កាលពីម្សិលមិញ សាលាដំបូងរាជធានីភ្នំពេញបានចាប់ផ្តើមបើកសវនាការជំនុំជម្រះរឿងក្តីបុរសពីរនាក់ដែលជាប់ពាក់ព័ន្ធអំពើមនុស្សឃាតដ៏សាហាវដោយគិតទុកជាមុន ហើយបន្ទាប់មកបានប្លន់យករបស់របរស្ត្រីវ័យក្មេងទាំងពីរ កាលពីឆ្នាំមុន។
ហ៊ុល សំណាង អាយុ១៦ឆ្នាំ និង ផុន សារុំ អាយុ២៨ឆ្នាំត្រូវបានចាប់ខ្លួនកាលពីខែសីហា បន្ទាប់ពី ចប ស្រីលក្ខណ៍ អាយុ១៩ឆ្នាំ និង វ៉ន លក្ខិណា អាយុ២១ឆ្នាំត្រូវបានគេប្រទះឃើញចងជាប់គ្នា និងរឹតកសម្លាប់ នៅក្នុងខណ្ឌពោធិ៍សែនជ័យ។
ស្ត្រីវ័យក្មេងពីរនាក់នេះដែលបានកាន់លុយ១.៣០០ដុល្លារទៅបង់ថ្លៃសាលានោះត្រូវបានប្លន់យកប្រាក់នោះ គ្រឿងអលង្ការ និងម៉ូតូរបស់ពួកគេទៀត។
លោកស្រី គឹម ដានី ចៅក្រមប្រធានក្រុមប្រឹក្សាជំនុំជម្រះបានមានប្រសាសន៍ថា“ ហ៊ុល សំណាង ត្រូវបានចោទប្រកាន់ពីបទមនុស្សឃាតគិតទុកជាមុន ហើយ ផុន សារុំ ត្រូវបានចោទប្រកាន់ពីបទទទួលផលចោរកម្ម”។
ហ៊ុល សំណាង បានបដិសេធថា ខ្លួនមិនបានសម្លាប់ស្ត្រីទាំងពីរនាក់នោះទេ ដោយនិយាយថា “ យើងជាមិត្តរួមថ្នាក់នឹងគ្នា…។ ខ្ញុំមិនបានសម្លាប់ជនរងគ្រោះទេ” ។
លោក មាស ចាន់ពិសិដ្ឋ ព្រះរាជអាជ្ញារងអមសាលាដំបូងរាជធានីបានស្នើឲ្យចៅក្រមលើកលែងការចោទប្រកាន់ដល់ ផុន សារុំ ពីបទទទួលផលចោរកម្ម ដែលលោកបានមានប្រសាសន៍ថា គ្រាន់តែបានទិញម៉ូតូដែលគេបានលួចពីស្ត្រីរងគ្រោះទាំងពីរតែប៉ុណ្ណោះ ប៉ុន្តែ មិនបានដឹងអំពីអំពើមនុស្ស ឃាតនោះទេ។
ស្រីជាម្តាយរបស់ ចប ស្រីលក្ខណ៍ បានស្រក់ទឹកភ្នែក បន្ទាប់ពីការបើកសវនាការ។ អ្នកស្រីបាននិយាយថា “ ហេតុអ្វីបានជាពួកគេសម្លាប់កូនស្រីជាទីស្រឡាញ់តែម្នាក់គត់របស់ខ្ញុំ? ខ្ញុំចង់បានសំណងជាប្រាក់ចំនួន១០.០០០ដុល្លារ និងចង់ឲ្យតុលាការផ្តន្ទាទោសឃាតកររូបនេះដាក់ពន្ធនាគារអស់មួយជីវិត។ តុលាការនឹងប្រកាសសាលក្រមនៅថ្ងៃ ទី៤ ខែមីនា៕សារុន