មន្ត្រីជាន់ខ្ពស់រដ្ឋាភិបាលប្រទេសកម្ពុជា ប្រដូចទង្វើភ្នាក់ងារសមត្ថកិច្ចខ្មែរដែលយកស្ត្រីជនសង្ស័យរំដោះអ្នកទោសជនជាតិវៀតណាម ធ្វើជារូបភាពកម្សាន្តជាសាធារណៈ ថាមានចរិតទំនោរទៅរកទាហានឈុតខ្មៅថៃ ដែលភាគីខ្មែរចោទថាបានរំលោភបូកលើពលការិនីខ្មែរកាលពីពេលថ្មីៗនេះ។
អតីតរដ្ឋមន្ត្រីក្រសួងព័ត៌មាន និងជាសមាជិកក្រុមឧត្ដមប្រឹក្សាផ្ទាល់ព្រះមហាក្សត្រ លោក ខៀវ កាញារីទ្ធ សរសេរលើទំព័រហ្វេសប៊ុករបស់ខ្លួននៅថ្ងៃទី១៩ វិច្ឆិកា នេះថា នារីជនជាតិវៀតណាម បានប្រព្រឹត្តបទល្មើសជាក់ស្តែងប្រាកដមែន ប៉ុន្តែនៅពេលដែលចាប់បានហើយ ប៉ូលិសគួរតែការពារនាង មិនមែនទុកឱ្យនាងក្លាយជារូបភាពកម្សាន្តសាធារណៈបែបនេះទេ។
លោក ខៀវ កាញារីទ្ធ បញ្ជាក់ថា សមត្ថកិច្ចមានគុណសម្បត្តិដ៏ធំធេងក្នុងការតាមចាប់អ្នកទោស និងជនសង្ស័យត្រឡប់មកវិញ ប៉ុន្តែប៉ូលិសបែរជាមិនបានបំពេញកាតព្វកិច្ចជាមូលដ្ឋានក្នុងឋានៈជាកងនគរបាលជាតិរបស់ខ្លួនក្នុងការការពារជនសង្ស័យឱ្យបានពេញលេញទៅវិញ។
មន្ត្រីរដ្ឋាភិបាលរូបនេះបញ្ជាក់ថា ចំណែកអ្នកសារព័ត៌មានដែលប្រព្រឹត្តអំពើល្មើសលើក្រមសីលធម៌វិជ្ជាជីវៈរបស់ខ្លួន ក៏ជាកញ្ចក់បង្ហាញឱ្យឃើញពីកម្រិតយល់ដឹងរបស់ពួកគេដែរ ដូច្នេះហើយបានជាមានពាក្យរិះគន់ថា ពេលខ្លះពលរដ្ឋខ្លាចអ្នកសារព័ត៌មានជាងខ្លាចប៉ូលិសទៅទៀត។
មានមតិខ្មែរខ្លះក្នុងហ្វេសប៊ុកនិយាយថា លោក ខៀវ កាញារីទ្ធ កាន់ជើងជនជាតិយៀកណាម ចំណែកឯស្ត្រីខ្មែរដែលអាជ្ញាធរធ្វើបាប លោកបិទមាត់ឈឹង។
កាលពីថ្ងៃទី១៨ ខែវិច្ឆិកា ឆ្នាំ២០២៥ ជនជាប់ឃុំជនជាតិវៀតណាម ចំនួន ៦នាក់ ដែលជាប់ពាក់ព័ន្ធនឹងបទល្មើស មានគ្រឿងញៀន ការកាន់កាប់អាវុធខុសច្បាប់ និងការបង្ខាំងមនុស្ស ជាដើម ត្រូវបានសមត្ថកិច្ចតាមចាប់ខ្លួនបានវិញទាំងអស់ បន្ទាប់ពីត្រូវបានបក្ខពួកចូលទៅរំដោះក្នុងពេលបញ្ជូនទៅសាកសួរនៅតុលាការខេត្តស្វាយរៀង ក្នុងថ្ងៃដដែលនោះ។
ក្នុងចំណោមជនជាប់ចោទទាំង ៦នាក់ ក៏មាននារីជនសង្ស័យជនជាតិវៀតណាម ដែរ ដែលជាអ្នកចូលទៅរំដោះអ្នកទោសទាំងនោះ ប៉ុន្តែក្រោយសមត្ថកិច្ចចាប់ខ្លួនបាន ក៏មានការផ្សព្វផ្សាយនូវឃ្លីបវីដេអូមួយលើបណ្ដាញទំនាក់ទំនងសង្គម ដែលបង្ហាញពីសកម្មភាពបៀតបៀនលើរូបរាងកាយជនសង្ស័យ និងការនិយាយស្តីបែបប្រមាថមាក់ងាយផ្សេងៗជាច្រើនទៀតផងដែរ។
ទោះជាយ៉ាងណាក៏ដោយ នៅថ្ងៃទី១៩ វិច្ឆិកា នេះ សមត្ថកិច្ចខេត្តស្វាយរៀង បាននាំខ្លួនអ្នកកាសែត ២នាក់ ឈ្មោះ ផាត់ ហ៊ន និងឈ្មោះ ខាន់ សារ័ត្ន ទៅសួរនាំពាក់ព័ន្ធនឹងអំពើបៀតបៀនលើរូបរាងកាយជនសង្ស័យជានារីជនជាតិវៀតណាម នោះ ខណៈក្រសួងព័ត៌មាន ក៏បានចេញសេចក្តីសម្រេចលុបអាជ្ញាបណ្ណរបស់អ្នកសារព័ត៌មានទាំងពីរនេះកាលពីថ្ងៃពុធ ដែរ។
គេសួរថា ហេតុអ្វីដកអាជ្ញាបណ្ណផ្សាយការពិត?
ជុំវិញបញ្ហានេះ ស្នងការនគរបាលខេត្តព្រៃវែង លោក ឈឿន ប៊ុនឆន សរសេរលើគណនីហ្វេសប៊ុករបស់ខ្លួននៅថ្ងៃទី១៩ វិច្ឆិកា នេះថា ស្ត្រីជនជាតិវៀតណាម បានយកកាំភ្លើងឱ្យឧក្រិដ្ឋជនបាញ់កងកម្លាំងផ្ដាច់ជីវិត ខណៈមន្ត្រីនគរបាលក្លាហានហ៊ានលះបង់ជីវិតតាមចាប់ជនល្មើសដោយគ្មានគិតពីការបាត់បង់ជីវិត ប៉ុន្តែរងការរិះគន់ទៅវិញ។
លោក ឈឿន ប៊ុនឆន ត្អូញត្អែរថា ពេលនេះ នារីសហចារិកាឧក្រិដ្ឋជនក្លាយជាជនរងគ្រោះដោយអំពើអសីលធម៌មួយចំនួន ខណៈអ្នកលេងបណ្ដាញសង្គមបែរជាមកជេរប្រមាថលើកងកម្លាំងនគរបាល ទាំងដែលពួកគេមិនបានប្រព្រឹត្តនូវអំពើគ្មានសីលធម៌ដូចការចោទប្រកាន់ផងនោះ៕
© 2025, ឌឹ ខេមបូឌា ដេលី. All rights reserved.