38 C
Phnom Penh

​អង្គការ​ឃ្លាំមើល​សិទ្ធិ​មនុស្ស​ជំរុញ​ឲ្យ​ធនាគារ​ពិភព​លោក​ជួយ​អ្នក​តវ៉ា​ដែល​​រង​ការ​រំលោភ​បំពាន​

ដោយ ឌឹ ខេមបូឌា ដេលី

បទវិភាគ

សកម្មជន​ប្រឆាំងការ​បណ្តេញចេញ​ពី​លំនៅ​ដ្ឋាន​ រួមមាន​មនុស្ស​មួយ​ចំនួន​ដែល​ត្រូវ​បាន​ដោះ​លែង​ពី​ពន្ធនាគារ​ក្រោយ​ពី​ត្រូវ​ជាប់​គុក​ទាក់ទិន​នឹង​បទ​ចោទ​ប្រកាន់​ការ​តវ៉ា​ ធ្វើ​បាតុកម្ម​ខាង​ក្រៅ​តុលាការ​ក្រុង​ភ្នំពេញ​ កាលពី​ម្សិលមិញ​ ប្រឆាំង​នឹង​ពុករលួយ​ក្នុង​ប្រព័ន្ធ​តុលាការ​។ រូបថតៈ ស៊ីវ ចាន់​ណា​/The Cambodia Daily​

អង្គការ​ឃ្លាំមើល​សិទ្ធិ​មនុស្ស​ (Human Right Watch) ​និយាយ​ថា ធនាគារ​ពិភព​លោក​​មិន​​​កំពុង​​ចាត់​វិធានការ​ឲ្យ​បាន​គ្រប់គ្រាន់​ដើម្បី​ជួយ​ប្រជាពលរដ្ឋ​នៅ​ក្នុង​ប្រទេស​កម្ពុជា និង​នៅ​ក្នុង​ប្រទេស​ផ្សេងទៀត​ដែល​កំពុង​​ប្រឈម​ការ​​​​រំលោភ​បំពាន​​ពី​សំណាក់​រដ្ឋាភិបាល​​ចំពោះ​ការ​និយាយ​ប្រឆាំង​​គម្រោង​​មិន​ល្អ​ដែល​ទទួល​បាន​ជំនួយ​មូលនិធិ​ពី​ធនាគារ​ឡើយ​។

នៅ​ក្នុង​របាយការណ៍​មួយ​មាន​ចំណង​ជើង​​​ថា “​ការ​ប្រថុយ​ប្រថាន​​ផ្ទាល់​ខ្លួន​របស់​អ្នក​៖ ការ​សង​សឹក​អ្នក​រិះគន់​​​គម្រោង​របស់​ធនាគារ​ពិភព​លោក” ដែល​ចេញ​ផ្សាយ​កាលពី​ម្សិលមិញ ​​អង្គការ​ឃ្លាំមើល​សិទ្ធិ​មនុស្ស​បាន​ប្រើ​ប្រាស់​ការ​​បណ្ដេញ​​ប្រជាពលរដ្ឋ​​ជា​​ច្រើន​​គ្រួសារ​ចេញ​ពី​តំបន់​បឹងកក់ ក្នុង​រាជធានី​ភ្នំពេញ មក​ធ្វើ​ជា​ឧទាហរណ៍​ដ៏​សំខាន់​​ដែល​បង្ហាញ​ពី​​កំហុស​ឆ្គង​របស់​ធនាគារ​ពិភព​លោក​ និង​សាជីវកម្ម​ហិរញ្ញវត្ថុ​​អន្តរជាតិ​ (International Finance Corporation) ដែលជា​ដៃគូ​ផ្ដល់​ឥណទាន​ឯកជន​របស់​ខ្លួន​។​

ធនាគារ​ពិភព​លោក​បាន​ទទួល​ស្គាល់​ថា កំហុស​ឆ្គង​ដែល​ខ្លួន​បាន​ធ្វើ​គឺ​ការ​រៀបចំ​ផែន​ការ​ និង​ការ​ឃ្លាំមើល​​គម្រោង​ផ្ដល់​ប័ណ្ណ​កម្មសិទ្ធិ​ដីធ្លី​មួយ​ដែល​ខ្លួន​បាន​ផ្ដល់​ជំនួយ​មូលនិធិ​​នៅ​ក្នុង​ប្រទេស​កម្ពុជា​​ ជាហេតុ​បណ្ដាល​ឲ្យ​មាន​ការ​បណ្ដេញ​ប្រជាពលរដ្ឋ​ប្រមាណ​៣.០០០​​គ្រួសារ​ចេញពី​​តំបន់​បឹងកក់ ដើម្បី​បើក​ផ្លូវ​សម្រាប់​គម្រោង​អភិវឌ្ឍន៍​អចលនទ្រព្យ​មួយ​របស់​សមាជិក​ព្រឹទ្ធសភា​មួយ​រូប​មក​ពី​គណបក្ស​ប្រជាជន​កម្ពុជា។ ចាប់តាំង​ពីឆ្នាំ​២០០៨​មក ប្រជាពលរដ្ឋ​ដែល​បាន​តវ៉ា​ប្រឆាំង​នឹង​គម្រោង​នេះ​​ត្រូវ​បាន​នគរ​បាល​វាយ​ដំ​​​​​អំឡុង​​ការ​តវ៉ា​ដោយ​សន្តិវិធី ​​​ត្រូវ​ចាប់​ឃុំខ្លួន ​ផ្ដន្ទាទោស និង​ដាក់​ពន្ធនាគារ​​ម្ដង​ហើយ​ម្ដង​ទៀត​តាម​​បទ​​ចោទ​ប្រកាន់​​ដែល​គេ​រិះគន់​ថា ជា​ហេតុ​ផល​នយោបាយ​។

លោកស្រី ជេស៊ីកា អុីវេនស៍ (Jessica Evans) អ្នក​តស៊ូមតិ​ជាន់​ខ្ពស់​ផ្នែក​ស្ថាប័ន​ហិរញ្ញវត្ថុ​អន្តរជាតិ​របស់​អង្គការ​​ឃ្លាំមើល​សិទ្ធិមនុស្ស បាន​លើក​ឡើង​នៅ​ក្នុង​សេចក្ដី​ថ្លែងការណ៍​មួយ​ថា “​ធនាគារ​ពិភព​លោក​​​ធ្លាប់​បាន​លើក​ឡើង​ជាយូរ​មក​ហើយ​ថា ​ការ​ចូល​រួម​របស់​សាធារណជន​ និង​គណនេយ្យភាព ​គឺ​ជា​កត្តា​សំខាន់​ឆ្ពោះ​ទៅ​រក​ភាព​ជោគ​ជ័យ​នៃ​កិច្ច​ប្រឹង​ប្រែង​អភិវឌ្ឍន៍​ដែល​ខ្លួន​ផ្ដល់​ជំនួយ​មូលនិធិ។ ប៉ុន្តែ​ការ​ខក​ខាន​ម្ដង​ហើយ​ម្ដង​ទៀត​របស់​ធនាគារ​ពិភព​លោក​ក្នុង​ការ​ប្រឈម​តតាំង​នឹង​ការ​បំភិត​បំភ័យ ឬ​ការ​រំលោភ​បំពាន​ប្រជាពល​រដ្ឋ​​ដែល​រិះគន់​គម្រោង​របស់​ខ្លួន ​ប្រឈម​នឹង​ការ​សើច​ចំអក​​គោល​ការណ៍​ទាំង​នេះ”។

យោង​តាម​​របាយការណ៍​នេះ​​បង្ហាញ​ថា ក្រុម​អធិការកិច្ច​របស់​ធនាគារ​ពិភព​លោក​ថែម​ទាំង​បាន​រក​ឃើញ​ករណី​នៅ​ក្នុង​ប្រទេស​មួយ​ចំនួន​​ ដែល​បុគ្គលិក​ផ្ទាល់​របស់​ធនាគារ​នេះ​បាន​បំបាក់​ទឹក​ចិត្ត​ប្រជាជន​មិន​ឲ្យ​ដាក់​ពាក្យ​បណ្ដឹង​​ប្រឆាំង​គម្រោង​របស់​ខ្លួន​​ទៀត​ផង​។ នៅ​ក្នុង​ប្រទេស​កម្ពុជា ប្រជាពលរដ្ឋ​នៅ​បឹងកក់​និយាយ​ថា ធនាគារ​នេះ​បាន​ជំរុញ​ពួកគាត់​កុំ​ឲ្យ​ដាក់​ពាក្យ​បណ្ដឹង​​​​ស្ដីពី​ការ​រំលោភ​បំពាន​ទៅ​អង្គការ​មិន​មែន​រដ្ឋាភិបាល​ក្នុង​ស្រុក​ “​ពីព្រោះ​ការ​រិះគន់​ធនាគារ​ពិភព​លោក​ និង​រដ្ឋាភិបាល​គឺ​ជា​​ ‘ការ​ងារ​របស់​ពួកគេ​’ ទៅ​ហើយ​”។

អង្គការ​ឃ្លាំមើល​សិទ្ធិ​មនុស្ស​និយាយ​ថា នៅ​ក្នុង​ឆ្នាំ​២០០២ ធនាគារ​ពិភព​លោក​បាន​រិះគន់​​ការ​បង្ក្រាប​របស់​រដ្ឋាភិបាល​កម្ពុជា​ទៅ​លើ​ការ​តវ៉ា​មួយ​ដោយ​និយាយ​ថា វា​​ជា​ទង្វើ​ ​”មិន​អាច​ទទួល​យក​បាន​” ហើយ​បាន​​ចោទ​ប្រកាន់​មន្ត្រី​ថា​ជា​មនុស្ស​លាក់​ពុត​។ អង្គការ​នេះ​និយាយ​ទៀត​ថា “ទោះបី​ជា​​ក្នុង​រយៈ​ពេល​ប៉ុន្មាន​ឆ្នាំ​ថ្មីៗ​នេះ​មាន​ការ​បង្ក្រាប​ឃោរឃៅ​ស្រដៀង​គ្នា​យ៉ាង​ណា​ក្ដី ក៏​ធនាគារ​ពិភព​លោក​នៅ​តែ​រក្សា​ភាព​ស្ងៀម​ស្ងាត់​ដែរ​”។

នៅ​ក្នុង​របាយការណ៍​របស់​ខ្លួន​ អង្គការ​ឃ្លាំមើល​សិទ្ធិ​មនុស្ស​បាន​ផ្ដល់​អនុសាសន៍​មួយ​ចំនួន​ដល់​ធនាគារ​នេះ​ ក្នុង​នោះ​រួម​មាន​ទាំង​ការ​ថ្កោល​ទោស​ជា​សាធារណៈ​ចំពោះ​ការ​សង​សឹក​​របស់​រដ្ឋាភិបាល ឬសាជីវកម្ម​ទៅ​លើ​អ្នក​រិះគន់​គម្រោង និង​​ការ​ជំរុញ​ឲ្យ​ដោះ​លែង​​ដោយ​គ្មាន​លក្ខខណ្ឌ​នូវ​អ្នក​​ដែល​ជាប់​ឃុំ​តាម​បទ​ចោទ​ប្រកាន់​ដែល​គេ​ប្រឌិត​ឡើង​ផង​ដែរ​។

អង្គការ​នេះ​ក៏​បាន​ផ្ដល់​អនុសាសន៍​ឲ្យ​ចាត់​វិធានការ​បង្ការ​ជាមុន​ផង​ដែរ ដូច​ជាការ​យក​ចិត្ត​ទុក​ដាក់​ឲ្យ​បាន​ច្រើន​​ក្នុង​ការ​វាយ​តម្លៃ​​​អំពី​លទ្ធភាព​នៃ​ការ​សង​សឹក​​នាពេល​អនាគត​ មុន​ពេល​ប្ដេជ្ញាចិត្ត​អនុវត្ត​គម្រោង​​ណា​មួយ​ និង​ការ​ឲ្យ​ដៃគូ​សាជីវកម្ម និង​ដៃគូ​រដ្ឋាភិបាល​របស់​ធនាគារ​នេះ​ធានា​អះអាង​ថា អ្នក​រិះគន់​នឹង​មិន​ត្រូវ​បាន​រំលោភ​បំពាន​។

នៅ​តំបន់​បឹងកក់​ មាន​ប្រជាពលរដ្ឋ​តែ​ប៉ុន្មាន​នាក់​ប៉ុណ្ណោះ​ដែល​​រង​ការ​រំលោភ​បំពាន​ខ្លាំង​​ដូច​អ្នកស្រី ទេព វន្នី។ ដោយ​​ជាញឹក​ញាប់​បង្ហាញ​ខ្លួននៅ​ខាង​​​មុខ​គេ​អំឡុង​ការ​​​តវ៉ា​ប្រឆាំង​ការ​បណ្ដេញ​ប្រជាពល​រដ្ឋ​ចេញពីតំបន់​នេះ អ្នកស្រី​​បាន​រង​ការ​វាយ​ដំ​​​ពី​សំណាក់​កង​កម្លាំង​សន្តិសុខ​ ​ត្រូវ​ចាប់​ឃុំខ្លួន ចោទ​ប្រកាន់ និង​ជាប់ពន្ធនាគារ​​ម្ដង​ហើយ​ម្ដង​ទៀត​។

អ្នកស្រី​បាន​យល់​ស្រប​នឹង​​ការ​លើក​ឡើង​របស់​អង្គការ​ឃ្លាំមើល​សិទ្ធិ​មនុស្ស​ថា ធនាគារ​ពិភព​លោក​​បាន​ចាត់វិធានការ​តិច​តួច​ណាស់​ក្នុង​ការ​ជួយ​គាត់​​ និង​​ក្រុម​អ្នក​តវ៉ា​ជាមួយ​គាត់​។

អ្នកស្រី​និយាយ​ថា “​យើង​ចង់​ឃើញ​ធនាគារ​ពិភព​លោក​អន្តរាគមន៍​​ចេញ​មុខ​ចរចា​ជាមួយ​រដ្ឋាភិបាល​​ នៅ​ពេល​ប្រជាពលរដ្ឋ​របស់​យើង​​​ជាប់​ពន្ធនាគារ​ ប៉ុន្តែ​យើង​មិន​ដែល​ឃើញ​ពួកគេ​មក​សួរ​សុខទុក្ខ​យើង​ទេ។ ពួកគេ​មិន​អើ​ពើ​នឹង​យើង​នោះ​ទេ”។

​នៅ​ក្នុង​ការ​ឆ្លើយ​តប​តាម​​រយៈ​អុីម៉េល​ទៅ​នឹង​សំណួរ​ជុំវិញ​របាយការណ៍​នេះ លោក ប៊ូ សារឿន អ្នក​នាំពាក្យ​ធនាគារ​ពិភពលោក​បាន​សរសេរ​ថា ធនាគារ​​ពិភព​លោក​មាន​ “​គោល​ការណ៍ និង​យន្តការ​រឹងមាំ​ ដែល​​បាន​ដោះ​ស្រាយ​ក្ដី​បារម្ភ​ជាច្រើន​​លើក​ឡើង​ដោយ​​បណ្ដា​អង្គការ​តស៊ូមតិ​ការ​ពារ​សិទ្ធិ​មនុស្ស និង​សង្គម​ស៊ីវិល​ ហើយ​យើង​បើក​ទូលាយ​​ស្វាគមន៍​ការ​ជជែក​ដើម្បី​ធ្វើ​ការ​កែលម្អ​។ ដំណោះស្រាយ​យុត្តិធម៌​ និង​ដោយ​សន្តិវិធី​នៅ​ក្នុង​វិវាទ​ដីធ្លី​ មាន​សារៈសំខាន់​ចំពោះ​ការ​អភិវឌ្ឍ​សេដ្ឋកិច្ច​ និង​សង្គម​​ប្រកប​ដោយ​និរន្តរភាព​​របស់​កម្ពុជា​។ យើង​បន្ត​ពិភាក្សា​ជាមួយ​រដ្ឋាភិបាល​ជុំវិញ​វិធី​គាំទ្រ​ការ​អភិវឌ្ឍ​របស់​ប្រទេស​នៅ​​ក្នុង​ផ្លូវ​មួយ ដែល​ផ្ដល់​អត្ថប្រយោជន៍​​ដល់​ប្រជាពល​រដ្ឋ​​កម្ពុជា​គ្រប់រូប​”។

មុន​ពេល​ចេញ​ផ្សាយ​របាយការណ៍​នេះ អង្គការ​ឃ្លាំមើល​សិទ្ធិ​មនុស្ស​​ក៏​បាន​​ស្នើ​សុំ​ព័ត៌មាន​​ត្រឡប់​ពី​ធនាគារ​ពិភពលោក​ដែរ​​ជុំវិញ​​ការ​​ចោទ​ប្រកាន់​របស់​ខ្លួន​។ ​យោង​តាម​របាយ​ការណ៍​នេះ​បង្ហាញ​ថា លោក​ អាល់ឡឺស៊ែន សូ (Alassene Sow) នាយក​ធនាគារ​ពិភព​លោក​ប្រចាំ​ប្រទេស​កម្ពុជា​ បាន​បដិសេធ​​ការ​អះអាង​​របស់​​ក្រុម​អ្នក​តវ៉ា​ដែល​លើក​ឡើង​ថា លោក​ស្ម័គ្រ​ចិត្ត​​លើក​ឡើង​​​អំពី​ពាក្យ​បណ្ដឹង​របស់​ពួកគាត់​ទៅ​អង្គការ​សហប្រជាជាតិ​ ហើយ​បាន​មាន​ប្រសាសន៍​ថា លោក​បាន​ជំរុញ​ពួកគាត់​ម្ដង​ហើយ​ម្ដង​ទៀត​ឲ្យ​ “​ទាក់ទង​” ទៅ​អាជ្ញាធរ​មូលដ្ឋាន​ពាក់​ព័ន្ធ​នឹង​ប័ណ្ណ​កម្មសិទ្ធិ​ដីធ្លី​ដែល​ពួកគាត់​ទាម​ទារ​។ របាយការណ៍​នេះ​បាន​លើក​ឡើង​បន្ថែម​ថា លោក អាល់ឡឺស៊ែន សូ បាន​មាន​ប្រសាសន៍​ថា ការ​សង​សឹក​អ្នក​តវ៉ា​នៅ​សហគមន៍​បឹងកក់​ “​គឺ​មិន​ពាក់​ព័ន្ធ​គ្នា​នោះ​ទេ”។

លោក ប៊ូ សារឿន មិន​បាន​ឆ្លើយ​សំណួរ​​​អំពី​ការ​អះអាង​ទាំង​នេះ​ទេ​នៅ​ក្នុង​ការ​ឆ្លើយ​តប​របស់​លោក​។

យោង​តាម​របាយការណ៍​នេះ​​បាន​ឲ្យ​ដឹង​ថា ធនាគារ​ពិភព​លោក​កំពុង​អភិវឌ្ឍ​គោល​ការណ៍​ណែនាំ​ស្ដីពី​របៀប​ឆ្លើយ​តប​​ទៅ​នឹង​​សេចក្ដី​រាយការណ៍​អំពី​ការ​សង​សឹក​​ ហើយ​តំណាង​របស់​សាជីវកម្ម​​ហិរញ្ញវត្ថុ​អន្តរជាតិ​ បាន​សន្យា​ពិចារណា​អនុសាសន៍​របស់​អង្គការ​ឃ្លាំមើល​សិទ្ធិ​មនុស្ស​។

ទោះបី​ជា​ធនាគារ​នេះ​មិន​​ទាន់​បាន​ចាត់​វិធានការ​ជាក់​ស្ដែង​ណាមួយ​នៅ​​ក្នុងការ​ប្រតិកម្ម​​ចំពោះ​ការ​ផ្ចាញ់​តប​របស់​រដ្ឋាភិបាល​កម្ពុជា​លើ​អ្នក​តវ៉ា​មក​ពី​សហគមន៍​បឹងកក់​យ៉ាង​ណា​ក្ដី ក៏​ខ្លួន​បាន​ផ្អាក​ការ​​ផ្ដល់​​ឥណទាន​ថ្មីៗ​​ដល់​ប្រទេស​កម្ពុជា​នៅ​​ក្នុង​ឆ្នាំ​២០១១ នៅ​ក្នុង​ការ​ជំទាស់​នឹង​ការ​បណ្ដេញ​ប្រជាពលរដ្ឋ​ទាំង​បង្ខំ​ចេញ​ពី​តំបន់​បឹងកក់​។

រដ្ឋាភិបាល​​​បាន​បញ្ចេញ​​ប្រតិកម្ម​តប​នឹង​ចំណាត់​ការ​នេះ​តាម​រយៈ​​ការ​ចេញ​ប័ណ្ណ​កម្មសិទ្ធិ​ដីធ្លី​ដល់​ប្រជាពលរដ្ឋ​ប្រមាណ​៧០០​គ្រួសារ​ ដែល​មិន​ទាន់​បាន​ចាក​ចេញពី​តំបន់​បឹងកក់​​នៅឡើយ​ ដោយ​អនុញ្ញាត​ឲ្យ​ពួកគាត់​រក្សា​ទុក​ផ្ទះ​របស់​ខ្លួន។ ប៉ុន្តែ​រដ្ឋាភិបាល​ក៏​បាន​និយាយ​សម្រាល​​ផល​ប៉ះពាល់​នៃ​ការ​ផ្អាក​ការ​ផ្ដល់​ឥណទាន​ថ្មី​នេះ​ដែរ ដោយ​អះអាង​ថា ម្ចាស់​ជំនួយ​អន្តរជាតិ​ផ្សេងៗ​ទៀត​រីក​រាយ​នឹង​បំពេញ​ការ​ខ្វះ​ចន្លោះ​​ក្នុង​ការ​ផ្ដល់​មូលនិធិ​នេះ។​ ដោយ​សារ​តែ​ប្រទេស​ចិន​ជា​ម្ចាស់​ជំនួយ​ និង​ជា​វិនិយោគិន​ដ៏​សំខាន់​នៅ​​ក្នុង​ប្រទេស​កម្ពុជា បណ្ដា​អ្នក​សង្កេត​​ការណ៍​និយាយ​ថា រដ្ឋាភិបាល​និយាយ​ត្រូវ​។

ប៉ុន្តែ​លោក ហ្វីល រ៉ូបឺតសុន (Phil Robertson) ​អនុប្រធាន​អង្គការ​ឃ្លាំមើល​​សិទ្ធិមនុស្ស​ប្រចាំ​តំបន់​អាស៊ី​​បាន​មាន​ប្រសាសន៍​ថា ​រដ្ឋាភិបាល​ក៏​ចង់​រក្សា​ទុក​​ធនាគារ​ពិភព​លោក​ខ្លាំង​ណាស់​ដែរ ដោយ​សារ​តែ​វត្តមាន​របស់​ធនាគារ​នេះ​​ផ្ដល់​ទំនុក​ចិត្ត​ទៅ​លើ​បណ្ដា​វិនិយោគិន​បរទេស​។

លោក​បាន​​លើក​ឡើង​តាម​រយៈ​អុីម៉េល​ថា “​រដ្ឋាភិបាល​កម្ពុជា​ដឹង​ថា ការ​ចាក​ចេញ​​ណា​មួយ​របស់​ធនាគារ​ពិភព​លោក​ពី​កម្ពុជា​ នឹង​ធ្វើ​ឲ្យ​​ប៉ះពាល់​ធ្ងន់​ធ្ងរ​ដល់​ទំនុក​ចិត្ត​​របស់​បណ្ដា​វិនិយោគិន​ដែល​គិត​ចង់​មក​វិនិយោគ​នៅ​ក្នុង​ប្រទេស​នេះ​។ ប្រាក់​​គឺ​ជា​ស្ដេច​នៅ​កម្ពុជា ហើយ​រំហូរ​ចូល​វិនិយោគ​​ឥត​ឈប់​គឺ​ជា​ផ្នែក​ដ៏​សំខាន់​មួយ​នៃ​ការ​ធានា​ថា ប្រាក់​បន្ត​ហូរ​ចូល។​ធនាគារ​ពិភពលោក​​ក៏គួរ​តែ​អាច​ប្រើ​ប្រាស់​តថភាព​នោះ​ជា​ឥទ្ធិពល​គ្រប់​គ្រាន់​​សម្រាប់​ទាម​ទារ​ឲ្យ​ដោះលែង​អ្នក​តវ៉ា​ចេញ​ពី​មន្ទីរ​ឃុំឃាំង​ និង​ទាម​ទារ​កុំ​ឲ្យ​តម្រង់​គោល​ដៅ​ទៅ​រក​សកម្មជន​សង្គម​ស៊ីវិល​ផ្សេងៗ​ទៀត​ផង​ដែរ​”។

ការ​មក​ដល់​ក្នុង​ពេល​ឆាប់ៗ​នៃ​ធនាគារ​វិនិយោគ​ហេដ្ឋារចនាសម្ព័ន្ធ​អាស៊ី (Asian Infrastructure Investment Bank) ​​​របស់​ចិន​ ដែល​ហៅ​កាត់​ថា AIIB ក្នុង​ឋានៈ​​ជា​គូប្រជែង​​របស់​ធនាគារ​​​ផ្ដល់​ឥណទាន​នានា​​ដូច​ជា​ធនាគារ​​ពិភព​លោក​ដើម​នោះ ​​​បាន​ធ្វើ​ឲ្យ​ពួកគេ​មាន​ការ​ព្រួយ​បារម្ភ​ខ្លាំង​ឡើង​ថា ខ្លួន​នឹង​លែង​សំខាន់​តទៅ​ទៀត​នៅ​ក្នុង​តំបន់​។ ប៉ុន្តែ​លោក ហ្វីល រ៉ូបឺតសុន បាន​មាន​ប្រសាសន៍​ថា ធនាគារ​វិនិយោគ​ហេដ្ឋារចនាសម្ព័ន្ធ​អាស៊ី​​ ដែល​មិន​ទាន់​បាន​ប្រកាស​គោល​នយោបាយ​ការ​ពារ​សិទ្ធិ​មនុស្ស​របស់​ខ្លួន​នៅ​ឡើយ​នេះ​ នៅ​តែ​ខ្វះ​ឥទ្ធិពល​ និង​ភាព​អាច​ជឿ​ទុក​ចិត្ត​បាន​​​ដែល​បណ្ដា​វិនិយោគិន​បរទេស​ចង់​បាន​៕ សុខុម​​​​​​​​​​​​​​​​​​

 

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស