TAG
paywall
សាលាក្តីខ្មែរក្រហមនៅតែមិនអនុញ្ញាតឲ្យ តា អាន មើលសំណុំឯកសារនៅក្នុងរឿងក្តីរបស់គាត់
យោងតាមឯកសារថ្មីមួយដែលសាលាក្តីខ្មែរក្រហមចេញផ្សាយកាលពីថ្ងៃអង្គារ បង្ហាញថា លោក តា អាន ជនសង្ស័យឧក្រិដ្ឋកម្មសង្គ្រាមក្នុងរបបខ្មែរក្រហមនៅក្នុងសំណុំរឿង០០៤នៅតែមិនអនុញ្ញាតឲ្យមើលសំណុំឯកសាររបស់គាត់ដដែល។
ឯកសារចុះថ្ងៃទី១៥ខែមករា ដែលត្រូវបានផ្សព្វផ្សាយកាលពីថ្ងៃអង្គារនោះ គាំទ្រសេចក្តីសម្រេចកាលពីថ្ងៃទី៣១ខែកក្កដា របស់លោក ម៉ាក ហាម៉ុន សហចៅក្រមសើុបអង្កេតអន្តរជាតិនៅសាលាក្តីខ្មែរក្រហម ក្នុងការបដិសេធមិនឲ្យលោកតា អាន មើលសំណុំឯកសាររបស់គាត់ ព្រោះគាត់មិនទាន់ត្រូវបានចោទប្រកាន់ជាផ្លូវការពីបទល្មើសណាមួយឡើយ។
មេធាវីរបស់លោកតា អាន ដែលជាអតីតលេខារងភូមិភាគកណ្តាលអំឡុងរបប ប៉ុល ពត បានប្តឹងឧទ្ធរណ៍ជំទាស់នឹងសេចក្តីសម្រេចរបស់លោកចៅក្រម ម៉ាក ហាម៉ុន ប៉ុន្តែ ចៅក្រមខ្មែរនៅអង្គបុរេជំនុំជម្រះដែលមានសមាជិកចំនួនប្រាំរូបនេះ គឺលោក ប្រាក់ គឹមសាន្ត លោក ន័យ ថុល និងលោក ហួត វុទ្ធី បានច្រានចោលការប្តឹងឧទ្ធរណ៍នេះដោយលើកឡើងថា ពួកគាត់យល់ស្របតាមលោកចៅក្រម ម៉ាក ហាម៉ុន។
ទោះជាយ៉ាងណា ចៅក្រមអន្តរជាតិពីររូបគឺ ចាង ហូជុង និង រ៉ូវ៉ាន់ ដូនីង នៅក្នុងអង្គបុរេជំនុំជម្រះនេះ លើកឡើងថា ពួកគាត់ចាត់ទុក តាអាន ជាជនជាប់ចោទ ហើយថា សេចក្តីសម្រេចរបស់លោកចៅក្រម ហាម៉ុន គួរតែកែប្រែ។
មេធាវីរបស់លោកតា អាន បាននិយាយថា ការបដិសេធមិនឲ្យពួកគាត់មើលសំណុំឯកសារដែលពាក់ព័ន្ធនឹងកូនក្តីរបស់ពួកគាត់មានន័យថា ពួកគាត់មិនដឹងថា តើការសើុបអង្កេតលើកូនក្តីរបស់គាត់នឹងដំណើរការដោយវិធីណាទេ។លោកចៅក្រម ហាម៉ុន បានជំរុញឲ្យមានការសើុបអង្កេតក្នុងសំណុំរឿង០០៤ដែលរដ្ឋាភិបាលជំទាស់មិនឲ្យដំណើរការ។
លោកចៅក្រម យូ ប៊ុនឡេង សហចៅក្រមសើុបអង្កេតដែលជាសមភាគីជាតិរបស់លោកចៅក្រម ហាម៉ុន ដែលគាំទ្រគោលជំហររបស់រដ្ឋាភិបាលនោះ បានចាត់ទុកសំណុំរឿង០០៤ថា ចប់ហើយ ព្រោះវាស្ថិតនៅក្រៅអំណាចរបស់សាលាក្តី នេះ ដែលសើុបអង្កេតតែមេដឹកនាំជាន់ខ្ពស់ និងអ្នកទទួលខុសត្រូវខ្ពស់បំផុតចំពោះបទល្មើសនៅក្នុងរបបនោះតែប៉ុណ្ណោះ៕គឹមហឿន
លោក ស ខេង មានប្រសាសន៍ថា ការដំឡើងប្រាក់ខែមន្ត្រីរាជការនាំឲ្យមានអតិផរណាខ្ពស់
លោក ស ខេង រដ្ឋមន្ត្រីក្រសួងមហាផ្ទៃបានមានប្រសាសន៍កាលពីម្សិលមិញថា ការដំឡើងប្រាក់ខែសម្រាប់មន្ត្រីរាជការដែលមានប្រាក់ខែតិចតួចនោះនឹងនាំឲ្យមានភាពចលាចលនៅក្នុងប្រទេស ព្រោះវាធ្វើឲ្យអតិផរណាកើនឡើងខ្លាំង។
ថ្លែងទៅកាន់មន្ត្រីជាង៥០០នាក់នៅឯសន្និបាតបូកសរុបការងារប្រចាំឆ្នាំរបស់សាលារាជធានី លោក ស ខេង បានក្រើនរំឭកថា ការដំឡើងប្រាក់ខែមន្ត្រីរាជការនឹងនាំឲ្យមានការដំឡើងតម្លៃម្ហូបអាហារនាំចូល ព្រោះត្រូវមានការដំឡើងពន្ធនាំចូលថែមទៀត។
លោក ស ខេង បានមានប្រសាសន៍ថា “យើងពិតជាអាចដំឡើងប្រាក់ខែសម្រាប់មន្ត្រីរាជការយើងបាន ប៉ុន្តែ អ្វីដែលជាកង្វល់នោះគឺថា តម្លៃទំនិញក៏នឹងកើនឡើងដែរនៅពេលយើងដំឡើងពន្ធ”។លោកបានមានប្រសាសន៍ថា “ ដូច្នេះការដំឡើងប្រាក់ខែគ្មានន័យអ្វីទេ។ ហេតុដូច្នេះហើយទើបយើងត្រូវប្រុងប្រយ័ត្ន”។ លោក ស ខេង បានបន្ថែមថា ប្រសិនបើរដ្ឋាភិបាលត្រូវដំឡើងពន្ធនាំចូល ប្រជាពលរដ្ឋក្រីក្រនឹងរងផលប៉ះពាល់ធ្ងន់ធ្ងរបំផុតដោយសារតម្លៃទំនិញឡើងខ្ពស់។ លោកមានប្រសាសន៍ថា “ សូមកុំសប្បាយចិត្តនឹងប្រាក់ចំណូលខ្ពស់ពីការដំឡើងពន្ធ។ សូមកុំភ្លេចថា ប្រសិនបើពន្ធកើនឡើង តម្លៃទំនិញក៏កើនឡើងដែរ”៕គឹមហឿន
លោក ខៀវ កាញារីទ្ធ បញ្ជាក់ជាថ្មីថា គ្មានហ្វ្រេកង់ស្ថានីយទូរទស្សន៍សម្រាប់លោក ម៉ម សូណង់ដូ ទេ
កាលពីម្សិលមិញ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានលាតត្រដាងផែនការបំបែកស្ថានីយទូរទស្សន៍ជាតិកម្ពុជាជាបីស្ថានីយដាច់ដោយឡែកពីគ្នា ប៉ុន្តែបានគូសបញ្ជាក់ជាថ្មីថា គ្មានហ្វ្រេកង់ទំនេរសម្រាប់លោក ម៉ម សូណង់ដូ ម្ចាស់ស្ថានីយវិទ្យុសម្បុកឃ្មុំ ដែលជាស្ថានីយវិទ្យុឯករាជ្យទេ។
លោក ម៉ម សូណង់ដូ បានស្នើសុំអាជ្ញាប័ណ្ណបង្កើតស្ថានីយទូរទស្សន៍ម្ដងហើយម្ដងទៀតជាច្រើនលើកច្រើនសាក្នុងរយៈពេលប៉ុន្មានឆ្នាំមកនេះ ប៉ុន្តែលើកណាក៏ត្រូវគេច្រានចោលដែរ ដោយលើកហេតុផលថា ខ្វះហ្វ្រេកង់។ លោកបានដាក់សំណើចុងក្រោយកាលពីថ្ងៃទី១០ ខែកុម្ភៈ។
លោក ខៀវ កាញារីទ្ធ បានបញ្ជាក់អះអាងនៅខាងក្រៅសន្និបាតបូកសរុបការងារប្រចាំឆ្នាំរបស់ក្រសួងព័ត៌មានកាលពីម្សិលមិញថា “ពេលនេះយើងគ្មានស្ថានីយទូរទស្សន៍ផ្ដល់ឲ្យទេ ពីព្រោះគ្មានហ្វ្រេកង់”។...
តុលាការបើកសវនាការជំនុំជម្រះរឿងក្តីចោរប្លន់ពីរនាក់ដែលបានប្លន់សម្លាប់ស្ត្រីវ័យក្មេងពីរនាក់
កាលពីម្សិលមិញ សាលាដំបូងរាជធានីភ្នំពេញបានចាប់ផ្តើមបើកសវនាការជំនុំជម្រះរឿងក្តីបុរសពីរនាក់ដែលជាប់ពាក់ព័ន្ធអំពើមនុស្សឃាតដ៏សាហាវដោយគិតទុកជាមុន ហើយបន្ទាប់មកបានប្លន់យករបស់របរស្ត្រីវ័យក្មេងទាំងពីរ កាលពីឆ្នាំមុន។
ហ៊ុល សំណាង អាយុ១៦ឆ្នាំ និង ផុន សារុំ អាយុ២៨ឆ្នាំត្រូវបានចាប់ខ្លួនកាលពីខែសីហា បន្ទាប់ពី ចប ស្រីលក្ខណ៍ អាយុ១៩ឆ្នាំ និង វ៉ន លក្ខិណា អាយុ២១ឆ្នាំត្រូវបានគេប្រទះឃើញចងជាប់គ្នា និងរឹតកសម្លាប់ នៅក្នុងខណ្ឌពោធិ៍សែនជ័យ។
ស្ត្រីវ័យក្មេងពីរនាក់នេះដែលបានកាន់លុយ១.៣០០ដុល្លារទៅបង់ថ្លៃសាលានោះត្រូវបានប្លន់យកប្រាក់នោះ គ្រឿងអលង្ការ និងម៉ូតូរបស់ពួកគេទៀត។
លោកស្រី គឹម ដានី ចៅក្រមប្រធានក្រុមប្រឹក្សាជំនុំជម្រះបានមានប្រសាសន៍ថា“ ហ៊ុល សំណាង ត្រូវបានចោទប្រកាន់ពីបទមនុស្សឃាតគិតទុកជាមុន ហើយ ផុន សារុំ ត្រូវបានចោទប្រកាន់ពីបទទទួលផលចោរកម្ម”។
ហ៊ុល សំណាង បានបដិសេធថា...
លោក សម រង្ស៊ី ណែនាំអ្នកគាំទ្រឲ្យចាប់អារម្មណ៍លើប្រធានាធិបតីបាត់បង់តំណែងនៅអ៊ុយក្រែន
ស្រុកស្អាង ខេត្តកណ្តាល-រយៈពេលជាងមួយខែបន្តិចបន្តួច បន្ទាប់ពីអ្នកគាំទ្រលោកនាយករដ្ឋមន្ត្រី ហ៊ុន សែន បានជំរុញឲ្យមានការលប់ចោលកម្មវិធីជួបជុំគ្នារបស់គណបក្សប្រឆាំងនៅស្រុកស្អាងខេត្តកណ្តាល លោក សម រង្ស៊ី និងលោក កឹម សុខា មេដឹកនាំគណបក្សសង្គ្រោះជាតិបានវិលត្រឡប់មកសំណេះសំណាលជាមួយអ្នកគាំទ្រវិញ និងបានសន្យាថា ការផ្លាស់ប្តូរដែលបានរុញច្រានជនផ្តាច់ការនៅប្រទេសអ៊ុយក្រែនឲ្យចាកចេញឆ្ងាយ នឹងកើតឡើងនៅក្នុងប្រទេសកម្ពុជានាពេលឆាប់ៗនេះដែរ។
ថ្លែងនៅលើឆាកប្រក់កៅស៊ូតង់ ទៅកាន់អ្នកគាំទ្រនៅក្នុងមូលដ្ឋានប្រហែល៦០០នាក់ នៅលើដីតូចមួយកន្លែង ក្នុងឃុំត្រើយស្លា លោក សម រង្ស៊ី បានប្រាប់អ្នកគាំទ្ររបស់លោកថា ប្រទេសកម្ពុជានឹងមិនមានរបបផ្តាច់ការក្នុងពេលឆាប់ៗនេះ ដូចគ្នាទៅនឹងអ្វីដែលបានកើតឡើងកាលពីពេលថ្មីៗនេះនៅក្នុងទីក្រុងគែរនៅពេលស្ថានភាពច្របូក ច្របល់របស់ប្រជាជនស៊ីវិលអស់រយៈពេលជាច្រើនខែបានជំរុញឲ្យលោក វិកទ័រ យ៉ាណូកូវិច (Viktor Yanukovich) មេដឹកនាំនៃប្រទេសអ៊ុយក្រែនធ្លាក់ចេញពីតំណែង។
ថ្លែងអំពីព្រឹតិ្តការណ៍ថ្មីៗដែលបានកើតឡើងនៅប្រទេសអ៊ុយក្រែន ថៃ និងប្រទេសផ្សេងៗទៀត ដោយចាត់ទុកថា ព្រឹត្តិការណ៍ទាំងនេះគឺជា “ វដ្តនៃការផ្លាស់ប្តូរ” ដែលកំពុងបក់បោកទូទាំងពិភពលោកនោះ លោក សម រង្ស៊ី បានលើកឡើងថា អាថ៌កំបាំងនៃជ័យជម្នះរបស់ចលនាបែបនេះគឺនៅពេលដែលសមាជិកកម្លាំងប្រដាប់អាវុធលែងធ្វើតាមបទបញ្ជាឲ្យសម្លាប់ប្រជាជនខ្លួនឯង។
លោក សម រង្ស៊ី បានមានប្រសាសន៍ទៅកាន់អ្នកគាំទ្រដែលបានទះដៃអបអរសាទរយ៉ាងកងរំពងថា “ នៅជុំវិញពិភពលោក បងប្អូនអើយ និងនៅប្រទេសជិតយើងនេះ និងនៅប្រទេសនៅឆ្ងាយពីយើង ជនផ្តាច់ការដែលបានធ្វើបាបប្រជាជននោះ បានបាត់បង់តំណែងរបស់ពួកគេហើយ។ នៅពេលឆាប់ៗនេះ នឹងដល់វេនជនផ្តាច់ការនៅប្រទេសកម្ពុជាម្តងហើយ”។
លោក សម រង្ស៊ី បានមានប្រសាសន៍សំដៅទៅលើសកម្មភាព និងចលនាតវ៉ាដ៏ខ្លាំងក្លានៅប្រទេសអ៊ុយក្រែនថា “ក្រុមអ្នកតវ៉ាត្រូវបានបាញ់សម្លាប់ ក៏ប៉ុន្តែ អ្នកតវ៉ានៅតែចេញមកទីសាធារណៈទាំងថ្ងៃទាំងយប់”។ លោកបានមានប្រសាសន៍បន្ថែមទៀតថា “ មួយចំនួនក្នុងចំណោមមេនគរបាលគិតថា ពួកគេមិនគួរស្តាប់ជនផ្តាច់ការ ឬក៏ទទួលយកបទបញ្ជាពីជនផ្តាច់ការ និងសម្លាប់ប្រជាជនទេ...។ នោះជាពេលវេលាដែលពួកគេត្រូវផ្តាច់ខ្លួនចេញពីមេដឹកនាំផ្តាច់ការ និងចូលរួមជាមួយក្រុមអ្នកតវ៉ា”។ លោកបានថ្លែងបន្តទៀតថា “ ជនផ្តាច់ការលែងមានអំណាចទៀតហើយ។ ខ្ញុំជឿជាក់ថា កម្លាំងប្រដាប់អាវុធនៅប្រទេសកម្ពុជាក៏ស្រឡាញ់ប្រទេសជាតិ និងមានឈាមរបស់ពួកគេក្នុងចំណោមពួកយើងទាំងអស់គ្នាផងដែរ។ លើកក្រោយនេះ នៅពេលយើងធ្វើការតវ៉ា តើពួកគេនៅតែហ៊ានបាញ់យើងទៀតដែរឬទេ?”។
ទោះបីជា លោក សម រង្ស៊ី មិនបានបញ្ចេញឈ្មោះ លោក នាយករដ្ឋមន្ត្រី ហ៊ុន សែន នៅក្នុងសុន្ទរកថារបស់លោកក៏ដោយ ក៏ប្រសាសន៍របស់លោកបានឆ្លុះបញ្ចាំងឲ្យដឹងដែរ ហើយលោកបានសន្យាថា នៅតែមិនទាន់ហួសពេលដែលត្រូវនិយាយអំពីប្រធានបទ “ ចុះចេញពីតំណែង” ដែរ។ លោកបានមានប្រសាសន៍បន្ថែមទៀតថា “ ប្រទេសអ៊ុយក្រែនជាគំរូ យើងទាំងអស់គ្នាគួរតែគិតអំពីគំរូនេះ។ ហើយសម្រាប់ជនផ្តាច់ការខ្លួនឯងក៏មិនទាន់ហួសពេលដែរ។ ប្រសិនបើអ្នកសាហាវពេក វានឹងប៉ះពាល់ខ្លាំងទៅលើអនាគតរបស់អ្នកផ្ទាល់”។
លោកបានកត់សម្គាល់ថា សកម្មភាពតវ៉ារបស់គណបក្សប្រឆាំងនៅតែរក្សាស្មារតីសន្តិវិធីក្នុងការប្រឈមនឹងអំពើហិង្សារបស់រដ្ឋ។លោក សម រង្ស៊ី បានមានប្រសាសន៍បន្តទៀតថា “ ប្រសិនបើអ្នកចង់បានដំណោះស្រាយដែលគ្មានការបង្ហូរឈាម និងសកម្មភាព អ្នកគួរតែឈប់ទៅ ពីព្រោះនៅថ្ងៃណាមួយប្រជាជនដែលទទួលបទបញ្ជាពីអ្នកនឹងនឿយហត់ ងើបឡើង ហើយពួកគេនឹងឈប់ធ្វើបែបនេះ”។ លោក បានអះអាងថា ប្រជាជន ជាច្រើនលាននាក់ និងចូលរួមសកម្មភាពតវ៉ាក្នុងពេលអនាគតដែលត្រូវបានរៀបចំដោយគណបក្សសង្គ្រោះជាតិ។
លោកបានមានប្រសាសន៍បន្តថា “ បាតុកម្មបន្ទាប់មិនមែនមាន២០០.០០០នាក់ទេ ប៉ុន្តែ ពីរលាននាក់។ ដូច្នេះ សូមត្រៀមខ្លួនធ្វើបាតុកម្មដែលមានអ្នកចូលរួមពីរលាននាក់ ហើយវានឹងដូចនៅប្រទេសអ៊ុយក្រែនដែរ។ នឹងមិនមានកម្លាំងប្រដាប់អាវុធបាញ់អ្នកតវ៉ាទេ។ ពួកគេ នឹងចូលរួមជាមួយ អ្នកតវ៉ាដែរ”។
លោក កឹម សុខា អនុប្រធានគណបក្សសង្គ្រោះជាតិ ដែលបានឡើងទៅលើឆាកធម្មតាតូចមួយនោះ នៅពេលរសៀលក្តៅហែង ក្នុងស្រុកស្អាង មុនលោក សម រង្ស៊ី នោះក៏បានសន្យាផងដែរថា “ ការផ្លាស់ប្តូរនឹងមកដល់ប្រទេសកម្ពុជានាពេលឆាប់ៗនេះ”។
លោកបានថ្លែងទៅកាន់ក្រុមអ្នកគាំទ្រថា “ គ្មាននរណាម្នាក់អាចផ្លាស់ប្តូរចលនាផ្លាស់ប្តូរនៅប្រទេសកម្ពុជាបានទេ។ យើងត្រូវតែប្តូរមេដឹកនាំ ទោះបីជាមានរឿងអ្វីក៏ដោយ”។
មេដឹកនាំបានថ្លែងសុន្ទរកថាឥតសំចៃបែបនេះ មួយថ្ងៃបន្ទាប់ពីលោក ហ៊ុន សែន បានប្រកាសថា លោកបានដាក់ឲ្យអនុវត្តសិទ្ធិមានសេរីភាពជួបជុំឡើងវិញ។ គួរបញ្ជាក់ថា សិទ្ធិនេះត្រូវបានព្យួរ បន្ទាប់ពីកម្លាំងកងរាជអាវុធហត្ថបានបាញ់សម្លាប់កូដករប្រាំនាក់ និងធ្វើឲ្យជាង៤០នាក់ផ្សេងទៀតរងរបួសកាលពីថ្ងៃទី៣ ខែមករា។
ទោះបីជាយ៉ាងណា លោក ហ៊ុន សែន ក៏បានព្រមានផងដែរថា នៅកន្លែងណាដែលខាងប្រឆាំងជួបជុំគ្នាដើម្បីតវ៉ា នៅទីនោះក៏នឹងមានវត្តមានគណបក្សកាន់អំណាចរបស់លោកផងដែរ។ លោក ហ៊ុន សែន បាននិយាយលេងកាលពីថ្ងៃអង្គារថា ការទុកឲ្យអ្នកគាំទ្រគណបក្សទាំងពីរនៅដាច់ពីគ្នា ប្រហែលជាត្រូវការសង់របងនៅទីលានប្រមូលផ្តុំជាសាធារណៈដែលគេស្គាល់ថា ទីលានប្រជាធិបតេយ្យ ក្នុងរាជធានីភ្នំពេញ។
ដូចមេដឹកនាំគណបក្សសង្គ្រោះជាតិដែល លោក ហ៊ុន សែន ក៏បានលើកឡើងទាក់ទងទៅនឹងប្រទេសមួយដែលមានចលាចលស៊ីវិល និងកំពុងប្រឈមនឹងអំណាចនយោបាយដ៏ខ្លាំងផងដែរ។ លោក ហ៊ុន សែន បានលើកឡើងនៅក្នុងសុន្ទរកថារបស់លោកថា “ ខ្ញុំមិនធ្វើតាមប្រធានាធិបតីប្រទេសវេណេស៊ុយអេឡា ដែលបានអំពាវនាវឲ្យអ្នកគាំទ្ររបស់គាត់ចេញមកធ្វើបាតុកម្មទេ។ ខ្ញុំមិនអំពាវនាវទេ។ ខ្ញុំគ្រាន់តែផ្តល់សិទ្ធិស្មើភាពពួកគេ” ឲ្យធ្វើដូច្នេះប៉ុណ្ណោះ។
ទោះជាយ៉ាងណា កាលពីម្សិលមិញ មាន កម្លាំងនគរបាល និងកងរាជអាវុធហត្ថតិចតួចប៉ុណ្ណោះ មានវត្តមាននៅកន្លែងជួបជុំគ្នារបស់គណបក្សសង្គ្រោះជាតិក្នុងស្រុកស្អាង ហើយពួកគេបានដឹកនាំចរាចរនៅជុំវិញកន្លែងជួបជុំ និងយូរៗម្តងបានបង្វែរចំណាប់អារម្មណ៍ទៅសុន្ទរកថារបស់មេដឹកនាំគណបក្សប្រឆាំង នៅពេលក្រុមអ្នកគាំទ្រស្រែកថា “ ហ៊ុន សែន អើយ! ចុះចេញទៅ”។
លោក ឡុង ភ័ត្រា មេប៉ុស្តិ៍ត្រើយស្លាដែលកំពុងបំពេញតួនាទីរបស់លោកនៅកន្លែងជួបជុំនោះ បានឲ្យដឹងថា ថ្នាក់លើរបស់លោកបានបញ្ជាឲ្យមានវត្តមានបន្តិចបន្តួច ពោលគឺមានកម្លាំងតែប្រាំពីរនាក់ប៉ុណ្ណោះ។
កាលពីថ្ងៃទី២១ ខែមករា លោក សម រង្ស៊ី និងលោក កឹម សុខា ត្រូវបានបង្ខំឲ្យលុបចោលកម្មវិធីជួបជុំមួយនៅស្រុកស្អាងនេះនៅពេលកសិករជាច្រើនរយនាក់ ព្រមទាំងយុវជនវ័យក្មេងកម្លាំងខ្លាំង និងកាត់សក់ខ្លី និងស្លៀកពាក់សម្លៀកបំពាក់ស៊ីវិល ហើយមានការគាំទ្រពីកម្លាំងនគរបាលបង្ក្រាបកុបកម្ម និងកម្លាំងកងរាជអាវុធហត្ថដែលប្រដាប់អាវុធ បានចេញមកបង្ហាញការគាំទ្រគណបក្សប្រជាជនកម្ពុជា ដែលកំពុងគ្រប់គ្រងអំណាចរបស់លោក ហ៊ុន សែន។
អ្នកគាំទ្រគណបក្សប្រជាជនកម្ពុជាបានលើកឡើងថា ពួកគេមិនអនុញ្ញាតឲ្យមានការជួបជុំរបស់គណបក្សសង្គ្រោះជាតិ ឬក៏ការផ្សព្វផ្សាយមតិសាធារណៈណាដែលរិះគន់លោកនាយករដ្ឋមន្ត្រី ហ៊ុន សែន ទេ។ នៅពេលសួរថា តើមូលហេតុអ្វីបានជាក្រុមអ្នកគាំទ្រគណបក្សប្រជាជនកម្ពុជាមិនជួបជុំគ្នាដូចកាលពីមួយខែមុន លោក ភ័ត្រា មេប៉ុស្តិ៍ត្រើយស្លា បានលើកឡើងថា លោកក៏មិនដឹងដែរ។
លោក ជាម យៀប សមាជិកសភាមកពីគណបក្សប្រជាជនកម្ពុជា បានចោទប្រកាន់លោក សម រង្ស៊ី ថា កំពុងរុញច្រានប្រទេសកម្ពុជាឲ្យធ្លាក់ចូលទៅក្នុង “ ភាពចលាចល និងសង្គ្រាមស៊ីវិល” ដោយប្រៀបប្រដូចស្ថានភាពនៅប្រទេសនេះ ទៅនឹងស្ថានភាពនៅប្រទេសអ៊ុយក្រែន។លោក ជាម យៀប បានមានប្រសាសន៍ថា “ សេចក្តីលោភរបស់លោក សម រង្ស៊ី នឹងបំផ្លិចបំផ្លាញសង្គម”។ លោកបានបន្ថែមទៀតថា “ ប្រជាជនខ្មែរខុសពីប្រជាជននៅប្រទេសអ៊ុយក្រែន។ បញ្ហានៅប្រទេសកម្ពុជាកើតឡើងដោយសារអ្នកចាញ់ឆ្នោតគឺលោក សម រង្ស៊ី និងលោក កឹម សុខា។ នេះគឺជាការញុះញង់”។
ប៉ុន្តែ លោក ស ខេង រដ្ឋមន្ត្រីក្រសួងមហាផ្ទៃ មកពីគណបក្សប្រជាជនកម្ពុជា ក៏ដឹងអំពីស្ថានភាពនៅប្រទេសអ៊ុយក្រែនដែរ។
ថ្លែងនៅឯពិធីបិទកិច្ចប្រជុំប្រចាំឆ្នាំរបស់សាលារាជធានីភ្នំពេញ លោក ស ខេង បានសម្តែងការសោកស្តាយជាខ្លាំងចំពោះការ
សម្លាប់អ្នកឈរមើល និងអ្នកតវ៉ា ធ្វើឡើងដោយនគរបាល និងកងរាជអាវុធហត្ថនៅ ក្នុងឧបទ្ទវហេតុបីលើកនៅចន្លោះពីខែកញ្ញា ដល់ខែមករា និងបានលើកឡើងថា សកម្មភាពដែលមានការបាត់បង់ជីវិត គឺសមតែនឹងកើតឡើង។
លោក ស ខេង បានមានប្រសាសន៍ដូច្នេះថា “ យើងសោកស្តាយចំពោះការបាត់បង់ជីវិតនៅក្បាលថ្នល់ វត្តស្ទឹងមានជ័យ និងនៅផ្លូវវេងស្រេង។ ក៏ប៉ុន្តែ ហេតុការណ៍នេះមិនមែនកើតឡើងដោយឯកឯងឡើយ។ យើងមានមូលហេតុច្បាស់លាស់មួយ សម្រាប់ដោះស្រាយបញ្ហានេះ”។លោកបានមានប្រសាសន៍បន្ថែមទៀតថា “ យើងមិនអាចប្រថុយប្រថានទេ។ បើហានប្រថុយ ស្ថានភាពនោះនឹងធ្ងន់ធ្ងរ”។ លោក ស ខេង បានមានប្រសាសន៍បន្តទៀតថា “ឧទាហរណ៍ នៅប្រទេសអ៊ុយក្រែន ប្រធានាធិបតីត្រូវបានបោះឆ្នោតឲ្យចេញពីអំណាច ហើយស្ថានភាពនេះកាន់តែធ្ងន់ធ្ងរទៅៗ។ យើងមិនអាចបណ្តោយឲ្យបញ្ហានេះកើតឡើងធ្ងន់ធ្ងរដូច្នោះទេ”៕ សុធា
(រាយការណ៍បន្ថែមដោយ ផាន់ អាណា និង ឃី សុវុឌ្ឍី)
បុគ្គលិកមន្ទីរពេទ្យឈប់តវ៉ាបន្ទាប់ពីមានការសន្យាសង់អគារថ្មី
គ្រូពេទ្យ និងវេជ្ជបណ្ឌិតនៅមន្ទីរពេទ្យបង្អែករាជធានីភ្នំពេញបាននិយាយកាលពីម្សិលមិញថា ពួកគាត់ផ្អាកធ្វើការតវ៉ាប្រឆាំងនឹងការដោះដូរស្ងាត់ៗមន្ទីរពេទ្យបច្ចុប្បន្នរបស់ខ្លួន បន្ទាប់ពីលោក ម៉ម ប៊ុនហេង រដ្ឋមន្ត្រីក្រសួងសុខាភិបាលយល់ព្រមតាមសំណើសុំអគារថ្មីពីរទៀតសម្រាប់ពួកគាត់។
លោករដ្ឋមន្ត្រី ម៉ម ប៊ុនហេង បានជួបជាមួយបុគ្គលិកមន្ទីរពេទ្យកាលពីម្សិលមិញ នៅមន្ទីរពេទ្យនេះ មួយថ្ងៃបន្ទាប់ពីវេជ្ជបណ្ឌិត និងឆ្មបប្រហែល៨០នាក់បានតវ៉ាប្រឆាំងនឹងបទបញ្ជាឲ្យចាប់ផ្តើមរុះរើចេញ ពីមន្ទីរពេទ្យបច្ចុប្បន្ននៅតាមផ្លូវលេខ១៦៩ដើម្បីចូលទៅធ្វើការនៅអគារថ្មីមួយដែលមិនទាន់សាងសង់រួចរាល់។ បុគ្គលិកមន្ទីរពេទ្យ ចោទអាជ្ញាធរថាពុករលួយក្នុងការដោះដូរដីជាមួយក្រុមហ៊ុនឯកជនមួយដែលគេមិនស្គាល់ឈ្មោះ ហើយបាននិយាយថា អគារថ្មីនេះតូចពេកមិនអាចឆ្លើយតបតាមតម្រូវការរបស់អ្នកជំងឺបានទេ។
កាលពីម្សិលមិញ លោក ម៉ម ប៊ុនហេង បានស្នើសុំដោយផ្ទាល់ឲ្យអ្នកយកព័ត៌មានចាកចេញពីបន្ទប់មុនពេលចាប់ផ្តើមជួបពិភាក្សាជាមួយបុគ្គលិកមន្ទីរពេទ្យ ហើយបានបដិសេធមិននិយាយជាមួយប្រព័ន្ធផ្សព្វផ្សាយទេនៅពេលក្រោយមក។
បុរសម្នាក់ដែលទទួលទូរស័ព្ទរបស់លោក ម៉ម ប៊ុនហេង នៅពេលក្រោយបានបដិសេធមិនប្រាប់ឈ្មោះទេ ហើយបានអះអាងថា លោករដ្ឋមន្ត្រីកំពុងជាប់រវល់។ ទោះជាយ៉ាងណា បុគ្គលិក និងមន្ត្រីបាននិយាយពេលក្រោយមកថា រដ្ឋមន្ត្រីរូបនេះបានសន្យាស្នើសុំអគារថ្មីពីរទៀតសម្រាប់ពួកគេ ហើយនឹងអនុញ្ញាតឲ្យពួកគេធ្វើការក្នុងអគារបច្ចុប្បន្នរហូតអគារថ្មីសាងសង់រួចរាល់។
លោកវេជ្ជបណ្ឌិត ហុង លីគួង អនុប្រធានមន្ទីរពេទ្យនេះដែលបានចូលរួមការតវ៉ាកាលពីថ្ងៃអង្គារ និងបានចូលរួមកិច្ចប្រជុំកាលពីម្សិលមិញ បានបញ្ជាក់ថា លោក ម៉ម ប៊ុនហេង បានយល់ព្រមតាមការទាមទាររបស់ពួកគាត់។ លោកវេជ្ជបណ្ឌិត ហុង លីគួង បានមានប្រសាសន៍ថា “ លោក ម៉ម ប៊ុនហេង ព្រមទទួលយក ហើយលោកនឹងធ្វើសំណើទៅរដ្ឋាភិបាលសុំសាងសង់អគារពីរទៀត។ បុគ្គលិកទាំងអស់នឹងបំពេញការងារជាធម្មតានៅអគារចាស់រហូតដល់គេសាងសង់អគារថ្មីរួចរាល់”។ លោកបានមានប្រសាសន៍ថា បុគ្គលិកព្រមព្រៀងឈប់ធ្វើការតវ៉ា។“ បុគ្គលិកទាំងអស់មានអារម្មណ៍សប្បាយរីករាយ។ ខ្ញុំគិតថា លោករដ្ឋមន្ត្រីអាចធ្វើបាន”។
លោកវេជ្ជបណ្ឌិត នេត សុវីរៈ ប្រធានមន្ទីរពេទ្យនេះបានបញ្ជាក់ពីរឿងនេះ ប៉ុន្តែ លោកបានបដិសេធមិនប្រាប់ថា ត្រូវចាកចេញពីអគារបច្ចុប្បន្ននៅពេលណានោះទេ ហើយលោកបានមានប្រសាសន៍ថា លោក ម៉ម ប៊ុនហេង មិនបានប្រាប់ពីពេលវេលាច្បស់លាស់ឡើយ។ លោកបានមានប្រសាសន៍ថា “ ផ្អែកតាមប្រសាសន៍របស់រដ្ឋមន្ត្រី យើងនឹងប្រើទីតាំងនេះដើម្បីសាងសង់អគារពីរទៀត។ ខ្ញុំមិនដឹងថា អគារចាស់នោះនឹងត្រូវទុកសម្រាប់ធ្វើអ្វីទេ ប៉ុន្តែ យើងត្រូវការសាងសង់អគារពីរទៀត”។
ប្រធានផ្នែកវះកាត់នៅមន្ទីរពេទ្យនេះដែលគ្រាន់តែប្រាប់ថា គាត់ឈ្មោះ វុទ្ធី ដោយសារលោកខ្លាចមានការស្តីបន្ទោសចំពោះ ការនិយាយជាមួយប្រព័ន្ធផ្សព្វផ្សាយនោះ បារម្ភខ្លាចលោករដ្ឋមន្ត្រីមិនអាចធ្វើបាន ប៉ុន្តែ បានមានប្រសាសន៍ថា លោកឈប់ធ្វើការតវ៉ាសិននៅពេលនេះ។ លោកបានមានប្រសាសន៍ថា “ យើងបានផ្អាកធ្វើកូដកម្មមួយរយៈសិន ហើយយើងនឹងរង់ចាំដំណោះស្រាយ។ ខ្ញុំនឹងមិនចាកចេញពីអគារចាស់ទេរហូតដល់ខ្ញុំដឹងថា អគារថ្មីកម្ពស់ប្រាំជាន់ត្រូវបានសាងសង់រួចរាល់”។
លោក ពុធ ចិត្ថាវណ្ណ វេជ្ជបណ្ឌិតផ្នែកកុមារនៅមន្ទីរពេទ្យនេះបានមានប្រសាសន៍ថា អគារថ្មីមួយដែលកំពុងសាងសង់នោះតូចពេក និងខ្វះបន្ទប់ទឹក ហើយលោកជឿជាក់តែ៤០ទៅ៥០ភាគរយប៉ុណ្ណោះថា អាចសាងសង់អគារពីរទៀតបាន។ លោកបានមានប្រសាសន៍ថា លោកក៏មានការខកចិត្តចំពោះលោករដ្ឋមន្ត្រីផងដែរដោយសារមិនបានឆ្លើយច្បាស់លាស់នៅពេលបុគ្គលិកសួរសំណួរចំៗអំពីព័ត៌មានពាក់ព័ន្ធនឹងការដោះដូរដីនេះ។ លោកបានមានប្រសាសន៍ថា “ យើងសោកស្តាយដែលលោករដ្ឋមន្ត្រីលាក់បាំងព័ត៌មានអំពីការដោះដូរមន្ទីរពេទ្យនេះ។ គ្មានបុគ្គលិកណាម្នាក់ដឹងថា ក្រុមហ៊ុនណាទិញដីចាស់នេះទេ”។
លោក សុខ សុគន្ធ ប្រធានមន្ទីរសុខាភិបាលរាជធានីភ្នំពេញបានអះអាងកាលពីថ្ងៃអង្គារថា លោកមិនចាំឈ្មោះក្រុមហ៊ុនឯកជនដែលកាន់កាប់អគារមន្ទីរពេទ្យបច្ចុប្បន្នជាថ្នូរនឹងការសាងសង់អគារថ្មីនេះទេ ហើយគេមិនអាចទាក់ទងលោកបានទេកាលពីម្សិលមិញ។
ប្រធានផ្នែកសាងសង់នៅក្នុងក្រុមហ៊ុន Angkor International Development ដែលគ្រាន់តែប្រាប់ថា គាត់ឈ្មោះ សារ៉ាត់ បានបញ្ជាក់ថា ក្រុមហ៊ុនរបស់គាត់កំពុងសាងសង់អគារមន្ទីរពេទ្យថ្មីនេះ ប៉ុន្តែ ក៏បាននិយាយដែរថា គាត់មិនដឹងថា នរណាជួលក្រុមហ៊ុនគាត់ឲ្យសាងសង់អគារថ្មីនេះទេ៕គឹមហឿន
(រាយការណ៍បន្ថែមដោយ ឃី សុវុឌ្ឍី)
អ្នកជំនាញលើកឡើងថា កូដកម្មរបស់កម្មករជារឿងត្រឹមត្រូវ តែការបង្ក្រាបមិនត្រឹមត្រូវឡើយ
របាយការណ៍ថ្មីមួយរបស់សាស្ត្រាចារ្យអន្តរជាតិមួយក្រុម និងអ្នកជំនាញការងារបានរកឃើញថា ការទាមទារដំឡើងប្រាក់ខែគោល១៦០ដុល្លាររបស់កម្មកររោងចក្រកាត់ដេរគឺជារឿងត្រឹមត្រូវ និងគួរឲ្យគោរព។
អ្នកសរសេររបាយការណ៍នោះរួមមានក្រុមមួយមកពីមហាវិទ្យាល័យសិក្សាពីតំបន់បូព៌ា និងអាហ្វ្រិក នៅសាកលវិទ្យាល័យឡុងដុង សហជីពកូរ៉េខាងត្បូង និងហ្វីលីពីន និងមជ្ឈមណ្ឌលធនធានឃ្លាំមើលអាស៊ី (Asia Monitor Resource Center) ក្នុងទីក្រុងហុងកុង បានធ្វើដំណើរមកកាន់ប្រទេសកម្ពុជាដើម្បីជួបសំណេះសំណាលជាមួយកម្មករនិងសកម្មជនសហជីពបន្ទាប់ពីមានការបង្ក្រាបរបស់រដ្ឋាភិបាលទៅលើកូដកម្មរបស់កម្មកររោចក្រកាត់ដេរកាលពីអំឡុងខែមករា ដែលបានបណ្ដាលឲ្យកម្មករប្រាំនាក់ស្លាប់ និងរងរបួសជាច្រើននាក់ទៀត។
របាយការណ៍៥២ទំព័រ ដែលនឹងត្រូវចេញផ្សាយជាផ្លូវការនៅថ្ងៃព្រហស្បតិ៍ ក្នុងទីក្រុងហុងកុងនោះមានខ្លឹមសារថា “ ការទាមទារដំឡើងប្រាក់ខែគោល១៦០ដុល្លាររបស់កម្មកររោងចក្រកាត់ដេរកម្ពុជា គឺត្រឹមត្រូវនិងសមហេតុផល ពីព្រោះប្រាក់ខែពិតប្រាកដរបស់ពួកគេមិនមានការផ្លាស់ប្ដូរឡើយ ថ្វីបើពួកគេមានការរួមចំណែកដ៏ធំដល់កំណើនសេដ្ឋកិច្ចនៅកម្ពុជាក៏ដោយ”។ របាយការណ៍នេះបានបន្តថា “ ការប្រើកម្លាំងហួសហេតុរបស់រដ្ឋាភិបាលទៅបង្ក្រាបការតវ៉ាស្របច្បាប់បង្ហាញឲ្យឃើញថា រដ្ឋាភិបាលមានការព្រួយបារម្ភចំពោះការការពារផលប្រយោជន៍ និងប្រាក់ចំណេញរបស់សមាជិកនៃសមាគមរោងចក្រកាត់ដេរនៅកម្ពុជា ច្រើនជាងការការពារសិទ្ធិរបស់កម្មករក្នុងការទាមទារប្រាក់ខែសមរម្យ ល្មមអាចរស់បាន សេរីភាពនៃការជួបជុំ និងសិទ្ធិជាមូលដ្ឋានផ្សេងៗទៀត”។
ការរកឃើញសំខាន់របស់ក្រុមអ្នកជំនាញទាំងនេះគឺថា កម្មករបានសម្រេចធ្វើការតវ៉ាផ្អែកលើបញ្ហាសំខាន់ៗចំនួនបីគឺ ប្រាក់ខែតិចតួច លក្ខខណ្ឌការងារមិនល្អ និង “ កង្វះលទ្ធិប្រជាធិបតេយ្យក្នុងការដោះស្រាយកង្វល់របស់កម្មករ”។
ក្រុមដែលបានធ្វើការស្រាវជ្រាវលើកឡើងថា គោលបំណងរបស់ខ្លួនគឺដើម្បីស្វែងយល់ពីទស្សនរបស់កម្មកររោងចក្រកាត់ដេរ...
រកឃើញប្រាសាទបុរាណមុនសម័យអង្គរចំនួនប្រាំពីរនៅលើដីសម្បទានក្នុងខេត្តព្រះវិហារ
ប្រាសាទបុរាណមុនសម័យអង្គរចំនួនប្រាំពីរត្រូវបានរកឃើញនៅលើដីសម្បទានពីរកន្លែងក្នុងខេត្តព្រះវិហារ ប៉ុន្តែខណៈពេលដែលមន្ត្រីក្រសួងបរិស្ថានមួយរូបលើកឡើងកាលពីម្សិលមិញថា ក្រសួងមិនបានដឹងពីប្រាសាទទាំងនេះនៅពេលពួកគេផ្ដល់ដីសម្បទានទាំងនេះនោះ ក្រសួងវប្បធម៌និងវិចិត្រសិល្បៈបាននិយាយថា គេដឹងថា មានប្រាសាទទាំងនេះជាយូរមកហើយ។
បន្ទាប់ពីមានសេចក្ដីរាយការណ៍ថា ក្រុមហ៊ុន Cambodia Blue Heaven Ltd. និងក្រុមហ៊ុន Cambodia Down Plantation Ltd. ដែលក្នុងម្នាក់ៗមានដីសម្បទានប្រហែល១០.០០០ហិកតាបានធ្វើឲ្យខូចខាតប្រាសាទទាំងនេះ ក្រសួងទាំងពីរបានបញ្ជូនគណៈប្រតិភូមួយក្រុមទៅកាន់ទីតាំងប្រាសាទទាំងនោះដែលស្ថិតនៅក្នុងស្រុកគូលែន និងស្រុកជាំក្សាន្ត កាលពីសប្ដាហ៍មុន ដើម្បីពិនិត្យមើល។
លោក ផាន់ ណាឌី អនុប្រធាននាយកដ្ឋានបេតិកភណ្ឌវប្បធម៌នៃក្រសួងវប្បធម៌ និងវិចិត្រសិល្បៈបានមានប្រសាសន៍កាលពីម្សិលមិញថា “យើងបានឮថា ក្រុមហ៊ុនទាំងនេះទន្ទ្រានចូលដីជុំវិញប្រាសាទ ហើយយើងក៏បានចុះទៅបញ្ជាក់ថា តើរឿងនេះជាការពិតឬយ៉ាងណា”។...
សាជីវកម្មហិរញ្ញវត្តុអន្តរជាតិទទួលពាក្យបណ្តឹងរឿងគម្រោងវិនិយោគចម្ការកៅស៊ូនៅរតនគិរី
មន្ត្រីទទួលបន្ទុកអង្កេតបណ្តឹងប្រជាជនរបស់សាជីវកម្មហិរញ្ញវត្ថុអន្តរជាតិ(Internation- al Finance Corporation) ហៅកាត់ថា IFC បានយល់ព្រមទទួលពាក្យបណ្តឹងមួយជាផ្លូវការពីគ្រួសារប្រជាជនជនជាតិដើមភាគតិចក្នុងខេត្តរតនគិរី ដែលប្តឹងសាជីវកម្មហិរញ្ញវត្ថុអន្តរជាតិ រឿងបោះទុនវិនិយោគក្នុងចម្ការកៅស៊ូដែលត្រូវបានចោទប្រកាន់ថា បានលួចយកដី និងទន្ទ្រានព្រៃឈើ។
នៅក្នុងលិខិតមួយច្បាប់ដែលត្រូវបានផ្ញើជូនក្រុមគ្រួសារប្រជាជនទាំងនេះកាលពីថ្ងៃច័ន្ទ មន្ត្រីទទួលបន្ទុកអង្កេតបណ្តឹងប្រជាជនយល់ឃើញថា ពាក្យបណ្តឹងរបស់ពួកគាត់ថា មានភាពសមស្របសម្រាប់អង្គភាពអង្កេតឯករាជ្យរបស់សាជីវកម្មហិរញ្ញវត្ថុអន្តរជាតិដាក់ចេញនូវប្រតិបត្តិការបន្តទៀត និងអាចជួយឲ្យពួកគាត់អាចស្នើឲ្យមន្ត្រីទទួល បន្ទុកអង្កេតបណ្តឹងប្រជាជនត្រួតពិនិត្យគម្រោងវិនិយោគនេះ ឬក៏ជួយសម្របសម្រួលក្នុងការរកដំណោះស្រាយ។
ប្រជាជនជាច្រើនគ្រួសារមកពីសហគមន៍ផ្សេងគ្នាចំនួន១៧បានដាក់ពាក្យបណ្តឹងកាលពីថ្ងៃទី១០ ខែកុម្ភៈ ដោយចោទប្រកាន់សាជីវកម្មហិរញ្ញវត្ថុអន្តរជាតិ ដែលជាសេនាធិការវិនិយោគឯកជនរបស់ធនាគារពិភពលោក (World Bank) ហៅកាត់ WB ថា បានរំលោភគោលការណ៍ការពារសុវត្ថិភាពរបស់ខ្លួន ដោយបានបោះទុនវិនិយោគនៅក្នុងក្រុមហ៊ុនវៀតណាមមួយ ឈ្មោះ ហ័ង អាញ់ ហ្គៀ ឡៃ (Hoang Anh Gia Lai) ហៅកាត់ថា HAGL ដែលធ្វើប្រតិបត្តិការលើចម្ការកៅស៊ូមួយចំនួននៅក្នុងខេត្តរតនគិរី ក្រោមការរិះគន់ថាបានរំលោភបំពានច្បាប់ក្នុងស្រុកជាច្រើន។ គ្រួសារប្រជាជនទាំងនេះបានលើកឡើងក្នុងពាក្យបណ្តឹងរបស់ខ្លួនថា ពួកគាត់ចង់ឲ្យក្រុមហ៊ុនប្រគល់ដីដែលក្រុមហ៊ុនយកពីពួកគាត់ឲ្យពួកគាត់វិញ។
យោងតាមអង្គការក្រៅរដ្ឋាភិបាលនានាដែលជួយគ្រួសារប្រជាជនទាំងនេះបានឲ្យដឹងផងដែរថា សាជីវកម្មហិរញ្ញវត្ថុអន្តរជាតិ បានបោះទុនវិនិយោគទឹកប្រាក់ចំនួន២៧លានដុល្លារនៅក្នុងមូលនិធិភាគហ៊ុនមួយឈ្មោះ ដ្រាក់ហ្គុន ខេបភិថល (Dragon Capital) ដែលកាន់កាប់ភាគហ៊ុន៥,៥ភាគរយនៅក្នុងក្រុមហ៊ុន HAGL ។ នៅពេលនេះ បន្ទាប់ពីសាជីវកម្មនេះព្រមទទួលពាក្យបណ្តឹងរបស់ប្រជាជន ការិយាល័យមន្ត្រីទទួលបន្ទុកអង្កេតបណ្តឹងប្រជាជនរបស់ខ្លួន នឹងធ្វើរបាយការណ៍មួយដែលនឹងបញ្ជាក់អំពីវិវាទនេះ ក្នុងរយៈពេល១២០ថ្ងៃខាងមុខ ដើម្បីឲ្យភាគីទាំងអស់ដឹងអំពីបញ្ហានេះ ហើយបន្ទាប់នោះនឹងជួយគ្រួសារប្រជាជនជនជាតិដើមភាគតិច ឲ្យសម្រេចនូវអ្វីដែល ពួកគេចង់ឲ្យមន្ត្រីទទួលបន្ទុកអង្កេតបណ្តឹងប្រជាជន ធ្វើនៅពេលបន្ទាប់។
លោក ដេរីត ប្រេត (David Pred) ធ្វើការនៅអង្គការក្រៅរដ្ឋាភិបាលមួយដែលមានឈ្មោះថា អង្គការអភិវឌ្ឍន៍ដើម្បីទាំងអស់គ្នាអន្តរជាតិ (Inclusive Development International) ដែលបានជួយគ្រួសារប្រជាជនទាំងនេះរៀប ធ្វើពាក្យបណ្តឹង បានលើកឡើងថា ប្រជាជន ទាំងនោះបានស្នើឲ្យមន្ត្រីទទួលបន្ទុកអង្កេតបណ្តឹងប្រជាជន អនុវត្តប្រតិបត្តិការត្រួតពិនិត្យលើដំណើរអនុវត្តគោលការណ៍ការពារសុវត្ថិភាពរបស់សាជីវកម្មហិរញ្ញវត្ថុអន្តរជាតិ ឬស្វែងរកដំណោះស្រាយមួយជាមួយសាជីវកម្មហិរញ្ញវត្ថុអន្តរជាតិ មូលនិធិ ដ្រាក់ហ្គុន ខេបភីថល និងក្រុមហ៊ុន HAGL។ លោក ដេវីត ប្រេត បានមានប្រសាសន៍ថា “សេចក្តីសម្រេចនេះនឹងអាស្រ័យទៅលើឆន្ទៈរបស់សាជីវកម្មហិរញ្ញវត្ថុអន្តរជាតិ មូលនិធិដ្រាក់ហ្គុន ខេបភីថល និងក្រុមហ៊ុន HAGL ក្នុងការអនុវត្តកិច្ចសហប្រតិបត្តិការក្នុងដំណើរការសម្របសម្រួលមួយ ក្នុងស្មារតីជឿជាក់ពិតប្រាកដ ដើម្បីដោះស្រាយបញ្ហាផលប៉ះពាល់ដែលត្រូវបានបង្កឡើងដោយសារគម្រោងវិនិយោគរបស់ពួកគេ”។
សាជីវកម្មហិរញ្ញវត្ថុអន្តរជាតិ បានលើកឡើងក្នុងន័យការពារគម្រោងវិនិយោគរបស់ខ្លួននៅក្នុងមូលនិធិដ្រាក់ហ្គុន ខេបភីថល ថា វាជាវិធីដ៏ប្រសើរបំផុតរបស់ខ្លួន ក្នុងការរកប្រាក់ឲ្យបានច្រើនបំផុត ក៏ប៉ុន្តែ បានបដិសេធមិនធ្វើសេចក្តីអត្ថាធិប្បាយទាក់ទងទៅនឹងពាក្យបណ្តឹងរបស់ខ្លួនឡើយ។
ក្រុមហ៊ុន HAGL បានបញ្ជាក់ឲ្យដឹងថា ចម្ការរបស់ខ្លួននៅក្នុងព្រះរាជាណាចក្រកម្ពុជា អនុវត្តតាមច្បាប់ក្នុងស្រុកទាំងអស់។
លោក ប្រេត បានលើកឡើងបន្ថែមទៀត ថា គ្រួសារប្រជាជនទាំងនេះនឹងអាចស្នើឲ្យមន្ត្រីទទួលបន្ទុកអង្កេតបណ្តឹងប្រជាជនរបស់សាជីវកម្មហិរញ្ញវត្ថុអន្តរជាតិ អនុវត្តប្រតិបត្តិការត្រួតពិនិត្យមួយនៅពេលណាក៏បាន ប្រសិន បើដំណើរការសម្របសម្រួលទទួលបរាជ័យ ក៏ប៉ុន្តែ លោក ប្រេត បានលើកឡើងបន្តទៀតថា បរាជ័យនេះអាចជាចំណុចអវិជ្ជមានមួយផ្សេងទៀត ដែលបង្កផលប៉ះពាល់ទៅលើមុខមាត់របស់សាជីវកម្មហិរញ្ញវត្ថុអន្តរជាតិនិងទំនងជាបណ្តាលឲ្យសមាជិកភាគហ៊ុនធំៗដកភាគហ៊ុនរបស់ខ្លួនចេញពីមូលនិធិ ដ្រាក់ហ្គុន និងក្រុមហ៊ុន HAGL”។
លោក សុល នឿយ ដែលជាកសិករម្នាក់ក្នុងចំណោមកសិករដែលរងប៉ះពាល់ដោយសារគម្រោងនេះ បានលើកឡើងថា លោកចង់ឲ្យមានការចរចាគ្នា។ លោក សុល នឿយ បានមានប្រសាសន៍ថា “ យើងចង់ឲ្យសាជីវកម្មហិរញ្ញវត្ថុអន្តរជាតិ មកចរចាជាមួយក្រុមហ៊ុនដើម្បីស្វែងរកដំណោះស្រាយឲ្យប្រជាជន ដែលរងផលប៉ះពាល់។ ខ្ញុំសង្ឃឹមថា សាជីវកម្មហិរញ្ញវត្ថុអន្តរជាតិប្រហែលជាអាចជួយពួកយើងបាន ក៏ប៉ុន្តែ ប្រសិនបើជាពួកគេមិនចង់ស្វែងរកយុត្តិធម៌ឲ្យប្រជាជនដែលមានជម្លោះជាមួយនឹងក្រុមហ៊ុននេះទេ យើងគ្មានកន្លែងទៅទេ ព្រោះយើងគ្មានដីផ្សេងទៀត៕សុធា
(រាយការណ៍បន្ថែមដោយ អូន ភាព)
អភិបាលរាជធានីភ្នំពេញប្រាប់ឲ្យមន្ត្រីក្រោមឱវាទរបស់ខ្លួនជួលជុលការថ្នាំងថ្នាក់របស់ប្រជាជន
កាលពីម្សិលមិញអភិបាលរាជធានីភ្នំពេញបានប្រាប់ឲ្យមន្ត្រីសាលារាជធានីបញ្ឈប់អំពើពុករលួយ ហើយខិតខំធ្វើការឲ្យបានខ្លាំងជាងមុនដើម្បីផ្តល់សេវាសាធារណៈក្នុងគោលបំណងស្តារទំនុកចិត្តក្នុងចំណោមប្រជាពលរដ្ឋដែលមានការថ្នាំងថ្នាក់យ៉ាងខ្លាំងជាមួយគណបក្សកាន់អំណាច ដោយពួកគាត់បាននាំគ្នាបោះឆ្នោតគាំទ្រគណបក្សសង្គ្រោះជាតិនៅក្នុងការបោះឆ្នោតជាតិកាលពីឆ្នាំមុន។
ថ្លែងទៅកាន់មន្ត្រីជាង៤០០នាក់រួមមាននគរបាលនិងកងរាជអាវុធហត្ថដែលបានចូលរួមនៅក្នុងសន្និសីទប្រចាំឆ្នាំនៅឯសាលារាជធានីភ្នំពេញកាលពីថ្ងៃច័ន្ទ លោក ប៉ា សុជាតិវង្ស អភិបាលរាជធានីភ្នំពេញ បានស្តីបន្ទោសអាជ្ញាធរមូលដ្ឋានថា បានធ្វើឲ្យពលរដ្ឋបាត់បង់ជំនឿចិត្តលើគណបក្សកាន់អំណាច ជាពិសេសលោកនាយករដ្ឋមន្ត្រី ហ៊ុន សែន ដោយបានធ្វើឲ្យគណបក្សប្រជាជនកម្ពុជាបាត់បង់ការគាំទ្រយ៉ាងច្រើនបំផុតចាប់តាំងពីឆ្នាំ១៩៩៨មកនៅក្នុងការបោះឆ្នោតជាតិដែលធ្វើឡើងអំឡុងខែកក្កដា។
លោក ប៉ា សុជាតិវង្ស បានមានប្រសាសន៍ដោយជំរុញឲ្យមន្ត្រីរបស់លោកខិតខំធ្វើការឲ្យបានខ្លាំងជាងមុន និងធ្វើឲ្យកិច្ចការរបស់រដ្ឋាភិបាលកាន់តែមានតម្លាភាពថា “ ខ្ញុំដឹងពីអារម្មណ៍របស់មេដឹកនាំ ជាពិសេសសម្តេច តេជោ ។ លោកបានខិតខំធ្វើការដោយហ៊ានពលីជីវិតរបស់លោក លោកមិនដែលណែនាំឲ្យយើងធ្វើអាក្រក់ឬប្រព្រឹត្តខុសឡើយ”។ លោក ប៉ា សុជាតិវង្ស បានគូសបញ្ជាក់ថា លោកនាយករដ្ឋមន្ត្រី ហ៊ុន សែន បានជំរុញឲ្យលោកខិតខំធ្វើការឲ្យបានខ្លាំងជាងមុននិងប្រកបដោយក្រមសីលធម៌ខ្ពស់នៅក្នុងការផ្តល់សេវាសាធារណៈដល់ប្រជាជនរស់នៅក្នុងរាជធានី ដើម្បីស្តារការគាំទ្រនិងកសាងទំនុកចិត្តក្នុងចំណោមពលរដ្ឋដែលលោកបានមានប្រសាសន៍ថា មិនពេញចិត្តនឹងរដ្ឋាភិបាលសព្វថ្ងៃ។ លោក ប៉ា សុជាតិវង្ស បានរំឭកឡើងវិញនូវការណែនាំ របស់លោកនាយករដ្ឋមន្ត្រី ហ៊ុន សែន ដែលបានប្រើឃ្លាមួយថា“ ជួសជុលការថ្នាំងថ្នាក់របស់ប្រជាជន”។ ដោយប្រៀបធៀបការធ្វើខុសរបស់មន្ត្រីទៅនឹងរថយន្តខុសមួយគ្រឿង លោក ប៉ា សុជាតិវង្ស បានដាក់ចេញនូវយុទ្ធសាស្ត្រកំណែទម្រង់មួយរបស់លោក។
លោកបានមានប្រសាសន៍ថា “ បានណែនាំខ្ញុំឲ្យប្រាប់មន្ត្រីឲ្យខិតខំធ្វើការឲ្យបានខ្លាំងជាងមុននិងប្តូរអត្តចរិតរបស់ខ្លួន។ នៅពេលយើងដឹងថា រថយន្តខូច យើងត្រូវតែយកវាចូលយានដ្ឋានដើម្បីជួសជុល។យើងមានបេសកកម្មពិសេសថ្មីដើម្បីលុបបំបាត់ការថ្នាំងថ្នាក់ក្នុងចំណោមពលរដ្ឋរបស់យើង”។ លោកបានលើកឡើងបន្តថា ហេតុដូច្នេះហើយដាច់ខាតមិនត្រូវប្រព្រឹត្តអំពើពុករលួយឡើយ ត្រូវទប់ស្កាត់សំណង់ខុសច្បាប់ ត្រូវកាត់បន្ថយការគ្រោះថ្នាក់ចរាចរណ៍ហើយត្រូវចាត់វិធានការចំពោះបទល្មើសនិងបទឧក្រិដ្ឋដែលកើតឡើងញឹកញាប់នៅក្នុងរាជធានីភ្នំពេញ ដូចជាអំពើប្លន់ ការប្រើប្រាស់គ្រឿងញៀន និងការលេងល្បែងស៊ីសងជាដើម៕ ស៊ុយឈាង
Latest news
© 2021, ដេលី. All rights reserved.