាស៊ីខាងត្បូង ត្រូវបានក្រុមបាតុករទាញទម្លាក់ពីអំណាច

កងទ័ពនេប៉ាល់ ដណ្តើមបានទីក្រុង Kathmandu មកវិញ ក្រោយពីរដ្ឋធានីមួយនេះធ្លាក់ក្នុងអំពើកុបកម្ម

កងទ័ពនេប៉ាល់ ត្រូវបានស្នើអន្តរាគមន៍ដើរល្បាតនៅក្នុងទីក្រុងកាតម៉ានឌូ ខណៈអំពើហិង្សានៅតែបន្ត

អត្ថបទអានច្រើន

និស្សិតភូមា យករូបមេដឹកនាំកម្ពុជាលោក ហ៊ុន សែន ទៅជាន់ឈ្លីនិងដុតចោលតាមទីសាធារណៈ

លោក ហ៊ុន សែន គំរាមមិនឱ្យលោក ស ខេង ឈរជាបេក្ខភាពនាយករដ្ឋមន្ត្រីបន្ទាប់ពីលោកជាដាច់ខាត

អតិថិជនទិញអចលនទ្រព្យពីអ្នកឧកញ៉ា ឡេង ណាវ៉ាត្រា ទាមទារផ្ទះតាមកិច្ចសន្យា

អតិថិជនទិញផ្ទះល្វែងពីបុរីពិភពថ្មីកំបូលខកចិត្តនឹងគុណភាពសំណង់ផ្ទះល្វែង និងសេវាមួយចំនួនរបស់ក្រុមហ៊ុននេះ

លោក ជា សុផារ៉ា រងការចោទប្រកាន់ថាប្រព្រឹត្តអំពើពុករលួយក្នុងជួរបក្សកាន់អំណាចរបស់ខ្លួន

លោក សម រង្ស៊ី ប្រកាសរកការរួបរួមជាមួយបក្សកាន់អំណាចរបស់លោក ហ៊ុន សែន ដើម្បីជាតិខ្មែររុងរឿង

សេចក្ដីរាយការណ៍ពិសេស

លោក ចេន ហ្ស៊ី បាត់មុខពីកម្ពុជា ស្របពេលអាមេរិកលាតត្រដាងអំពើឆបោកនិងលាងលុយកខ្វក់ក្នុងប្រព័ន្ធគ្រីបតូ

តើព្រះសង្ឃ និងមេដឹកនាំខ្មែរ បានធ្វើអ្វីខ្លះដើម្បីជាប្រយោជន៍ដល់ព្រះពុទ្ធសាសនា និងសង្គមជាតិរបស់ខ្លួន?

តើកាកបាទក្រហមកម្ពុជាទទួលអំណោយសប្បុរសដោយកុសលកម្ម ឬអកុសលកម្មបថ?

លោក ហេង សិទ្ធី អំពាវនាវឱ្យពលរដ្ឋខ្មែរចូលរួមរំដោះប្រទេសចេញពីអំណាចប្រមូលផ្ដុំគ្រួសារតែមួយ

មេធាវី៖ ការចាប់ខ្លួនលោក ហេង សិទ្ធី ដោយសារដឹងអំពីផែនការបង្កើតបក្សនយោបាយប្រឆាំងត្រកូលហ៊ុន