កាលពីម្សិលមិញ លោក ខៀវ កាញារីទ្ធ រដ្ឋមន្ត្រីក្រសួងព័ត៌មានបានលាតត្រដាងផែនការបំបែកស្ថានីយទូរទស្សន៍ជាតិកម្ពុជាជាបីស្ថានីយដាច់ដោយឡែកពីគ្នា ប៉ុន្តែបានគូសបញ្ជាក់ជាថ្មីថា គ្មានហ្វ្រេកង់ទំនេរសម្រាប់លោក ម៉ម សូណង់ដូ ម្ចាស់ស្ថានីយវិទ្យុសម្បុកឃ្មុំ ដែលជាស្ថានីយវិទ្យុឯករាជ្យទេ។
លោក ម៉ម សូណង់ដូ បានស្នើសុំអាជ្ញាប័ណ្ណបង្កើតស្ថានីយទូរទស្សន៍ម្ដងហើយម្ដងទៀតជាច្រើនលើកច្រើនសាក្នុងរយៈពេលប៉ុន្មានឆ្នាំមកនេះ ប៉ុន្តែលើកណាក៏ត្រូវគេច្រានចោលដែរ ដោយលើកហេតុផលថា ខ្វះហ្វ្រេកង់។ លោកបានដាក់សំណើចុងក្រោយកាលពីថ្ងៃទី១០ ខែកុម្ភៈ។
លោក ខៀវ កាញារីទ្ធ បានបញ្ជាក់អះអាងនៅខាងក្រៅសន្និបាតបូកសរុបការងារប្រចាំឆ្នាំរបស់ក្រសួងព័ត៌មានកាលពីម្សិលមិញថា “ពេលនេះយើងគ្មានស្ថានីយទូរទស្សន៍ផ្ដល់ឲ្យទេ ពីព្រោះគ្មានហ្វ្រេកង់”។ លោកថ្លែងបន្ថែមទៀតថា “រឿងសំខាន់នៅពេលនេះគឺថា យើងប្រើប្រព័ន្ធ [ផ្សព្វផ្សាយ] ឌីជីថល។ ទូរទស្សន៍ជាតិនឹងត្រូវបំបែកជាបីប៉ុស្ដិ៍ ពីព្រោះវាមានកម្មវិធីច្រើនពេក។ នឹងមានប៉ុស្ដិ៍សម្រាប់កម្មវិធីនយោបាយ កម្មវិធីកម្សាន្ត និងអប់រំ ឬព័ត៌មានទូទៅ”។
លោក ម៉ម សូណង់ដូ បានមានប្រសាសន៍តាមទូរស័ព្ទថា លោកមិនយល់ពីលោក ខៀវ កាញារីទ្ធ ដែលបដិសេធមិនផ្ដល់អាជ្ញាប័ណ្ណដល់លោក ស្របពេលអនុញ្ញាតឲ្យបង្កើតស្ថានីយទូរទស្សន៍ផ្សេងៗទៀតនោះទេ។ លោក ម៉ម សូណង់ដូ បានមានប្រសាសន៍បន្ថែមទៀតថា “គាត់និយាយគ្មានហេតុផល។ ហេតុអ្វីបានជាខាងគាត់ផ្ដល់ហ្វ្រេកង់ឲ្យបង្កើតស្ថានីយទូរទស្សន៍និងវិទ្យុបាន? ខ្ញុំបានស្នើសុំរឿងនេះតាំងពីឆ្នាំ២០០៥មកម៉្លេះ។ ខ្ញុំនឹងរង់ចាំមួយសប្ដាហ៍ទៀត ហើយប្រសិនបើខ្ញុំមិនទទួលបានការឆ្លើយតបពីក្រសួង [ពាក់ព័ន្ធនឹងសំណើសុំអាជ្ញាប័ណ្ណចុងក្រោយនេះ] ទេ ខ្ញុំនឹងធ្វើការតវ៉ានៅខាងមុខក្រសួងព័ត៌មាន”។
ការតវ៉ាលើកចុងក្រោយរបស់លោក ម៉ម សូណង់ដូ នៅខាងមុខក្រសួងនេះកាលពីខែមករា ត្រូវបានបង្ក្រាបដោយកម្លាំងកងរាជអាវុធហត្ថប្រដាប់ដោយដំបង និងគ្រាប់បែកផ្សែង។លោក យ៉ែម បុញ្ញប្ញទ្ធិ អ្នកនាំពាក្យគណបក្សសង្គ្រោះជាតិ ដែលបានស្នើសុំអាជ្ញាប័ណ្ណបង្កើតស្ថានីយទូរទស្សន៍ផ្ទាល់ខ្លួនដើម្បីប្រកួតប្រជែងជាមួយស្ថានីយទូរទស្សន៍ជាច្រើននាពេលបច្ចុប្បន្ន ដែលសុទ្ធតែគាំទ្រគណបក្សប្រជាជនកម្ពុជារបស់លោកនាយករដ្ឋមន្ត្រី ហ៊ុន សែន នោះ ក៏បានចោទសួរពីសច្ចភាពនៃការបញ្ជាក់អះអាងរបស់លោក ខៀវ កាញារីទ្ធ ដែរពាក់ព័ន្ធនឹងហ្វ្រេកង់នេះ។ លោកបានមានប្រសាសន៍បន្ថែមទៀតថា “យើងចង់ឲ្យក្រុមបច្ចេកទេសពិនិត្យមើលថា តើពិតជាគ្មានហ្វ្រេកង់មែនឬយ៉ាងណា។ យើងមើលឃើញថា មានហ្វ្រេកង់ជាច្រើនសម្រាប់អ្នកមួយចំនួនដែលស្នើសុំបង្កើតស្ថានីយទូរទស្សន៍និងវិទ្យុ”។
ឯកសាររបស់រដ្ឋាភិបាលបង្ហាញថា ក្រសួងព័ត៌មានបានផ្ដល់អាជ្ញាប័ណ្ណដល់ស្ថានីយទូរទស្សន៍ថ្មីយ៉ាងហោចណាស់ចំនួនបីចាប់តាំងពីឆ្នាំ២០១១មក។ ស្ថានីយទូរទស្សន៍ទាំងនោះរួមមានទាំងបណ្ដាញព័ត៌មានកម្ពុជា CNC របស់លោក គិត ម៉េង ប្រធានក្រុមហ៊ុនរ៉ូយាល់គ្រុប ដែលមានទំនាក់ទំនងជិតស្និទ្ធជាមួយលោកនាយករដ្ឋមន្ត្រី ហ៊ុន សែន និងស្ថានីយទូរទស្សន៍ BTV របស់លោកស្រី ហ៊ុន ម៉ាណា ដែលត្រូវជាកូនស្រីបង្កើតរបស់លោកនាយករដ្ឋមន្ត្រីផងដែរ៕ សុខុម