TAG
features1
នគរបាល និងកងសន្តិសុខរារាំងការហែក្បួនប្រឆាំងច្បាប់ស្តីពីអង្គការមិនមែនរដ្ឋាភិបាល
កាលពីម្សិលមិញ សាលារាជធានីភ្នំពេញបានធ្វើតាមអ្វីដែលខ្លួនបានលើកឡើងថា នឹងបញ្ឈប់ផែនការតវ៉ាមួយចំនួនប្រឆាំងនឹងសេចក្តីព្រាងច្បាប់ដែលមានបំណងគ្រប់គ្រងអង្គការមិនមែនរដ្ឋាភិបាលនៅកម្ពុជា ដោយដាក់ពង្រាយកងសន្តិសុខ និងនគរបាលរាប់រយនាក់នៅក្នុងរាជធានីភ្នំពេញដើម្បីបញ្ឈប់អ្នកតវ៉ា។
បុគ្គលិកអង្គការមិនមែនរដ្ឋាភិបាល សមាជិកសហជីព និងសកម្មជនរាប់រយនាក់នៅតែមានផែនការប្រមូលផ្តុំគ្នានៅរដ្ឋសភាដោយមានគោលដៅចេញពីទីតាំងចំនួនបួនដាច់ដោយឡែកពីគ្នាដើម្បីស្នើឲ្យសមាជិកសភាកុំអនុម័តសេចក្តីព្រាងច្បាប់នេះ ទោះបីជាមានការគំរាមពីសាលារាជធានីថា នឹងប្រើ "គ្រប់មធ្យោបាយ" ដើម្បីបញ្ឈប់ពួកគេក៏ដោយ។
សាលារាជធានីបានលើកឡើងថា រាល់ការហែក្បួនណាមួយនឹងត្រូវបានចាត់ទុកថា ខុសច្បាប់ ព្រោះអ្នករៀបចាំការហែក្បួនមិនបានសុំការអនុញ្ញាតឡើយ។ ហើយដោយធ្វើតាមអ្វីដែលខ្លួនបានលើកឡើង សាលារាជធានីបានដាក់ពង្រាយកងសន្តិសុខ និងនគរបាលប្រដាប់ដោយខែល និងដំបងរាប់រយនាក់នៅតាមទីតាំងដាច់ដោយឡែកទាំងបួនជាទីដែលអ្នកតវ៉ាបានប្រមូលផ្តុំគ្នាកាលពីព្រឹកម្សិលមិញ។
លោក ឡុង ឌីម៉ង់ អ្នកនាំពាក្យសាលារាជធានី បានមានប្រសាសន៍ថា "យើងបានព្យាយាមប្រាប់ពួកគេកុំឲ្យធ្វើការតវ៉ាដោយខុសច្បាប់ ព្រោះច្បាប់នេះកំពុងស្ថិតក្រោមការពិភាក្សា និងពិគ្រោះយោបល់នៅឡើយ ហេតុដូច្នេះពួកគេមិនគួរធ្វើការតវ៉ាទេ ព្រោះច្បាប់នេះនៅមិនទាន់ក្លាយជាច្បាប់នៅឡើយទេ"។
នៅឯស្ពានអាកាស៧មករាតាមបណ្តោយមហាវិថីកម្ពុជាក្រោម អ្នកតវ៉ាប្រហែល២០០នាក់ បានធ្វើដំណើរឆ្លងកាត់កងសន្តិសុខជួរមុខ ហើយអាចហែក្បួនបានប្រហែលមួយគីឡូម៉ែត្រឆ្ពោះទៅកណ្តាលរាជធានីភ្នំពេញ ប៉ុន្តែ ត្រូវបានរារាំងដោយរបាំងក្បួនម៉ូតូរបស់នគរបាល។ ហើយអ្នកតវ៉ាមួយចំនួនត្រូវបានគេរឹបអូសយកបដារបស់ខ្លួន។
លោក អ៊ុក ពេជ្រសំណាង អ្នកតវ៉ាម្នាក់ក្នុងចំណោមអ្នកតវ៉ាទាំងនេះបាននិយាយថា "ពួកទាំងនេះមិនមែនជាកងកម្លាំងខ្មែរទេ...សកម្មភាពរបស់ពួកគេដែលរារាំងការតវ៉ាដោយសន្តិវិធីរបស់យើងគឺមិនអាចទទួលយកបានឡើយ ព្រោះពួកគេរារាំងយើងមិនឲ្យសំដែងចេញពីក្តីព្រួយបារម្ភរបស់យើង"។ លោកបាននិយាយបន្ថែមថា "យើងគ្រាន់តែចង់សំដែងមតិយោបល់របស់យើងប្រឆាំងនឹងច្បាប់ស្តីពីអង្គការមិនមែនរដ្ឋាភិបាលប៉ុណ្ណោះ ព្រោះច្បាប់នេះនឹងរឹតបន្តឹងយ៉ាងខ្លាំងលើសិទ្ធិសេរីភាពរបស់មនុស្សជាតិ និងសកម្មជនការពារសិទ្ធិមនុស្ស"។
អ្នកនាង អ៊ូ ទេពផល្លីន អនុប្រធានសហព័ន្ធសហជីពកម្មករចំណីអាហារ និងសេវាកម្មកម្ពុជា បានលើកឡើងថា ប្រសិនបើសេចក្តីព្រាងច្បាប់នេះក្លាយជាច្បាប់មែននោះ អ៊ីចឹង"កម្ពុជានឹងលែងជាប្រទេសប្រជាធិបតេយ្យទៀតហើយ"។
លោក អំ សំអាត អ្នកគ្រប់គ្រងបច្ចេកទេសរបស់អង្គការសិទ្ធិមនុស្សលីកាដូបានលើកឡើងថា អាជ្ញាធរបានឃាត់ខ្លួនអ្នកតវ៉ាពីរនាក់ដែលកំពុងរៀបចំហែក្បួនចេញពីខណ្ឌមានជ័យ ហើយបាននាំពួកគេទៅអធិការដ្ឋាននគរបាលខណ្ឌ ប៉ុន្តែក្រោយមកបានដោះលែងពួកគេវិញ ។
ទោះបីជាត្រូវបានរារាំងមិនឲ្យហែក្បួនក៏ដោយ តែក្រោយមក អ្នកតវ៉ាប្រហែល២០០នាក់នេះបានប្រមូលផ្តុំគ្នាជាថ្មីនៅមុខរដ្ឋសភាអំឡុងពេលព្រឹកដដែល នៅពេលអាជ្ញាធរបានដកចេញរបាំងដែលគេដាក់ព័ទ្ធជុំវិញបរិវេណរដ្ឋសភា បន្ទាប់ពីសម័យប្រជុំពេញអង្គត្រូវបានបញ្ចប់។
ដោយមិនខ្លាចរអានឹងការបង្ក្រាបរបស់នគរបាល លោក អំ សំអាត បានលើកឡើងទៀតថា អ្នកតវ៉ាប្រឆាំងនឹងច្បាប់ស្តីពីអង្គការមិនមែនរដ្ឋាភិបាល នឹងបន្តការតវ៉ាប្រឆាំងនឹងច្បាប់នេះរហូតទាល់តែវាត្រូវបានដកចេញពីសភា ឬកែប្រែតាមការទាមទារ។
លោកបានមានប្រសាសន៍ថា "ប្រសិនបើច្បាប់នេះត្រូវបានអនុម័ត យើងនឹងបន្តតវ៉ាទៅមុខទៀតដូចភ្លៀងរលឹមអ៊ីចឹងរហូតទាល់តែវាត្រូវបានកែប្រែ ។ ប្រសិនបើវាមិនត្រូវបានកែប្រែទេនោះ រដ្ឋសភាមិនត្រូវអនុម័តច្បាប់នេះឡើយ ព្រោះវារំលោភសិទ្ធិមនុស្ស និងផ្ទុយពីរដ្ឋធម្មនុញ្ញ"។
ច្បាប់នេះនឹងតម្រូវឲ្យអង្គការមិនមែនរដ្ឋាភិបាល និងសមាគមទាំងអស់នៅក្នុងប្រទេសចុះបញ្ជីជាមួយរដ្ឋាភិបាលដើម្បីបន្តប្រតិបត្តិការ និងដាក់របាយការណ៍ប្រចាំឆ្នាំស្តីអំពីហិរញ្ញវត្ថុ និងសកម្មភាពរបស់ខ្លួនជូនរដ្ឋាភិបាល។ វាក៏នឹងផ្តល់ឲ្យប្រព័ន្ធតុលាការនូវសិទ្ធិអំណាចក្នុងការបិទអង្គការមិនមែនរដ្ឋាភិបាល និងសមាគមផងដែរ។ ហើយអ្នករិះគន់ខ្លាចក្រែងបទប្បញ្ញត្តិដ៏ទូលំទូលាយ និងមិនច្បាស់លាស់នៅក្នុងច្បាប់នេះនឹងផ្តល់ឲ្យរដ្ឋាភិបាលនូវអំណាចក្នុងការបំបិទសិទ្ធិរិះគន់។
សមាជិកសភាគ្រោងជួបជាមួយអង្គការមិនមែនរដ្ឋាភិបាលនៅរដ្ឋសភានៅថ្ងៃទី១០ ខែកក្កដា ដើម្បីពិភាក្សាអំពីសេចក្តីព្រាងច្បាប់នេះ៕ស៊ុយឈាង
អង្គការឃ្លាំមើលសិទ្ធិមនុស្សជំរុញឲ្យធនាគារពិភពលោកជួយអ្នកតវ៉ាដែលរងការរំលោភបំពាន
អង្គការឃ្លាំមើលសិទ្ធិមនុស្ស (Human Right Watch) និយាយថា ធនាគារពិភពលោកមិនកំពុងចាត់វិធានការឲ្យបានគ្រប់គ្រាន់ដើម្បីជួយប្រជាពលរដ្ឋនៅក្នុងប្រទេសកម្ពុជា និងនៅក្នុងប្រទេសផ្សេងទៀតដែលកំពុងប្រឈមការរំលោភបំពានពីសំណាក់រដ្ឋាភិបាលចំពោះការនិយាយប្រឆាំងគម្រោងមិនល្អដែលទទួលបានជំនួយមូលនិធិពីធនាគារឡើយ។
នៅក្នុងរបាយការណ៍មួយមានចំណងជើងថា "ការប្រថុយប្រថានផ្ទាល់ខ្លួនរបស់អ្នក៖ ការសងសឹកអ្នករិះគន់គម្រោងរបស់ធនាគារពិភពលោក" ដែលចេញផ្សាយកាលពីម្សិលមិញ អង្គការឃ្លាំមើលសិទ្ធិមនុស្សបានប្រើប្រាស់ការបណ្ដេញប្រជាពលរដ្ឋជាច្រើនគ្រួសារចេញពីតំបន់បឹងកក់ ក្នុងរាជធានីភ្នំពេញ មកធ្វើជាឧទាហរណ៍ដ៏សំខាន់ដែលបង្ហាញពីកំហុសឆ្គងរបស់ធនាគារពិភពលោក និងសាជីវកម្មហិរញ្ញវត្ថុអន្តរជាតិ (International Finance Corporation) ដែលជាដៃគូផ្ដល់ឥណទានឯកជនរបស់ខ្លួន។
ធនាគារពិភពលោកបានទទួលស្គាល់ថា កំហុសឆ្គងដែលខ្លួនបានធ្វើគឺការរៀបចំផែនការ និងការឃ្លាំមើលគម្រោងផ្ដល់ប័ណ្ណកម្មសិទ្ធិដីធ្លីមួយដែលខ្លួនបានផ្ដល់ជំនួយមូលនិធិនៅក្នុងប្រទេសកម្ពុជា ជាហេតុបណ្ដាលឲ្យមានការបណ្ដេញប្រជាពលរដ្ឋប្រមាណ៣.០០០គ្រួសារចេញពីតំបន់បឹងកក់ ដើម្បីបើកផ្លូវសម្រាប់គម្រោងអភិវឌ្ឍន៍អចលនទ្រព្យមួយរបស់សមាជិកព្រឹទ្ធសភាមួយរូបមកពីគណបក្សប្រជាជនកម្ពុជា។ ចាប់តាំងពីឆ្នាំ២០០៨មក ប្រជាពលរដ្ឋដែលបានតវ៉ាប្រឆាំងនឹងគម្រោងនេះត្រូវបាននគរបាលវាយដំអំឡុងការតវ៉ាដោយសន្តិវិធី...
ក្រុមអ្នកនេសាទដែលជាប់នៅប្រទេសឥណ្ឌូណេស៊ី បានមកដល់កម្ពុជាវិញហើយ
អ្នកនេសាទមួយក្រុមមានគ្នាចំនួន២៣០នាក់ ដែលជាប់ទៅណាមិនរួចនៅក្នុងប្រទេសឥណ្ឌូណេស៊ី បានវិលត្រឡប់មកដល់កម្ពុជាវិញហើយកាលពីម្សិលមិញ បន្ទាប់ពីត្រូវបានជួយសង្គ្រោះពីការធ្វើការដូចទាសករនៅលើទូកនេសាទដែលបញ្ជាដោយជនជាតិថៃ។
អ្នកនេសាទកម្ពុជាជាង៣០០នាក់ត្រូវបានធ្វើមាតុភូមិនិវត្តពីប្រទេសឥណ្ឌូណេស៊ី ក្នុងរយៈពេលពីរខែមកនេះ រួមទាំងក្រុមអ្នកនេសាទកាលពីម្សិលមិញផង ក្រោយពីរដ្ឋាភិបាលឥណ្ឌូណេស៊ីបានអនុវត្តបម្រាមលើទូកនេសាទបរទេសដែលដាក់ចេញកាលពីខែវិច្ឆិកាដើម្បីគ្រប់គ្រងវិស័យេនះឲ្យបានប្រសើរជាងមុន។
បម្រាមនេះបានបង្ខំឲ្យទូកនេសាទដែលបញ្ជាដោយជន ជាតិថៃចូលចត និងដោយសារមានការសើុប អង្កេតពីសំណាក់ទីភ្នាក់ងារសារព័ត៌មាន AP បានឈានទៅដល់ការរកឃើញពលករចំណាកស្រុក រាប់ពាន់នាក់មកពីប្រទេសភូមា ប្រទេសកម្ពុជា និងប្រទេសថៃដែលត្រូវគេបង្ខំឲ្យ ធ្វើការនៅទូកទាំងនោះ។
អ្នកនេសាទ៩៧នាក់បានវិលត្រឡប់ពីកោះបេនជីណា ប្រទេសឥណ្ឌូណេស៊ីមកកាន់កម្ពុជាវិញ កាលពីខែឧសភា និងខែមិថុនា បន្ទាប់ពីត្រូវគេបង្ខំឲ្យធ្វើការដូចទាសករអស់រយៈពេលរាប់ខែ ឬរាប់ឆ្នាំ។ អ្នកនេសាទជាច្រើនក្នុងចំណោមនោះនិយាយថា ខ្លួនត្រូវគេរត់ពន្ធចូលក្នុងប្រទេសថៃដោយប្រើលេសថា ពួកគេនឹងទទួលបានការងារមានប្រាក់ខែខ្ពស់ មុនពេលត្រូវគេបង្ខំឲ្យធ្វើការនៅលើទូក។
បុរសដែលបានធ្វើមាតុភូមិនិវត្តកាលពីម្សិលមិញ គឺមកពីកោះអាំប៊ុន បន្ទាប់ពីមន្ត្រីការទូតកម្ពុជា និងក្រសួងជលផលរបស់ប្រទេសឥណ្ឌូណេស៊ីបានចរចាបញ្ជូនពួកគេត្រឡប់មកវិញ ជាមួយក្រុមហ៊ុនឧស្សាហកម្មភីធី ម៉ារីប៊ូ គ្រុប ជាក្រុមហ៊ុនតំណាងឲ្យទូកនេសាទថៃដែលអ្នកនេសាទទាំងនេះធ្វើការឲ្យក្នុងលក្ខខណ្ឌការងារដូចទាសករ។
នៅឯអាកាសយានដ្ឋានភ្នំពេញអន្តរជាតិកាលពីម្សិលមិញ លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអគ្គលេខាធិការនៃគណៈកម្មាធិការជាតិដឹកនាំការបង្ក្រាបអំពើជួញដូរមនុស្ស បានមានប្រសាសន៍ថា ការដែលពលករចំណាកស្រុកឆ្លងដែនដោយខុសច្បាប់ មិនមែនមកពីកង្វះឱកាសការងារនៅក្នុងប្រទេសនោះទេ។
លោកស្រីបានគូសបញ្ជាក់ថា "អស់លោកត្រូវតែយល់ មិនថានៅកម្ពុជា ឬនៅបណ្តាប្រទេសធំៗទេ គឺសុទ្ធតែមានអ្នកធ្វើចំណាកស្រុក វាមិនមានន័យថា នៅក្នុងប្រទេសរបស់ពួកគេគ្មានការងារសម្រាប់ពួកគេឡើយ។ វាជាជម្រើសរបស់ពួកគេ។នៅពេលពួកគេគិតថា នៅកន្លែងណាបានប្រាក់ខែខ្ពស់ជាង ពួកគេនឹងធ្វើការជ្រើសរើស"។
ខណៈពេលអ្នកនេសាទរាប់រយនាក់ឡើងជិះរថយន្តក្រុងទៅកាន់សាលាខណ្ឌជ្រោយចង្វា លោកស្រីបានថ្លែងទៅកាន់ប្រព័ន្ធផ្សព្វផ្សាយថា លោកស្រីមិនដឹងច្បាស់ថា តើមានអ្នកនេសាទកម្ពុជាប៉ុន្មានអ្នកទៀតជាប់នៅក្នុងប្រទេសឥណ្ឌូណេស៊ីទេ។ លោកស្រីមានប្រសាសន៍ថា "យើងមិនអាចប៉ាន់ស្មានដឹងថា មានប៉ុន្មានអ្នកកំពុងស្ថិតក្នុងប្រទេសឥណ្ឌូណេស៊ីនោះទេ ពីព្រោះពួកគេទៅដោយខុសច្បាប់"។
លោក ឌី ថេហូយ៉ា មន្ត្រីកម្មវិធីទទួលបន្ទុកបញ្ហាចំណាកស្រុក និងការជួញដូរមនុស្សនៅមជ្ឈមណ្ឌលអប់រំច្បាប់សម្រាប់សហគមន៍ បានមានប្រសាសន៍ថា ការលើកឡើងរបស់លោកស្រី ជូ ប៊ុនអេង គឺជាការបង្វែរការចាប់អារម្មណ៍លើឧបសគ្គពិតដែលពលករធ្វើចំណាកស្រុកដើម្បីរកការងារធ្វើកំពុងតែប្រឈមមុខ។
លោកបានលើកឡើងថា "ភាគច្រើនពួកគាត់មកពីតំបន់ជនបទដែលការធ្វើស្រែចម្ការគឺជាជម្រើសតែមួយគត់របស់ពួកគាត់។ រដ្ឋាភិបាលកម្ពុជាគ្មានសមត្ថភាពជួយអ្នកទាំងេនះឲ្យទទួលបានការងារនៅទីនេះទេ។ ប្រសិនបើមាន ហើយពួកគាត់ទទួលបានការបណ្តុះបណ្តាលវិជ្ជាជីវៈ ម្លេ៉ះពួកគាត់មិនទៅប្រទេសថៃតាំងពីដំបូង"។
លោកបានទទួលស្គាល់ថា ក្រសួងការងារបានដំណើការមណ្ឌលបណ្តុះបណ្តាលវិជ្ជាជីវៈ និងមណ្ឌលការងារ ប៉ុន្តែ លោកបានបញ្ជាក់ថា វាមិនគ្រប់គ្រាន់ទេ។ ដោយសារតែគ្មានការបណ្តុះបណ្តាលត្រឹមត្រូវដើម្បីអភិវឌ្ឍជំនាញរបស់ពួកគាត់ បានធ្វើឲ្យពលករគ្មានជំនាញទៅស្វែងរកការងារធ្វើនៅក្នុងប្រទេសថៃ ពីព្រោះពួកគាត់អាចរកប្រាក់បានច្រើនជាងនៅកម្ពុជា។
លោកស្រី សារ៉ា ភាហ្សាណូ នាយកគម្រោងប្រឆាំងការជួញដូរមនុស្ស ដែលទទួលបានជំនួយមូលនិធីពីសហរដ្ឋអាមេរិក បានមានប្រសាសន៍ថា ការបណ្តុះបណ្តាលបន្ថែមដើម្បអភិវឌ្ឍជំនាញរបស់ពលករនៅកម្ពុជា នឹងជួយការពារពួកគេពីការត្រូវគេបង្ខំឲ្យធ្វើការនៅលើទូកនេសាទ។
លោកស្រីថ្លែងថា "ពលករដែលប្រឈមហានិភ័យបំផុត គឺពលករគ្មានជំនាញ។ ខ្ញុំគិតថា ចាំបាច់ត្រូវមានព័ត៌មានបន្ថែមទៀតស្តីពីឱកាសការងារ ហើយការបណ្តុះបណ្តាលបន្ថែម នឹងជួយការពារពលករតាមរយៈការធ្វើឲ្យពួកគេមិនសូវងាយរងគ្រោះ"។
លោក បឿន បើយ មកពីខេត្តសៀមរាប ដែលទើបតែវិលត្រឡប់មកប្រទេសឥណ្ឌូណេស៊ីវិញ និយាយថា គាត់គ្មានដីសម្រាប់ធ្វើកសិកម្មទេ ហើយគាត់បានទៅប្រទេសថៃ ដើម្បីរកការងារធ្វើ ពីព្រោះវាជាផ្លូវតែមួយគត់សម្រាប់គាត់ទទួលបានការងារធ្វើ។ គាត់និយាយថា "ការធ្វើការនៅលើទូកមិនងាយស្រួលទេ យើងធ្វើការហាលភ្លៀង និងកណ្តាលថ្ងៃ។ ពួកគេបង្ខំឲ្យយើងធ្វើការហើយធ្វើការទៀត ពីព្រោះពួកគេចង់បានត្រីច្រើន"។
អ្នកនេសាទទាំង២៣០នាក់នេះបានទទួលប្រាក់ខែរបស់ខ្លួន និងជិះយន្តហោះត្រឡប់មកប្រទេសកម្ពុជាវិញដោយឥតគិតថ្លៃ បន្ទាប់ពីរដ្ឋាភិបាលឥណ្ឌូណេស៊ី និងស្ថានទូតកម្ពុជានៅក្នុងទីក្រុងហ្សាការតាបានជួយអន្តរាគមន៍។
លោក មីុ គីម អាយុ៣៦ឆ្នាំមកពីខេត្តកំពង់ធំនិយាយថា គេប្រាប់គាត់ថា គាត់នឹងធ្វើការនេសាទនៅក្នុងដែនសមុទ្រថៃ ប៉ុន្តែ ទូកបែរជាចេញទៅប្រទេសឥណ្ឌូណេស៊ីទៅវិញ ធ្វើឲ្យគាត់ជាប់នៅទីនោះអស់រយៈពេលពីរឆ្នាំ។
គាត់និយាយទៀតថា "យើងត្រូវធ្វើការទាំងថ្ងៃទាំងយប់ ហើយពេលខ្លះបានដេកតែកន្លះម៉ោងប៉ុណ្ណោះ។ ខ្ញុំមិនចង់ត្រឡប់ទៅវិញទេ"៕សុខុម
អតីតសាមណេរអះអាងថា ជាការការពារខ្លួនក្នុងសំណុំរឿងចាក់សម្លាប់គ្រូសូត្រនៅវត្តសាមគ្គីរង្សី
អតីតសាមណេរម្នាក់ដែលត្រូវបានចាប់ផ្សឹក បានប្រាប់សាលាដំបូងរាជធានីភ្នំពេញថា រូបគេគ្រាន់តែការពារខ្លួនប៉ុណ្ណោះ នៅពេលខ្លួនចាប់សម្លាប់គ្រូសូត្រមួយអង្គគង់នៅវត្តសាមគ្គីរង្សីកាលពីខែមករា។
អតីតសង្ឃ ចាន់ សុភ័ក្ត្រ អាយុ១៨ឆ្នាំត្រូវបានចោទប្រកាន់ពីបទបង្កអំពើហិង្សាដោយចេតនាមានស្ថានទម្ងន់ទោសចំពោះការសម្លាប់ព្រះតេជគុណ ថាច់ ខាន់ ព្រះជន្ម៣៧វស្សា ជាគ្រូសូត្រឆ្វេងគង់នៅវត្តនេះ ដែលជាកន្លែងគង់អាស្រ័យរបស់ក្រុមព្រះសង្ឃដែលធ្វើសកម្មភាពសកម្មបំផុតផ្នែកនយោបាយនៅក្នុងប្រទេសកម្ពុជា។ បទចោទប្រកាន់នេះត្រូវមានទោសជាប់ពន្ធនាគារពី៧ឆ្នាំដល់១៥ឆ្នាំ។
ចៅក្រមជំនុំជម្រះ តុប ឈុនហេង បានមានប្រសាសន៍នៅពេលបិទសវនាការក្នុងសំណុំរឿងនេះកាលពីម្សិលមិញថា "តុលាការមានភ័ស្តុតាងគ្រប់គ្រាន់។ អាជ្ញាធរក៏បានដកហូតកាំបិត និងស្បង់ចីពររបស់ជនសង្ស័យដែរ បន្ទាប់ពីជនសង្ស័យបានប្រព្រឹត្តបទល្មើស"។
នគរបាលនិយាយថា ចាន់ សុភ័ក្ត្រ ជាព្រះសង្ឃខ្មែរក្រោមដែលប្រើឈ្មោះ លី...
កម្ពុជាតវ៉ាចំពោះគម្រោងសាងសង់ដែលចម្លងតាមរចនាប័ទ្មប្រាសាទអង្គរវត្ត
កាលពីថ្ងៃសៅរ៍ ក្រសួងការបរទេសបានផ្ញើកំណត់ទូតទៅក្រសួងការបរទេសឥណ្ឌា ដោយសំដែងពីការព្រួយបារម្ភរបស់ខ្លួនចំពោះគម្រោងសាងសង់ប្រាសាទដែលចម្លងតាមរចនាប័ទ្មដូចប្រាសាទអង្គរវត្ត និងបានអំពាវនាវឲ្យមានការបញ្ឈប់គម្រោងសាងសង់នេះ។
គម្រោងសាងសង់ប្រាសាទនេះដែលគ្រោងសាងសង់នៅក្នុងខេត្តប៊ីហា (Bihar)ប្រទេសឥណ្ឌាមានដំណើរការតាំងពីឆ្នាំ២០១២មកម្លេ៉ះ នៅពេលក្រុមហ៊ុនឯកជនមួយឈ្មោះថា Mahavir Mandir Trust បានប្រកាសពីគម្រោងសាងសង់ប្រាសាទដែលចម្លងតាមរចនាប័ទ្មប្រាសាទអង្គរវត្តដោយធ្វើឲ្យរដ្ឋាភិបាលកម្ពុជាបញ្ចេញប្រតិកម្មយ៉ាងខ្លាំង។
ដើម្បីដោះស្រាយចំពោះការព្រួយបារម្ភរបស់ប្រទេសកម្ពុជាអំឡុងពេលនោះ រដ្ឋាភិបាលឥណ្ឌាបានបង្ខំក្រុមស្ថាបត្យករឲ្យកែប្រែរចនាបទរបស់ពួកគេចេញ ប៉ុន្តែ លោក ហ៊ុន ហាន ឯកអគ្គរាជទូតកម្ពុជាប្រចាំប្រទេសឥណ្ឌាបានលើកឡើងអំឡុងពេលចុះទៅពិនិត្យមើលនៅការដ្ឋានសាងសង់ប្រាសាទកាលពីសប្តាហ៍មុនថា ប្លង់ថ្មីនៅតែដូចប្រាសាទអង្គរវត្តដែលលោកបានមានប្រសាសន៍ថា "មិនអាចទទួលយកបាន"។
យោងតាមគេហទំព័រព័ត៌មាន India Today បានឲ្យដឹងថា លោក ហ៊ុន ហាន បានថ្លែងប្រាប់អ្នកយកព័ត៌មានថា "នេះគឺជាបញ្ហាដ៏រសើុបសម្រាប់កម្ពុជា ហើយរដ្ឋាភិបាលរបស់យើងយកចិត្តទុកដាក់ណាស់ចំពោះការចុះផ្សាយរបស់ប្រព័ន្ធផ្សព្វផ្សាយអំពីការចម្លងរចនាប័ទ្មអង្គរវត្ត"។ លោកបានមានប្រសាសន៍បន្ថែមថា "យើងនឹងលើកយកបញ្ហានេះទៅពិភាក្សាជាមួយក្រសួងការបរទេសឥណ្ឌា"។
នៅក្នុងកំណត់ទូតដែលផ្ញើកាលពីម្សិលមិញ ប្រទេសកម្ពុជាបានលើកឡើងថា ការចម្លងតាមរចនាបថអង្គរវត្តគឺវា "រំលោភបំពាន" ដល់រចនាប័ទ្មអង្គរវត្តដែលជាសម្បត្តិបេតិកភណ្ឌពិភពលោកចុះបញ្ជីទទួលស្គាល់ និងការពារដោយអង្គការយូណេស្កូ។
កំណត់ទូតនេះមានខ្លឹមសារដូច្នេះថា "រាជរដ្ឋាភិបាលកម្ពុជាចាត់ទុកថា ការចម្លងតាមរចនាបទប្រាសាទអង្គរវត្តសម្រាប់ប្រយោជន៍ពាណិជ្ជកម្ម គឺជាការរំលោភបំពានយ៉ាងធ្ងន់ធ្ងរដល់សម្បត្តិបេតិកភណ្ឌពិភពលោក ដែលមានតម្លៃជាសាកល និងមិនអាចកាត់ថ្លៃបានសម្រាប់មនុស្សជាតិ"។
កំណត់ទូតនេះមានខ្លឹមសារបន្តថា "ទាក់ទិននឹងបញ្ហាេនះ ក្រសួងការបរទេសនិងកិច្ចសហប្រតិបត្តិការអន្តរជាតិនៃកម្ពុជា សូមស្នើឲ្យក្រសួងការបរទេសឥណ្ឌាពិចារណាជាបន្ទាន់ និងឲ្យបានហ្មត់ចត់ចំពោះគម្រោងសាងសង់ដែលចម្លងតាមរចនាប័ទ្មប្រាសាទអង្គរវត្ត ដើម្បីរក្សាទំនាក់ទំនងជាយូរមកហើយរវាងប្រជាជាតិ និងប្រទេសទាំងពីរឲ្យកាន់តែប្រសើរឡើង"។
លោក ឌីណេស ប៉ាតណាអីុក (Dinesh Patnaik) ឯកអគ្គរដ្ឋទូតឥណ្ឌាប្រចាំប្រទេសកម្ពុជាបានលើកឡើងកាលពីម្សិលមិញថា ក្រុមហ៊ុន Mahavir Mandir Trust ទំនងជាព្យាយាមធ្វើឲ្យកើតមានភាពចម្រូងចម្រាសនេះដើម្បីទាក់ទាញម្ចាស់ជំនួយដែលមានសក្ដានុពលចំពោះគម្រោងរបស់ខ្លួនដែលគ្រោងនឹងចំណាយប្រាក់ចំនួន២០លានដុល្លារ និងចំណាយពេល១០ឆ្នាំដើម្បីសាងសង់។
លោកបានមានប្រសាសន៍ថា "ក្រុមហ៊ុនឆ្លាតណាស់។ ពួកគេមានចេតនាធ្វើដូច្នេះព្រោះវាជួយក្នុងការរៃអង្គាសមូលនិធិ"។ លោកបានមានប្រសាសន៍បន្ថែមថា "ខ្ញុំបាននិងកំពុងធ្វើយ៉ាងណាកុំឲ្យវាមានការចាប់អារម្មណ៍យ៉ាងខ្លាំងពីសាធារណៈជន"។
លោក ប៉ាតណាអីុក បានលើកឡើងបន្ថែមទៀតថា ក្រុមហ៊ុន Mahavir Mandir Trust បានប្រាប់រដ្ឋាភិបាលឥណ្ឌាថា ខ្លួនមិនមែនព្យាយាមចម្លងតាមរចនាបថប្រាសាទអង្គរវត្តឡើយ គឺគ្រាន់តែធ្វើតាមគំនិតដែលផុសឡើង បន្ទាប់ពីបានឃើញប្រាសាទអង្គរវត្តប៉ុណ្ណោះ។ លោកបានលើកឡើងបន្តថា រដ្ឋាភិបាលឥណ្ឌានឹងមិនអនុញ្ញាតឲ្យការសាងសង់ដែលចម្លងតាមរចនាបថអង្គរវត្តសុទ្ធសាធមានដំណើរការទៅមុខឡើយ។
លោកបានមានប្រសាសន៍ថា "យើងមានទំនាក់ទំនងល្អខ្លាំងណាស់ជាមួយកម្ពុជា ហើយយើងនឹងមិនអនុញ្ញាតឲ្យនរណាម្នាក់ធ្វើអ្វីដែលបង្កើតបញ្ហានោះឡើយ"។
ទោះជាយ៉ាងណា លោក ប៉ាតណាអីុក បានគូសបញ្ជាក់ថា ក្រុមហ៊ុន Mahavir Mandir Trust នៅមិនទាន់សូម្បីតែទទួលបានដីសម្រាប់គម្រោងសាងសង់ប្រាសាទនេះនៅឡើយទេ។ អ្វីៗទាំងអស់នេះគឺគ្រាន់តែនៅលើក្រដាសប៉ុណ្ណោះ។
លោកថៃ នរៈសត្យា អ្នកនាំពាក្យក្រសួងវប្បធម៌ និងវិចិត្រសិល្បៈបានលើកឡើងថា កំណត់ទូតនេះ គឺចាំបាច់ណាស់ព្រោះក្រុមហ៊ុនMahavir Mandir Trust បានធ្វើមិនត្រឹមត្រូវឡើយ។
លោកបានមានប្រសាសន៍ថា "ប្រសិនបើពួកគេចង់ចម្លងតាមសម្បត្តិវប្បធម៌ដ៏អស្ចារ្យគួរឲ្យស្ញប់ស្ញែងរបស់ប្រាសាទអង្គរវត្ត ពួកគេគួរតែបានយ៉ាងហោចណាស់សុំការអនុញ្ញាត ឬក៏ទាក់ទងឲ្យបានច្បាស់លាស់ជាមុន ទើបសម"។
តែទោះជាយ៉ាងណា លោកបានបន្ថែមថា ប្រសិនបើទីបំផុតប្រាសាទដែលចម្លងតាមរចនាបថអង្គរវត្តត្រូវបានសាងសង់រួចរាល់នោះ វាអាចជាប្រយោជន៍របស់ប្រទេសកម្ពុជា។ លោកបានមានប្រសាសន៍ថា "វានឹងធ្វើឲ្យគេចង់មកមើលប្រាសាទពិតប្រាកដកាន់តែច្រើនថែមទៀត"៕ស៊ុយឈាង
របាយការណ៍បង្ហាញថា មិនគួរប្រើសន្តិសុខខណ្ឌឲ្យរក្សាសណ្ដាប់ធ្នាប់នៅកន្លែងតវ៉ាទៀតឡើយ ពីព្រោះពួកគេហិង្សាពេក
អង្គការលើកលែងទោសអន្តរជាតិបានលើកឡើងនៅក្នុងរបាយការណ៍មួយចេញផ្សាយនៅថ្ងៃនេះថា មិនគួរប្រើសន្តិសុខខណ្ឌដែលបានក្លាយជានិមិត្តរូបនៃការបង្ក្រាបរបស់រដ្ឋាភិបាលក្រោយការបោះឆ្នោតជ្រើសតាំងតំណាងរាស្ត្រដ៏ចម្រូងចម្រាសកាលពីខែកក្កដា ឆ្នាំ២០១៣ ដើម្បីរក្សាសណ្ដាប់ធ្នាប់នៅកន្លែងតវ៉ាទៀតឡើយ។
នៅក្នុងរបាយការណ៍ដែលមានឈ្មោះថា "ការចេញទៅតវ៉ាតាមដងផ្លូវ៖ សេរីភាពនៃការជួបជុំដោយសន្តិវិធីនៅកម្ពុជា" អង្គការលើកលែងទោសអន្តរជាតិបានវិភាគអំពីស្ថានភាពចលាចលជាច្រើនខែដែលបានចាប់ផ្ដើមពីចំណុចដែលអ្នកបោះឆ្នោតដែលមានការខកចិត្ត អំពាវនាវឲ្យមានការផ្លាស់ប្ដូរ និងក៏បានប្រែក្លាយទៅជាកុបកម្មហិង្សាបណ្ដាលឲ្យមនុស្សប្រាំពីរនាក់ត្រូវកងកម្លាំងរបស់រដ្ឋាភិបាលបាញ់ស្លាប់។
របាយការណ៍នេះមានខ្លឹមសារយ៉ាងដូច្នេះថា "ក្រុមសន្តិសុខខណ្ឌដូនពេញ បានជាប់ពាក់ព័ន្ធនឹងការបំពានសិទ្ធិមនុស្សជាច្រើនករណី រួមទាំងការបង្ករបួសធ្ងន់ធ្ងរផងដែរ។ អង្គការលើកលែងទោសអន្តរជាតិយល់ថា ក្រុមសន្តិសុខខណ្ឌដូនពេញមិនស័ក្ដិសមនឹងបំពេញមុខងារដែលចាត់តាំងឲ្យពួកគេឡើយ"។
លោក រូភើត អែបបុត (Rupert Abbott) ប្រធានផ្នែកស្រាវជ្រាវនៅអង្គការលើកលែងទោសអន្តរជាតិប្រចាំតំបន់អាស៊ីបា៉ស៊ីហ្វិក បានលើកឡើងនៅក្នុងអុីម៉េលមួយថា "ទស្សនរបស់អង្គការលើកលែងទោសអន្តរជាតិយល់ឃើញថា ក្រុមសន្តិសុខដែលត្រូវបានជ្រើសរើសមិនទទួលបានការបណ្ដុះបណ្ដាលឲ្យបានគ្រប់គ្រាន់ឡើយ ហើយវាបង្ហាញឲ្យឃើញតាមរយៈការប្រើប្រាស់កម្លាំងបង្ក្រាបហួសហេតុ និងមិនរើសមុខជាញឹកញាប់របស់ពួកគេ...
សាកលវិទ្យាល័យភូមិន្ទវិចិត្រសិល្បៈនឹងត្រូវផ្លាស់ប្តូរទៅកាន់ទីតាំងថ្មី
ក្រុមមន្ត្រីបានឲ្យដឹងកាលពីម្សិលមិញថា ក្រសួងវប្បធម៌ និងវិចិត្រសិល្បៈបានសម្រេចប្តូរទីតាំងសាកលវិទ្យាល័យភូមិន្ទវិចិត្រសិល្បៈពីទីតាំងនៅកណ្តាលរាជធានីភ្នំពេញទៅកាន់ជាយរាជធានីដើម្បីពង្រីកសារមន្ទីរជាតិ។
លោក ថៃ នរសត្យា អ្នកនាំពាក្យក្រសួងនេះបានលើកឡើងថា សារមន្ទីរជាតិដែលនៅជាប់សាកលវិទ្យាល័យនេះនឹងត្រូវពង្រីកចូលដីសាលកវិទ្យាល័យក្នុងខណ្ឌដូនពេញ ហើយថា ទីតាំងថ្មីនៃអគារសាកលវិទ្យាល័យនឹងត្រូវសាងសង់នៅក្នុងតំបន់ជ្រោយចង្វា។
លោកបានមានប្រសាសន៍ថា "យើងចង់ពង្រីកសារមន្ទីរជាតិ ព្រោះឥឡូវនេះមានទីធ្លាតូចអង្អៀត។ គ្មានបន្ទប់គ្រប់គ្រាន់សម្រាប់ភ្ញៀវទេចរចំណាយពេលដើរមើលឡើយ"។
លោក នរសត្យា បានលើកឡើងទៀតថា ការចំណាយលើការសាងសង់អគារសាកលវិទ្យាល័យថ្មីដែលនឹងត្រូវសាងសង់នៅលើដីផ្តល់ដោយសាលារាជធានីភ្នំពេញ នៅមិនទាន់កំណត់នៅឡើយទេ។
លោកបានមានប្រសាសន៍ថា "ការចំណាយលើការសាងសង់នឹងត្រូវប្រើថវិកាជាតិ ហើយយើងនៅមិនទាន់ដឹងអំពីខ្ទង់ចំណាយនៅឡើយទេ ព្រោះយើងត្រូវការបញ្ចប់ការសិក្សាជាមុនសិន"។
លោកស្រី ភឿង សក្កណា រដ្ឋមន្ត្រីក្រសួងវប្បធម៌ និងវិចិត្រសិល្បៈបានលើកឡើងថា ដេប៉ាតឺម៉ង់ស្ថាបត្យកម្មរបស់សាកលវិទ្យាល័យភូមិន្ទវិចិត្រសិល្បៈបានជួយព្រាងរចនាប្លង់ជំហានដំបូងរួចហើយសម្រាប់អគារថ្មី ប៉ុន្តែថា ការសាងសង់នៅមិនទាន់ចាប់ផ្តើមនៅឡើយទេរហូតដល់ចុងឆ្នាំនេះ ឬដើមឆ្នាំក្រោយ។
លោកស្រី សក្កណា បានលើកឡើងទៀតថា សារមន្ទីរជាតិនឹងប្រើប្រាស់អគារដែលមានស្រាប់របស់សាកលវិទ្យាល័យសម្រាប់ការពង្រីករបស់ខ្លួន។
លោកស្រីបានមានប្រសាសន៍ថា "វាមិនស្ថិតនៅក្នុងថវិការបស់រដ្ឋាភិបាលទេ ប៉ុន្តែ រដ្ឋាភិបាលនឹងរកប្រាក់។ វាប្រហែលមកពីក្រសួងអប់រំ យុវជន និងកីឡា ឬក្រសួងវប្បធម៌ និងវិចិត្រសិល្បៈ... ខ្ញុំនៅមិនទាន់អាចនិយាយបានឡើយ"។
លោក ប៉ា សុជាតិវង្ស អភិបាលរាជធានីភ្នំពេញបានលើកឡើងថា ចំណាត់ការនេះគឺមានសារៈសំខាន់ក្នុងការធ្វើឲ្យអគារសារមន្ទីរជាតិដែលជាតំបន់ទេសចរណ៍មួយក្នុងចំណោមតំបន់ទេសចរណ៍សំខាន់ៗក្នុងរាជធានីភ្នំពេញកាន់តែប្រសើរឡើង ។
លោកបានមានប្រសាសន៍ថា "យើងនឹងពង្រីកសារមន្ទីរ ព្រោះបច្ចុប្បន្នមានភ្ញៀវទេសចរជាច្រើនមកទស្សនា"។
នៅឯសាកលវិទ្យាល័យនេះកាលពីម្សិលមិញ និស្សិតបានសំដែងការខកចិត្តចំពោះការប្តូរទីតាំងនេះ។
ម៉ុយ បញ្ញា អាយុ២០ឆ្នាំ និស្សិតផ្នែកបុរាណវិទ្យាបានលើកឡើងថា នាងចង់បន្តសិក្សានៅអគារចាស់ស្ថិតនៅកណ្តាលរាជធានីភ្នំពេញជាងអគារថ្មីដែលត្រូវឆ្លងកាត់ទន្លេ។
និស្សិតរូបនេះបាននិយាយថា "នៅឆ្នាំក្រោយសាលានេះនឹងមានអាយុ១០០ឆ្នាំហើយ។ ប្រសិនបើក្រសួងប្តូរទីតាំងសាលានេះយើងនឹងបាត់បង់វប្បធម៌ដ៏មានតម្លៃ"។
បញ្ញា បានលើកឡើងទៀតថា ទីតាំងបច្ចុប្បន្នរបស់សាកលវិទ្យាល័យនេះលំបាកក្នុងការធ្វើដំណើរមកសិក្សាបន្តិចមែន ប៉ុន្តែ វាស្ថិតនៅក្នុងតំបន់មួយដែលផ្តល់ភាពងាយស្រួលដល់និស្សិត។
បញ្ញា បាននិយាយទៀតថា "សាលាបច្ចុប្បន្ន គឺនៅជាប់សារមន្ទីរជាតិ និងព្រះបរមរាជវាំង។ វាងាយស្រួលសម្រាប់យើងក្នុងការមកសិក្សា និងស្រាវជ្រាវ"។
ពេជ្រ ករុណា អាយុ២០ឆ្នាំ និស្សិតផ្នែកស្ថាបត្យកម្មបានលើកឡើងថា ខ្លួនព្រួយបារម្ភខ្លាចក្រែងនិស្សិតប្រហែលជាមិនធ្វើដំណើរទៅកាន់ទីតាំងថ្មីឡើយ។
និស្សិតរូបេនះបាននិយាយថា "ប្រសិនបើមានការប្តូរទីតាំងមែន និស្សិតនឹងមិនទៅសិក្សាឡើយ។ តាមការយល់ឃើញរបស់ខ្ញុំ វាមិនមែនជាគំនិតល្អទេ ខ្ញុំមិនយល់ស្របឡើយ"។
នៅពេលរដ្ឋាភិបាលកែទម្រង់រចនាសម្ព័ន្ធសាកលវិទ្យាល័យភូមិន្ទវិចិត្រសិល្បៈក្នុងឆ្នាំ២០១៥នេះដោយប្តូរទីតាំងដេប៉ាតឺម៉ង់មួយចំនួនទៅកាន់សង្កាត់ភ្នំពេញថ្មីក្នុងខណ្ឌឫស្សីកែវ ការចុះឈ្មោះចូលរៀននៅក្នុងដេប៉ាតឺម៉ង់ទាំងនេះមានការធ្លាក់ចុះ។
លោក ប៊ុង សុវត្ថិ សាកលវិទ្យាធិការនៃសាកលវិទ្យាល័យភូមិន្ទវិចិត្រសិល្បៈបានលើកឡើងថា លោករំពឹងថាអ្វីៗនឹងមិនកើតឡើងដូចមុនឡើយ នៅពេលសាកលវិទ្យាល័យទាំងមូលត្រូវបានប្តូរទីតាំងនៅប៉ុន្មានខែខាងមុខនេះ។
លោកបានមានប្រសាសន៍ថា "សិស្សបច្ចុប្បន្នទាំងអស់របស់យើងមិនមែនសុទ្ធតែរស់នៅក្បែរសាលានេះឡើយ។ អ្នកខ្លះបានធ្វើដំណើររួចទៅហើយ"។ លោកបានលើកឡើងទៀតថា គេបានធានាចំពោះលោកថា គេនឹងមិនវាយកម្ទេចចោលអគារបច្ចុប្បន្នរបស់សាកលវិទ្យាល័យនេះឡើយ ហើយថាទីតាំងថ្មីរបស់សាកលវិទ្យាល័យនឹងផ្តល់ទីធ្លាធំជាងមុនសម្រាប់និស្សិត។
លោកបានមានប្រសាសន៍ថា "គេនឹងរក្សាអគារទុកនៅដដែល គឺគ្រាន់តែផ្លាស់ប្តូរមុខងារប៉ុណ្ណោះ។ យើងមានទីធ្លាតូចដែលមានកំណត់នៅទីនេះ ប្រសិនបើើយើងមានអគារកាន់តែធំ ខ្ញុំគិតថា វាជាដំណឹងល្អសម្រាប់យើង"៕ ស៊ុយឈាង
គោឧសភរាជបរិភោគសណ្តែក និងពោតច្រើនក្នុងព្រះរាជពិធីច្រត់ព្រះនង្គ័លឆ្នាំនេះ
គោឧសភរាជមិនបរិភោគស្មៅដែលជាអាហារប្រចាំថ្ងៃរបស់វាទេអំឡុងព្រះរាជពិធីច្រត់ព្រះនង្គ័លធ្វើឡើងនៅក្នុងក្រុងបាត់ដំបង កាលពីម្សិលមិញ ហើយបានងាកទៅបរិភោគពោត និងសណ្តែកជំនួសវិញ ដែលនេះជាទំនាយថា កសិករនឹងទទួលបានទិន្នផលដំណាំពោត និងសណ្តែកខ្ពស់នៅឆ្នាំនេះ។
លោក ចាន់ សុផល អភិបាលខេត្តបាត់ដំបង និងលោកស្រី គីម ប៊ុណ្ណារ៉ា ដែលជាភរិយារបស់លោក បានដើរតួតំណាងឲ្យស្តេចមាឃ និងព្រះមេហួរ ក្នុងព្រះរាជពិធីដ៏ឱឡារិកនៅលើទីលានបាត់ទាត់ក្នុងក្រុងនាភាគឧត្តរនេះ និងបាចពូជស្រូវតាមគន្លងនង្គ័ល ខណៈព្រះមហាក្សត្រ នរោត្តម សីហមុនី និងក្រុមមន្ត្រីជាន់ខ្ពស់កំពុងតែយាងទត និងទស្សនា។
ប៉ុន្តែពួកគេមកចូលរួមដើម្បីមើលថា តើគោឧសភរាជដែលមានតួនាទីសម្រេចជោគវេសនាភោគផលកសិកម្មទូទាំងប្រទេសកម្ពុជា...
លោក ហ៊ុន សែន ប្រាប់លោក សម រង្ស៊ី កុំឲ្យមានគំនិតសងសឹក
នៅក្នុងកិច្ចប្រជុំជាសាធារណៈដ៏ពិសេសមួយជាមួយលោក សម រង្ស៊ី មេដឹកនាំគណបក្សប្រឆាំងនៅក្នុងទីក្រុងគូឡាឡាំពួ កាលពីថ្ងៃសៅរ៍ លោកនាយករដ្ឋមន្ត្រី ហ៊ុន សែន បានទទួលស្គាល់ថា លោក សម រង្ស៊ី អាចនឹងជំនួសលោកនៅក្នុង២០១៨ ប៉ុន្តែបានព្រមានថា "កងកម្លាំង" ដែលស្មោះស្ម័គ្រនឹងគណបក្សប្រជាជនកម្ពុជានឹងរារាំងមិនឲ្យកើតមានទង្វើសងសឹកណាមួយឡើយ ប្រសិនបើលោក សម រង្ស៊ី គ្រោងធ្វើដូច្នេះនោះ។
លោក ហ៊ុន សែន បានលើកឡើងពេលថ្លែងនៅក្នុងព្រឹត្តិការណ៍ផ្លូវការមួយរវាងមេដឹកនាំទាំងពីរនៅសណ្ឋាគារ Hilton Double Tree ក្នុងទីក្រុងគូឡាឡាំពួថា លោក សម រង្ស៊ី នឹងមិនអាចគេចផុតពីផលប៉ះពាល់បានឡើយ ប្រសិនបើលោកឡើងកាន់អំណាច ហើយបន្ទាប់មកចាប់ផ្តើមធ្វើបាបអ្នកកាន់តំណែងមុនលោកនោះ។
លោក ហ៊ុន សែន បានមានប្រសាសន៍នៅចំពោះមុខពលរដ្ឋខ្មែរប្រហែល២០០នាក់ក្នុងប្រទេសម៉ាឡេស៊ីពេលអង្គុយជាប់លោក សម រង្ស៊ី ថា "ឥឡូវនេះខ្ញុំនៅធ្វើនាយករដ្ឋមន្ត្រី ទាំងអស់គ្នានៅជាមួយគ្នាបាន ប៉ុន្តែ ស្រាប់តែដល់ពេលណាមួយ ស្រាប់តែឯកឧត្តម សម រង្ស៊ី ធ្វើជានាយករដ្ឋមន្ត្រីម្តង ឧទាហរណ៍ទេណា! ស្រាប់តែដល់ពេលហ្នឹងឯកឧត្តមអត់ឲ្យខ្ញុំរស់នៅ ស្រាប់តែទៅធ្វើបាបខ្ញុំ ហើយខ្ញុំមានកងកម្លាំងដែលអាចវាយបកវិញ នោះវានឹងធ្វើឲ្យឯកឧត្តមក៏មិនអាចរស់នៅបានដែរ"។
លោក ហ៊ុន សែន ក៏បានរិះគន់ខ្លាំងៗចំពោះអ្នករិះគន់ ដែលលោក និងលោក សម រង្ស៊ី បានផ្សព្វផ្សាយចាប់តាំងពីមានភាពរីកចម្រើនផ្អែកនយោបាយកាលពីឆ្នាំមុនមក។ មេដឹកនាំទាំងពីរចាត់ទុកវប្បធម៌នៃការសន្ទនានេះជាការបញ្ចប់វប្បធម៌នយោបាយហិង្សា ដែលកើតមកជាយូរមកហើយនៅក្នុងប្រទេសកម្ពុជា ប៉ុន្តែ អ្នករិះគន់បានលើកឡើងថា លោក ហ៊ុន សែន ឲ្យតម្លៃដល់វប្បធម៌នៃការសន្ទនានេះគឺគ្រាន់តែនៅពេលវាផ្តល់ប្រយោជន៍ដល់លោកប៉ុណ្ណោះ។
លោកនាយករដ្ឋមន្ត្រីបានអំពាវនាវឲ្យមានភាពអត់ធ្មត់ ដោយលើកឡើងថា មានតែពេលវេលាទេ ដែលនឹងអាចប្រាប់ថា តើវប្បធម៌ថ្មីនេះពិត ឬយ៉ាងណា?។
លោក ហ៊ុន សែន បានមានប្រសាសន៍ថា "សូមរង់ចាំមើលសិន។ ប្រសិនបើយើងមិនចុះទឹកទេ យើងនឹងមិនដឹងថា ត្រូវហែលទឹកដូចម្តេចឡើយ ហើយមិនដឹងថា តើវាជ្រៅ ឬក៏រាក់ ក្តៅ ឬត្រជាក់ឡើយ"។
លោក សម រង្ស៊ី ដែលបានទៅដល់ប្រទេសម៉ាឡេស៊ី កាលពីសប្តាហ៍មុនជាមួយសមាជិកសភាមកពីគណបក្សប្រឆាំងមួយចំនួនទៀតសម្រាប់កិច្ចប្រជុំក្រុមប្រឹក្សានៃអ្នកប្រជាធិបតេយ្យសេរីអាស៊ីបានសាទរចំពោះភាពរីកចម្រើននៃទំនាក់ទំនងរវាងលោក និងលោកនាយករដ្ឋមន្ត្រី។
លោក សម រង្ស៊ី បានមានប្រសាសន៍នៅក្នុងកិច្ចប្រជុំជាមួយលោក ហ៊ុន សែន ថា "នេះគឺជានិមិត្តរូបនៃការរួបរួមជាតិ។ អ្វីដែលយើងបានចាប់ផ្តើម រវាងលោក ហ៊ុន សែន និងខ្ញុំ គឺត្រូវចាប់ផ្តើមវប្បធម៌នៃការសន្ទនា ដែលជាទំព័រប្រវត្តិសាស្ត្រផ្នែកនយោបាយនៅក្នុងឆាកនយោបាយកម្ពុជា "។ លោកបានមានប្រសាសន៍ថា "ឥឡូវនេះ សហគមន៍អន្តរជាតិ ប្រទេសជិតខាងរបស់យើង និងអ្នកកាសែតកំពុងសំដែងការគាំទ្រ ការសរសើរ ហើយទទួលស្គាល់ថា ឥឡូវខ្មែរយើងដឹងអំពីរបៀបស្វែងរកវិធីសាស្ត្រដើម្បីពិភាក្សា និងគោរពគ្នាទៅវិញទៅមកហើយ"។
លោក សម រង្ស៊ី បានអះអាងថា "មានប្រទេសជាច្រើនបាននិយាយថា ពួកគេចង់យកកម្ពុជាជាគំរូ"។
“វប្បធម៌នៃការសន្ទនា" ថ្មីមួយត្រូវបានប្រកាសឡើងជាលើកដំបូងដោយលោក សម រង្ស៊ី បន្ទាប់ពីភាពរីកចម្រើនផ្នែកនយោបាយស្រដៀងគ្នានេះជាមួយលោក ហ៊ុន សែន កាលពីខែកុម្ភៈ ឆ្នាំ២០០៦ ប៉ុន្តែ ទីបំផុតវាបានរលាយសាបសូន្យទៅវិញ ដោយលោក សម រង្ស៊ី បានភៀសខ្លួនទៅប្រទេសបារាំងអស់រយៈពេលបីឆ្នាំ បន្ទាប់ពីត្រូវបានចោទប្រកាន់ពីបទល្មើសមួយចំនួនពាក់ព័ន្ធនឹងការដកបង្គោលព្រំដែន។
ទោះបីជាយ៉ាងដូច្នេះក្តី តែកាលពីថ្ងៃសៅរ៍ លោក សម រង្ស៊ី ក៏បានអំពាវនាវស្រដៀងនឹងការអំពាវនាវរបស់លោក ហ៊ុន សែន ដែលស្នើឲ្យមានការអត់ធ្មត់ដែរ ខណៈវប្បធម៌នៃការសន្ទនាកំពុងរីកចម្រើន។
លោកបានមានប្រសាសន៍ថា "យើងបានឃើញវត្តមានរបស់អ្នកកាសែត ដែលបានតាមដានយើងរហូតមក។ ពួកគេកំពុងឆ្ងល់ថា តើយើងអនុវត្តវប្បធម៌នៃការសន្ទនាពិតប្រាកដ ឬលេងសើច"។
មេដឹកនាំគណបក្សប្រឆាំងរូបេនះបានមានប្រសាសន៍បន្ថែមទៀតថា "សូមរង់ចាំមើលសិន។ វានឹងមានភាពរីកចម្រើនកាន់តែខ្លាំងឡើង"។
លោក គល់ បញ្ញា នាយកប្រតិបត្តិគណៈកម្មាធិការដើម្បីការបោះឆ្នោតដោយសេរី និងយុត្តិធម៌នៅកម្ពុជា (ខុមហ្វ្រែល) បានលើកឡើងថា វាគ្មានអ្វីប្លែកទេសម្រាប់ លោក ហ៊ុន សែន ដែលសន្យាថា នឹងមានការផ្ទេរអំណាចនៅពេលប្រឈមនឹងការប្រឆាំង ដ៏ខ្លាំងក្លា ហើយក្រោយមកធ្វើការរិះគន់ និងអះអាងពីភាពខ្លាំងរបស់ខ្លួនសាជាថ្មីនោះ។
លោកបានមានប្រសាសន៍ថា " លោក ហ៊ុន សែន ធ្លាប់បាននិយាយជាច្រើនលើកច្រើនសាបែបនេះជាមួយលោក សម រង្ស៊ី រួចមកហើយ ដូចជានៅក្នុងឆ្នាំ២០០៦ជាដើម ដោយលោកលើកឡើងថា លោកនឹងផ្ទេរអំណាចប្រសិនបើលោកចាញ់ឆ្នោត ប៉ុន្តែ បន្ទាប់មកលោកព្យាយាមគ្រប់គ្រង និងដាក់សម្ពាធផ្នែកនយោបាយ។វាមិនមែនជាលើកទី១ទេដែលបញ្ហានេះបានកើតឡើង។ វាកើតឡើងនៅពេលលោកត្រូវការចរចា"។
នៅក្នុងសន្ទរកថាមួយពីរខែមុនការបោះឆ្នោតជាតិលើកចុងក្រោយ លោក ហ៊ុន សែន បានប្តេជ្ញាថា នឹងធ្វើជានាយករដ្ឋមន្ត្រីរហូតដល់អាយុ៧៤ឆ្នាំ ប៉ុន្តែ លោក បានដកពាក្យសម្តីនេះវិញកាលពីខែមីនា ដោយលើកឡើងថា វាគ្រាន់តែជាកំហឹងមួយពេលរបស់លោកប៉ុណ្ណោះ។
លោក គល់ បញ្ញា បានលើកឡើងថា ការគំរាមប្រើកម្លាំងជាសាធារណៈរបស់លោក ហ៊ុន សែន ឥឡូវនេះអាចងាកទៅខាំលោកវិញ ប្រសិនបើការក្តោបអំណាចរបស់លោកមិនធ្លាក់ចុះនៅក្នុងការបោះឆ្នោតជាតិនៅក្នុងឆ្នាំ២០១៨ទេនោះ។
លោកបានមានប្រសាសន៍ថា "លោកមិនគួរគំរាមសងសឹកដោយប្រើយោធា ឬអ្វីផ្សេងណាមួយឡើយ ហើយគួរតែដកពាក្យសម្តីបែបនេះចេញដើម្បីកុំធ្វើឲ្យពលរដ្ឋមានអារម្មណ៍សុវត្ថិភាពជាងមុន និងមានការអត់ឱន"។
លោកបានមានប្រសាសន៍បន្ថែមទៀតថា "លោកស្មានថាអ្វីៗនៅតែស្ថិតក្រោមការគ្រប់គ្រងរបស់លោក ប៉ុន្តែ វាប្រហែលជាមិនពិតឡើយ។ មានតែការគាំទ្រ និងការអត់ឱនរបស់ពលរដ្ឋទេ ដែលអាចធានាសុវត្ថិភាពរបស់លោកបាន"៕ ស៊ុយឈាង (រាយការណ៍បន្ថែមដោយ Alex Willemyns)
នៅតំបន់អន្លង់វែង ថ្ងៃ១៧មេសានាំមកនូវអារម្មណ៍លាយឡំគ្នា
ទីប្រជុំជនអន្លង់វែង, ខេត្តឧត្តរមានជ័យ- នៅពេលកងទ័ពខ្មែរក្រហមក្មេងៗបានសម្រុកចូលក្រុងភ្នំពេញ និងដណ្តើមអំណាចកាលពី៤០ឆ្នាំមុន គិតត្រឹមថ្ងៃសុក្រនេះ ទីប្រជុំជនដាច់ស្រយាលនៅតាមបណ្តោយព្រំដែនខ្មែរថៃនេះបានស្ថិតនៅក្រោមរដ្ឋបាលក្មេងខ្ចីរបស់ខ្លួនអស់រយៈពេល៥ឆ្នាំហើយ។
ជាតំបន់ព្រៃស្ងាត់ជ្រងំនៅជាយដែនក្រោមការគ្រប់គ្រងរបស់រដ្ឋាភិបាល ទីប្រជុំជននេះមានតួនាទីតិចតួចក្នុងចលាចលដែលបន្ទាប់មកមានការឡើងកាន់អំណាចនៅថ្ងៃ១៧មេសាឆ្នាំ១៩៧៥របស់ ប៉ុល ពត រហូតដល់ជនផ្តាច់ការដែលគេបណ្តេញចេញពីតំណែងរូបនេះតាំងទីលំនៅនៅទីនេះក្នុងឆ្នាំ១៩៩៣ ដោយនាំមកជាមួយគាត់នូវទាហានជាច្រើននាក់ ដែលបានជួយគាត់ដណ្តើមបានអំណាច។
ទីប្រជុំជននៅតំបន់អង្លង់វែងមានទាហានខ្មែរក្រហមរស់នៅច្រើននៅឡើយ ដែលអ្នកទាំងនោះកាលពីដើមទសវត្សរ៍ឆ្នាំ១៩៧០បានរត់ចូលព្រៃម៉ាគី ជាចលនាប្រឆាំងរបបសាធារណរដ្ឋ ដែលមានជាច្រើនក្រុម ក្នុងនោះមានខ្មែរក្រហមផងដែរ នៅតាមខេត្តនានា ដូចជាខេត្តកំពត បាត់ដំបង និងកំពង់ចាម។ ហើយនៅតែជាកន្លែងមួយក្នុងចំណោមកន្លែងពីរបីដែលការដួលរលំក្រុងភ្នំពេញ ជាអនុស្សាវរីយ៍ដ៏សប្បាយ។
អតីតទាហានថ្មើរជើង ឈ្មោះ...