អតីតសាមណេរម្នាក់ដែលត្រូវបានចាប់ផ្សឹក បានប្រាប់សាលាដំបូងរាជធានីភ្នំពេញថា រូបគេគ្រាន់តែការពារខ្លួនប៉ុណ្ណោះ នៅពេលខ្លួនចាប់សម្លាប់គ្រូសូត្រមួយអង្គគង់នៅវត្តសាមគ្គីរង្សីកាលពីខែមករា។
អតីតសង្ឃ ចាន់ សុភ័ក្ត្រ អាយុ១៨ឆ្នាំត្រូវបានចោទប្រកាន់ពីបទបង្កអំពើហិង្សាដោយចេតនាមានស្ថានទម្ងន់ទោសចំពោះការសម្លាប់ព្រះតេជគុណ ថាច់ ខាន់ ព្រះជន្ម៣៧វស្សា ជាគ្រូសូត្រឆ្វេងគង់នៅវត្តនេះ ដែលជាកន្លែងគង់អាស្រ័យរបស់ក្រុមព្រះសង្ឃដែលធ្វើសកម្មភាពសកម្មបំផុតផ្នែកនយោបាយនៅក្នុងប្រទេសកម្ពុជា។ បទចោទប្រកាន់នេះត្រូវមានទោសជាប់ពន្ធនាគារពី៧ឆ្នាំដល់១៥ឆ្នាំ។
ចៅក្រមជំនុំជម្រះ តុប ឈុនហេង បានមានប្រសាសន៍នៅពេលបិទសវនាការក្នុងសំណុំរឿងនេះកាលពីម្សិលមិញថា “តុលាការមានភ័ស្តុតាងគ្រប់គ្រាន់។ អាជ្ញាធរក៏បានដកហូតកាំបិត និងស្បង់ចីពររបស់ជនសង្ស័យដែរ បន្ទាប់ពីជនសង្ស័យបានប្រព្រឹត្តបទល្មើស”។
នគរបាលនិយាយថា ចាន់ សុភ័ក្ត្រ ជាព្រះសង្ឃខ្មែរក្រោមដែលប្រើឈ្មោះ លី ទឹង បានចាក់ព្រះតេជគុណ ថាច់ ខាន់ បន្ទាប់ពីគ្រូសូត្រអង្គនេះបានដាល់ចំថ្គាមជនល្មើសនៅវត្តសាមគ្គីរង្សី។
ភ្លាមៗក្រោយពីចាក់ជនរងគ្រោះ ចាន់ សុភ័ក្ត្រ ត្រូវបានចាប់ខ្លួនខណៈកំពុងពួនសម្ងំនៅផ្ទះមួយក្បែរវត្តនេះ ហើយភ្លាមៗក៏បានសារភាពថា ខ្លួនពិតជាបានប្រើអំពើហិង្សាមែន ដោយប្រាប់នគរបាលថា ខ្លួនធ្វើបែបនេះគ្រាន់តែជាការតបតទៅនឹងសកម្មភាពរបស់គ្រូសូត្រឆ្វេងដែលព្យាយាមដាក់វិន័យខ្លួនប៉ុណ្ណោះ ហើយនៅក្នុងតុលាការកាលពីម្សិលមិញ ជនល្មើសក៏នៅតែអះអាងបែបនេះដដែល។
ជនល្មើសរូបេនះបាននិយាយថា “នៅម៉ោងប្រហែល៧ព្រឹក [ព្រះតេជគុណ ថាច់ ខាន់] បានមកបន្ទប់របស់ខ្ញុំ ហើយវ៉ៃខ្ញុំពេញវត្ត។ ខ្ញុំសួរលោកថា ‘ហេតុអីវ៉ៃកូណា?’ ប៉ុន្តែលោកបានរុញខ្ញុំ ហើយដាល់មុខខ្ញុំ។ ខ្ញុំបានព្យាយាមគេចចេញពីលោក ប៉ុន្តែលោកនៅតែដេញតាមខ្ញុំ ដូច្នេះហើយខ្ញុំក៏ទាញកាំបិតពីលើតុក្បែរនោះ ដើម្បីតបតទៅវិញ”។
វត្តសាមគ្គីរង្សីបានក្លាយជាកន្លែងស្នាក់អាស្រ័យរបស់ព្រះសង្ឃប្រឆាំង និងជាកន្លែងស្នាក់អាស្រ័យបណ្ដោះអាសន្នសម្រាប់ប្រជាពលរដ្ឋរងភាពអយុត្តិធម៌នៅតាមបណ្ដាខេត្តដែលមកកាន់រាជធានីភ្នំពេញ ដើម្បីសុំជំនួយអន្តរាគមន៍ពីលោកនាយករដ្ឋមន្ត្រី ឬរដ្ឋសភា។
ព្រះសង្ឃភាគច្រើនដែលគង់នៅវត្តនេះគឺជាព្រះសង្ឃខ្មែរកម្ពុជាក្រោម ដែលភាគច្រើនអះអាងថា បានភៀសខ្លួនមកកម្ពុជាដើម្បីរត់គេចពីការធ្វើទុក្ខបុកម្នេញខាងសាសនានៅក្នុងប្រទេសវៀតណាម។
ចលនាតវ៉ាផ្សេងៗដូចជាការប្រឆាំងការចាប់យកដីធ្លី ឥទ្ធិពលរបស់វៀតណាមនៅក្នុងប្រទេសកម្ពុជា និងការធ្វើទុក្ខបុកម្នេញខ្មែរកម្ពុជាក្រោមនៅក្នុងប្រទេសវៀតណាមជាដើមបានកើតចេញពីក្នុងវត្តនេះ ហើយអតីតសង្ឃ ចាន់ សុភ័ក្ត្រ បានប្រាប់តុលាការកាលពីម្សិលមិញថា ព្រះតេជគុណ ថាច់ ខាន់ បានព្យាយាមបង្ខំខ្លួនឲ្យចូលរួមក្នុងបាតុកម្ម។
ជនល្មើសរូបនេះបាននិយាយអំពីការវាយតប់គ្នាដែលបានឈានដល់ការចាក់សម្លាប់នោះថា “លោកខឹងខ្ញុំ ព្រោះខ្ញុំមិនបានចូលរួមបាតុកម្មជាមួយព្រះសង្ឃផ្សេងទៀត”។
ទោះជាយ៉ាងណា ព្រះតេជគុណ ថាច់ សុគន្ធ ដែលគង់នៅវត្តសាមគ្គីរង្សីដែរ និងត្រូវជាបងប្អូនជីដូនរបស់ព្រះសង្ឃដែលសុគត បានជំទាស់ការអះអាងទាំងនេះ។ ព្រះអង្គបានមានសង្ឃដីកាថា “សក្ខីកម្មរបស់ ចាន់ សុភ័ក្ត្រ មិនមែនជាការពិតទេ។ ព្រះតេជគុណ ថាច់ ខាន់ គ្រាន់តែស្ដីបន្ទោសសាមណេរនេះប៉ុណ្ណោះ ដោយសារតែសាមណេរនេះប្រព្រឹត្តមិនល្អ។ លោកមិនដែលបង្ខំព្រះសង្ឃអង្គណាឲ្យចូលរួមបាតុកម្មនោះទេ វាជាការស្ម័គ្រចិត្ត”។
ព្រះតេជគុណអង្គនេះបានមានសង្ឃដីកាបន្តថា ព្រះតេជគុណ ថាច់ ខាន់ បានហៅសាមណេរ ចាន់ សុភ័ក្ត្រ ទៅទទួលការដាក់វិន័យ បន្ទាប់ពី ចាន់ សុភ័ក្ត្រ បានហែកផ្ទាំងប្រកាសមួយដែលសរសេរថា បុគ្គលម្នាក់ត្រូវបានហាមប្រាមមិនឲ្យប្រើឈ្មោះវត្តនេះដើម្បីធ្វើឲ្យខ្លួនមានបាន។
ប៉ុន្មានថ្ងៃក្រោយពីការចាក់សម្លាប់នេះ ព្រះតេជគុណ ថាច់ ហាសំអាង ព្រះចៅអធិការស្ដីទីនៃវត្តនេះបានមានសង្ឃដីកាថា ទង្វើនេះជាការរៀបចំទុកជាមុន ហើយបានលើកឡើងថា មានការជ្រៀតជ្រែកពីខាងក្រៅ។ ព្រះអង្គបានមានសង្ឃដីកានៅពេលនោះថា “វាអាចមាននរណាម្នាក់នៅខាងក្រៅវត្តញុះញង់ឲ្យសាមណេរនេះបង្កបញ្ហានៅក្នុងវត្ត ពីព្រោះបើវត្តមានរឿងកើតឡើង [អាជ្ញាធរ] អាចបិទវត្តនេះចោលបាន”។
ពេលទាក់ទងកាលពីម្សិលមិញ លោក ណៃ វណ្ណដា មន្ត្រីឃ្លាំមើលជាន់ខ្ពស់នៅអង្គការសិទ្ធិមនុស្សអាដហុកបានមានប្រសាសន៍ថា លោកបានស៊ើបអង្កេតករណីនេះ ហើយលោកមិនពេញចិត្តឡើយចំពោះការអះអាងថា ចាន់ សុភ័ក្ត្រ សម្លាប់ព្រះតេជគុណ ថាច់ ខាន់ ដោយចៃដន្យ។
លោកបានថ្លែងថា “យើងសង្ស័យថា ករណីនេះពាក់ព័ន្ធការញុះញង់។ ប្រជាពលរដ្ឋជាច្រើនដែលចាញ់ក្ដីនៅក្នុងវិវាទដីធ្លីបានមកវត្តនេះ។ នៅជ្រុងម្ខាងទៀតនៃវិវាទទាំងនោះ គឺជាអ្នកមានទ្រព្យស្ដុកស្ដម្ភ ដែលប្រហែលជាមិនសប្បាយចិត្តយ៉ាងខ្លាំងចំពោះវត្តនេះ។ នោះជាមូលហេតុដែលយើងអំពាវនាវសុំឲ្យមានការស៊ើបអង្កេតពេញលេញ និងឯករាជ្យ”។
ចៅក្រមជំនុំជម្រះ តុប ឈុនហេង បានបញ្ជាក់ថា សាលាដំបូងនឹងចេញសាលក្រមក្នុងសំណុំរឿងនេះនៅថ្ងៃទី២៣ ខែមិថុនា៕ សុខុម (រាយការណ៍បន្ថែមដោយ Matt Blomberg)