32 C
Phnom Penh

គោ​ឧសភរាជ​​​​​បរិភោគ​​​សណ្តែក និង​ពោត​ច្រើន​ក្នុង​ព្រះ​រាជ​ពិធី​ច្រត់​ព្រះ​នង្គ័ល​​​ឆ្នាំ​​នេះ

ដោយ ឌឹ ខេមបូឌា ដេលី

បទវិភាគ

គោឧសភរាជមួយ​នឹម​ដើរ​ជុំវិញ​កីឡាដ្ឋាន​ក្នុង​ក្រុង​បាត់ដំបង អំឡុង​ពេល​ច្រត់​ព្រះ​នង្គ័ល​ កាលពីម្សិល​មិញ។ រូបថត​ៈ ំMasayori Ishikawa
គោឧសភរាជមួយ​នឹម​ដើរ​ជុំវិញ​កីឡាដ្ឋាន​ក្នុង​ក្រុង​បាត់ដំបង អំឡុង​ពេល​ច្រត់​ព្រះ​នង្គ័ល​ កាលពីម្សិល​មិញ។ រូបថត​ៈ ំMasayori Ishikawa

គោ​ឧស​ភរាជ​​​​មិន​​បរិភោគស្មៅ​ដែល​​ជា​​អា​ហារ​ប្រចាំ​ថ្ងៃ​របស់​​វាទេអំឡុង​ព្រះ​រាជ​ពិធី​ច្រត់​ព្រះ​នង្គ័លធ្វើ​ឡើង​នៅ​ក្នុង​​ក្រុង​បាត់​ដំបង​ កាល​ពី​ម្សិល​មិញ ​ហើយ​​បាន​​ងាក​ទៅ​បរិភោគ​ពោត និង​សណ្តែកជំនួស​វិញ​ ដែល​នេះជា​ទំនាយ​ថា កសិករ​​នឹង​ទទួលបាន​​ទិន្នផល​ដំណាំ​ពោត និង​សណ្តែក​ខ្ពស់​នៅ​ឆ្នាំ​នេះ​។

លោក ចាន់ សុផល ​អភិបាល​ខេត្ត​​បាត់​ដំបង និង​លោក​ស្រី គីម ប៊ុណ្ណារ៉ា ដែល​ជា​ភរិយា​របស់លោក បាន​ដើរ​តួ​តំណាង​ឲ្យ​ស្តេច​មាឃ និង​ព្រះ​មេហួរ ​ក្នុង​​ព្រះរាជ​ពិធី​ដ៏​ឱឡារិក​នៅ​លើ​ទី​លាន​បាត់ទាត់​​ក្នុង​ក្រុង​នា​​​​ភាគ​ឧត្តរ​​នេះ​ ​​និង​បាច​ពូជ​ស្រូវ​តាម​គន្លង​នង្គ័ល​ ខណៈ​​ព្រះមហា​ក្សត្រ នរោត្តម សីហមុនី ​និង​ក្រុម​​មន្ត្រីជាន់​ខ្ពស់​កំពុង​តែ​​យាង​ទត និង​​ទស្សនា​។

ប៉ុន្តែ​​ពួក​គេ​មក​​​ចូល​រួម​​ដើម្បីមើល​​ថា តើ​​គោ​ឧស​ភរាជ​ដែល​មាន​​តួនាទីសម្រេច​ជោគ​វេសនាភោគ​ផល​កសិកម្ម​​ទូទាំង​ប្រទេស​កម្ពុជា ​នឹង​​បរិភោគ​​​អាហារ​ណា​ខ្លះ​​ក្នុង​ចំណោម​អាហារ​​​​ទាំង​៧​មុខ​​ដែល​មាន​ដូចជា​ពោត សណ្តែក ស្រូវ ល្ង ទឹក ស្រា និង​ស្មៅ។

លោក​​ កង កេន ​​​ប្រធានអា​ចារ្យ​ព្រហ្ម​បុរោហិត និង​ហោរា​ប្រចាំ​​ព្រះ​បរម​​រាជវាំង បាន​ប្រកាស​​ទៅ​កាន់​អ្នក​ចូល​រួម​ប្រមាណ​ ១.០០០ នាក់​តាម​​ឧគ្ឃោសន​សព្ទ​ថា “ឆ្នាំ​នេះ​ ដំណាំ​​​ទាំង​នោះ​នឹង​ទទួល​បា​ន​ទិន្នផល​ច្រើន”។

ទោះ​​​ជា​​​យ៉ាងណា ​​​បើ​​​ក្រឡេក​​​មើល​​​មួយ​​​ភ្លែត​​​​​​ទៅ​​​លើ​​​​​​​​​​​​ចំណូល​​​ចិត្ត​​​របស់​​​គោ​​​ឧស​​​ភរាជ​​​​​​ក្នុង​​​រយៈ​​​ពេល​​​​​​ប្រាំ​​​ឆ្នាំ​​​មក​​​នេះ ប្រហែល​​​ជា​​​ធ្វើ​​​ឲ្យ​​​ប្រជា​​​កសិករ​​​ពិចារណា​​​ឡើង​​​វិញ​​​ចំពោះ​​​ការ​ផ្លាស់​ប្តូរ​​​​មុខ​​​ដំណាំ​​​តាម​​​ការ​​​​ទស្សន៍​ទាយ​បែប​​​នេះ។ ក្នុង​​​​ឆ្នាំ​​​២០១៤​​​ គោ​​ឧសភរាជ​​​​​​​​​​​​​​​​​​​បាន​​​បរិភោគ​​​ពោត​​​ និង​​​សណ្តែក ក្រោយ​​​មក​​​ក៏​​​បរិភោគ​​​ស្រូវ​​​បន្តិច​​​បន្តួច។ នៅ​​​ឆ្នាំ​​​២០១៣​​​​​​ គោ​​​ឧសភរាជ​​​បាន​​​បរិភោគ​​​ពោត​​​ និង​​​ស្មៅ​​​ ហើយ​​​នៅ​​​​​​ឆ្នាំ​​​២០១២​​​ ២០១១​​​ និង​​​២០១០​​​ គោ​​​ឧសភរាជ​​​
សុទ្ធ​​​តែ​​​បរិភោគ​​​ពោត​​​ និង​​​សណ្តែក​​​។

ប៉ុន្តែ ដោយ​​​សារ​​​តែ​​​ពេល​​​នេះ​​​​​​ជា​​​រដូវ​​​បង្ក​​​បង្កើត​ផល​ដំណាំ​​​​ស្រូវ​​​នៅ​​​ក្នុង​​​ខេត្ត​​​មួយ​​​ចំនួន​​ ហើយ​​​ភ្លៀង​​​នឹង​​​បង្អុរចុះ​មក​​​​​ក្នុង​​​ពេល​​​ឆាប់​​​ៗ​​​​​នោះ ការ​​​ចាប់​​​អារម្មណ៍​​​កាល​​​ពី​​​ម្សិលមិញ​​​ បាន​​​ផ្តោត​​​​ទៅ​​​លើ​​​ដំណាំ​​​ស្រូវ​​​ដែល​​​ជាស្បៀង​​​​​​ដ៏​​​សំខាន់​​​​​​របស់​​​ប្រទេស​​​កម្ពុជា ដោយ​​​កសិករ​​​មួយ​​​ចំនួន​​​ព្រួយ​​​បារម្ភ​​​ចំពោះ​​​ការ​​​ទស្សន៍ទាយ​​​អំពី​​​ពេល​​​អនាគត​​​ដោយ​​​គោឧសភរាជ។

លោក​​​ កង កេន ​​​ បាន​​​មាន​​​ប្រសាសន៍​​​តាម​​​ទូរស័ព្ទ​​​​​​ជា​​​​ក្រោយ​​​ថា “កុំ​​​បារម្ភ​​​រឿង​​​គោ​​​មិន​​​បរិភោគ​​​ស្រូវ​​​អី​​​។ គោ​​​ទាំង​​​នេះ​​​បរិភោគ​​​ពោត​​​ និង​​​សណ្តែក​​​ស្ទើរ​​​តែ​ទាំ​​​ង​​​អស់ ដូច្នេះ​​​ដំណាំ​​​ទាំង​​​នោះ​​​​នឹង​ទទួល​​​បាន​​​ទិន្នផល​​​ខ្ពស់​​​”។

ប៉ុន្តែ សម្រាប់​​​អ្នក​​​ស្រី អុីម សាឃឿន អាយុ​៥៩​​​ឆ្នាំ​​​ ដែល​​​ជា​​​កសិករ​​​ម្នាក់​នៅ​​​​ក្នុង​​​ស្រុក​​​រតនមណ្ឌល ​​​ខេត្ត​​​បាត់​​​ដំបងវិញ​​​​ ទិន្ន​​​ផល​​​ពោត​​​ និង​​​សណ្តែក​​​គ្មាន​​​ន័យ​​​អ្វី​​​ទាំង​​​អស់​​​សម្រាប់​​​គាត់​​​ ដោយ​​​សារ​​​តែ​​​ដី​ទំហំ​​​៥ហិកតា​​​របស់​​​គាត់​​​​​​សុទ្ធ​តែ​ប្រើ​សម្រាប់​​​​បង្ក​​​បង្កើនផល​​​​ដំណាំ​​​
ស្រូវ​​​។

អ្នកស្រី​​​​​​និយាយ​​​ថា “ខ្ញុំ​​​ព្រួយ​​​បារម្ភ​​​ថា ដំណាំស្រូវ​​​នៅ​​​ឆ្នាំ​​​នេះ​​​នឹង​​​មិន​​​ទទួល​​​បាន​​​ទិន្ន​ផល​​​​ច្រើន​​ទេ ​​​ដោយ​​​សារ​​​គ្មាន​​​ទឹក​​​គ្រប់​​​គ្រាន់​​​​​​។ កាល​​​ពី​​​ឆ្នាំ​​​មុន ​​​ដំណាំ​​​ស្រូវ​​​លូត​​​លាស់​​​​បាន​​​ល្អ​ ពីព្រោះ​​​ភ្លៀង​​​បាន​​​​​​ធ្លាក់​​​នៅ​​​​ដើម​​​ឆ្នាំ​​​ និង​​​កណ្តាល​​​ឆ្នាំ​​​។ ប៉ុន្តែ ឆ្នាំ​​​នេះ​​​ ភ្លៀង​​​មិន​​​ទាន់​​​ចាប់​​​ផ្តើម​​​ធ្លាក់​​​ទេ​​​។ ទន្ទឹម​​​នឹង​​​នេះ​​​ [នៅ​​​ឆ្នាំ​​​នេះ​​​] គោ​​​ក៏​​មិន​​​ស៊ី​​​ស្រូវ​​​ទៀត​​​”។

អ្នក​​​ស្រី​​​ជឿ​​​ថា ការ​​​បក​​​ស្រាយ​​​របស់​​​ហោរា​​​រូប​​​េនះ​​​ចំពោះ​​​ចំណូល​​​ចិត្ត​​​របស់​​​គោឧសភរាជ​​​ គឺ​​​​​ត្រូវ​ណាស់​​​។ អ្នក​​​ស្រី​​លើក​ឡើង​ទៀត​​​ថា​​​ ” ខ្ញុំ​​​ជឿ​​​​លើ​ការ​​​ទស្សន៍ទាយ​​​នេះ​​​​​​ ព្រោះ​​​វា​​​ជា​​​ប្រពៃណី​​​របស់​​​ខ្មែរ​​​។ នៅ​​​ពេល​​​គេ​​​ទស្សន៍ទាយ​​​ដោយ​​​ផ្អែក​​​លើ​​​អ្វី​​​ដែល​​​គោ​​​ស៊ី យើង​​​អាច​​​មើល​​​ឃើញ​​​​​​ថា អ្វី​​​ដែល​​​ពួក​​គាត់​​​​និយាយ​​​គឺ​​​ដូច​​​អ្វី​​​ដែល​​​​កើត​ឡើង​​អ៊ីចឹង​​​​”។

លោក សឿង សៀម អាយុ​​​៣៩​​​ឆ្នាំ​​ដែល​​​​ជា​​​កសិករ​​​ម្នាក់​នៅ​​​ស្រុក​​​សំរោង​​​ទង​​​ ខេត្ត​​​កំពង់​​​ស្ពឺ​​​ មិន​សូវ​មាន​អបិយ​ជំនឿដូច​នេះឡើយ​។​​​គាត់​​​និយាយ​​​ថា “រឿង​​​ដែល​​​សំខាន់​​​គឺ​​​ថា ដំណាំ​​​ស្រូវ​​​ពឹង​​​ផ្អែក​​​លើ​​​​​​អាកាស​​​​​​ធាតុ​​​ និង​​​ទឹក​​​ភ្លៀង​​​គ្រប់​​​គ្រាន់​​​”។ គាត់​​​បាន​​​បញ្ជាក់ថា គាត់​​​មាន​​​ជំនឿ​​​តែ​​​ប្រហែល​​​៥ភាគ​​​រយ​​​ប៉ុណ្ណោះ​​​​​​សម្រាប់​​​ការ​​​ទស្សន៍​​​ទាយ​​​របស់​​​គោឧសភរាជ​​​​អំឡុង​​​​ព្រះរាជ​​​ពិធី​​​ច្រត់​​​ព្រះ​​​នង្គ័ល​​​។

លោក ហ៊ាន វ៉ាន់​ហ៊ន អនុ​​​ប្រធាន​​​នាយក​​​ដ្ឋាន​​​នៅ​ក្រសួង​​​កសិកម្ម​​​ ក៏មិន​សូវ​មាន​អបិយ​ជំនឿ​​​​​​​ដែរ​​​។ នៅ​​​ពេល​​​ទាក់​​​ទង​​​តាម​​​ទូរស័ព្ទ​​​ លោក​​​បាន​​​មាន​​​ប្រសាសន៍​​​ថា ទោះ​​​បីជា​​​គោ​​​ឧសភ​​​រាជ​​​ចូល​​​ចិត្ត​​​​​​ពោត​​​ និង​​​សណ្តែក​​​ក្តី​​​​​​ ក៏​​​កសិករ​​​គួរ​​​តែ​​​ប្រើ​​​​​​សុភនិច្ឆ័យ​​​។

លោក​​​បាន​​​​​​លើក​​​ឡើង​​​បន្ថែម​​​ទៀត​​​ថា “ព្រះរាជពិធី​​​ច្រត់​​​ព្រះនង្គ័ល គឺ​​​ជា​​​ផ្នែក​​​មួយ​​​នៃ​​​ជំនឿ និង​​​ប្រពៃណី​​​របស់​​​យើង​​​។​​​ ប្រសិន​​​បើ​​​យើង​​​ជឿ​​​ទៅ​​​លើ​​​វា​​​ទាំង​​​ស្រុង​​​ ហើយ​​​បោះ​​​បង់​​​ការ​​​ដាំដំណាំ​​​ផ្សេង​​​ៗ​​​ទៀត​​​ នោះវា​​​​​​នឹង​​​គ្មាន​​​ទិន្ន​​​ផល​​​ឡើយ​​​”៕ សុខុម​​​​​​

 

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស